प्रधानमंत्री ह किहीन कि छब्बीस नवंबर के दिन ह यहू खातिर महत्तम वाले हे काबर कि बछर उन्नीस सौ उनचास म इही तिथि के संविधान सभा ह भारत के संविधान ल अंगीकार करे रिहीस। अउ फेर ए संविधान ह छब्बीस जनवरी उन्नीस सौ पचास म पूरा भारत म लागू होइस। एमा अब तक कुल एक सौ छै घांव संसोधन करे गेहे।
श्री मोदी ह किहीन कि वोकल फॉर लोकल के सफलता ह विकसित भारत अउ समृध्द भारत के द्वार खोलत हे। वोकल फॉर लोकल अभियान ले देसभर के अर्थव्यवस्था मजबूत होवत हे उहें, ए ह रोजगार अउ विकास के गारंटी हरय। प्रधानमंत्री ह भरोसा दिखावत किहीन कि देस ह विकसित बने के संकल्प ल पूरा करही अउ जय जवान, जय किसान, जय विज्ञान, जय अनुसंधान ल प्रोत्साहन दिही।
श्री मोदी ह प्रकाश पर्व ले आगू गुरूनानक देव ल सुरता करीन। ओमन किहीन कि गुरूनानक जी के अनमोल संदेस ह भारते म नही भलूक दुनिया भर म आज घलो प्रेरक अउ प्रासंगिक हे।संविधान दिवस
आज संविधान दिवस हरय। संविधान सभा ह बछर उन्नीस सौ ओनचास म आजे के दिन छब्बीस नवंबर के संविधान ल औपचारिक रूप ले स्वीकार करे रिहीस। जउन ह छब्बीस जनवरी उन्नीस सौ पचास ले लागू होइस। केंद्र सरकार ह बछर दू हजार पन्द्रह म नागरिक मन म संवैधानिक मूल्य ल बढ़ावा देबर छब्बीस नवंबर ल हर बछर संविधान दिवस के रूप म मनाय के फैसला करे रिहीस। आज संविधान दिवस के मउका म राष्ट्रपति द्रौपदी मुर्म ह आज सर्वोच्च न्यायलय म डॉक्टर भीमराव अंबेडकर के प्रतिमा के आज अनावरण करीन।
छत्तीसगढ़ म घलो संविधान दिवस के मउका म अब्बड़ अकन कारीकरम होवत हे। कोंडागांव अउ मंुगेली जिला कलेक्टेªट परिसर म संविधान के प्रस्तावना ल पढ़ीन। उहें, रईपुर के स्कूल कॉलेज मन म घलो पढ़ईया लइका मन संविधान के विशेषता जाने के संगे उद्देस्यिका ल दोहराइन।
ओति राजनांदगांव एसपी ऑफिस समेत पुलिस लाइन अउ थाना चौकी के जवान मन संविधान दिवस के सपथ लीन।
इही तरह जांजगीर-चांपा जिला के कुटराबोड़ गांव म घलो संविधान दिवस
मनाय गीस। ए मउका म मलखंभ खिलाड़ी मन अपन खेल प्रतिभा ल दिखाइन तहा ए खिलाड़ी अउ लोगन मन ल संविधान दिवस के सपथ देवाय गीस।
पीएससी-अधिसूचना
छत्तीसगढ़ लोक सेवा आयोग-पीएससी ह राज्य सेवा परीक्षा- दू हजार तेईस के प्रारंभिक परीक्षा के तारीख घोषित कर देहे। राज्य शासन के कई ठिन विभाग म कुल दू सौ बयालीस खाली पद म भर्ती बर ग्यारा फरवरी दू हजार चौबीस के बिहनिया दस बजे ले मंझनिया एक बजे तक अउ मंझनिया तीन बजे ले संझा पांच बजे तक दू पाली म प्रारंभिक परीक्षा होही। आयोग डहार ले जारी अधिसूचना मुताबिक प्रारंभिक परीक्षा बर ऑनलाइन आवेदन अवइया एक दिसंबर ले तीस दिसंबर तक दे जा सकही। राज्य सेवा परीक्षा दू हजार तेईस बर कोनो भी तरह के मेनुअल या फेर डाक ले पठोय आवेदन पत्र आयोग डहार ले नइ झोंके जाही। उहें, आयोग ह मुख्य परीक्षा के संभावित तारीख तेरह, चौदह, पंद्रह अउ सोलह जून दू हजार चौबीस तय करे गेहे।
मतगणना-तैयारी
छत्तीसगढ़ विधानसभा आम चुनाव दू हजार तेईस के चलत मतगणना याने काउंटिंग ह अवईया तीन दिसंबर के सबो जिला मुख्यालय मन म कड़ा सुरक्षा व्यवस्था भीतरी होही। एखर बर निर्वाचन आयोग डहार ले सबो तियारी करे जात हे।
दुरूग जिला म भिलाई के जुनवानी स्थित श्री शंकराचार्य इंजीनियरिंग कॉलेज म बनाय गे स्ट्रांग रूम म जिला के छै ठिन विधानसभा क्षेत्र अउ बेमेतरा जिला के साजा अउ बेमेतरा विधानसभा क्षेत्र के कुछेक ईवीएम ल कड़ा सुरक्षा भीतरी राखे गेेहे।
ओति राजनांदगांव जिला के पुलिस अधीक्षक मोहित गर्ग अउ अतिरिक्त पुलिस अधीक्षक राहुल देव शर्मा ह गंजमंडी स्थित मतगणना जघा के इंस्पेक्सन करीन। स्ट्रांग रूम म ईवीएम अउ वीवीपैट मसीन मनके सुरक्षा केंद्रीय सुरक्षा बल डहार ले करे जात हे। संगे सीसीटीवी कैमरा के माध्यम ले घलोक ईवीएम उपर चौबीसों घंटा निगरानी राखे जात हे।
धान खरीदी
प्रदेस म ए बखत किसान मनले समर्थन मूल्य म धान बिसाय जात हे। अब तक ले दू लाख पचयासी हजार किसान मनले ग्यारा लाख तिहत्तर हजार मीट्रिक टन ले जादा धान बिसाय जा चुके हे। धान के एवज म किसान मन ल भुगतान करे बर मार्कफेड डहार ले अपेक्स बैंक ल तीन हजार एक सौ अठ्ठारा करोड़ रूपिया के रासि जारी करे गेहे। उहें, राईस मिलर्स डहार ले कस्टम मीलिंग बर धान के उठाव करे जात हे। अब तक ले तीन लाख उनसठ हजार मीट्रिक टन ले जादा धान के उठाव बर डीओ जारी करे गेहे, अउ करीबन एक लाख संतावन हजार मीट्रिक टन धान के उठाव होगे हे।
इहां, ए बतादन कि प्रदेस म चालू खरीफ विपणन बछर म समर्थन मूल्य म धान बिसई बीतें एक नवंबर ले चलत हे। जउन ह अवईया इकतीस जनवरी तक ले जारी रइही।
एनसीसी दिवस समारोह
राष्ट्रीय कैडेट कोर-एनसीसी के पचहत्तरवां एनसीसी दिवस समारोह आज राजनांदगांव के स्टेट हाईस्कूल परेड ग्राउंड म मनाय गीस। ए मउका म माई पहूना राजनांदगांव के पहलईया अतिरिक्त जिला अउ सत्र न्यायधीश दीपक कुमार गुप्ता ह परेड के निरीक्षण करीन। ए दौरान सबो कैडेट मन ल एनसीसी के सपथ देवाय गीस।
गुरूनानक जयंती-कार्तिक पूर्णिमा
सिक्ख मनके पहलईया गुरू अउ सिक्खपंथ के संस्थापक गुरूनानक देव जी के काली जयंती हरय। ए मउका म छत्तीसगढ़ समेत देसभर म कई ठिन कारीकरम होही।
उहें, कातिक पुन्नी काली हरय। ए मउका म राजधानी रईपुर समेत प्रदेस के कई ठिन जघा म नदिया तीर मेला भराही। इंहा ए बतादन कि सरद पुर्णिमा ले कातिक पुन्नी तक मुंदरहा बेरा म एक महिना तक ले नदिया म नहाय के परंपरा निभाय जथे।
विधानसभा अध्यक्ष डॉक्टर चरणदास महंत ह गुरूनानक देवजी के जयंती अउ कातिक पुन्नी के सुघ्घर मउका म प्रदेस के रहवईया मन ल बधई अउ सुभकामना दीन हे।
कोरबा-जमीन धंसा
कोरबा जिला के पसान इलाका म एक घांव फेर भुईया धसके के घटना आगू आय हे। मिले जानकारी मुताबिक विजय वेस्ट कोयला खदान ले करीबन एक किलोमीटर दूरिहा बीजाडांड गांव म करीबन एक एकड़ भुईयां ह पांच ले छै फीट खाल्हे डहार धंस गे। ए घटना बारे म साउथ ईस्टर्न कोल फील्ड लिमिटेड-एसईसीएल के रानी अटारी खदान मैनेजमेंट के कहना हे कि पर्यावरण विभाग अउ राज्य शासन ले अनुमति लेगे हे फेर खदान के तीर-तखार म तीन किलोमीटर के एरिया म ए तरह के घटना होना सामान्य बात हे।
बीजापुर-रक्तदान शिविर
जनपद पंचायत बीजापुर म रक्तदान अउ स्वास्थ्य परीक्षण सिविर राखे गीस। भारतीय रेडक्रॉस सोसायटी के मार्गदर्सन म होय ए सिविर म लोगन मन करीबन सैंतीस यूनिट रक्तदान करीन। ए मउका म जिला कलेक्टर राजेन्द्र कुमार कटारा ह खून देवइया मनखे मन ल प्रसस्ति पत्र देके सम्मानित करीन। कलेक्टर ह बताइन कि जिला म खून के कमी वाले याने एनीमिया पीड़ित माईलोगिन मनके संख्या जादा होय के सेति जिला अस्पताल म खून के व्यवस्था करना पढ़थे। एला देखत ए सिविर ल राखे गे रिहीस। जिहां लोगन मनके स्वास्थ्य परीक्षण घलो होइस।