केन्द्रीय टीम-दौरा
राष्ट्रीय रोग नियंत्रण केन्द्र-एन.सी.डी.सी. ह दुरूग जिला प्रसासन अउ स्वास्थ्य विभाग ल जिला म कोरोना संक्रमण के सेती होवत मउत ल नियंत्रित करे के निरदेस देहे।
केन्द्र सरकार के निरदेस म एन.सी.डी.सी. के ए टीम नई दिल्ली ले दुरूग के दउरा म पहुंचे हे। ए टीम म तीन बिसेसज्ञ डाॅक्टर संग रईपुर के दू झिन डाॅक्टर सामिल हे। ए टीम के सदस्य मन ह जिला म कोरोना संक्रमित मरीज मनके इलाज के सुभीत अउ अस्पताल के व्यवस्था ल देखीन अउ एखर बाद जिला प्रसासन अउ स्वास्थ्य विभाग के अधिकारी मन संग बइठका के बेरा केन्द्रीय दल के सदस्य मन ह जिला म कोरोना संक्रमण के सेती होवत मउत के आंकड़ा म संसो जताईन। बइठका म स्वास्थ्य विभाग के अधिकारी मन ह केन्द्रीय टीम ल कोरोना संक्रमण के निपटे खातिर ज्यादा मात्रा म दवई अउ किट देवाय बर किहीन।
ए टीम राजनांदगांव जिला के दउरा म घलो गीन। जिहां टीम के सदस्य मन ह उद्याचल भवन म चलाय जात कोविड केयर संेटर अउ पेंड्री के कोविड अस्पताल म बेवस्था ल देखीन।
स्वास्थ्य मंत्रालय-स्कूल
केन्द्र सरकार ह तीस सितंबर तक स्कूल बंद राखे के आदेस देहे, फेर इक्कीस सितंबर ले स्वैच्छिक आधार म कक्षा नौवीं ले बारहवीं तक स्कूल खोले बर मानक उपाय जारी करे हे। ए बेरा म पचास प्रतिसत सिक्षक मन ल स्कूल बलाय के मंजूरी देहे।
केन्द्र सरकार ह कक्षा नौवीं ले बारहवीं तक के पढ़ईया लइका मन ल उंखर अभिभावक मन तीर ले लिखित म सहमति लेके स्कूल आय अउ सिक्षक मन तीर ले जउन भी पढ़ई से संबंधित पूछताछ करना हे, तेखर मंजूरी देके अधिकार राज्य सरकार ल देहे।
छत्तीसगढ़ म केन्द्र सरकार के ए फइसला म गोठबात करे जात हे। गोठबात के बादे स्कूल खोले के संबंध म सही फैसला ले जाही।
केन्द्र सरकार के दिसा-निरदेस के मुताबिक स्कूल म बइठे के बेवस्था अइसन किसम ले होही कि हरेक कुर्सी के बीच कम सेे कम छह फीट के दूरी होवय। मास्क पहिनना जरूरी होही। सभा अउ खेल म प्रतिबंध रइही। सिक्षक अउ स्कूल करमचारी सबो झन ल नइ बला के आधा झन ल बलाय जाही, जेखर ले आॅनलाइन पढ़ई अउ बाकी काम हो सकय। जउन स्कूल ल क्वारेंटाइन सेंटर बनाय गे रिहीस, ओला पहिली सैनिटाईज करे जाही।
कोरोना खबरें
मुख्यमंत्री भूपेश बघेल ह महानदी-इंद्रावती भवन म कोरोन संक्रमण म रोक लगाय बर परभावी उपाय करे के निरदेस दीन हे। मुख्यमंत्री ह मुख्य सचिव आर.पी. मंडल ले किहीन कि कोरोना संक्रमण के रोकथाम संबंधी सुरक्षा उपाय ल दूनों भवन म लागू करे बर सबो करमचारी संगठन के पदाधिकारी मन संग गोठबात करे जाय। संगेसंग नियम के कड़ाई ले पालन करे के निरदेस दीन।
इही बीच, खबर मिले हे कि मुख्य सचिव आर.पी.मंडल अउ करमचारी संघ के नेता मनके बीच बइठका होईस। मंत्रालय अउ इंद्रावती भवन म कोरोना संक्रमण ले कुछेक करमचारी के मउत अउ आने करमचारी मनके पाॅजिटिव होय के बाद करमचारी संगठन ह कार्यालय म कामकाज बंद करे मांग करत रिहीन।
उहें, कोरोना संक्रमण के बिना लक्षण वाले अउ कमती लक्षण वाले मरीज मनके होम आइसोलेशन म इलाज के बेवस्था करे बर स्वास्थ्य विभाग ह चेक लिस्ट जारी करे हे। होम आइसोलेशन के बेवस्था देखइया सबो अधिकारी मन ल एखरे मुताबिक काम करे बर केहे गेहे।
ओति, कोंडागांव जिला के केशकाल म आज ल लेके चैदह सितंबर तक पांच दिन के पूरा तालाबंदी रइही।
कोरिया जिला के बैकुंठपुर के एसबीआई के मुख्य साखा म काम करइया एक अधिकारी कोरोना पाॅजिटिव पाय गेहे। एखर बाद बैंक ल आज ले तीन दिन बर बंद कर दे गेहे।
कोरोना संक्रमित मरीज मिले के सेती भिलाई नगर निगम मुख्यालय आज ले तीन दिन बर बंद रइही।
एक करमचारी के कोरोना संक्रमित होय के बाद महासमुंद जिला कलेक्ट्रेट कार्यालय म सम्मार तक कोनों भी बाहिर मनखे के अवई-जवई रोक लगा दे गेहे।
ऐति, जांजगीर-चांपा जिला के कलेक्टर यशवंत कुमार ह कोविड अस्पताल अउ आइसोलेशन सेंटर बर नोडल अधिकारी अउ सहायक अधिकारी के नियुक्ति करीन हे।
शासकीय अवकाश-प्रतिबंध
रायपुर जिला म सरकारी अधिकारी अउ करमचारी मनके अक्टूबर महीना तक छुट्टी ले म रोक लगा दे गेहे। कोनों करमचारी कुछु भी कारण ले छुट्टी लेवत हे त ओला अपन कार्यालय प्रमुख के मंजूरी अउ छुट्टी ले के कारण ल बताके जिला कलेक्टर तीर अरजी भेजना होही।
रईपुर जिला के कलेक्टर डाॅक्टर एस. भारतीदासन ह निरदेस जारी करके किहीन हे कि करमचारी मन ल जिला के बाहिर जाय या फेर मुख्यालय छोड़े बर मंजूरी ले बर पड़ही।
गरीब कल्याण अन्न योजना-वेबीनार
प्रधानमंत्री गरीब कल्याण अन्न योजना म पत्र सूचना कार्यालय-पीआईबी अउ रीजनल आउटरीच ब्यूरो-आओबी रईपुर कोति ले आज एक वेबीनार राखे गीस। एमा पीआईबी रईपुर के अपर महानिदेशक सुदर्शन पनतोड़े अउ भारतीय खाद्य निगम के उप महाप्रबंधक बीजू बी., के संग कतकोन आने अधिकारी और आरओबी के पंजीयन होय लोक कलाकार मन सामिल होईन।
वेबीनार म बोलत भारतीय खाद्य निगम के उप महाप्रबंधक ह किहीन कि भारत सरकार के आंकड़ा के मुताबिक छत्तीसगढ़ म केन्द्र सरकार के ए योजना के कुल दू करोड़ सततत्तर हजार लाभार्थी हवय। एखर मुताबिक छत्तीसगढ़ म हर महीना एक लाख तीन सौ पच्यासी मीटरिक टन अनाज के जरूरत हवय। पाछु अप्रैल महीना ले नवंबर महीना तक राज्य बर आठ लाख तीन हजार तिरासी मीटरिक टन अनाज के जरूरत होही। ओमन बतईन कि राज्य सरकार ह पाछु अप्रैल ले अगस्त महीना तक बर ए योजना म आवंटित खाद्यान्न के पूरा कोटा के उठाव कर ले गेहे।
कारीकरम म रईपुर के विवेकानंद महाविद्यालय के सहायक प्रध्यापक डाॅक्टर आशीष दुबे ह किहीन कि कोरोना महामारी के सेती तालाबंदी के बेरा भारत सरकार के ए योजना असंगठित क्षेत्र के मजदूर अउ गरीब वर्ग मन ल सोझे फायदा पहुंचाय बर मददगार हवय।
कारीकरम म केन्द्रीय खाद्य अउ पोषाहार बोर्ड के अधिकारी मनीष यादव म किहीन कि ए योजना म लोगन मन ल प्रोटीन के कमी दूरिहाय खातिर एक किलो चना या फेर दार बांटे जात हे।
मुख्यमंत्री-बैठक
मुख्यमंत्री भूपेश बघेल ह वन वाले क्षेत्र म जादा ले जादा रोजगार देवाय बर आवर्ती चराई योजना अउ वन अधिकार अधिनियम के तहत मनरेगा म जादा काम मंजूर करे के निरदेस दीन हे। मुख्यमंत्री के अगुवई म आज रईपुर के उंखर निवास कार्यालय म कैम्पा शासी निकाय के पहिली बइठका राखे गीस। एमा मुख्यमंत्री ह कैम्पा मद ले कराय गे काम के समीक्षा करीन। संगेसंग तरिया निर्माण, चारागाह विकास, फलदार रोपण अउ सितंबर ले अक्टूबर महीना तक हरियर चारा के कटाई के काम ल मुख्य रूप ले कराय बर किहीन।
हाथी-आतंक
महासमुंद जिला के खल्लारी पहाड़ी क्षेत्र म दू दंतैल हाथी घुमत हे। ऐहतियात बरते खातिर वन विभाग ह पहाड़ी ले होके खल्लारी गांव तक पहुंचया रद्दा म अवई-जवई ल रोक देहे।
खबर के मुताबिक दू दंतैल हाथी खल्लारी गांव के तीर जंगल म पहुंचे के बाद खल्लारी के खेत-खार अउ प्राथमिक स्वास्थ्य केन्द्र तीर घुमत हे। बागबाहरा के रेंजर वन करमचारी मन संग मउका म पहुंच के हाथी के गतिविधि म नजर राखे हे।
टिकट दलाल-अभियान
छत्तीसगढ़ समेत देसभर म रेलवे सुरक्षा बल कोति ले अवैध रूप ले ट्रेन टिकिट के कालाबाजारी करइया मनके खिलाफ अभियान चलाय जात हे।
रेलवे सुरक्षा बल के महानिदेशक के निरदेस म चलाय जात ए अभियान म अब तक करीबन तीन सौ टिकिट दलाल ल गिरफ्तार करे गेहे अउ उंखर तीर ले करीबन डेढ़ करोड़ रूपिया के टिकिट घलो बरामद होय हे। ट्रेन के टिकिट के अवैध रूप ले बुकिंग करे म जउन साॅफ्टवेयर बउरे जाथे – रेड मिर्ची-रेड बुल अउ आई बाॅल के खिलाफ घलो कार्रवाई करे गेहे। रेलवे सुरक्षा बल के मुताबिक अवइया बेरा म टिकिट दलाल मनके खिलाफ ए अभियान जारी रइही।