राष्ट्रपति द्रौपदी मुर्मु ए महीना के आठ तारीख के अंतर्राष्ट्रीय महिला दिवस के मउका म नई दिल्ली म एक राष्ट्रीय सम्मेलन के उद्घाटन करही। महिला अउ बाल विकास मंत्रालय कोति ले राखे गे ए सम्मेलन के बिसय हरय – ‘‘नारी शक्ति से विकसित भारत‘‘। एखर संगेसंग ‘‘शी बिल्ड्स भारत‘‘ हैशटैग के संग एक सोशल मीडिया अभियान घलो राखे जात हे। महिला दिवस ल लेके केन्द्रीय महिला अउ बाल विकास मंत्री अन्नपूर्णा देवी ह किहीन कि ए दिन माईलोगिन मनके बहुमुखी विकास म गोठबात करे अउ परेसानी ल खतम करे के मउका देथे।
प्रधानमंत्री-बिलासपुर
प्रधानमंत्री नरेन्द्र मोदी तीस मार्च के छत्तीसगढ़ दउरा म रइही। ए दउरान ओमन बिलासपुर म कतकोन परियोजना के लोकार्पण अउ भूमिपूजन करही। खबर के मुताबिक बिल्हा तीर मोहभट्टा म आमसभा ल संबोधित कर सकत हे।
प्रधानमंत्री के प्रस्तावित कार्यक्रम ल लेके राज्य सरकार ह तियारी सुरू कर देहे।
शासकीय सेवक-महंगाई भत्ता
राज्य के शासकीय सेवक मनके महंगाई भत्ता म तीन प्रतिशत के बढ़वार के आदेस वित्त विभाग ह जारी कर देहे। सातवां वेतनमान म काम करत कर्मचारी मनके महंगाई भत्ता म तीन प्रतिशत के बढ़वार करे गेहे। अब ओमन ल तिरपन प्रतिशत महंगाई भत्ता मिलही। उहें, छठवां वेतनमान के कर्मचारी मनके महंगाई भत्ता म सात प्रतिशत के बढ़वार होय हे। अब ओमन ल दू सौ छियालीस प्रतिशत महंगाई भत्ता मिलही। ए बढ़वार एक मार्च ले प्रभावी होही अउ एखर भुगतान मार्च महीना के वेतन के संग अप्रैल महीना म करे जाही।
खबर के मुताबिक वित्तमंत्री ओ.पी. चौधरी ह तीन मार्च के विधानसभा म अवइया वित्तीय बछर बजट म सासकीय सेवक मन ल तिरपन प्रतिशत महंगाई भत्ता दे जाय के घोसना करे रिहीन।
विस ध्यानाकर्षण-प्रश्नकाल
राज्य विधानसभा के बजट सत्र के आठवां दिन आज आवास अउ पर्यावरण मंत्री ओ.पी. चौधरी ह दस अप्रैल ले फ्लाईऐश डंपिंग करइया गाड़ी म जीपीएस सिस्टम लगाय के घोसना करीन हे। संगेसंग ओमन किहीन कि फ्लाईऐश डंपिंग करइया जघा के जीयो-टैगिंग कराय जाही। ध्यानाकर्षण ले कांग्रेस विधाकय राघवेन्द्र कुमार सिंह ह अकलतरा विकासखंड के ग्राम पंचायत कल्याणपुर म जल स्त्रोत अउ तरिया ल राखड़ ले पाटे के मामला उठईन। जुवाब म श्री चौधरी ह किहीन कि ग्राम पंचायत कल्याणपुर म जल अउ वायु प्रदूषण के मामला म जांच करे जात हे।
सदन म आज ध्यानाकर्षण ले भाजपा विधायक भावना बोहरा ह करीबधाम जिला के पंडरिया के सरदार वल्लभ भाई पटेल सहकारी सक्कर कारखाना म आर्थिक संकट के मामला उठईन। ओमन मांग करीन कि किसान मन ल राहत दे बर राज्य सरकार कोति ले ए कारखाना ल आर्थिक मदद दे जाय। एमा सहकारिता मंत्री केदार कश्यप ह किहीन कि अधिकारी मनके एक दल सरदार वल्लभ भाई पटेल सहकारी सक्कर कारखाना भेजे जाही, जउन आर्थिक नकसान के जांच करके सरकार ल रिपोर्ट दीहीं।
प्रश्नकाल म आज कांग्रेस विधायक राघवेन्द्र कुमार ह गौण खनिज ले मिले रकम ल लेके होवत जांच म गड़बड़ी उपर सवाल करीन। जुवाब म उपमुख्यमंत्री अरूण साव ह बतईन कि जांच म निमय के उल्लंघन साबित होय म छै झिन अधिकारी मन ल निलंबित करे गेहे। ओमन बतईन कि मुख्य अभियंता के अगुवई म अधिकारी मनके टीम बनाय गेहे, जेखर जांच रिपोर्ट जल्दी आ जही।
माओवादी आत्मसमर्पण
दंतेवाड़ा जिला म आज दू इनामी महिला माओवादी मन ह पुलिस के आगू आत्मसमर्पण करीन हे। एमा ले एक माओवादी उपर दू लाख अउ एक आने माओवादी उपर एक लाख रूपिया के इनाम घोषित रिहीस। खबर के मुताबिक आत्मसमर्पित माओवादी भीमे वेट्टी प्लाटून नंबर चौबीस के सदस्य अउ जोगी कुंजाम मलांगेर-पालनार एलओएस के सदस्य हवय। आत्मसमर्पण करइया माओवादी मन ल राज्य सरकार के पुनर्वास नीति म पच्चीस-पच्चीस हजार रूपिया के सहायता राशि दे गेहे।
दुर्घटना
प्रदेस म पाछु चौबीस घंटा के दउरान होय सड़क हादसा म दस झिन के मउत होगे। उहें, दस ले जादा घायल होगे हे।
रईपुर जिला म मंदिरहसौद थाना क्षेत्र के उमरिया गांव म आज एक तेजी ले आवत कार अनते-तनते होके डिवाडर ल पार करत ट्रक ले जा टकरईस। ए हादसा म कार म बइठे पांच झिन के मउकाच म मउत होगे। ए दुर्घटना अतका भीषण रिहीस कि कार के परखच्चा उड़ गे। घटना के सूचना मिलतेच पुलिस मउका म पहुंचीस अउ क्रेन के मदद ले कार म फंसे सव ल बाहिर निकालीस। आसंका जताय जात हे कि कार के टायर फटे ले ए हादसा होय हे।
राजधानी रईपुर के पुरानी बस्ती थाना क्षेत्र म आज बिहनिया कार ह पैदल चलत एक मनखे ल अपन चपेट म ले लीस, जेमा मउकाच म ओ मनखे के मउत होगे।
ओति, नारायणपुर जिला के मड़ोनार गांव तीर पाछु रतिहा एक ट्रैक्टर के पलटे ले चार झिन के मउत होगे। ओमा एक महिला घलो सामिल हे। उहें, दस ले जादा झन घायल होगे हे। ट्रेक्टर म तोयामेटा, काबानार अउ मुसनार गांव के करीबन सोलह झन बइठे रिहीन अउ ए सबो झिन ओरछा गांव ले चाउर लेके आत रिहीन, तभे मड़ोनार गांव म नाला तीर ट्रेक्टर ह अनते-तनते होके पलट गे। हादसा म घायल लोगन के इलाज छोटे डोंगर के प्राथमिक स्वास्थ्य केन्द्र म होवत हे।
सीजीएमएससी-मामला पूछताछ
छत्तीसगढ़ मेडिकल सर्विसेस कारर्पोरेशन-सीजीएमएससी म होय करीबन छह सौ साठ करोड़ रूपिया के गड़बड़ी के मामला म एसीबी अउ ईओडब्ल्यू ह आईएएस अधिकारी भीमसिंह ले घलो आज पूछताछ करीन। एखर पहिली, काली आईएएस अधिकारी चन्द्रकांत वर्मा ले करीबन छह घंटा पूछताछ करे गे रिहीस। एसीबी अउ ईओडब्ल्यू के अधिकारी सीजीएमएससी म होय घोटाला ले जुड़े दस्तावेज अउ टेंडर के कामकाज ल लेके पूछताछ करत हे।
डीएमएफ घोटाला-मामला
डीएमएफ घोटाला मामला म आरोपी सौम्या चौरसिया, रानू साहू अउ सूर्यकांत तिवारी ल आज रईपुर के विशेष अदालत म पेस करे गीस। आर्थिक अपराध अन्वेषण ब्यूरो-ईओडब्ल्यू ह न्यायालय ले तीनों आरोपी के रिमांड अवधि दस मार्च तक बढ़ाय के मांग करीन, जेला न्यायालय ह मंजूर कर लीस। सौम्या चौरसिया, रानू साहू अउ सूर्यकांत तिवारी के संग माया वारियर अउ मनोज द्विवेदी घलो ईओडब्ल्यू के रिमांड म रइही।
मोहला-मानपुर सिविक एक्शन कार्यक्रम
मोहला-मानपुर जिला के माओवाद प्रभावित घोड़ागांव अउ कुमुड़कट्टा गांव म भारत तिब्बत सीमा पुलिस बल-आईटीबीपी कोति ले सिविक एक्शन कार्यक्रम राखे गीस। ए कार्यक्रम म गांव के लोगन मन ल वाटर फिल्टर अउ वाटर टैंक अउ माईलोगिन मन ल सिलाई मसीन बांटे गीस। कार्यक्रम के बेरा आईटीबीपी के अधिकारी मन ह गांव के लोगन ल नसा ले होवइया नकसान के संबंध म बतावत नशामुक्ति बर प्रेरित करीन।
इग्नू-दीक्षांत समारोह
इंदिरा गांधी राष्ट्रीय मुक्त विश्वविद्यालय-इग्नू के अड़तीसवां दीक्षांत समारोह काली नई दिल्ली म होइस। समारोह म केन्द्रीय शिक्षा मंत्री धर्मेन्द्र प्रधान मुख्य अतिथि के रूप म सामिल होइन। समारोह म देस-दुनिया के तीन लाख तेरह हजार सात सौ सत्तर विद्यार्थी मन ल डिग्री दे गीस। उहें, रईपुर के कचना क्षेत्र के इग्नू क्षेत्रीय केन्द्र म राखे गे कार्यक्रम म भारतीय प्रबंध संस्थान आईआईएम रईपुर के निदेशक प्रोफेसर रामकुमार ककानी माईपहुना के रूप म मौजूद रिहीन। ए मउका म सत्रह सौ विद्यार्थी मन ल डिग्री दे गीस।
उहें, रईपुर के हिदायतुल्लाह राष्ट्रीय विधि विश्वविद्यालय म अवइया आठ मार्च के दीक्षांत समारोह होही। समारोह म माईपहुना सुप्रीम कोर्ट के न्यायमूर्ति पी.एस. नरसिम्हा होही। उहेंं, मुख्यमंत्री विष्णुदेव साय, सुप्रीम कोर्ट के न्यायमूर्ति प्रशांत कुमार मिश्रा अउ उपमुख्यमंत्री अरूण साव विशिष्ट अतिथि के रूप म मौजूद रइही।
अउ अब मौसम के हाल…
पश्चिमी विक्षोभ के असर सिराय ले अवइया चौबीस घंटा के दउरान प्रदेस के तापमान म बढ़वार होय के संभावना हवय। मौसम विभाग के मुताबिक नौ मार्च तक प्रदेस के अधिकतम तापमान म करीबन चार डिग्री सेल्सियस के बढ़वार होय के आसार हवय।