केंद्रीय निर्वाचन आयोग ह देस के जम्मों पात्र नागरिक मन ले अपील करे हे कि ओमन मतदाता सूची म अपन नाव दरज कराय अउ अपन पूरा जानबा ल सही कराय। आयोग ह केहे हे कि बिसेस सारांश पुनरीक्षण-एसएसआर, दू हजार चौबीस अवईया महिना के नौ दिसंबर तक जारी रइही। सोशल मीडिया प्लेटफॉर्म के एक ठिन पोस्ट म आयोग ह केहे हे कि ए पुनरीक्षण म लोगन मन मतदाता सूची म अपन नांव दरज करा सकथे अउ अपन पता के नवीकरण के संगेसंग पूरा विवरण ल सही करवा सकथे।
अवईया लोकसभा चुनई ल देखत मतदाता सूची मनके पुनरीक्षण जरूरी हे। जउन युवा मन के एक जनवरी दू हजार चौबीस तक अठ्ठारा साल के उमर होगे हे। ओमन मतदाता सूची म अपन नांव दरज करा सकथे। लोकसभा के चुनई होय के पहिली ओमन ल ए मउका दे जात हे। आयोग ह एखर ले जुड़े दावा अउ आपत्ति के निपटारा छब्बीस दिसंबर के करही। मतदाता सूची के आखरी प्रकासन पांच जनवरी दू हजार चौबीस के करे जाही।
स्ट्रांग रूम-सुरक्षा
प्रदेस म विधानसभा चुनई के पहिली अउ दूसर चरण के मतदान के बाद जिला मुख्यालय मन म राखेगे स्ट्रांग रूम मन म ईवीएम के कड़ा सुरक्षा राखे गेहे। केंद्रीय सुरक्षा बल के जवान मन सरलग ईवीएम के निगरानी करत हे। संगेसंग सीसीटीवी कैमरा के माध्यम ले घलो स्ट्रांग रूम उपर नजर राखे जात हे। रईपुर जिला के जम्मों विधानसभा क्षेत्र मन के ईवीएम मसीन ल सेजबहार स्थित इंजीनियरिंग कॉलेज म बनाय गे स्ट्रांग रूम म राखे गेहे। कॉलेज परिसर के जम्मों कोति सीसीटीवी कैमरा लगाय के संगेसंग तीन लेयर म सुरक्षा के तगडा़ बेवस्था करे गेहे। स्ट्रांग रूम के अंदर सीआईएसएफ के जवान मनके ड्यूटी लगाय गेहे। दूसर लेयर म छत्तीसगढ़ सशस्त्र बल सीएएफ के जवान अउ बाहिर तीसर लेयर म जिला पुलिस बल के जवान तैनात हे। त उहें, बस्तर संभाग के बारह विधानसभा के ईवीएम मसीन मन ल जिला मुख्यालय म बनाय गे स्ट्रांग रूम म राखे गेहे। जगदलपुर स्थित स्ट्रांग रूम म तीन विधानसभा क्षेत्र के ईवीएम राखे गेहे। निर्वाचन आयोग अउ जिला प्रशासन डहार ले स्ट्रांग रूम म राखे गे ईवीएम के कड़ा सुरक्षा बर जिला पुलिस बल के संगेसंग सीआरपीएफ अउ बीएसएफ के जवान मनके तैनाती करे गेहे।
निर्वाचन आयोग-जब्त
केंद्रीय निर्वाचन आयोग ह बतइन कि छत्तीसगढ़ के संगेसंग पांच राज्य मन म चुनाव के घोषणा होय के बाद ले एक हजार सात सौ साठ करोड़ रूपिया के जब्ती करे गेहे। ए ह बछर दू हजार अठ्ठारा म होय विधानसभा चुनई म जब्त करे गे करीबन दू पन्द्रह करोड़ रूपिया के रासि ले बहुत जादा हे। ए आकड़ा ह दर्साथे कि निर्वाचन आयोग ह स्वतंत्र, निष्पक्ष अउ लालच ले मुक्त चुनाव कराय बर हर संभव प्रयास करत हे। ए बार चुनाव जब्ती प्रबंधन प्रणाली के माध्यम ले नवा-नवा मसीन के परयोग करे गे रिहीस।
रमन सिंह-मांग
भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह किहीन हे कि चुनाव ड्यूटी ले अलग रेहे प्रशासन के अधिकारी अउ कर्मचारी मनके डाक मतपत्र म संसोधन नइ होना निर्वाचन के काम म चूक हरय। डॉक्टर सिंह ह सोसल मीडिया म जानबा देवत बतइन कि ए चुनाव म जउन अधिकारी अउ कर्मचारी मतदान नइ करे हे। उंखर मन बर मुख्य निर्वाचन पदाधिकारी ले आग्रह करे गेहे कि ए मामला ल गंभीरता ले लेके ओखर मन बर मतदान करवाय के जल्दी फैसला लेवय।
सीटेट-नीट/यूजी
केंद्रीय माध्यमिक शिक्षा बोर्ड-सीबीएसई कोति ले होवइया केंद्रीय शिक्षक पात्रता परीक्षा सीटेट एसो दिसंबर के बजाय जनवरी म होही। पहिली ए परीक्षा जुलाई अउ दिसंबर म होवत रिहीस। फेर ए बार दिसंबर के परीक्षा इक्कीस जनवरी के होही। ए परीक्षा पेन अउ पेपर मोड माने ओएमआर म होही। परीक्षा ह प्रदेस के रईपुर, दुरूग, बिलासपुर के संगेसंग एक सौ पैंतीस सहर मन म होही। सीटेट बर अर्जी देके काम चलत हे। तेईस नवंबर तक अर्जी दे जा सकथे। त उहें, नेसनल टेस्टिंग एजेंसी एनटीए कोति ले मेडिकल प्रवेस परीक्षा नीट-यूजी दू हजार चोबीस के सिलेबस अवईया हफ्ता जारी होही। नीट-यूजी बर ऑनलाइन रजिस्ट्रेसन के काम जनवरी ले सुरू हो सकथे। ए परीक्षा अवईया साल पांच मई के होही।
छठ पर्व-समापन
लोक आस्था के परब ‘‘छठ‘‘ आज बिहनिया उगत सूरज ल अर्घ्य देके संग सिरागे। ए मउका म बड़ संख्या म पूजा-पाठ करईया श्रध्दालु मन ह नदिया, तरिया अउ बांधा म जाके पानी म खड़े होके सूर्य देव ल अर्घ्य दीन। पूजा-पाठ के बाद छत्तीस घंटा तक रेहे उपास ल तोड़े गीस। राजधानी रईपुर के खारून नदिया म घलो पूजा-पाठ करईया लोगन मनके भीड़ देखे गीस। त उहें, बिलासपुर के तोरवा छठघाट म घलो भक्तिभाव के संग लोगन मन पूजा-पाठ करीन। जगदलपुर स्थित दलपत सागर, इंद्रावती नदिया के महादेव घाट अउ गंगामुंडा तरिया म घलो बड़ संख्या म श्रध्दालु मन पूजा-पाठ करीन। ए दउरान जिला प्रशासन डहार ले सुरक्षा के पूरा बेवस्था करे गे रिहीस। एखर पहिली काली रईपुर के महादेव घाट म होय छठ महापर्व कारीकरम म मुख्यमंत्री भूपेश बघेल, पूर्व मुख्यमंत्री डॉक्टर रमन सिंह के संगेसंग कतकोन विधायक, पूर्व विधायक मन सामिल होईन।
रायपुर-क्रिकेट मैच
भारत अउ आस्ट्रेलिया के बीच एक दिसंबर के टी-ट्वेंटी अंतर्राष्ट्रीय क्रिकेट मैच राजधानी रईपुर के शहीद वीरनारायण सिंह अंतर्राष्ट्रीय क्रिकेट स्टेडियम म खेले जाही। छत्तीसगढ़ राज्य क्रिकेट संघ अउ जिला प्रशासन ह एखर पुष्टि कर देहे। छत्तीसगढ़ राज्य क्रिकेट संघ के मुताबिक एक दिसंबर के नागपुर म होवईया टी-ट्वेंटी क्रिकेट मैच ह अब रईपुर म खेले जाही। मैच ल लेके क्रिकेट संघ तियारी सुरू कर देहे।
संविधान दिवस-प्रतियोगिता
संसदीय कार्य मंत्रालय ह संविधान दिवस मनाय बर लोगन मनले संविधान प्रश्नोत्तरी अउ प्रस्तावना ल ऑनलाइन पढ़े के प्रतियोगिता म सामिल होय बर आमंत्रित करे हे। मंत्रालय ह लोगन मन के एमा भागीदारी जादा ले जादा होय एखर बर दू ठिन वेब पोर्टल चालू करे हे। लोगन मन वेबसाइट-रीड प्रिमेम्बल डॉट एनआईसी डॉट इन अउ कॉन्सीट्यूटेशन क्विज डॉट एनआईसी डॉट इन म जाके संविधान के प्रस्तावना ल पढ़ सकथे अउ प्रतियोगिता म भाग लेके प्रमाण पत्र ले सकथे। मंत्रालय ह केहे हे कि भारत के जम्मों बाइस ठिन राष्ट्रीय भाषा मन म प्रस्तावना पढ़े जा सकथे। संविधान दिवस हर साल छब्बीस नवंबर के मनाय जाथे। इही दिन संविधान सभा ह एला पारित करे रिहीस।
बीएड/डीएलएड सीटें
प्रदेस म बैचलर ऑफ एजुकेसन-बीएड अउ डिप्लोमा इन एलीमेंट्री एजुकेसन डीएलएड पाठ्यक्रम के प्रवेस परीक्षा पूरा होगे हे। फेर अभी घलो बीएड म दू हजार चार सौ अउ डीएलएड म आठ सौ पचास सीट खाली हे। ए खाली सीट मन म प्रवेस बर तारीक के घोषणा जलदीच करे जाही। जानबा के मुताबिक एससीईआरटी कोति ले प्रवेस के काम आने-आने चरण म पूरा होगे हे। हर चरण म छात्र मन ल दो-दो राउण्ड म प्रवेस लेके बेरा देगे रिहीस। फेर एखर बाद घलो बीएड अउ डीएलएड के सीट खाली रही गेहे। प्रदेस म विधानसभा चुनई होय के सेति आदर्स आचार संहिता लागू होय आचार संहिता के हटते प्रवेस के काम सुरू हो जही। जानबा के मुताबिक राज्य म ए बेरा बीएड के पढ़ई करीबन एक सौ छियालीस ठिन कॉलेज मन म होवत हे। जिहां चौदह हजार चार सौ सीट हवय। अइसने इंक्यानवे ठिन कॉलेज मन म डीएलएड के छै हजार सात सौ पचीस सीट हवय। प्राइवेट बीएड कॉलेज मन म दूसर राज्य के छात्र मन बर बीस प्रतिसत सीट आरक्षित हे। शासकीय कॉलेज मनके बीएड अउ डीएलएड के सीट ह पहिली चरण के काउंसिलिंग म भर गेहे। प्राइवेट कॉलेज मन म सीट खाली हे।
मौसम
प्रदेस म अवईया चौबीस घंटा के दउरान अधिकतम अउ न्यूनतम तापमान म कोनो प्रकार के बदलाव होय के संभावना नइ हे। मौसम विभाग ले मिले जानबा के मुताबिक तापमान म थोरकिन बढ़ोत्तरी हो सकथे। त उहें, कोनो-कोनो जघा म हल्का बादर घपटे रइही। संगेसंग बिहनिया के बेरा म कोहरा बाढ़े के संभावना हे।
धान खरीदी
प्रदेस म ए बेरा समर्थन मूल्य म धान बिसाय के काम चलत हे। इही कड़ी म सूरजपुर जिला म आज कलेक्टर संजय अग्रवाल ह आदिमजाति सहकारी समिति देवनगर अउ चंदरपुर म धान खरीदी के जानबा लीन। ए दउरान ओमन धान खरीदी के बेवस्था ल देखिन उहें, बलरामपुर जिला म अब तक आठ सौ इकसठ कुंटल ले जादा के धान खरीदी करे जा चुके हे।