प्रदेस म दू चरण म संपन्न होय विधानसभा चुनाव म मतदान करईया पुरूष मतदाता के मुकाबला वोट डलइया महिला मतदाता मनके संख्या जादा रिहीस। पचास विधानसभा क्षेत्र म महिला मन पुरूष के तुलना म जादा मतदान करीन। छत्तीसगढ़ म दू चरण म होय मतदान म कुल एक करोड़ पचपन लाख इकसठ हजार चार सौ साठ मतदाता मन अपन मताधिकार ल बउरीन। ऐमा ससत्तर लाख अड़तालीस हजार छै सौ बारा पुरूष मतदाता अउ अठहत्तर लाख बारा हजार छै सौ इकतीस महिला मतदाता सामिल हे।
मुख्य निर्वाचन पदाधिकारी कार्यालय ले मिले जानकारी के अनुसार भरतपुर-सोनहत, प्रतापपुर, रामानुजगंज, सामरी, लुण्ड्रा, अंबिकापुर, सीतापुर, जशपुर, कुनकुरी, पत्थलगांव, लैलूंगा, सारंगढ़, खरसिया, धर्मजयगढ़, रामपुर, पालीतानाखार, जैजैपुर, मरवाही, सरायपाली, बसना, खल्लारी अउ महासमुंद म महिला मतदाता मनके संख्या वोट डालने वाला पुरूष मतदाता के तुलना म जादा हे। उहें, बिलाईगढ़, राजिम, बिन्द्रानवागढ़, सिहावा, डौण्डीलोहारा, गुण्डरदेही, संजारी-बालोद, धमतरी, दुरूग सहर, पंडरिया, कवर्धा, खैरागढ़, डोंगरगढ़, डोंगरगांव, खुज्जी, मोहला-मानपुर, भानुप्रतापपुर, कांकेर, केशकाल, कोंडागांव, नारायणपुर, बस्तर, जगदलपुर, चित्रकोट, दंतेवाड़ा, बीजापुर अउ कोंटा विधानसभा क्षेत्र मन म घलो मतदान केंद्र म आके वोट डलईया महिला मतदाता के संख्या वोट डालने वाला पुरूष मतदाता मनके तुलना म जादा हरय।
छत्तीसगढ़ म संपन्न होय विधानसभा चुनाव के दूनों चरण के मतगणना तीन दिसंबर के करे जाही। मतगणना के तियारी सुरू कर दे गेहे। संघरा डाक मतपत्र मनके घलो गणना करे जाही।
इही कड़ी म राजनांदगांव म हर विधानसभा क्षेत्र बर दू-दी ठिन टेबल अलग ले लगाय जाही। एक सहायक निर्वाचन अधिकारी के ड्यूटी घलो रिही। ईवीएम अउ डाक मतपत्र के गिनती संगेसंग चलही। ए दरी सियान अउ दिव्यांग मनले डाक मतपत्र के माध्यम ले घरे म मतदान कराय गेहे। एखरे सेति डाक मत के संख्या जादा हे। मतदान के पहिली लगभग साढ़े पांच हजार डाक मतपत्र जारी करे गे रिहीस। एमा ले अधिकांस मन मतदान करीन हे। एला गिने म अतकिहा समय लग सकत हे। एखर अलावा लगभग आठ सौ सेवा मतदाता हवय जे मन ल पोस्टल बैलेट जारी करे गे रिहीस। संघरा चार सौ इकतालीस सियान अउ दिव्यांग मतदाता मन ल घलो ए सुविधा देगे रिहीस। एमा ले अधिकांस ह डाक मतपत्र के माध्यम ले मतदान करके ओला जमा घलो करा देहे। ए मतपत्र मन के गणना ईवीएम म पड़े मत मनके संघरा ही करे जाही। एखर बर बेवस्था घलो तय कर ले गेहे। हरेक विधानसभा क्षेत्र म ईवीएम ले मतगणना बर चौदा-चौदा टेबल लगाय जाही।
बतादन कि पहिली चरण म बीस विधानसभा सीट बर सात नवंबर के वोट डाले गे रिहीस उहें, दूसर चरण म सत्तर विधानसभा सीट बर सत्रह नवंबर के मतदान करे गेहे।
छठ पर्व
छत्तीसगढ़ समेत देस के आने-आने जघा म चार दिन तक चलईया छठ पूजा उछाह के संग मनाय जावत हे। लोक आस्था के महापर्व छठ पूजा के तीसरईया दिन आज भक्त माड़ी तक गहरा पानी म खड़ा होके डूबत सूरज ल अर्घ्य दीन। उहें, काली सोमवार के उगत सूरज ल अर्घ्य देके संग छठ पूजा अनुष्ठान संपन्न हो जही। प्रदेस म घलो छठ परब ल लेके लोगन मन म जोरदरहा उछाह हरय। एला देखत तालाब अउ नदी मनके घाट के सफई करे गेहे।
राज्यपाल विश्व भूषण हरिचंदन ह छठ पूजा के मउका म प्रदेसवासी मन ल हार्दिक बधाई अउ सुभकामना दीन हे। ओमन किहीन कि सूर्य उपासना के ए परब हमन ल प्रकृति के प्रति प्रेम के घलो संदेस देथे। ओमन कामना करीन कि छठ महापर्व प्रदेसवासी मनके जीवन म सुख-समृध्दि अउ खुसहाली लावय।
कांग्रेस-निष्कासन
प्रदेस कांग्रेस कमेटी ह पार्टी के अधिकृत प्रत्यासी के विरूध्द पार्टी विरोधी गतिविधि मन म सामिल रहय के सेति बालोद जिला कांग्रेस कमेटी के पूर्व अध्यक्ष हलधर साहू ल भारतीय राष्ट्रीय कांग्रेस के प्राथमिक सदस्यता ले छै साल बर निष्कासित कर दे गेहे।
विश्व कप क्रिकेट
आईसीसी क्रिकेट विश्व कप म भारत अउ ऑस्ट्रेलिया के बीच अहमदाबाद के नरेंद्र मोदी स्टेडियम म फाइनल मुकाबला खेले जावत हे। भारत ह निर्धारित पचास ओवर म दू सौ चालीस रन बनाइस हे। एखर ले पहिली ऑस्ट्रेलिया ह टॉस जीतके गेंदबाजी करे के फैसला करीस।
महिला अग्निवीर-भर्ती रैली
सेना भर्ती कार्यालय जबलपुर डहार ले अग्निवीर सैन्य पुलिस के रूप म महिला उम्मीदवार मन बर इही महिना उनतीस नवंबर के रैली के आयोजन करे जाही। मध्य प्रदेस के अउ छत्तीसगढ़ के नोनी मन दू हजार तेईस-चोबीस के भर्ती चक्र म सैन्य पुलिस म सामिल होय बर प्रतिस्पर्धा करही। भर्ती रैली बिहनिया सात बजे ले जबलपुर के रानी दुर्गावती विश्वविद्यालय शारीरिक शिक्षा विभाग के मैदान म होही। उम्मीदवार मन ल एयरपोर्ट रोड जबलपुर के प्रवेस द्वार म बिहनिया पांच बजे तक रिपोर्ट करना होही।
फसल-आगजनी
राजनांदगांव जिला के गंडई-पंडरिया ईलाका म एक किसान के फसल ल आगी लगाय के मामला आगू आय हे। ए मामला म पुलिस ह तीन झन युवक मनके खिलाफ अपराध पंजीबध्द करे हे। बताय जात हे कि खरही म रखे करीबन डेढ़ लाख रूपिया कीमत के फसल ल युवा मन आगी बार दिन जेखर ले फसल जलके राख होगे। संघरा आस-पास रखे पैरा घलो बरगे।
विश्व वयस्क दिवस
बीएसपी-उपलब्धि
बतादन कि साबरमती सुविधा ले सालाना एक लाख टन दू सौ साठ वेल्डेड पैनल के उत्पादन संभावित हे।
अउ अब थोरकुन समाचार सार म –
– गरियाबंद जिला के छुरा थाना क्षेत्र म एक महिला चिकित्सा अधिकारी के शव घर म फंदा म लटके मिले हे। फिलहाल पुलिस मामला के जांच करत हे।
अउ
– ऐति, सूरजपुर जिला के विश्रामपुर नगर क्षेत्र म नाबालिग जोड़ा के आत्महत्या करे के मामला आगू आय हे।