जावड़ेकर-फिल्म टेलीविजन
केन्द्रीय सूचना अउ प्रसारण मंत्री प्रकाश जावड़ेकर ह कोरोना महामारी के दौर म फिल्म अउ टेलीविजन कारीकरम निर्माण बर मानक संचालन प्रक्रिया के आज घोषणा करीन। ओमन किहीन कि फिल्म अउ टेलीविजन इंडस्ट्री ह महत्वपूर्ण उद्योग हे, जेखर ले लाखों लोगन के रोजगार जुड़े हे। केन्द्रीय गृह मंत्रालय अउ स्वास्थ्य मंत्रालय के परामर्श के बाद अब फिल्म अउ टेलीविजन उद्योग बर मानक संचालन प्रक्रिया जारी करे गेहे।
ओमन बतईन कि अब सरकार डहार ले अंतर्राष्ट्रीय अनुभव के आधार म सुरक्षा मापदंड के पालन करत मानक संचालन प्रक्रिया जारी कर दे गेहे, जेखर ले जम्मों कारीकरम मनके शूटिंग अउ निर्माण काम अब देसभर म सुरू करे जा सकही।
प्रधानमंत्री-खिलौना उद्योग
प्रधानमंत्री नरेन्द्र मोदी ह भारतीय खिलौना ल बढ़ावा दे अउ वैश्विक स्तर म एला लोकप्रिय बनाय के उपाय बर वरिष्ठ अधिकारी अउ मंत्री मनके संग विचार-विमर्स करीन। भारत म कतकोन खिलौना उद्योग समूह हे अउ हजारों कारीगार ए काम ले जुड़े हे। ओमन किहिन कि खिलौना न केवल सांस्कृतिक संपर्क सृदृढ़ करथे, फेर लइका मन म मानसिक कौशल के विकास घलो करथे।
संगेसंग ए ह ‘‘एक भारत-श्रेष्ठ भारत‘‘ के भावना के प्रसार के उत्कृष्ट माध्यम बन सकत हे।
श्री मोदी ह किहिन कि युवा मनके नवाचारी अउ रचनात्मक उपाय ले ए उद्योग समूह ल बढ़ावा दे जाना चाही। भारतीय खिलौना बाजार के विस्तार के अपार संभावना हे अउ आत्मनिर्भर भारत अभियान म स्थानीय उत्पाद ल बढ़ावा देके ए उद्योग म क्रांतिकारी बदलाव लाय जा सकत हे। ओमन किहीन कि ए खिलौना के माध्यम ले आंगनबाड़ी केन्द्र अउ स्कूल म सिक्षा के उपकरण के रूप म घलो उपयोग करे जा सकत हे। प्रधानमंत्री ह खिलौना उद्योग अउ पर्यटन क्षेत्र ल बढ़ावा दे के अपील घलो करीन।
मुख्यमंत्री-जन्मदिन बधाई
राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह मुख्यमंत्री भूपेश बघेल के जनम दिन म बधाई अउ सुभकामना देवत उंखर दीर्घायु अउ स्वस्थ जीवन के कामना करे हे।
मुख्यमंत्री के जनम दिन के बेरा म लोकसभा अध्यक्ष ओम बिड़ला, रक्षा मंत्री राजनाथ सिंह के संघरा कतकोन केन्द्रीय मंत्री, कई ठिन राज्य के मुख्यमंत्री के अलावा देस-प्रदेस के कतकोन जनप्रतिनिधि मन मुख्यमंत्री ल दूरभाष अउ ट्वीट के माध्यम ले बधाई संदेस प्रेषित करे हे।
ऐति, छत्तीसगढ़ के राज्यपाल अनुसुईया उइके, स्वास्थ्य मंत्री टी.एस. सिंहदेव, प्रदेस कांग्रेस अध्यक्ष मोहन मरकाम अउ पूर्व मुख्यमंत्री डाॅक्टर रमन सिंह के संघरा राज्य मंत्रिमंडल के सदस्य, भाजपा अउ कांग्रेस के वरिष्ठ नेता मन घलो श्री बघेल ल बधाई अउ सुभकामना देहे।
मुख्यमंत्री जन्मदिन-वीडियो कान्फ्रेंसिंग
मुख्यमंत्री श्री भूपेश बघेल ह अपन जनम दिन म आज वीडियो कान्फ्रेंसिंग के माध्यम ले सुभचिंतक अउ प्रसंसक मन ले रूबरू होके सुभकामना स्वीकार करीन अउ जम्मों लोगन ल उंखर सुभेच्छा बर धन्यवाद कहिन। कोरोना संक्रमण ल देखत मुख्यमंत्री ह अपन निवास कार्यालय म प्रदेस के कतकोन जिला अउ विकासखंड मुख्यालय म उपस्थिति जनप्रतिनिधि, कार्यकर्ता अउ नागरिक मन ले वीडियो कान्फ्रेंसिंग के माध्यम ले जुड़ के जम्मों झन के अभिवादन अउ सुभकामना स्वीकार करीन।
मुख्यमंत्री ह जनप्रतिनिधि मन ले चरचा करत बेरा कतकोन जिला म बरसा अउ खरीफ फसल के स्थिति के बारे म जानकारी लीन। ए बेरा ओमन किहीन कि ए साल ‘अरपा महोत्सव‘ के आयोजन नव गठित गौरेला-पेण्ड्रा-मरवाही जिला म करे जाही। ओमन जांजगीर-चांपा जिला म युरिया खाद के कालाबाजारी के सिकायत म अधिकारी मन ल सख्त कार्रवाई करे के निरदेस देहे। मुख्यमंत्री ह किहीन कि प्रदेस म यूरिया के कमी नइ हे। किसान मन ल उचित मूल्य म यूरिया खाद मिलही। एखर अलावा, मुख्यमंत्री ह मुंगेली जिला म अतिवृष्टि ले फसल अउ घर के होय नुकसान ले प्रभावित लोगन ल मुआवजा देके घोसना करीन।
एंबुलेंस-लोकार्पण
मुख्यमंत्री भूपेश बघेल ह आज नगर निगम रायपुर के अत्याधुनिक चिकित्सकीय सुविधा ले युक्त एम्बुलेंस वाहन के लोकार्पण करीन। ए बेरा म मुख्यमंत्री ह किहीन कि कोरोना संकट के बेरा म ए अत्याधुनिक एबुलेंस प्रदेसवासी मन बर लाभकारी होही। रायपुर नगर निगम डहार ले उपलब्ध कराय गे ए एम्बुलेंस वाहन पूरा तरीका ले वातानुकूलित हे, जेमा वेंटीलेटर के सुविधा घलो उपलब्ध हे।
एक्स-रे मशीन
प्रदेस के नवा जिला गौरेला-पेण्ड्रा-मरवाही के स्वास्थ्य सुविधा ल बेहतर बनाय बर दू ठिन नवा अत्याधुनिक एक्स-रे मसीन जिला अस्पताल गौरेला अउ सामुदायिक स्वास्थ्य केन्द्र मरवाही म लगाय गेहे।
जानबा के मुताबिक मुख्यमंत्री भूपेश बघेल ह विश्व आदिवासी दिवस के बेरा म जिलावासी मन ले वीडियो कान्फ्रेंसिंग म चर्चा करत सिक्षा, स्वास्थ्य के संघरा जम्मों अधोसंरचना के विकास बर तेजी ले कदम उठाय के आश्वासन दे रिहीन। इही कड़ी म उच्च तकनीकी क्षमता के एक्स-रे मसीन के स्थापना करे गेहे। अब जिला के सासकीय अस्पताल म एक्स-रे मसीन लगे ले हड्डी टूटे, फैक्चर अउ दुर्घटना म अस्थि विकार केे पीड़ित मनके स्थानीय स्तर म ही इलाज हो सकही।
नुवाखाई
आज नुवाखाई हे। ए तिहार नवा फसल के आगमन अउ किसान के बंधुत्व के प्रतीक के रूप म मनाय जाथे। ए बेरा म मुख्यमंत्री भूपेश बघेल ह प्रदेसवासी मन ल नुवाखाई तिहार के सुभकामना देहे। अपन संदेस म श्री बघेल ह किहीन कि ए तिहार नवा फसल आय के बेरा म, धरती अउ भगवान के वंदन अउ किसान भाई के बंधुत्व अउ एकत्व के प्रतीक हे। गांव के खुसहाली अउ सामाजिक संबंध म प्रगाढ़ करइया ए तिहार ल ऋषि पंचमी के दिन मनाय जाथे।
शिक्षक सम्मान
दुरूग जिला के सासकीय उच्चतर माध्यमिक साला जेवरा-सिरसा के व्याख्याता सपना सोनी के चयन राष्ट्रीय सिक्षक सम्मान बर होय हे। ए बछर राष्ट्रीय सिक्षक सम्मान पवइया सुश्री सोनी ह राज्य ले एकमात्र सिक्षिका हे। उंखर चयन विज्ञान के क्षेत्र म अध्ययन-अध्यापन काम म लगातार करे गे नवाचार के सेती होय हे। ओमन ह परंपरागत पढ़ई के जगह एक्टिीविटी एक्सीपेरिमेंट अउ प्रैक्टिकल बेस्ड पढ़ई बर नवाचार के सुरूवात बछर दू हजार नौ म करे रिहीन।
जानबा के मुताबिक ए बछर राष्ट्रीय सिक्षा सम्मान बर जम्मों देसभर ले सैंतालीस सिक्षक मनके चयन करे गेहे।
कोरोना-मरीज
छत्तीसगढ़ म कोरोना संक्रमण के मामला लगातार बाढ़त जात हे। आज घलो कतकोन जिला ले कोरोना संक्रमित नवा मरीज मिले के पुष्टि होय हे।
रायगढ़ जिला म आज इक्कीस नवा कोरोना संक्रमित मरीज मिले हे। कोरोना संक्रमण के बाढ़त मामला ल देखत जिला प्रसासन ह लाॅकडाउन के अवधि ल सात दिन ले बढ़ाके चैदह दिन कर देहे।
ओति, महासमुंद जिला म आज आठ नवा मरीज पाय गेहे। एमा तुमगांव ले पांच झिन सामिल हे।
उहें, राजनांदगांव जिला म घलो आज छह नवा कोरोना मरीज के पुष्टि होय हे। कांग्रेस के सहर अध्यक्ष, जिला कांग्रेस के प्रवक्ता अउ एक कम्प्यूटर आॅपरेटर के जांच रिपोर्ट घलो पाॅजिटिव आय हे।
अइसने, कोंडागांव जिला के भाजपा अध्यक्ष घलो कोरोना संक्रमित पाय गेहे।
कोरोना-एंटीजन टेस्ट
कोरबा जिला के जम्मों सरकारी अउ निजी अस्पताल म इलाज बर अवइया सर्दी, खांसी, बुखार अउ सांस ले म तकलीफ के मरीज मनके निःसुल्क एंटीजन टेस्ट कराय जाही। जिला प्रसासन ह कोरोना संक्रमण के बाढ़त मामला ल देखत कोरोना पीड़ित मरीज के पहिचान करे बर ए निर्णय लेहे।
हर्षवर्धन-कोरोना वैक्सीन
केन्द्रीय स्वास्थ्य अउ परिवार कल्याण मंत्री डाॅक्टर हर्षवर्धन ह बतईन हे कि देस ह ए बछर के आखिर तक कोरोना संक्रमण के उपचार बर वैक्सीन बना लीही। ओमन पत्रकार मन ल बतईन कि कोरोना संक्रमण के उपचार बर देस म बनत तीन म ले एक वैक्सीन ह पूर्व नैदानिक मानव परीक्षण के तीसर दउर म पहुंच चुके हे।
आरक्षक हत्या
बीजापुर जिला म आज अज्ञात मनखे ह एक झिन सहायक आरक्षक के कुल्हाड़ी मार के हत्या कर दीन। पुलिस अधीक्षक कमलोचन कश्यप ह घटना के पुष्टि करत बतईन कि कुटरू थाना क्षेत्र इलाका म सहायक आरक्षक सुरेश कुमरे ह रासन सामान खरीदे बर बाजार गे रिहीस। ए बेरा एक झिन अज्ञात मनखे सहायक आरक्षक उपर कुल्हाड़ी ले हमला कर दीन, जेखर ले ए जवान के मउकाच म मउत होगे। आरोपी के तलाश करे जावत हे। पुलिस अधीक्षक ह ए घटना म माओवादी के हाथ होय के आशंका जताय हे।
नवा शिक्षा नीति-सुझाव
स्कूल सिक्षा अउ साक्षरता विभाग ह देसभर के स्कूल के अध्यापक अउ प्रधानाचार्य मन ले नवा सिक्षा नीति ल लागू करे के प्रक्रिया उपर सुझाव मांगे हे। अध्यापक मन अपन सुझाव काली ले इकतीस अगस्त तक अपलोड कर सकत हे। जम्मों सुझाव उपर राष्ट्रीय शैक्षिक अनुसंधान अउ प्रशिक्षण परिषद-एन.सी.आर.टी. के विशेसज्ञ दल ह विचार करही।
केन्द्रीय शिक्षा मंत्री रमेश पोखरियाल निशंक ह बतईन कि नवा राष्ट्रीय सिक्षा नीति ल लागू करे म सिक्षक मनके भूमिका सबले महत्वपूर्ण हे।