प्रधानमंत्री नरेंद्र मोदी ह आज कोरोना संक्रमण के रोकथाम ले जुड़े समुचित व्यवहार के बारे म ट्वीटर के माध्यम ले जन आंदोलन अभियान के शुरूआत करीन।
अवइया तिहार अउ सर्दी के मौसम के संग आर्थिक गतिविधि के शुरूआत ल देखत ये अभियान चलाये जात हे। श्री मोदी ह ट्वीट संदेश म लोगन ले कोरोना संक्रमण ले संघर्ष म एकजुट रेहे के अपील करीन। ओमन मास्क लगाये, हाथ के साफ सफाई राखे अउ दू गज के दूरी के नियम के पालन करत सुरक्षित दूरी बनाये राखे के अपील करीन।
प्रधानमंत्री ह कीहिन कि कोरोना संक्रमण ले संघर्ष एक ठिन जन आंदोल न हरय। ए आंदोलन ल कोविड योद्धा के समर्पण ले शक्ति मिले हे। ओमन कीहिन कि हमर सामूहिक प्रयास ले कतकोन लोगन के जान बचाये जा सके हे। ओमन कीहिन कि हमन ल अपन प्रयास ले ये गति ल बनाये राखना होही अउ ये घातक संक्रमण ले लोगन के बचाव करना होही।
सुप्रसिद्ध अभिनेता अमिताभ बच्चन ह लोगन मनले कोरोना संक्रमण ले बचाव खातिर सरकार के दिशा – निर्देश के पालन करे के अपील करे हे।
राज्य मंत्रिमंडल बैठक
राज्य मंत्रिमंडल ह कोरोना संक्रमण के स्थिति ल देखत प्रदेश के जम्मों स्कूल ल बंद राखे के निर्णय लेहे।
मुख्यमंत्री भूपेश बघेल के निवास कार्यालय म आज होय मंत्रिमंडल के बइठका म राज्य स्थापना दिवस के बेरा म होवइया कार्यक्रम के आयोजन नइ करे जाही। ये मउका म केवल सिरिफ राज्य अलंकरण समारोह मुख्यमंत्री निवास कार्यालय म आयोजित करे जाही। बइठका म प्रदेश के यात्री वाहन के सितंबर अउ अक्टूबर महीना के देय मासिक कर म शर्त के संग छूट देके निर्णय घलो ले गेहे।
एखर संग सामाजिक संस्था मन ल अब रियायती दर म साढ़े सात हजार वर्गफीट तक जमीन आवंटन करे जा सकही। मंत्रिमंडल के बइठका म औद्योगिक नीति दू हजार उन्नीस-चोबीस म संशोधन करे के अनुमति घलो दे गेहे। एखर तहत छोटे उद्योग के संग लघु अउ मध्यम उद्योग मन ल घलो स्थायी पूंजी निवेश अनुदान के सुविधा मिलही।
उंहें छत्तीसगढ़ औद्योगिक भूमि अउ प्रबंधन नियम दू हजार पंद्रा म संशोधन के प्रस्ताव ल मंजूरी दे गेहे। एखर तहत पट्टा म देगे औद्योगिक भूमि के उपयोग नइ होय के स्थिति म भूमि के हस्तांतरण ल आसान करे जाही।
केंद्रीय निर्वाचन आयोग ह कोरोना संक्रमण के दउरान स्वतंत्र, निष्पक्ष, शांतिपूर्ण, पारदर्शी अउ सुरक्षित मतदान करे खातिर अवइया चुनाव बर स्टार प्रचारक मनले संबंधित नियम म संशोधन करे गेहे। आयोग ह कीहिन कि संशोधित दिशा निर्देश के अनुसार मान्यता प्राप्त राष्ट्रीय अउ राज्य स्तर के राजनीतिक दल मन बर स्टार प्रचारक मनके अधिकतम संख्या चालीस के जगा म तीस होही। गैर पंजीकृत राजनीतिक दल मन बर ए संख्या बीस के जगा म पंद्रा होही।
पीएससी परीक्षा
छत्तीसगढ़ उच्च न्यायालय ह राज्य़ लोक सेवा आयोग के मुख्य परीक्षा के आयोजन म रोक लगा देहे।
ये परीक्षा अठारा अक्टूबर के होवइया रीहिस हे। मिले खबर के मुताबिक छत्तीसगढ़ लोक सेवा आयोग डहार ले आयोजित प्रारंभिक परीक्षा म कुछएक प्रश्न अउ उत्तर ल लेके आपत्ति जतावत अभ्यर्थी मन डहार ले हाईकोर्ट म याचिका दायर करे गेहे । ए मामला म हाईकोर्ट के एकल पीठ ह आज प्रकरण के निराकरण तक मुख्य परीक्षा के आयोजन ल स्थगित राखे के आदेश देहे।
प्रदेश म गौरेला-पेण्ड्रा-मरवाही जिला के मरवाही विधानसभा क्षेत्र म होवइया उप चुनाव म कोरोना संक्रमित मरीज घलो मतदान कर सकही। ए संबंध म जिला निर्वाचन अधिकारी डोमन सिंह ह कोरोना पाॅजीटिव मरीज मन बर केंद्रीय निर्वाचन आयोग डहार ले पोस्टल, बैलट के माध्यम ले वोट डारे के प्रक्रिया के बारे म जानकारी दीन।
एमा होम आइसोलेशन अउ अस्पताल म भर्ती कोरोना संक्रमित मरीज मन ल पोस्टल, बैलट के आवेदन फार्म बारह-डी म उपलब्ध कराके पोस्टल बैलेट जारी करे जाही। ए सुविधा अस्सी बछर ले जादा उमर के अउ दिव्यांग मतदाता मन ल घलो दे जाही।
इही बीच राज्य के मुख्य निर्वाचन पदाधिकारी रीना बाबा साहेब कंगाले ह गौरेला म मतदाल दल मनके चलत प्रशिक्षण काम के अवलोकन करीन।
प्रदेश म एक नवंबर ले धान खरीदी करे अउ प्रति एकड़ बीस कुंटल धान खरीदे के संग आने आने मंाग ल लेके भाजपा कार्यकर्ता मन राजनांदगंाव जिला के सबो ब्लाॅक मुख्यालय मन म धरना प्रदर्शन करीन।
ए दउरान कार्यकर्ता मन ह राज्य सरकार ले पाछू दू साल के बोनस अउ पाछू साल खरीदे गे धान के अंतर के राशि एकमुश्त किसान मन ल दे जाय के मांग करीन। बाद म पार्टी के पदाधिकारी मन ह कलेक्टर अउ स्थानीय एसडीएम ल मुख्यमंत्री के नाव ज्ञापन सौंपीन।
इही बीच भाजपा के प्रदेश उपाध्यक्ष खूबचंद पारख ह राज्य सरकार उपर किसान विरोधी होय के आरोप लगाइन । ओमन कीहिन कि केंद्र सरकार डहार ले किसान मनके समुचित विकास अउ कृषि क्षेत्र ल मजबूत करे बर सरलग प्रयास करे जात हे।
राज्य के आने आने जिला म पाछू तीन दिन ले होवत बरसा ले धान के फसल ल नुकसान पहुंचे के खबर मिले हे। कुछएक जिला म धान के फसल खेत मन म गिर गेहे, त उंहंे कतकोन जगा म खेत म पानी भरे ले फसल के बूडे के समाचार घलो मिले हे।
बालोद जिला के संवाददाता ह बताइन कि ग्रामीण अंचल मन म कुछएक किसान मन ह धान कटाई शुरू कर दे रीहिस। फेर बरसा के सेती फसल भीज गेहे। संगेसंग तेज बरसा अउ हवा ले सागभाजी के फसल ल घलो नुकसान पहुंचे हे। जिला के मेढ़की, बधमरा, ओरमा अउ नयापारा गांव के सड़क तीर के धान ल जादा नुकसान पहुंचे हे।
ओति महासमुंद जिला म घलो होय बरसा के सेती फसल मनके खराब होय के खबर हे। उंहें कृषि विभाग के सहायक संचालक किसान मन ल धान फसल के कटाई कुछएक दिन तक रोके के अउ मौसम साफ होय के अगोरा करे के सलाह दीन।
राज्य के गृहमंत्री ताम्रध्वज साहू ह आज वीडियो कॅान्फ्रेसिंग ले रायगढ़ जिला के केडार म नवा थाना भवन के शुभारंभ करीन। संगेसंग चक्रधर नगर म नवा बने थाना भवन के आॅनलाईन लोकार्पण घलो करीन। ए मउका म ओमन कीहिन कि सबो जिला म जुंआ, सट्टा अउ अवैध शराब के बिक्री उपर अंकुश लगाय खातिर प्रभावी कार्रवाई करे जाही। ओमन कीहिन कि प्रदेश म पुलिस विभाग कानून व्यवस्था अच्छा बनाये राखे बर काम करे जात हे।