मन की बात
प्रधानमंत्री नरेन्द्र मोदी ह लोगन ले अपील करीन हे कि ओमन तिहार के बेरा म बाजार-हाट ले खरीददारी करत बेरा स्थानीय उत्पाद ल प्राथमिकता देवय। आकाशवाणी ले प्रसारित मन की बात कारीकरम म बोलत श्री मोदी जम्मों झन ले किहीन कि वोकल फाॅर लोकल के संकलप ल ध्यान म राखय। ओमन किहीन कि जब हम तिहार के तियारी करथन त सबले पहिली मन म इही आथे कि का-का बिसाना हे। लइका मन बिसेस रूप ले उछाह रहिथे। फेर एसो जब भी कुछु बिसाय बर जावव त बिसावत बेरा स्थानीय उत्पाद ल लेवव।
प्रधानमंत्री ह किहीन कि भारत के अध्यातम योग अउ आयुर्वेद असन कतकोन राष्ट्रीय खेल ह दुनिया के लोगन ल अचरज म डारत हे। ओमन बतईन कि हमर मलखंभ कतकोन देस म प्रचलित हवय। ओमन युवा पीढ़ी ले किहीन कि मलखंभ के जानकारी लेवव अउ देस के परंपरागत युद्ध कला ल जानय-सीखय। श्री मोदी ह तिहार के बेरा जम्मों झन ले मास्क पहिरे, साबुन ले हाथ धोय अउ दू गज के दूरी राखे के सुझाव ल दोहराईन।
प्रधानमंत्री ह किहीन कि तिहार के दउरान हमन ल तालाबंदी के बेरा ल सुरता राखना चाही। संगेसंग बहादुर सैनिक मन ल सुरता राखे के बात किहीन, जउन सीमा म देस के रक्षा करत हे। प्रधानमंत्री ह किहीन कि इकतीस अक्टूबर के सरदार वल्लभ भाई पटेल के जयंती मनाय जाही। ए दिन ल राष्ट्रीय एकता के रूप म मनाय जाथे। प्रधानमंत्री ह पूर्व प्रधानमंत्री इंदिरा गांधी ल घलो सुरता करीन, जिखर पुण्यतिथि इकतीस अक्टूबर के हवय।
स्वास्थ्य मंत्री-कोविड वैक्सीन
केन्द्रीय स्वास्थ्य मंत्री डाॅक्टर हर्षवर्धन ह ए भरोसा जताईन हे कि कोविड वैक्सीन देस म अवइया बछर जनवरी तक मिल जही। दूरदर्शन समाचार के एक ठिन कारीकरम म ओमन किहीन कि देस म तीन वैक्सीन उपर परीक्षण चलत हे। डाॅक्टर हर्षवर्धन ह तिहार ल देखत लोगन ले सुरक्षा खातिर जरूरी उपाय के कड़ाई ले पालन करे के अपील करीन।
प्रधानमंत्री-सतर्कता जागरूकता
प्रधानमंत्री नरेन्द्र मोदी अवइया मंगलवार के राष्ट्रीय सतर्कता अउ भ्रष्टाचार रोधी सम्मेलन के उद्घाटन करही। ए सम्मेलन के बिसय – ‘‘सतर्क भारत, समृद्ध भारत‘‘ हवय। एखर आयोजन केन्द्रीय अन्वेषण ब्यूरो-सीबीआई ह करे हे। खबर के मुताबिक देस म सत्ताईस अक्टूबर ले दू नवंबर तक हरेक बछर सतर्कता जागरूकता सप्ताह मनाय जाथे।
शराब-कीमत
प्रदेस के सराब दुकान म तय कीमत ले जादा दर म सराब बेचे के सिकईत ग्राहक मन वाट्सऐप मोबाइल नंबर म कर सकही। एखर बर आबकारी मंत्री कवासी लखमा म आज वाट्सऐप मोबाइल नंबर नौ चार दू चार एक-शून्य दू एक शून्य दू जारी कर हे। ए सुविधा ले ग्राहक मन सराब दुकान के वीडियो बनाके ए वाट्सऐप मोबाइल नंबर म भेज सकत हे। एखर संगेसंग ए नंबर म अवैध सराब बिक्री अउ आने नसीला पदार्थ बेचे के सिकईत घलो करे जा सकत हे।
बीएसपी
देस ल आत्मनिर्भर बनाय म दुरूग जिला के भिलाई इस्पात संयंत्र अपन महत्ता के भूमिका निभावत हे। पाछु बाईस अक्टूबर के भिलाई इस्पात संयंत्र बर बड़ उछाह के बात रिहीस। ए दिन भारतीय नौ सेना म देस म बने कमोर्टा क्लास के चार युद्धपोत पनडुब्बी ल सामिल करे गीस। एमा आईएनएस कावरत्ती ल घलो सामिल करे गेहे। ए युद्धपोत ल बनाय म भिलाई इस्पात संयंत्र म बने लोहा के प्लेट लगे हे।
आकर्षि कश्यप-अपील
अंतर्राष्ट्रीय बैडमिंटन खिलाड़ी आकर्षि कश्यप ह लोगन ले कोरोना ले बचाव बर जरूरी सावधानी राखे के अपील करीन हे।
विजयादशमीं
बुराई उपर अच्छाई अउ असत्य म सत्य के जीत के प्रतीक दसेरा परब आज छत्तीसगढ़ समेत देसभर म उछाह के संग मनाय जात हे। दसेरा परब म राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह देसवासी मन ल अपन सुभकामना अउ बधाई दीन हे।
छत्तीसगढ़ के राज्यपाल अनुसुईया उइके, मुख्यमंत्री भूपेश बघेल अउ गृहमंत्री ताम्रध्वज साहू ह प्रदेस के लोगन ल दसेरा परब के सुभकामना दीन।
राजधानी रईपुर समेत प्रदेस के जम्मों जिला म दसेरा उत्सव के आयोजन करे जात हे। कोरोना संक्रमण ल देखत एसो दस फीट ले जादा ऊंचाई के पुतला दहन नइ करे जाही। उहें, ए कारीकरम म समिति के मुख्य पदाधिकारी समेत पचास ले जादा मनखे सामिल नइ होही। रईपुर के डब्ल्यू.आर.एस. काॅलोनी म काली रावण दहन के कारीकरम राखे गेहे।
इही बीच, राज्यपाल ह आज राजभवन म दसेरा के मउका म राखे गे शस्त्र पूजा म संघरीन। असइने, प्रदेस म अर्द्धसैनिक बल ह आज शस्त्र पूजन करीन। उहें, भिलाई म सीमा सुरक्षा बल के जवान अउ अधिकारी मन ह मां दुर्गा के मूर्ति के आगू शस्त्र पूजा करीन।
नवरात्र/बस्तर दशहरा
प्रदेस के देवी मंदिर मन म नवरात्र म राखे जोत-ज्वारा संग मां अम्बे के मूर्ति विसर्जन होवत हे। राजनांदगांव म जसगीत संग विसर्जन यात्रा निकाले गीस। एमा लोगन कोरोना संक्रमण ले बचाव बर जारी दिसा-निरदेस के पालन करत हे।
ऐति, कबीरधाम जिला म हर बछर असन एसो घलो चण्डी मंदिर, दंतेश्वरी अउ पमेश्वरी मंदिर ले खप्पर निकाले गीस। ए बेरा म पुलिस के चाक-चैबंद बेवस्था रिहीस। लोगन दुरिहा ले ही खप्पर के दर्सन करीन।
इही बीच, विश्व प्रसिद्ध बस्तर दशहरा के मुख्य रस्म निशाजात्रा पूजा विधान काली अधरतिहा के पूरा करे गीस। ए बेरा म बस्तर राजपरिवार के सदस्य अउ सांसद दीपक बैज मौजूद रिहीन।
मौसम
प्रदेस म अवइया चैबीस घंटा म मौसम के सूखा रेहे के संभावना हवय। मौसम विभाग ले मिले जानकारी के मुताबिक बंगाल देश के उपर एक चक्रवाती घेरा बने हे, जेखर परभाव ले प्रदेस म निम्न स्तर म नमी आवत हे।
संक्षिप्त समाचार
अउ अब थोरकुन समाचार सार म-
– राज्यपाल अनुसुईया उइके अउ मुख्यमंत्री भूपेश बघेल ह पूर्व विधायक अउ कवर्धा रियासत के राजमाता शशिप्रभा देवी के निधन म दुख जताईन हे।
– स्वास्थ्य विभाग के आयुक्त डाॅक्टर सी.आर. प्रसन्ना ह आज मुंगेली जिला के तीन ठिन विकासखंड म कोविड अस्पताल के जांच करीन। ए बेरा म ओमन मरीज मनके बने देखभाल के निरदेस दीन।
– रईपुर जिला के धरसीवां म राखे गे कृषि चैपाल कारीकरम म जैविक खेती ल बढ़ावा दे बर कलेक्टर डाॅक्टर एस. भारतीदासन ह किसान मन ल मिनी कीट बांटीन अउ जैविक फसल उत्पादन के बात किहीन।
– कोरिया जिला के तलवापारा म नवा जिला चिकित्सालय भवन बनाय बर राज्य सरकार ह तैंतीस करोड़ रूपिया के मंजूरी देहे।
– कोंडागांव जिला म चिपावंड गांव तीर एक दुपहिया गाड़ी ट्रैक्टर ले टकरा गे। ए घटना म दू झिन के मउकाच म मउत होगे।
– महासमुंद जिला के पिथौरा म एक व्यवासी के घर डकैती के प्रयास के मामला म सात झिन आरोपी ल गिरफ्तार करे गेहे। उहें, तीन झिन आरोपी फरार बताय जात हे।
अउ
– धमतरी जिला म अर्जुनी थाना के पुलिस ह एक मनखे ल गिरफ्तार करके ओखर तीर करीबन पन्द्रह किलो गांजा के संग डेढ़ लाख रूपिया नगद अउ एक ठिन मोबाइल जब्त करे हे।