मुख्यमंत्री विष्णुदेव साय ह चांपा-कोरबा तीसर रेललाइन परियोजना ल मंजूरी दे जाय म प्रधानमंत्री नरेन्द्र मोदी अउ रेलमंत्री अश्वनी वैष्णव बर आभार जतईन हे। ओमन किहीन कि ए परियोजना छत्तीसगढ़ के विकास अउ औद्योगिक बढ़वार, देस के ऊर्जा सुरक्षा ल मजबूत बनाय के दिसा म एक महत्वपूर्ण उलपब्धि हरय। श्री साय ह कहिन कि चांपा-कोरबा रेलखंड एसईसीएल अउ एमसीएल के खदान ल राष्ट्रीय रेल नेटवर्क ले जोड़इया एक महत्वपूर्ण कड़ी हे। ए परियोजना के पूरा होय ले कोयला लाने-लेगे के क्षमता म बढ़वार होही। मुख्यमंत्री ह कहिन कि बने रेल संपर्क ले उद्योग ल मजबूती मिलही, व्यापार के बढ़वार के संग रोजगार के नवा मउका मिलही।
कृषि मंत्री-बैठक
केन्द्रीय कृषि मंत्री शिवराज सिंह चौहान ह काली नई दिल्ली म एक उच्च स्तरीय कृषि बइठका म खरीफ सीजन बर देसभर म करे गे तियारी के समीक्षा करीन। बइठका म श्री चौहान ह कमती बरसा वाले जिला बर पहिली ले योजना ल तियार करे म जोर दीन। बइठका म ए बात म ध्यान केन्द्रित करे गीस कि फसल के मौसम के दउरान पैदा होवइया प्रतिकूल मौसम स्थिति ले किसानी अउ किसान के सुरक्षा बर सबो जरूरी कदम पहिली ले उठाय जाय। ओमन किहीन कि जउन जिला म कमती बरसा या फेर असमान बरसा के संभावना हवय, उहां बेरा रहत तियारी होना चाही।
अंतर्राष्ट्रीय योग दिवस
अवइया इक्कीस जून के मनाय जाने वाला बारहवां अंतर्राष्ट्रीय योग दिवस ल लेके छत्तीसगढ़ म तियारी आखिरी चरण म हवय। सामान्य प्रशासन विभाग कोति ले जिला मुख्यालय म होवइया सामूहिक योगाभ्यास कार्यक्रम बर माईपहुना के नाव तय कर दे गेहे।
राज्यपाल रमेन डेका राजधानी रईपुर म अंतर्राष्ट्रीय योग दिवस के मउका म सामूहिक योगाभ्यास कार्यक्रम म माईपहुना होही। उहें, मुख्यमंत्री विष्णुदेव साय के आतिथ्य म सरगुजा जिला म बिहनिया सात बजे सामूहिक योग होही। ए कार्यक्रम के अगुवई मंत्री श्यामबिहारी जायसवाल करही। एखर संगेसंग केन्द्रीय राज्यमंत्री तोखन साहू बिलासपुर, उपमुख्यमंत्री अरूण साव दुरूग, उपमुख्यमंत्री विजय शर्मा कबीरधाम अउ विधानसभा अध्यक्ष डॉक्टर रमन सिंह राजनांदगांव म अंतर्राष्ट्रीय योग दिवस के मउका म राखे गे कार्यक्रम म माईपहुना रइही। अइसने, आने जिला म होवइया योग कार्यक्रम म मंत्री, सांसद अउ विधायक अतिथि के रूप म संघरही। एसो अंतर्राष्ट्रीय योग दिवस के थीम ‘‘स्वस्थ आयु के लिए योग‘‘ राखे गेहे।
रेत खनन-विवाद
कोरिया जिला के नौगाई गांव म रेत खनन ल लेके होय विवाद म भाजपा नेता भरत सिंह गहरवार उर्फ लल्ला सिंह के मउत होगे। उहें, तीन आने घायल होगे हे। खबर के मुताबिक भाजपा नेता अपन कुछेक संगी मन संग पाछु रतिहा सोनहत गे रिहीन। इही दउरान नौगाई गांव म कुछेक लोगन मन उंखर गाड़ी ल रोक के तोड़फोड़ करत आगी लगा दीन। ए दउरान भाजपा नेता गाड़ी ले निकल नइ पईस अउ जलके उंखर मउत होगे। ए घटना तीन आने मनखे घायल होय के जउन ल अंबिकापुर के अस्पताल म भर्ती कराय गेहे। पुलिस ह ए मामला नौ झिन खिलाफ अपराध पंजीबद्ध करे हे, जेला ले चार झिन आरोपी ल गिरफ्तार करे गेहे। पुलिस आने आरोपी मनके तलाश करत हे।
सुंदरराज पी.-एनआईए
केन्द्रीय गृह मंत्रालय ह बस्तर रेंज के पुलिस महानिरीक्षक सुंदरराज पी. ल राष्ट्रीय जांच एजेंसी-एनआईए म आईजी नियुक्त करे हे। सुंदरराज पी. पाछु करीबन आठ बछर ले बस्तर म पदस्थ रेहे हे। ओमन कतकोन नक्सल विरोधी अभियान के अगुवई करीन हे।
एनटीए-अपील
राष्ट्रीय परीक्षा एजेंसी-एनटीए ह अवइया नीट परीक्षा ल देखत विद्यार्थी अउ परिवार वाले मन ल गड़बड़ी करइया मन ले सतर्क रेहे के अनुरोध करीन हे। एनटीए के महानिदेशक अभिषेक सिंह ह किहीन कि हम ए सुनिश्चित करबो कि परीक्षा बिना कोनों गड़बड़ी के पूरा होवय।
खबर के मुताबिक इक्कीस जून के तय नीट/यूजी के पुनर्परीक्षा ल देखत सरकार ह बाईस जून तक टेलीग्राम ऐप म ऑनलाइन संदेस भेजे म रोक लगा देहे।
स्क्रैप/बैटरी-कार्रवाई
छत्तीसगढ़ पर्यावरण संरक्षण मंडल ह राज्य म अवैध रूप ले स्क्रैप अउ ओमा बउरे बैटरी के संग्रहण, भंडारण, परिवहन, पुनर्चक्रण अउ व्यापार म जुड़े मनखे अउ संस्था के खिलाफ कार्रवाई के चेतवनी देहे। मंडल के संज्ञान म आय हे कि राज्य के कुछेक क्षेत्र म बिना पंजीयन स्क्रैप बैटरी के खरीदी-बिक्री करे जात हे। मंडल ह स्पष्ट करे हे कि अइसन किसम के काम पर्यावरण कानून के उल्लंघन हे अउ लोगन के स्वास्थ्य बर गंभीर खतरा पैदा करथे।
राज्यपाल-गजराज बांध
राज्यपाल रमेन डेका ह रईपुर के कमल विहार के गजराज बांध ल जलाशय के रूप म विकसित करे के पहल करीन हे। ए बांध करीबन दू सौ तीस एकड़ क्षेत्र म फइले हे। ए संबंध म राज्यपाल ह आज लोकभवन म रईपुर नगर निगम महापौर मीनल चौबे अउ अतिरिक्त कमिश्नर विनोद पांडे ले गोठबात करीन। राज्यपाल ह कहिन कि गजराज बांध ल पेयजल भंडार के रूप म बनाय ले रईपुर सहर ल सुद्ध अउ पर्याप्त पानी मिलही।
एमओयू
भारतीय प्रौद्योगिकी संस्थान-आईआईटी भिलाई अउ फ्रांस के इंस्टीट्यूट माइन्स-टेलीकॉम नॉर्ड यूरोप के बीच डुअल – जॉइंट डिग्री समझौता म दस्तखत करे गेहे। ए समझौता फ्रंास के नीस सहर म चौदह ले सोलह जून के बीच राखे गे ‘‘भारत इनोवेट्स‘‘ कार्यक्रम के दउरान होइस। ए समझौता ले दूनों संस्थान के विद्यार्थी मन ल एकीकृत शैक्षणिक कार्यक्रम ले भारत अउ फं्रास म अध्ययन के मउका मिलही। छात्र आईआईटी भिलाई अउ इंस्टीट्यूट माइन्स-टेलीकॉम नॉर्ड यूरोप दूनों कोति ले मान्यता मिले डिग्री ले सकही।
कांग्रेस-प्रदर्शन
बिजली के दर म करे गे बढ़वार के विरोध म कांग्रेस ह आज प्रदेस के सबो जिला म बिजली विभाग के घेराव करीन। कांग्रेस नेता अउ कार्यकर्ता मन ह रईपुर के डंगनिया के विद्युत विभाग कार्यालय के घेराव करके बिजली के दर म होय बढ़वार, बाढ़त महंगाई, पेट्रोल-डीजल अउ रसोई गैस के कीमत म बढ़वार ल लेके सरकार के खिलाफ नाराबाजी करीन।
जांजगीर म कार्यकर्ता मन ह रैली निकालीन। उहें, बिलासपुर म बिजली विभाग के घेराव करीन। ए दउरान कांग्रेस कार्यकर्ता अउ पुलिस के बीच झूमाझटकी घलो होइस।
कांग्रेस काली अट्ठारह जून के सबो जिला म पत्रकारवार्ता राख के बिजली के दाम म करे गे बढ़वार के विरोध करही।
विशेष भेंटवार्ता
आकाशवाणी रायपुर के प्रादेशिक समाचार एकांश कोति ले उन्नीस सासकीय भर्ती परीक्षा पास करके रिकॉर्ड बनइया चारू पांडे ले लेगे भंेटवार्ता के प्रसारण काली अट्ठारह जून के करे जाही। एखर प्रसारण रतिहा आठ बजके पन्द्रह मिनट ले आठ बजके तीस मिनट तक सुने जा सकत हे। ए कार्यक्रम ल छत्तीसगढ़ स्थित आकाशवाणी के सबो केन्द्र रिले करही।
जशपुर-सीड बॉल
जशपुर जिला म ‘‘बीज गोला बनाबो-जशपुर के जंगल ला बढ़ाबो‘‘ महाभियान के सुरूआत करे जात हे। एमा काली अट्ठारह जून के जिला के भैरव पहाड़, सोगड़ा, नुमान टेकरी समेत चिन्हा करे गे जगह म एके दिन म करीबन दू लाख सीड बॉल तियार करे के लक्ष्य राखे गेहे।