मुठभेड़-जवान शहीद
नारायणपुर जिला म आज सुरक्षा बल अउ माओवादी मनके बीच होय मुठभेड़ म डिस्ट्रिक्ट रिजर्व गार्ड-डीआरजी के एक झिन जवान सहीद होगे। उहें, एक झिन आने जवान घायल होगे हे।
जानबा के मुताबिक ओरछा थाना क्षेत्र के अबूझमाड़ वाले जघा के कदेर के जंगल म माओवादी मनके होय के सूचना मिले के बाद डीआरजी के टीम ह इहां पहुंचीन। इही दउरान पहिली ले घात लगाय बइठे माओवादी मन ह जवान मन उपर गोलीबारी सुरू कर दीन। दूनों कोति ले होय गोलीबारी म एक झिन जवान सहीद होगे। मुठभेड़ के बाद सुरक्षा बल मन ह माओवादी कैम्प ल खतम कर दीन।
उहें, दंतेवाड़ा पुलिस ह कुंआकोंडा क्षेत्र के दुवाली-करका के पहाड़ी मन म माओवादी मन डहार ले लुका के राखे गे विस्फोटक अउ आने जिनीस बरामद करे गेहे।
माशिमं-होम असाइनमेंट
छत्तीसगढ़ माध्यमिक शिक्षा मंडल डहार ले होम असाइनमेंट के प्राप्तांक के आधार म मुख्य परीक्षा दू हजार बीस-इक्कीस म हरेक बिसय म तीस प्रतिसत अंक आतंरिक मूल्यांकन के रूप म मान्य करे जाही। मुख्य परीक्षा म सिरिफ उही छात्र मन ल सामिल करे जाही, जउन मन कम ले कम सत्तर प्रतिसत होम असाइनमेंट करे होही। होम असाइनमेंट सितंबर दू हजार बीस ले फरवरी दू हजार इक्कीस तक के छात्र मन ल दे जाही।
मंडल के सचिव ह बतईन कि कोरोना संक्रमण के सेती अभी तक स्कूल नइ खुले हे, जेखर सेती मुख्य बिसय के पाठ्यक्रम म तीस ले चालीस प्रतिसत के कमी करे गेहे। पाठ्यक्रम मन ल सितंबर ले फरवरी तक छह महीना म बांटे गेहे। हरेक महीना छात्र मन बर होम असाइनमेंट जारी करे जात हे।
उहें, माध्यमिक सिक्षा मंडल के हाईस्कूल अउ हायर सेकेंडरी स्कूल के संगेसंग हायर सेकेंडरी व्यवसायिक पूरक परीक्षा अट्ठाईस नवंबर ले सुरू होही। पूरक परीक्षा बर अरजी इकतीस अक्टूबर तक भरे जाही।
मरवाही-उपचुनाव
मरवाही विधानसभा उपचुनई बर मतदान के तारीख तीर आय के संग उम्मीदवार मनके चुनाव प्रचार अभियान जोर पकड़ लेहे।
मरवाही उपचुनई म मतदाता मन ल जागरूक करे बर निर्वाचन प्रेक्षक जयसिंह अउ जिला निर्वाचन अधिकारी ह मतदाता जागरूकता रथ हरा झंडा देखाके रवाना करीन। मरवाही विधानसभा क्षेत्र म मतदाता पर्ची बांटे के काम सुरू होगे हे।
प्याज-भंडारण
केन्द्र सरकार ह केहे हे कि गोंदली के भाव ल कम करे अउ पूरा देस म एखर बने ढंग ले व्यवस्था करे उपर परयास करे गेहे। केन्द्रीय उपभोक्ता मामला खाद्य अउ सार्वजनिक वितरण मंत्रालय के सचिव ह किहीन कि इकतीस दिसंबर तक बेपारी मन बर प्याज के भंडारण के सीमा तय कर दे गेहे। केन्द्रीय सचिव ह किहीन कि थोक म गोंदली बेचइया बेपारी मन ह पच्चीस मीटरिक टन के प्याज रख सकथे। त उहें, चिल्लर बेचइया बेपारी मन ल दू मीटरिक टन प्याज राखे के मंजूरी दे गेहे।
बिजली-उत्पादन
छत्तीसगढ़ राज्य विद्युत उत्पादन कंपनी के जल विद्युत गृह मन ह पाछु साल के तुलना म एसो जादा विद्युत उत्पादन के रिकार्ड बनाय हे। अक्टूबर महीना के पहली पन्द्रहवीं म चार ठिन जल विद्युत परियोजना डहार ले अब तक करीबन दू सौ पैंतालीस मिलियन यूनिट ले जादा बिजली के उत्पादन करे गेहे।
जनरेशन कंपनी के प्रबंध निदेशक ह बतईन कि कोरबा जिला म चलत हसदेव बांगो म चार-चार मेगावाट क्षमता के चार विद्युत इकाई मन म तीन सौ अट्ठारह मिलियन यूनिट बिजली के उत्पादन करे गेहे।
आईटीबीपी-सीमा चैकियां
केन्द्र सरकार ह भारत-तिब्बत सीमा पुलिस-आईटीबीपी के सीमा उपर चैकसी बढ़ाय के उद्देश्य ले सैंतालीसवां उपरहा सीमा चैकी बनाय के मंजूरी दे देहे। केन्द्रीय गृह राज्यमंत्री जी. किशन रेड्डी ह आईटीबीपी के उनसठवां स्थापना दिवस म किहीन कि सरकार ह ए बल ल अउ जादा आधुनिक बनाय बर कतकोन कदम उठाय हे।
मन की बात
प्रधानमंत्री काली बिहनिया ग्यारह बजे आकाशवाणी ले ‘‘मन की बात‘‘ कारीकरम म अपन बिचार राखही। मासिक रेडियो कारीकरम के ए ह सत्तरवां कड़ी होही। ए कारीकरम ल आकाशवाणी अउ दूरदर्शन के जम्मों नेटवर्क ले प्रसारित करे जाही। हिन्दी म प्रसारण के तुरते बाद आकाशवाणी ले ए कारीकरम क्षेत्रीय भासा म घलो प्रसारित करे जाही। क्षेत्रीय भासा म एला रतिहा आठ बजे सुने जा सकथे।
लोकवाणी
मुख्यमंत्री भूपेश बघेल ह ‘‘लोकवाणी‘‘ ए बार ‘‘बालक-बालिकाओं की पढ़ाई, खेलकूद, भविष्य‘‘ जइसन बिसय उपर प्रदेस के लोगन मन ले गोठबात करही। ए बारे म सोलह साल ले कम उमर के बाबू-नोनी मन आकाशवाणी रईपुर के फोन नंबर शून्य सात सात एक- दो चार तीन शून्य पांच शून्य एक अउ दो चार तीन शून्य पांच शून्य दो म अट्ठाईस ले तीस अक्टूबर तक मंझनिया तीन बजे ले चार बजे के बीच फोन करके अपन सवाल ल रिकार्ड करा सकथे। मुख्यमंत्री के रेडियोवार्ता लोकवाणी के प्रसारण आठ नवंबर के बिहनिया साढ़े दस बजे करे जाही। एला छत्तीसगढ़ स्थित आकाशवाणी के जम्मों केन्द्र एके संघरा रिले करही।
स्वास्थ्य मंत्री-कोरोना
केन्द्रीय स्वास्थ्य मंत्री डाॅक्टर हर्षवर्धन ह किहीन हे कि देस म अवइया तीन महीना कोरोना संक्रमण के स्थिति बर निर्णायक रइही। ओमन किहीन कि अवइया तिहार अउ जाड़ा म ऐहतियात बरतना जरूरी हे अउ जतका कोविड बर नियम बनाय गेहे, ओखर पालन करना पड़ही।
कोरोना-जागरूकता
छत्तीसगढ़ म तिहार के मौसम म लोगन मन ल कोरोना के प्रति जागरूक करे के उद्देश्य ले सहर के संगेसंग गांव-गंवई मन म आने-आने अभियान चलाय जात हे।
दुरूग जिला म सोसल मीडिया के माध्यम ले कोरोना ले बचाव के जानबा साझा करे के जिम्मेवारी युवा इनफ्लुएंसर अउ समाजसेवी संगठन मन निभावत हे। करीबन तीस ले पैंतीस युवा मन सोसल मीडिया पेज के माध्यम ले जरूरी जानकारी साझा करत हे।
ऐति, जाने-माने भजन अउ गजल गायक प्रभंजय चतुर्वेदी ह लोगन मन ले कोरोना ले बचाव बर जरूरी सावधानी बरते के अपील करे हे।
महाअष्टमी/विजयादशमी
आज शारदेय नवरात्र के महाअष्टमी हरय। ए मउका म देस के संगेसंग प्रदेस के कतकोन जघा म हवन-पूजन के कारीकरम चलत हे। आज के दिन महागौरी के रूप म शक्ति के उपासना करे जाथे।
राजधानी रईपुर के संगेसंग प्रदेस के जम्मों सक्तीपीठ अउ मंदिर मन म कोरोना संक्रमण के दिसा-निरदेस के पालन करत हवन-पूजन के कारीकरम चलत हे। काली नवमीं अउ दसमीं एके दिन होय के सेती कतकोन जघा म दसहरा मनाय जाही।
राज्यपाल, मुख्यमंत्री अउ विधानसभा अध्यक्ष ह प्रदेस के लोगन मन ल दसहरा के बधाई अउ सुभकामना दे हवय।
बस्तर दशहरा
पचहत्तर दिन तक चलइया विश्व प्रसिद्ध बस्तर दशहरा म आज देर रतिहा निशाजात्रा विधान होही। बस्तर दसहरा म नवरात्रि परब के दउरान अष्टमी तिथि के रतिहा निशाजात्रा पूजा विधान के परंपरा हे। ए दउरान राजपरिवार के अगुवई म जगदलपुर के निशागुड़ी म पूजा-पाठ करे जाथे।
फूलबासन बाई-केबीसी
माईलोगिन मन ल आगू बढ़ाय अउ समाज सेवा के क्षेत्र म अपन पहिचान बनइया पद्मश्री फूलबासन बाई यादव ह जाने-माने टीवी कारीकरम ‘‘कौन बनेगा करोड़पति‘‘ म पचास लाख रूपिया के इनाम जीते हे। काली रतिहा प्रसारित ‘‘कर्मवीर‘‘ स्पेशल कारीकरम म छत्तीसगढ़ के फूलबासन बाई यादव ह महानायक अमिताभ बच्चन के हर सवाल के जवाब सुघ्घर ढंग ले दीन।
बिहान
छत्तीसगढ़ राज्य ग्रामीण आजीविका मिशन-बिहान योजना के स्व-सहायता समूह मन डहार ले गोबर, माटी अउ कपड़ा ले बनाय गे जिनीस ए बार देवारी तिहार म घर-अंगना ल चमकाही।
महासमुंद जिला म स्व-सहायता समूह के माईलोगिन मन ह देवारी तिहार ल धियान म राखत धान ले बने बिसेस सजावटी ग्रीटिंग कार्ड बनावत हे। एखर अलावा ए मन गोबर अउ माटी के दीया, ओम, स्वास्तिक, गौरी-गणेश के मूर्ति अउ पंचगव्य ले मिले हुए छेना घलो बनाय जात हे।
नरवा विकास-बैठक
प्रदेस म भूईंया के पानी के सही ढंग ले रखरखाव बर नरवा विकास के काम म उद्योग मन ले मिलइया भू-जल कर के पइसा ल खरचा करे जाही। मुख्य सचिव आर.पी.मंडल ह काली रईपुर म होय बइठका म जल संसाधन ग्रामीण विकास अउ वन विभाग के अधिकारी मन ल पानी ल रोके बर नरवा विकास के काम ल बने ढंग ले करे के निरदेस दीन।
मुख्य सचिव ह आदिवासी जघा के लइका मन ल खेल ले जोड़े के निरदेस खेल विभाग के अधिकारी मन ल दीन। बइठका म मुख्यमंत्री के प्राथमिकता वाले आने-आने जन कल्याणकारी योजना के घलो समीक्षा करे गीस।