देस म दुर्लभ बीमारी के ईलाज बर चार ठन जैनरिक दवई बने बर चालू होगे हे। केंद्रीय स्वास्थ्य मंत्रालय ह किहीस हे कि एखर ले दुर्लभ बीमारी ले पीड़ित मरीज मन ल कम दाम म दवई मिल पाही। चार दुर्लभ बीमारी टाइरोसिनेमिया टाइप-वन, गौचर्स रोग, विल्सन्स डिजीज अउ ड्रावेट-लेन्नॉक्स गैसटॉट सिन्ड्रोम के दवई अब बाजार म मिलत हे।
नीति आयोग के स्वास्थ्य संबंधी सदस्य डॉक्टर वी.के.पॉल ह नई दिल्ली म किहीन हे कि ए बीमारी बर आठ ठन दवई हवय जेमा ले चार ठन बाजार म मिलत हे। बांचे चार ह अनुमति के अगोरा म हवय। ओमन ह बताइन कि भारतीय विनिर्माता ए दवई ल बनावत हे। टाइरोसिनेमिया टाइप-वन ल पीलिया, बुखार अउ लीवर कैंसर ले चिन्हे जाथे। एखर ईलाज बर निटिसिनॉन औषधि बनाय गेहे। उहें, गौचर्स रोग के उपचार बर ऐलिगलुस्टैट दवई विकसित करे गेहे। ए बीमारी ले रोगी के लीवर ह बाढ़ जाथे अउ अब्बड़ थकासी लगथे। विल्सन्स डिजीज के कारण आरबीसी हीमोलोसिस हो जाथे। ऐखर उपचार बर स्वदेसी दवाई ट्राईएंटीन बनाय गेहे। एखरे जइसन ड्रावेट-लेन्नॉक्स गैसटॉट सिन्ड्रोम के ईलाज बर कैनाबिडिओल विकसित करे गेहे।
राज्यपाल-डी.लिट उपाधि
राज्यपाल विश्वभूषण हरिचंदन ल भुवनेश्वर के कलिंग इंस्टिट्यूट ऑफ सोसल साइंस ह डी.लिट के मानद उपाधि प्रदान करे हे। ए उपाधि उंहला ओड़िसा के राज्यपाल रघुवर दास ह प्रदान करीन। ए सम्मान सामाजिक अउ सार्वजनिक जीवन म सक्रियता ले जनसेवा करे बर दे गीस हे।
पीएम-मन की बात
प्रधानमंत्री नरेंद्र मोदी ह काली बिहनिया ग्यारा बजे आकाशवाणी ले ‘‘मन की बात‘‘ कारीकरम म देस-विदेस के लोगन मन संग अपन बिचार साझा करही। ए ह मासिक रेडियो कारीकरम के एक सौ सातवां कड़ी होही।
ए कारीकरम आकाशवाणी अउ दूरदर्शन के जम्मों नेटवर्क म परसारित करे जाही अउ आकाशवाणी समाचार के वेबसाइट-न्यूज ऑन एआईआर मोबाइल ऐप अउ नरेंद्र मोदी मोबाइल ऐप म घलो उपलब्ध होही। मन की बात कारीकरम ल आकाशवाणी समाचार, दूरदर्शन समाचार, प्रधानमंत्री कार्यालय अउ सूचना तथा प्रसारण मंत्रालय के यूट्यूब चैनल म घलो प्रसारित करे जाही। हिंदी प्रसारण के तुरते बाद ए कारीकरम के क्षेत्रीय भाषा मन म घलो प्रसारण करे जाही।
मतगणना-तैयारी
प्रदेस म विधानसभा चुनई के मतगणना बर तीन दिसंबर के बिहनिया आठ बजे ले वोट के गिनती सुरू होही। एखर बर निर्वाचन आयोग कोति ले सबो तियारी करे जात हे। सबो जिला के स्ट्रांग रूम म ईवीएम राखे गेहे, जेखर सुरक्षा बर अर्धसैनिक बल अउ पुलिस के तैनाती करे गेहे।
बीजापुर जिला के स्ट्रांग रूम म केंद्रीय सुरक्षाबल के संग स्थानीय पुलिस बल के ड्यूटी लगाय गेहे। उहें, आने-आने पार्टी के कार्यकर्ता मन घलो निगरानी करत हे। ए स्ट्रांग रूम म 245 ईवीएम मसीन ल सीसीटीवी कैमरा के नजर म राखे गेहे।
इही बीच, बलरामपुर जिला म सहायक मुख्य निर्वाचन पदाधिकारी प्रकाश त्रिपाठी ह भेलवाडीह म बनाय गे स्ट्रांग रूम के निरीक्षण करीन अउ अधिकारी मन ल मतगणना बर सब्बों तियारी पूरा करे के निरदेस दीन।
उंहे कोंडागंाव जिला के पुलिस अधीक्षक वाय. अक्षय कुमार ह चिखलपुट्टी के आरक्षी केंद्र म पुलिस अधिकारी अउ कर्मचारी मनके परेड के निरीक्षण करीन। ओमन ह पुलिस अधिकारी मन ल मतगणना के दउरान लोगन मन संग बने समन्वय बनाके काम करे के निरदेस दीन।
जिले की चिट्ठी
आकाशवानी रईपुर के प्रादेसिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सब्बों केंद्र एके संग रिले करही। ए दारी के अंक म जशपुर जिला के गतिविधि के बारे म जानकारी दे जाही।
ट्रेन-परिचालन
यात्री मनके सुविधा बर रेलवे प्रशासन ह गोंदिया-बरौनी-गोंदिया एक्सप्रेस ल कटनी-जबलपुर-नैनपुर-बालाघाट होके चलाय के निर्णय ले हे। एखर ले पहिली ए रेल ल चंदिया रोड स्टेसन म तीसरा रेल लाइन बने के काम के कारण रद्द कर दे गे रिहीस।
इही बीच, जाड़ म कोहरा के कारण उत्तर पूर्व रेलवे जोन म चलने वाला छपरा-दुर्ग-छपरा सारनाथ एक्सप्रेस ल दिसंबर महिना के कुछू-कुछू दिन बर रद्द करे गेहे। उहें, निजामुद्दीन-अंबिकापुर-निजामुद्
उहें, टाटानगर-नेताजी सुभाषचंद्र बोस-ईतवारी एक्सप्रेस ल आज रद्द कर दे गेहे। ए ट्रेन ह परनदीन सत्ताईस नवंबर के घलो नइ चले।
हाथी-आतंक
रायगढ़ जिला के बांधपाली म पाछू कुछ दिन ले दस ले बारा जंगली हाथी के दल ह घूमत हे। हाथी दल ह किसनहा मनके फसल ल नुकसान पहुंचाय हे। वन विभाग ह मुनादी कराके ग्रामीण मनका हाथी के तीर नइ जाय के समझाईस दिन हे। वन विभाग के संगेसंग गांव के मनखे मन घलो हाथी दल उपर नजर रखे हे।
दुर्घटना
खैरागढ़-छुईखदान-गंडई जिला म होय एक सड़क दुर्घटना म दू झिन मनखे के मउत होगे। उहें, दू झन आने गंभीर रूप ले घायल होगे हे। ए घटना ठेलकाडीह के सिरसाही गांव तीर दू मोटर साइकिल के टक्कर ले होइस। हादसा म बीतें अउ घायल मनखे मन ह कोपेगांव के रहईया बताय गेहे।
ऊर्जा संरक्षण-चित्रकला प्रतियोगिता
केंद्रीय विद्युत मंत्रालय कोति ले दुरूग के कुम्हारी म राज्य स्तरीय चित्रकला प्रतियोगिता राखे गीस। ऊर्जा बचाय के बिषय उपर आधारित ए चित्रकला प्रतियोगिता म आने-आने स्कूली लइका मन ह ऊर्जा संरक्षण उपर चित्र प्रदर्सित करीन। पुरस्कार वितरण अउ समापन समारोह के मुख्य अतिथि लोक शिक्षण विभाग के निदेसक सुनील कुमार जैन ह रिहीन। ओमन ह किहीन कि जलवायु परिवर्तन के प्रभाव पर्यावरण उपर होवत हे। ओमन ह ऊर्जा बर आने-आने स्त्रोत के उपयोग करे के बात किहीन।
प्रकाश पर्व-शोभायात्रा
सिक्ख मनके गुरू गुरूनानक देव के जनम उत्सव प्रकाश पर्व के मउका म राजधानी रईपुर समेत आने-आने जघा म शोभायात्रा निकाले गीस। रईपुर म पंच प्यारे के अगुवई म स्टेसन रोड के गुरूद्वारा ले नगर कीर्तन निकाले गीस। जेखर आने-आने बेपारी संगठन अउ आम मनखे मन जघा-जघा सुवागत करीन।
एखरे जइसन, राजनांदगांव जिला म गुरूनानक देव के प्रकाश पर्व म तीन दिनी कारीकरम के सुभारंभ नगर कीर्तन अउ शोभायात्रा ले होइस। नगर कीर्तन उपर पुष्प बरसा करे गीस। शोभायात्रा के अगुवई नान्हे-नान घुड़सवार मन करीन। ए मउका म गुरूद्वारा के संगेसंग कतकोन ठन जघा म भंडारा घलो राखे गीस।
मौसम
प्रदेस म अवईया चौबीस घंटा म दक्षिण बस्तर के कुछू-कुछू जघा म थोरकुन बरसा होय के संभावना हे। मौसम विभाग के अनुसार ए द्रोणिका ह उत्तर दिसा म स्थित हे। एखर प्रभाव ले हवा म नमी बाढ़ही फेर, न्यूनतम तापमान म कोनो बिसेस परिवर्तन के संभावना नइ हे।
संक्षिप्त समाचार
– रईपुर पुलिस ह सहर के आने-आने जघा म चोरी के मामला म तीन झन मनखे ल गिरफ्तार करे हे।
– धमतरी जिला के बोराई पुलिस ह एक ट्रक ले अस्सी किलो गांजा पकड़े हे। ए मामला म दू झिन आरोपी ल गिरफ्तार करे गेहे। जब्त गांजा के अनुमानित कीमत सोला लाख रूपिया बताय गेहे।
अउ
– जांजगीर- चांपा जिला रोजगार कार्यालय कोति ले युवा मन ल निजी क्षेत्र म रोजगार देवाय के उद्देस्य ले अवईया तीस नवंबर के जिला रोजगार कार्यालय म बिहनिया ग्यारा बजे ले प्लेसमेंट कैंप राखे गेहे।