मिशन कर्मयोगी
केंद्रीय मंत्रिमंडल ह राष्ट्रीय सिविल सेवा क्षमता निर्माण कार्यक्रम मिशन कर्मयोगी ल मंजूरी दीन । काली प्रधानमंत्री नरेंद्र मोदी के अध्यक्षता म होय मंत्रिमंडल के बइठका म ये फैसला ले गीस। मिशन कर्मयोगी के लक्ष्य अइसे भारतीय लोकसेवक तियार करना हे जउन मन ह जादा रचनात्मक, चिंतनशील, नवाचारी, पेशेवर अउ तकनीकी रूप ले सक्षम होही। केंद्रीय मंत्री प्रकाश जावड़ेकर ह कीहिन कि कर्मयोगी मिशन, मानव संसाधन विकास के दिशा म सरकार के सबले बड़का पहल होही।
कोरोना मरीज
प्रदेश म कोरोना संक्रमीत मरीज मनके मिले के सिलसिला लगातार जारी हे। कोरोना मरीज मनके संख्या करीबन छत्तीस हजार पहुंच गेहे। काली प्रदेश म दू हजार दू सौ उनहत्तर नवा कोरोना संक्रमित मरीज मनके पहिचान करे गेहे। अभी सतरा हजार ले जादा सक्रिय कोरोना संक्रमित मरीज मनके इलाज आने आने अस्पताल म चलत हे।
इही बीच काली बारा कोरोना संक्रमित मरीज मनके मउत होय हे। एला मिलाके अब तक दू सौ निन्यानवे कोरोना संक्रमित मरीज मनके मउत हो चुके हे।
एति महासमुंद जिला म नौ झिन बैंक कर्मी कोरोना पाॅजीटिव मिले हे । एमा स्टेट बैंक के मुख्य शाखा के प्रबंधक संग तीन कर्मचारी घलो सामिल हे। एखर बाद स्टेट बैंक के मुख्य शाखा ल सील कर दे गेहे।
उंहें जांजगीर चंापा के कोविड अस्पताल म इलाज के बेरा एक झिन कोरोना संक्रमित मरीज के मउत होय हे।
ओति राजनांदगंाव म पाछू तीन दिन के भीतर कोरोना संक्रमित चार मरीज के मउत के बाद नगरपालिक निगम सीमा ल कंटेनमेंट जोन घोषित कर दे गेहे। इंहा सबो व्यावसायिक संस्थान ल चार सितंबर ले बारा सितंबर तक बंद राखे जाही। उंहें लालबाग सिंधी कालोनी स्थित सिंधी धर्मशाला म घलो अब कोरोना के जांच करे जाही।
कोरोना परीक्षा प्रक्रिया
केंद्रीय स्वास्थ्य मंत्रालय ह परीक्षा के दउरान कोरोना संक्रमण के नियंत्रण बर मानक संचालक प्रक्रिया जारी कर देहे। ए मानक मनके अनुसार कम से कम छै फीट के शारीरिक दूरी बनाय रखना हे। मास्क पहिनना, साबुन ले हाथ धोना अउ सेनिटाइजर के उपयोग करना सामिल हे।
शारीरिक दूरी के मापदंड ल धियान म राखत संस्थान म परीक्षा बर बइठे के उचित व्यवस्था करे खातिर पर्याप्त कमरा के क्षमता होना चाही। परीक्षा हाॅल अउ आने सामान्य क्षेत्र म परीक्षा ले पहिली अउ बाद म हर बार साफ-सफाई अउ सेनिटाइजेशन करे जाही।
कोरोना अस्पताल
मुख्यमंत्री भूपेश बघेल ह कोरोना संक्रमित मरीज के बाढ़त संख्या ल देखत ओमन ल इलाज देवाय बर रायपुर अउ दुर्ग जिला म कोविड अस्पताल अउ कोविड केयर सेंटर मन म बिस्तर के संख्या बढ़ाय के निर्देश देहे। ओमन ह रायपुर जिला म करीबन दस हजार, दुर्ग, बिलासपुर अउ रायगढ़ जिला म दू हजार बिस्तर बढ़ाय बर केहे हे।
मुख्यमंत्री ह अधिकारी मन ल एक ठन एप बनाय के निर्देश घलो देहे। जेमा अस्पताल म भरे अउ खाली बिस्तर के जानकारी होही। एखर ले कोरोना मरीज ल अस्पताल के चुनाव करे म मदद मिल सकही।
विशेष कार्यक्रम
प्रधानमंत्री जनधन योजना ल शुरू होय बीते अठाईस अगस्त के छै साल पूरा होगे हे। ए योजना के आने आने पहलू ल जाने बर भारतीय स्टेट बैंक के उप महाप्रबंधक अउ छत्तीसगढ़ म स्टेट लेवल के बैंकर्स कमेटी के कन्वेनर परविंद भारती ले आकाशवाणी समाचार ले गोठबात होय हे। ए भेंटवार्ता के प्रसारण काली बीहनिया साढ़े दस बजे आकाशवाणी केंद्र रायपुर ले मीडियम वेव म करे जाही। एला छत्तीसगढ़ स्थित आकाशवाणी के सबो केंद्र एके संगरा रिेले करही।
शासकीय स्कूल प्रवेश
प्रदेश के सबो शासकीय स्कूल मन म विद्यार्थी मन ल निशुल्क प्रवेश देके निर्देश संचालक लोक शिक्षण डहार ले जारी करे गेहे। संयुक्त संचालक शिक्षा विभाग अउ जिला शिक्षा अधिकारी मन ल जारी निर्देश म केहे गेहे कि कुछएक जिला ले ये शिकायत आवत हे कि विद्यार्थी मनले शासकीय स्कूल म प्रवेश के दउरान स्थानीय निधि अउ शाला विकास बर शुल्क ले जावत हे। अभी सबो शिक्षण संस्थान बंद हे, एखर सेती कोनो भी छात्र ले शिक्षण संस्थान डहार ले कोनो भी शुल्क नइ ले जा सकही।
आंगनबाड़ी निर्देश
प्रदेश म आंगनबाड़ी केंद्र मन ल अवइया सात सितंबर ले खोले जाही। कोरोना संक्रमण के रोकथाम बर दिशा निर्देश के पालन करत आंगनबाड़ी केंद्र मन के संचालन करे जाही। इही दउरान आंगनबाड़ी केंद्र म मंझनियंा के पोषण आहार ल पहिली जइसन गरम भोजन के रूप म दे जाही। उंहें आंगनबाड़ी केंद्र मन म स्वास्थ्य अउ पोषण दिवस के आयोजन घलो होही।
महिला अउ बाल विकास विभाग ह ए संबंध म सबो संभाग आयुक्त, जिला कलेक्टर, अउ विभागीय जिला कार्यक्रम अधिकारी ल निर्देश जारी कर देहे। एमा कंटेनमेंट घोषित क्षेत्र मन म अवइया आंगनबाड़ी केंद्र मन ल नइ खोले जा सकही। सामाजिक दूरिहा बनाय बर हितग्राही मन ल अलग अलग बेरा म बलाय जाही। गरम भोजन बर पात्र हितग्राही जेमा तीन ले छै बछर के लईका, गर्भवती माइलोगिन, अउ सुपोषण अभियान के हितग्राही ल केंद्र म आय के मंजूरी मिलही। आंगनबाड़ी केंद्र म सबो हितग्राही मन ल मास्क पहिनना जरूरी होही।
सायबर अपराध
नेशनल क्राइम रिकार्ड ब्यूरो नई दिल्ली डहार ले संचालित साइबर क्राइम रिपोर्टिंग पोर्टल म मिले आॅनलाइन साइबर अपराध संबंधी शिकायत म अब तुरते कार्रवाई करे जाही।
छत्तीसगढ़ शासन के अतिरिक्त पुलिस महानिदेशक आर.के. विज ह काली वीडियो काॅन्फे्रसिंग के माध्यम ले सबो जिला के पुलिस अधिकारी मन ल साइबर अपराध संबंधी शिकायत म सजग होके तुरते कार्रवाई करे के निर्देश दीन। ए मामला म कोताही करइया मन उपर संबंधित थाना प्रभारी के खिलाफ अनुशासनात्मक कार्रवाई घलो करे जाही।
श्री विज ह पोर्टल के सुचारू संचालन के समीक्षा करीन। संगेसंग ओमन ह रायपुर, दुर्ग, अउ बिलासपुर जिला म जादा प्रकरण के लंबित होय के सेती पुलिस अधीक्षक मन ल तुरते कार्रवाई करे के निर्देश दीन।
इही बीच बिलासपुर जिला म पुलिस डहार ले साइबर अपराध ल रोके बर साइबर मितान अभियान चलाये जात हे। ए बेरा पुलिस के सइबर रक्षक घर-घर जाके लोगन मन ल जागरूक करत हे। आईजी दीपांशु काबरा अउ पुलिस अधीक्षक प्रशांत कुमार अग्रवाल साइबर मितान-एक कदम सजगता की ओर अभियान के शुरूआत करे हे। जेमा लोगन मनके घलो सहयोग मिलत हे।
आईईडी बरामद
राजनंादगंाव जिला म सुरक्षा बल ह सर्चिंग के दउरान कुकर म राखे पांच किलो के एक ठन आईईडी बरामद करे हे। खबर के मुताबिक बकरकट्टा थाना क्षेत्र म पुलिस अउ आईटीबीपी के संयुक्त टीम ह गश्त म निकले रीहिस इही दउरान जवान मन ह ग्राम खाम्ही हाथीझोला अउ समुंदपानी के बीच रद्दा तीर एक ठिन कुकर म राखे पांच किलो के आईईडी ल बरामद करे हे। जेला बाद म निष्क्रिय करे गीस।
उंहें सीमावर्ती तेलंगाना राज्य के भद्राद्री कोत्तागुड़म जिला के गुंडाला इलाका म सुरक्षा बल मन ह एक झिन माओवादी ल मार गिराइस। मारे गे माओवादी के तीर ले एक ठिन पिस्तौल बरामद करे गेहे।
संक्षिप्त समाचार
अउ अब थोरकुन समाचार सार म-
– जांजगीर-चंापा जिला म यूरिया खाद बांटे म गड़बड़ी के मामला म एक ठिन सहकारी समिति अउ सात निजी विक्रेता मनके पंजीयन प्रमाण पत्र ल निलंबित कर दे गेहे।
– राजनंादगंाव जिला के अंबागढ़ चैकी म शिवनाथ नदी तीर एनीकट म बूड़े ले एक झिन माइलोगिन के मउत होगे।
– जांजगीर-चंापा जिला के बम्हनीडीह थाना म पदस्थ दू आरक्षक मन ल पुलिस अधीक्षक ह एक झिन शराब तस्कर ल छोड़े के आरोप म निलंबित कर देहे।
अउ
– बलरामपुर जिला के प्रभारी प्रमुख सचिव मनोज कुमार पिंगुआ ह वाड्रफ नगर विकासखंड के ग्राम बसंतपुर के गौठान के निरीक्षण करके उंहा संचालित गतिविधि के बारे म जानकारी लीन।