बारिश-01
प्रदेस म पाछु एक हफ्ता ले सरलग बरसात होय ले आम जनजीवन बड़ प्रभावित होत हे। नदी-नरवा उफान म हे। कतको गांव मनके संपर्क जिला मुख्यालय मन ले टूट गेहे। खासकर बस्तर संभाग म बरसात ले जनजीवन अस्त-व्यस्त होगे हे।
हमर संवाददाता ले मिले जानकारी के अनुसार बस्तर जिला के इंद्रावती नदी खतरा के निसान ले दू मीटर उपर बोहात हे अउ नदी के जलस्तर सरलग बाढ़त हे।
कोंडागांव जिला के बारदा नदी म पुल के उपर ले पानी बोहात हे। कतको गांव मनके जिला मुख्यालय ले संपर्क टूट गेहे। कोंडागांव के जमपोट पारा म तरिया के पार टूटे ले जगदलपुर ले रायपुर अवइया राष्ट्रीय राजमार्ग उपर माड़ी तक पानी भर गेहे, जेखर ले अवइया-जवइया मन ल परेशानी होवत हे।
अइसने, सुकमा, बीजापुर, नारायणपुर अउ दंतेवाड़ा जिला म सरलग होवत बरसात ले जिला मुख्यालय मन ले सड़क संपर्क टूट गेहे। सुकमा जिला म बारू नदी के जलस्तर बाढ़े ले राष्ट्रीय राजमार्ग म आवागमन प्रभावित हे। कतकोन बस्ती मन ल खाली कराय जात हे। मलंगेर नदी के पुल के उपर ले पानी बोहात हे। जगदलपुर-भोपालपट्टनम रद्दा म आवागमन बाधित हे।
दंतेवाड़ा जिला के शंकनी-डंकनी नदी के जलस्तर सरलग बाढ़त हे, जेखर ले निचला इलाका मनके लोगन मन ल अलर्ट कर दे गेहे।
बारिश-02
ओति, जांजगीर-चांपा जिला म बरसात ले जनजीवन प्रभावित हे। जैजैपुर ब्लाॅक के ग्राम जमड़ी म स्थापित डेढ़ सौ साल जुन्ना शिव मंदिर बरसात म ढह गे। अइसने, जिला के डभरा के वार्ड ग्यारह म बरसात ले माटी के एक ठिन घर भरभरा के गिर गे। ए हादसा म एक झिन मनखे के मउत होगे।
ऐति, सरलग बरसात के सेती गरियाबंद जिला म स्थित सिकासेर बांध के दस गेट खोले गेहे। बांध ले प्रति सेकेंड दस हजार क्यूसेक पानी छोड़े जात हे। एखर ले पैरी नदी के जलस्तर सरलग बाढ़त हे। प्रसासन ह पैरी नदी के तीर म बसे गांव मन म मुनादी करा के लोगन मन ले सतर्क रेहे के अपील करे हे।
उहें, बालोद जिला के डौंडीलोहारा थाना क्षेत्र म स्थित केरीनाला म पुल पार करत बेरा एक झिन युवक बोहा गे लगातार बरसा के सेती पुल के उपर ले पानी बोहात हे।
इही बीच, मौसम विभाग ह अवइया 24 घंटा म प्रदेस म कुछु-कुछु जघा मन म भारी बरसात होय के चेतावनी देहे। बस्तर संभाग के बीजापुर अउ ओखर ले लगे जिला मन म रेड अलर्ट जारी करे गेहे। उहें, प्रदेस के कुछु जघा मन म हल्का ले मध्यम बरसात हो सकथे।
पंचायत अधिकार-समिति गठित
प्रदेस म पंचायती राज संस्था मन ल अउ ज्यादा शसक्त बनाय बर राज्य सरकार ह 8 सदस्य मनके समिति गठित करे हे। ए समिति एक महीना म त्रिस्तरीय पंचायती राज संस्था मन ल मिलइया अधिकार के समीक्षा करके अपन अनुसंसा राज्य सरकार ल सौंपही। सरकार समिति के प्रस्ताव के मूल्यांकन के बाद ओला राष्ट्रपिता महात्मा गांधी के जयंती 02 अक्टूबर के लागू करे के तैयारी करत हे।
पंचायत अउ ग्रामीण विकास मंत्री टी.एस. सिंहदेव के अनुमोदन के बाद पंचातय विभाग के विशेष सचिव अउ संचालक के अध्यक्षता म समिति गठित करे गेहे। आयुक्त मनरेगा, राज्य पंचायत अउ ग्रामीण विकास संस्थान के संचालक, विकास आयुक्त कार्यालय के वित्त नियंत्रण अउ पंचायत अउ ग्रामीण विकास मंत्री डहार ले नामांकित दू जिला पंचायत अध्यक्ष अउ दू जनपद पंचायत अध्यक्ष मन ल समिति के अध्यक्ष बनाय गेहे।
कोरोना-मरीज
छत्तीसगढ़ म कोरोना संक्रमण के मामला सरलग बाढ़त हे। आज घलो आने-आने जिला मन म कोरोना संक्रमित नवा मरीज मिले के पुष्टि होय हे।
दुर्ग जिला म आज 58 नवा मरीज मिले हे। एमा चंदूलाल चंद्राकर मेमोरियल अस्पताल के 05 डाॅक्टर सहित 16 कर्मचारी शामिल हे। अइसने, पाटन विकासखंड के रानीतराई म एकेच परिवार के 03 सहित 04 लोगन मन कोरोना पाॅजिटिव पाय गेहे। कोतवाली थाना भिलाई नगर के 03 आरक्षक के जांच रिपोर्ट पाॅजिटिव आय के बाद थाना परिसर ल सील कर दे गेहे। थाना के संचालन अस्थायी तौर म थाना परिसर के बाहिर टेंट लगाके करे जात हे।
ओति, कोरबा जिला म 18 नवा मरीज मनके पहिचान होय हे। एमा जिला पंचायत के 03 वाहन चालक, नगर निगम के 02 कर्मचारी शामिल हे।
उहें, रायगढ़ जिला के घरघोड़ा म न्यायिक अधिकारी अउ कर्मचारी मनके कोरोना संक्रमित मिले के बाद घरघोड़ा व्यवहार न्यायालय ल 04 दिन बर बंद कर दे गेहे। ए बेरा सबो अधिकारी अउ कर्मचारी मन ल होम क्वारेंटाइन म रेहे के निर्देश दे गेहे। न्यायालय के जरूरी कामकाज रायगढ़ म काम करइया अधिकारी मन द्वारा करे जाही।
सुनइया मन बतादन कि काली देर रात तक स्वास्थ्य विभाग डहार ले जारी बुलेटिन के अनुसार आने-आने जिला मन ले 1052 कोरोना पाॅजिटिव मरीज मनके पहिचान करे गे रिहीस। उहें, 554 कोरोना संक्रमित मरीज मन ल स्वस्थ होय के बाद अस्पताल ले छुट्टी दे दे गीस।
कोरोना-लक्षण जांच
स्वास्थ्य विभाग ह सर्दी, खांसी, बुखार, सांस ले म परेसानी अउ कोरोना संक्रमण के लक्षण वाले लोगन मन ल 24 घंटा के भीतर सैंपल जांच के निर्देश देहे। विभाग ह कोरोना संक्रमण के संभावित मरीज मनके पहिचान करे बर जिला के सघन सक्रिय सर्विलेंस संचालित करे बर केहे हे।
ए संबंध म स्वास्थ्य विभाग के सचिव निहारिका बारिक सिंह ह सबो कलेक्टर मन ल चिट्ठी लिखके जरूरी निर्देश देहे। पाती म केहे गेहे कि अभी के बेरा म कोरोना संक्रमण के प्रकरण के संख्या तेजी ले बाढ़त हे। प्रदेश म गंभीर लक्षण के संग पाय जात मरीज अउ कोरोना संक्रमण ले मउत के मामला बाढ़े हे। अइसन स्थिति म चिकित्सकीय अध्ययन के बाद एखर नियंत्रण बर काम करना जरूरी हे।
कोरोना-टेस्टिंग
बालोद जिला चिकित्सालय म घलो अब ट्रू-नाॅट तकनीक ले कोरोना के संभावित मरीज मनके जांच सुरू होगे हे। संसदीय सचिव कुंवर सिंह निषाद अउ संचारी बालोद के विधायक संगीता सिन्हा ह एखर उद्घाटन करीन। कलेक्टर ह बतईन कि जिला चिकित्सालय के संग जिला के 07 स्वास्थ्य केन्द्र मन म एंटीजन टेस्टिंग सेंटर स्थापित करे गेहे। उहां घलो कोरोना के संभावित मरीज मनके जांच करे जात हे।
कोरोना फाइटर्स-डिजिटल गेम
केन्द्रीय स्वास्थ्य मंत्री डाॅक्टर हर्षवर्धन ह कोरोना वायरस महामारी के बारे म कोरोना फाइटर्स नाव के ‘इंटरएक्टिव डिजिटल गेम‘ के सुरूवात करे हे। ओमन ह काली दू ठिन नवा वीडियो जारी करीन, जेमा लोगन मन ले ए महामारी के बचाव अउ एखर रोकथाम बर तय करे गे नियम के पालन करे के बारे म बताय गेहे।
ए अवसर म डाॅक्टर हर्षवर्धन ह किहीन कि ए इंटरएक्टिव गेम के माध्यम ले लोगन मन ल कोराना महामारी ले बचाव के तरीका अउ एखर ले जुड़े नियम मन ल नवा अउ रोचक तरीका ले समझे जा सकथे।
राजनांदगांव-प्रदर्शन
राजनांदगांव म लाॅकडाउन के बेरा डीजे अउ साउंड सिस्टम उपर लगे प्रतिबंध ले हलाकान संचालक मन ह आज प्रदर्शन करत मुख्यमंत्री के नाव कलेक्टर ल ज्ञापन सौंपीन। ज्ञापन म तीन दिन के भीतर डीजे अउ साउंड सिस्टम लगाय के अनुमति देके मांग करे गेहे। संगेसंग संचालक मन ह चेतावनी घलो देहे कि यदि उंखर मांग पूरा नइ करे जाही त ओमन मुख्यमंत्री कार्यालय के घेराव करही।
कोरोना-शिक्षक सम्मान
प्रदेश म कोरोना संक्रमण के बेरा अइसन शिक्षक जउन आने-आने नवाचार करके शिक्षा के अलख जगाय के काम करत हे, ओमन ल शिक्षक दिवस के दिन सम्मानित करे जाही। ए घोषणा स्कूल शिक्षा मंत्री डाॅक्टर प्रेमसाय सिंह टेकाम ह राष्ट्रीय शिक्षा नीति उपर रायपुर म आयोजित परिचर्चा म करीन।
डाॅक्टर टेकाम ह बतईन कि परिचर्चा के उद्देश्य राज्य म स्कूल शिक्षा विभाग के सबो निकाय मन ल नवा शिक्षा नीति ले परिचित कराना हे। ए बेरा नवा शिक्षा नीति ल प्रदेस म कोन प्रकार ले अउ कोन रूप म लागू करे जाय एखर उपर चर्चा करे गीस। ओमन बतईन कि कोरोना संक्रमण के बेरा जउन शिक्षक मन ह आने-आने नवाचार प्रयास के अंतर्गत ‘‘पढई तुहंर पारा‘‘ ‘‘लाउड स्पीकर‘‘ अउ ‘‘बुल्टू के बोल‘‘ जइसे कार्यक्रम के माध्यम ले शिक्षा के प्रचार-प्रसार करे हे, ओमन ल स्कूल शिक्षा विभाग डहार ले शिक्षक दिवस के दिन प्रमाण पत्र भेंट करके सम्मानित करे जाही। एखर ले जुड़े शिक्षक मन ल एखर बर अपन कार्य के वीडियो अउ फोटो वेबसाइट म अपलोड करना होही। स्कूल शिक्षा विभाग ह ए प्रमाण पत्र सोझे संबंधित शिक्षक ल ई-मेल करही।
ईएसआईसी
कर्मचारी राज्य बीमा निगम-ई.एस.आई.सी. ह कोरोना महामारी ल ध्यान म राखत कामगार मन ल ए साल 24 मार्च अउ 31 दिसंबर के बीच बेरोजगारी लाभ के रूप म तीन महीना के औसत वेतन के 50 प्रतिशत के बराबर रासि के भुगतान करे बर नियम मन म ढील देहे। नई दिल्ली म केन्द्रीय श्रम अउ रोजगार मंत्री संतोष कुमार गंगवार के अध्यक्षता म ई.एस.आई.सी. के बइठका म ए निर्णय ले गीस।
ई.एस.आई.सी. अटल बीमित मनखे मन कल्याण योजना म अमल करत हे, जेखर अंतर्गत कर्मचारी राज्य बीमा आयोग के तहत अवइया कामगार मन ल बेरोजगारी लाभ देके फइसला ले गेहे। ए योजना ल अवइया साल के 30 जून तक विस्तार करे के फइसला ले गेहे। वर्तमान म नियम मन म ढील दे बर अउ कोरोना महामारी के बेरा रोजगार गंवईया मनखे मन ल दे जाने वाला रासि म बढ़ोतरी करे के निर्णय ले गेहे। बाढ़े रासि के भुगतान ए बछर 24 मार्च ले 31 दिसंबर के बीच करे जाही।
ई.एस.आई.सी. के अंतर्गत बीमा करा चुके लोगन मन अपन अंतिम नियोक्ता के माध्यम ले आवेदन करे के बजाय सीधा ई.एस.आई.सी. साखा कार्यालय म आवेदन कर सकथे।
स्काई वाॅक-सहमति
राजधानी रायपुर के शास्त्री चैक म स्काई वाॅक निर्माण बर राज्य सरकार डहार ले गठित सामान्य सुझाव समिति के बइठका म सर्वसम्मित ले स्काई वाॅक बनाय के निर्णय ले गीस। बइठका म तकनीकी परीक्षण बर एक उप समिति गठित करे के निर्णय ले गेहे, जेखर ले तकनीकी पहलु मनके बारीकी ले अध्ययन करे जा सकय।
रायपुर ग्रामीण विधायक सत्यनारायण शर्मा के अध्यक्षता म बने समिति के काली बइठका होईस। बइठका म स्काई वाॅक निर्माण बर दू प्रस्ताव बर सहमति बनीस, जेमा एक रोटरी के संग अउ दूसर रोटरी के बिना कार्ययोजना तैयार करे जाही, जेखर ले जनभावना अउ सुविधा के संग-संग निर्माण हो सकय अउ खर्चा म घलो कटौती करे जा सकय। एखर तकनीकी सब कमेटी ले परीक्षण कराय जाही। एखर बाद मुख्य सचिव के अध्यक्षता म गठित समिति के संग चर्चा करके आखिरी निर्णय ले जाही।
तीज-गणेश चतुर्थी
सुहागिन मनके तिहार तीजा आज प्रदेशभर म श्रद्धा अउ भक्ती के संग मनाय जात हे। ए दिन सुहागिन मन निर्जला उपवास राख के पति के लंबा उमर के कामना करथे। ए दिन भगवान शिव अउ माता पार्वती के पूजा करे जाथे। आज शिव मंदिर मन ल घलो फूल ले सजाय गेहे।
काली गणेश चतुर्थी हे। ग्यारह दिन तक चलइया गणेश उत्सव के तैयारी जोर-शोर ले चलत हे। फेर ए बछर कोरोना संक्रमण ल देखत भगवान गणेश के मूर्ति ज्यादातर चैक-चैराहा म स्थापित नइ करे जाय। घर म ही गणेश जी के मूर्ति स्थापित करे जाही।
राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष डाॅक्टर चरणदास महंत ह गणेश चतुर्थी के अवसर म प्रदेशवासी मन ल बधाई अउ सुभकामना दीन हे।
हादसा
दुर्ग जिला म बीते रतिहा दादर-चरौदा मोड़ के तीर म पाटन ले लहुटत दू संगे भाई मन ल एक ठिन ट्रक ह टक्कर मार दीस। ए हादसा म बड़े भाई के मउकाच म मउत होगे अउ छोटे भाई ल गंभीर हालत म अस्पताल म भर्ती कराय गेहे।
उहें, राजनांदगांव जिला म खैरागढ़ के तीर आज होय सड़क दुर्घटना म ए युवक के मउत होगे।
ओति, जांजगीर-चांपा जिला के ग्राम बनाहिल म दू मोटर साइकिल के बीच टक्कर होय के बाद एक युवक के मउत होगे।