केंद्रीय गृहमंत्री अमित शाह काली अपन प्रवास के दौरान राजधानी रायपुर के अलावा जगदलपुर म आयोजित बस्तर ओलंपिक के समापन समारोह म सामिल होही। केंद्रीय गृहमंत्री जगदलपुर के सर्किट हाउस म आत्मसमर्पित माओवादी मन ले घलो मुलाकात करही।
मिले जानकारी के अनुसार श्री शाह काली बिहनिया ग्यारा बजे ले मंझनिया एक बजे तक राजधानी रायपुर के पुलिस परेड के ग्राउण्ड म आयोजित समारोह म छत्तीसगढ़ पुलिस ल राष्ट्रपति पुलिस कलर अवार्ड ले सम्मानित करही। ए पुरस्कार छत्तीसगढ़ पुलिस ल सत्यनिष्ठा, मानवीय गरिमा अउ पाछू चौबीस बछर के सानदार रिकार्ड बर दे जाही। एखर बाद श्री शाह मंझनिया ढाई बजे जगदलपुर के इंदिरा प्रदर्सनी खेल मैदान म आयोजित बस्तर ओलंपिक के समापन समारोह म सामिल होही। केंद्रीय मंत्री जगदलपुर स्थित सर्किट हाउस म संझा पौने पांच बजे हिंसा छोड़के समाज के मुख्यधारा म सामिल होय माओवादी मन ले मुलाकात करही।
विधानसभा-सत्र/रजत जयंती-01
छत्तीसगढ़ विधानसभा के सीतकालीन सत्र परनदिन सोलह दिसंबर ले सुरू होही। बीस दिसंबर तक चलइया ए सत्र म कुल चार बइठका होही। सत्र के दौरान वित्तीय काम के संगेसंग दूसर शासकीय काम ल संपादित करे जाही।
विधानसभा अध्यक्ष डॉक्टर रमन सिंह ह आज विधानसभा परिसर म आयोजित एक ठन पत्रकारवार्ता म बतइन कि सीतकालीन सत्र के पहलइया दिन सोलह दिसंबर के पूर्व राज्यसभा सदस्य श्रीगोपाल व्यास अउ अविभाजित मध्यप्रदेस के पूर्व विधायक नंदाराम सोरी के निधन के उल्लेख करे जाही। उहें, चालू वित्तीय बछर बर द्वितीय अनुपूरक अनुमान सदन म पेस करे जाही। एखर उपर दूसरइया दिन सत्रह दिसंबर के चर्चा होही। इही, दिन सदन म विनियोग विधेयक उपर घलो चर्चा करे जाही। विधानसभा अध्यक्ष ह बतइन कि ए सत्र बर अभी तक चार ठन विधेयक के सूचना मिले हे, जेमा छत्तीसगढ़ विधानसभा सदस्य वेतन, भत्ता अउ पेंसन संसोधन विधेयक, छत्तीसगढ़ भू-राजस्व संहिता संसोधन विधेयक, छत्तीसगढ़ नगर पालिक निगम अधिनियम-उन्नीस सौ छप्पन ले संबंधित संसोधन विधेयक अउ छत्तीसगढ़ नगर पालिका अधिनियम-उन्नीस सौ इकसठ ले संबंधित संसोधन विधेयक सामिल हे। विधानसभा अध्यक्ष ह बतइन कि सीतकालीन सत्र बर कुल आठ सौ चौदह प्रश्न प्राप्त होय हे। एमा चार सौ बीस तारांकित प्रश्न अउ तीन सौ चौरान्वे अतारांकित प्रश्न सामिल हे। उहें, ध्यानाकर्षण प्रस्ताव के एक सौ चालीस, अशासकीय संकल्प अउ सून्य काल के बारह-बारह अउ याचिका मनके संतावन ठन सूचना प्राप्त होय हे।
विधानसभा-सत्र/रजत जयंती-02
डॉक्टर रमन सिंह ह बतइन कि विधानसभा के रजत जयंती बछर आज ले सुरू होगे हे, जेन ल अवइया बछर चौदह दिसंबर दू हजार पच्चीस तक मनाय जाही। एक साल तक चलइया रजत जयंती बछर म कई ठिन कारीकरम अउ समारोह के आयोजन करे जाही।
विधानसभा अध्यक्ष ह बतइन कि सीतकालिन सत्र के पहलइया दिन सदस्य मनके नर्तक दल डहार ले स्वागत करे जाही। ओमन बतइन कि रजत जयंती बछर के दौरान सप्ताह के हर बुधवार अउ शुक्रवार के राज्य के सबो जिला के दसवीं-बारहवीं, महाविद्यालय अउ विश्वविद्यालय के छात्र-छात्रा मन ल विधानसभा परिसर के भ्रमण कराय जाही। छत्तीसगढ़ विधानसभा स्थित नवीन पुस्तकालय भवन म विधानसभा के पच्चीस बछर के दौरान अलग-अलग अवसर मनके छायाचित्र अउ नवा रायपुर स्थित नवा विधानसभा भवन के मॉडल के प्रदर्सनी घलो लगाय जाही।
विधानसभा अध्यक्ष ह बतइन कि बजट सत्र के दौरान सदस्य मन ल संबोधित करे बर राष्ट्रपति द्रौपदी मुर्मु ल आमंत्रित करे गेहे। रजत जयंती बछर के समाप्ति के अवसर म भव्य अउ गरिमापूर्ण सांस्कृतिक कारीकरम के आयोजन करे जाही। डॉक्टर सिंह ह यहू बतइन कि रजत जयंती बछर म ही छत्तीसगढ़ के नवा रायपुर अटल नगर स्थित नवा विधानसभा भवन के उद्घाटन प्रस्तावित हे। समारोह म मुख्य अतिथि के रूप म प्रधानमंत्री नरेंद्र मोदी ल आमंत्रित करे जाही।
विधानसभा अध्यक्ष ह आज विधानसभा परिसर म रजत जयंती बछर के प्रतीक चिन्ह अउ रजत जयंती बछर उपर केंद्रित एक ठिन वीडियो के विमोचन करीन। ए वीडियो ल छत्तीसगढ़ विधानसभा के वेबसाइट म अपलोड करे जाही।
प्रधानमंत्री रेल-परियोजना
प्रधानमंत्री नरेंद्र मोदी ह काली प्रयागराज म पचपन सौ करोड़ रूपिया के एक सौ सड़सठ परियोजना मन ल राष्ट्र ल समर्पित करीन। संगेसंग भारतीय रेल के सोलह सौ करोड़ रूपिया ले जादा के परियोजना मनके लोकार्पण घलो करीन। एखर तहत झूंसी-प्रयागराज लाईन के दोहरीकरण अउ विद्युतीकरण के संगेसंग गंगा नदी म बने रेल पूल ल राष्ट्र ल समर्पित करीन। ए परियोजना ले महाकुंभ के दौरान श्रध्दालु मनके यात्रा ल सुगम बनाय म मदद मिलही। संग ही प्रयागराज जंक्शन के इलेक्ट्रानिक इंटरलॉकिंग घलो करे गेहे। एखर ले ट्रेन मन के आवाजाही अउ सुरक्षा दूनो बाढ़ही।
राष्ट्रीय लोक अदालत
प्रदेस के सब्बो जिला अउ व्यवहार न्यायालय मन म आज राष्ट्रीय लोक अदालत के आयोजन करे गीस। लोक अदालत म आपसी सुलह-राजीनामा के जरिया कई ठन मामला के निपटारा करे गीस। एमा मोटर दुर्घटना दावा, बैंक रिकवरी प्रकरण, विद्युत संबंधी मामला अउ पारिवारिक विवाद के मामला के निराकरण करे गीस। एखर अलावा राजस्व, बैंक, विद्युत विभाग, दूरसंचार विभाग, नगर-निगम, नगर पालिका परिषद, नगर पंचायत म वसूली संबंधी लंबित मामला घलो जिला विधिक सेवा प्राधिकरण म प्रस्तुत करे गेहे। जेखर निराकरण आपसी राजीनामा के आधार म करे गेहे।
सोल्जरथॉन-मैराथन
भारतीय सेना डहार ले छत्तीसगढ़ शासन के सहयोग ले काली पंद्रह दिसंबर के नवा रायपुर के सेंट्रल पार्क म सोल्जरथॉन मैराथन के आयोजन करे जाही। मैराथन म अलग-अलग श्रेणी के दौड़ अउ पैदल चाल के आयोजन करे जाही। जेमा इक्कीस किलोमीटर, दस किलोमीटर अउ पांच किलोमीटर के दौड़ के संगेसंग तीन किलोमीटर के पैदल यात्रा सामिल हे। ए दौड़ नवा रायपुर स्थित सेंट्रल पार्क ले सुरू होही।
आयोजन म प्रतिभागी अउ दर्सक मनके सुविधा बर काली बिहनिया पांच बजे ले रायपुर के अलग-अलग जघा ले नवा रायपुर तक बिसेस बीआरटीएस बस सेवा निसुल्क उपलब्ध रइही। ए बस मन ल भाठागांव बस स्टैंड, पचपेड़ी नाका, कमल विहार, देवपुरी चौक, अटल एक्सप्रेस मार्ग अउ रेलवे स्टेसन ले संचालित करे जाही।
बतादन कि ए आयोजन पाकिस्तान के संग उन्नीस सौ इकहत्तर के युध्द म भारत के जीत के तिरपनवां वर्षगांठ के उपलक्ष म होही। प्रदर्सनी म युध्द ले संबंधित सैन्य कलाकृति, तस्वीर अउ यादगार चीज मन ल प्रदर्सित करे जाही। संगेसंग देस के रक्षा म प्राण न्यौछावर करइया शहीद सैनिक मन ल श्रध्दांजलि दे जाही।
रायपुर रेलमंडल-मधुरम मीडिया संवाद
दक्षिण पूर्व मध्य रेलवे के रायपुर मंडल म काली पहिली बार मधुरम मीडिया संवाद के आयोजन करे गीस। ए संवाद म मंडल रेल प्रबंधक संजीव कुमार सामिल होइन। ए दौरान वरिष्ठ मंडल वाणिज्य प्रबंधक अवधेश कुमार त्रिवेदी ह पत्रकार मन ल प्रोजेक्ट के जरिया रायपुर रेल मंडल के उपलब्धि मन ले अवगत कराइन। एखर बाद मंडल रेल प्रबंधक संजीव कुमार रायपुर रेल मंडल म रेल के बेहतर सेवा बर करे जात काम मन के जानकारी दीन। ए दौरान ओमन रेल यात्री मनके सेवा म सुधार, ऑनलाइन सिकायत मनके निराकरण समेत अलग-अलग समस्या मनके समाधान के जानकारी दीन।
अउ अब मौसम के हाल…
प्रदेस म जाड़ सरलग बाढ़त हे। सरगुजा संभाग के संगेसंग कुछ जघा म सीतलहर चले के स्थिति बने हुए हे। मौसम विभाग विज्ञानी एच.पी.चंद्रा ह बतइन कि प्रदेस म बंगाल के खाड़ी ले ठंडा अउ सुष्क हवा लगातार आवत हे। एखर असर ले न्यूनतम तापमान म अउ गिरावट आय के संभावना हे।