प्रधानमंत्री दीपावली
प्रधानमंत्री नरेंद्र मोदी ह आज छत्तीसगढ़ के बस्तर म सुरक्षाकर्मी मन संग देवारी तिहार मनाइन। ओमन किहीन कि एसो के देवारी के बिसेस महत्ता हे। काबर कि देस नक्सलवाद, माओवादी आतंक के खिलाफ लड़ई जीत चुके हे। ए पहिली देवारी हे, जब देस के हर जिला नक्सलवाद ले मुक्त हे। एखर सबले बड़े श्रेय लाखों वीर जवान सुरक्षाकर्मी मन के हे। प्रधानमंत्री ह किहीन कि एक समय रिहीस, जब करीबन बीस राज्य के दू सौ तीस ले जादा जिला नक्सलवाद ले प्रभावित रिहीस। छत्तीसगढ़, बिहार, महाराष्ट्र, ओडिसा, उत्तर प्रदेस, मध्य प्रदेस समेत देस के कतकोन हिस्सा ए समस्या ले जूूझत रिहीस। ओमन किहीन कि बछर दू हजार चार ले दू हजार तेरह के बीच शहीद होवइया सुरक्षाकर्मी मनके संख्या माओवादी मनके मुकाबला जादा रिहीस। ओ बखत के सरकार नक्सलवाद के समस्या के हल निकाले म विफल रिहीस। प्रधानमंत्री ह किहीन कि सैंतालीस बछर म पहिली घांव पाछू एक बछर म कोनो भी केंद्रीय रिजर्व पुलिस बल-सीआरपीएफ के जवान मन ह ड्यूटी के बेरा अपन जान नइ गवाय हे। प्रधानमंत्री ह सीआरपीएफ, कोबरा बटालियन, सीमा सुरक्षा बल, भारत तिब्बत सीमा पुलिस, सशस्त्र सीमा बल, भारतीय रिजर्व बटालियन, राज्य पुलिस बल, बस्तर म तैनात महिला कमांडो समेत बिसेस बल बर आभार जतइन।
प्रधानमंत्री ह किहीन कि देस राष्ट्र प्रथम के भाव ले काम करत हे, जेखर ले देस के सुरक्षा सुनिश्चित होथे। ओमन किहीन कि जब हम राष्ट्र प्रथम के भावना के संग काम करथन, त देस के सांति अउ सुरक्षा घलो सुनिश्चित होथे। देस विकास के नवा ऊंचाई ल छूते अउ गरीब वंचित मन के विकास म भागीदारी बाढ़थे। एखरे सेति पाछू बारह बछर म देस ह नक्सलवाद अउ अलगाववाद के खिलाफ ही लड़ाई नइ जीते हे, भलुक देस ह गरीबी के खिलाफ घलो बड़े जंग जीते हे। एखर पहिली, प्रधानमंत्री के बस्तर पहुंचे म जवान मन ह देस भक्ति गीत गाके प्रधानमंत्री के सुवागत करीन।
इही बीच, मुख्यमंत्री विष्णुदेव साय ह किहीन हे कि देवारी तिहार म प्रधानमंत्री नरेंद्र मोदी के बस्तर म आना अउ वीर जवान मन संग देवारी परब मनाना छत्तीसगढ़ बर गरब के पल हे। ओमन किहीन कि जवान मनके त्याग, समर्पण अउ साहस ले बस्तर नक्सलवाद के अंधियार ले निकल गेहे। मुख्यमंत्री ह किहीन कि प्रधानमंत्री के अगुवई म आज बस्तर विकास के रद्दा म आगू बढ़त हे। ए देवारी परब बस्तर के उज्जवल भविष्य समृध्द अउ खुसहाल के छत्तीसगढ़ के संकलप ल नवा ऊर्जा दिही।
प्रधानमंत्री के बस्तर दउरा म प्रदेस के उप मुख्यमंत्री अउ गृह मंत्री विजय शर्मा ह किहीन कि आज बाबा साहेब अंबेडकर कोति ले तियार करे गे संविधान बस्तर म पूरी तरह ले लागू हो गेहे। ओमन किहीन कि छत्तीसगढ़ राज्य ले माओवाद के सफाया हो गेहे। एखर सेति ए देवारी बस्तर के संगेसंग देस बर बिसेस हवय। प्रधानमंत्री ह देवारी मनाय बर बस्तर ल चुनिन अउ सुरक्षा बल संग देवारी परब मनाइन। एखर बर मैं आभार जतावत हंव।
दीपावली
देवारी के परब छत्तीसगढ़ समेत देसभर म उछाह के संग मनाय जात हे। ए तिहार अंधकार ल दूरिहा के लोेगन के जिनगी म सुख-सांति अउ समृध्दि लाथे। देवारी के मउका म आज घरोघर दीया के अंजोर ले जगमग करत हे। संगेसंग रंग-बिरंग झालर घलो जगमगात हे। अइसन मानता हे कि आजे के दिन भगवान राम लंका म विजय पाके अयोध्या लहुटे रिहीन अउ उंखर सुवागत बर लोगन दीया जलाके उछाह मनाइन, तभे ले ए परब मनाय जाथे। देवारी तिहार म राजधानी रईपुर समेत छत्तीसगढ़ के सबो सहर, कस्बा, गांव-गंवई म लोगन लक्ष्मी पूजा के तियारी करत हे। घर अउ अंगना लिपाय-पोताय चुकचुक ले दिखत हे। घर के बाहिर सुग्घर चउक पुराय हे अउ लइका मन फटाखा फोरत हे। उहें, रंधनी खोली रोटी पीठा ले महर-महर ममहावत हे। देवारी तिहार म बिहनियच ले लोगन हाट-बाजार म मिठई, फटाखा अउ लुगरा-कपड़ा, फल-फुल बिसाय बर निकलीन, जेखर ले हाट-बाजार म लोगन के भीड़ उमड़े हे। पूजा बर माता लक्ष्मी, सरस्वती, गणेश के फोटू के संग लाई, बतासा, कांदा, सिंघाड़ा, भाजी-भांटा बिसइन हे।
उहें, समृध्दि के प्रतीक धान के बाली ले बने झालर के मांग गजबे हे। लोगन परब म सोन-चांदी के गहना-गूठा संग कांस अउ पीतल के बर्तन बिसावत हे।
राष्ट्रपति द्रौपदी मुर्मू, उपराष्ट्रपति सी.पी.राधाकृष्णन, प्रधानमंत्री नरेंद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह प्रदेसवासी मन ल देवारी तिहार के बधई अउ सुभकामना दीन हे।
नेत्र रोग चिकित्सक-सलाह
आंखी के डॉक्टर ह देवारी तिहार म फटाखा चलात बेरा आंखी के सुरक्षा खातिर बिसेस सावधानी राखे के सलाह दीन हे। डॉक्टर ह लोगन मन ले किहीन कि खुला जघा, मैदान म फटाखा चलावय अउ तीर म बाल्टी भरके पानी रखय। अवइया-जवइया वाले जघा म फटाखा झन फोड़य अउ फटाखा बोड़त बेरा सादा चस्मा पहिरय। संगेसंग रेस्मी टेरीकाट कपड़ा पहिरके फटाखा झन फोड़य।
लालकृष्ण अडवानी-जन्मदिन
भारतीय जनता पार्टी के बड़का नेता अउ पूर्व उप प्रधानमंत्री लालकृष्ण अडवानी के आज उंखर निनान्वे जनमदिन म प्रधानमंत्री नरेंद्र मोदी ह ओमन ल सुभकामना दीन हे। समाचार पत्र लेख म प्रधानमंत्री ह श्री अडवानी के योगदान ल सुरता करीन अउ किहीन कि उंखर मजबूत विचारधारा अउ समझ ओमन ल एक अलग पहिचान देथे।
धान खरीदी
प्रदेस म समर्थन कीमत म अवइया पंद्रह नवंबर ले धान बिसाय के काम सुरू होही। एसो किसान मन ले इकतीस सौ रूपिया कुंटल के दर ले धान बिसाय जाही। एखर बर प्रदेस म तीन सौ साठ नवा खरीदी केंद्र बनाय गेहे। किसान मनके सुबिधा खातिर दस नवंबर ले ‘‘तुंहर टोकन मोबाइल ऐप‘‘ ले धान बेचे बर ऑनलाइन टोकन जारी करे जाही। किसान मन घर बइठे ऐप ले टोकन ले सकत हे।
अग्निवीर-मैराथन
धमतरी म अवइया पंद्रह नवंबर के अग्निवीर महा मैराथन के आयोजन करे जाही। निसुल्क कमांडो प्रसिक्षण केंद्र अउ मिलीट्री एकेडमी कोति ले राखे गे ए प्रतियोगिता म सोलह सौ मीटर के दउड़ होही। प्रतियोगिता बिहनिया पांच बजे ले धमतरी के इंडोर स्टेडियम म होही। पूर्व सैनिक अउ आर्मी इंस्ट्रक्टर जीवन राम निषाद ह बतइन कि ए प्रतियोगिता म सिरिफ छत्तीसगढ़ राज्य के ओ अग्निवीर उम्मीदवार भाग ले सकही, जउन मन भारतीय सेना के अग्निवीर भर्ती के लिखित परीक्षा पास कर लेहे। ओमन बतइन कि प्रतियोगिता म सामिल होवइया उम्मीदवार मन बर आधार कारड अउ अग्निवीर भर्ती लिखित परीक्षा के प्रवेस पत्र संग म लाना जरूरी हे। प्रतियोगिता के उद्देस्य उम्मीदवार मन म शारीरिक क्षमता, अनुशासन, आत्मविस्वास ल बढ़ाना हे।
बीएसपी सत्यापन प्रणाली
भिलाई इस्पात सयंत्र ह करमचारी मनके फोटोग्राफ जमा करे अउ उंखर सत्यापन के कामकाज ल सरल बनाय बर ऑनलाइन करमचारी फोटू अपलोड अउ सत्यापन प्रणाली सुरू करे हे। एखर ले नवा पहिचान पत्र जारी करे समेत आने आधिकारिक काम बर करमचारी मनके फोटो के ऑनलाइन प्रबंधन करे जा सकही। एखर सुभारंभ कार्यपालक निदेसक वित्त अउ लेखा प्रवीण निगम अउ कार्यपालक निदेसक मानव संसाधन पवन कुमार ह संयुक्त रूप ले करीन। नवा बेवस्था म करमचारी अपन वर्तमान फोटो देख सकही अउ जरूरत होय म जेपीजी प्रारूप म नवा फोटू अपलोड कर सकही।
अउ अब थोरकुन समाचार सार म –
– शहीद वीर नारायण सिंह स्मृति आदिवासी लोककला महोत्सव के जिला स्तरीय कारीकरम शक्ति जिला म होही, ए कारीकरम म संघरे बर आदिवासी लोककला नर्तक दल ले दस नवंबर तक अर्जी मंगाय गेहे।
– बालोद जिला रोजगार अउ स्व-रोजगार मार्गदर्सन केंद्र कोति ले तेरह नवंबर के संयुक्त जिला कार्यालय स्थित जिला रोजगार कार्यालय म रोजगार मेला लगाय जाही।
अउ
– बालोद के दुधली के पीएमश्री जवाहर नवोदय विद्यालय म कक्षा छठवीं म भर्ती खातिर जवाहर नवोदय विद्यालय चयन परीक्षा अट्ठाईस नवंबर के होही।