छत्तीसगढ़ म विधानसभा चुनई के पहिली चरण के बीस विधानसभा सीट बर आज कुछएक छुटपुट घटना संग मतदान होगे। अभी तक मिले आंकड़ा के मुताबिक ये सीट मन म इकहत्तर प्रतिशत मतदान होय हे । सबले जादा उनासी प्रतिशत भानुप्रतापपुर म अउ सबले कमती बीजापुर म करीबन इकतालीस प्रतिशत मतदान दर्ज करे गेहे।
पहिली पारी म पच्चीस माइलोगन समेत दू सौ तेइस उम्मीदवार चुनाव मैदान म हवय। एमा मुख्य रूप ले भाजपा नेता अउ पूर्व मुख्यमंत्री डॅाक्टर रमनसिंह, वनमंत्री मोहम्मद अकबर, आबकारी मंत्री कवासी लखमा, आदिम जाति कल्याण मंत्री मोहन मरकाम, विधानसभा उपाध्यक्ष संतराम नेताम, कांग्रेस के प्रदेश अध्यक्ष दीपक बैज, पूर्व मंत्री केदार कश्यप, लता उसेण्डी, विक्रम उसेण्डी अउ महेश गागड़ा शामिल हवय। ये जम्मों के भाग्य आज ईवीएम म कैद होगे। आज जउन बीस विधानसभा सीट बर वोट डारे गेहे। ओमा जादा सीट माओवाद प्रभावित हवय। एला देखत निर्वाचन आयोग ह मतदान के बेरा ल अलग-अलग तय करे रीहिस अउ हर केंद्र म सुरक्षा के चाक चौबंद व्यवस्था करे गे रीहिस हे।
दस विधानसभा क्षेत्र अंतागढ़, भानुप्रतापपुर, कांकेर, केशकाल, कोंडागांव, नारायणपुर, दंतेवाड़ा, बीजापुर, कोंटा, मोहला-मानपुर म बीहनिया सात बजे ले मंझनियां तीन बजे तक वोट डारे गीस। उंहे दस आने विधानसभा क्षेत्र पंडरिया, कवर्धा, खैरागढ़, डोंगरगढ़, राजनांदगांव, डोंगरगांव, खुज्जी, बस्तर, जगदलपुर, अउ चित्रकोट म बीहनिया आठ बजे ले संझा पांच बजे तक वोट डारे गीस। पहिली पारी बर ये विधानसभा क्षेत्र म पांच हजार ले जादा मतदान केंद्र बनाय गे रीहिस। महिला मतदाता मनके मदद बर दू सौ संगवारी अउ ग्यारा आदर्श मतदान केंद्र बनाय गे रीहिस। संगवारी केंद्र मन म मतदान के जम्मों जिम्मेंवारी माइलोगन मन ल सौंपे गे रीहिस। पाछू बखत जिहां मतदान प्रतिशत कमती रीहिस ओला बढ़ाय बर ये कदम उठाय गीस।
पहला चरण मतदान 02
मतदान ल लेके आज युवा वर्ग ले सियान अउ माइलोगन म भरपूर उछाह देखे गीस। मतदान केंद्र मन म बीहनिया ले ही लंबा लाइन लगे रीहिस। कांकेर जिला के गांव मुसुरपुट्टा म एक सौ बारा बछर के सियनहीन फुलकीबाई भारती ह वोट डारीस।
उंहे पखांजूर म एक सौ दू बछर के कनक मंडल ह वोट डारीस अउ सतायु वोटर के नाव ले मतदान केंद्र म ही पौधारोपण करीन। फेर कवर्धा म पंच्यानबे बछर के जुबीन बी ह मतदान केंद्र पहुंचके वोट डारीन।
सियान अउ दिव्यांग मतदाता के मदद बर स्काउट गाइड के कैडेट पोलिंग बूथ म मौजूद रीहिन। उंहे डोंगरगढ़ म सरदार अमृत सिंह बिहाव के जोड़ा म अपन परिवार के सदस्य संग वोट डारे खातिर मतदान केंद्र पहुंचीन। नारायणपुर म तीन दिन पहिली माओवादी हमला म मारे गे भाजपा नेता रतन दुबे के परिवार वोट डारे बर पहुंचीन। ये दउरान रतन के पिता ह कहिन कि माओवादी समस्या के हल निकलना चाही।
सुकमा जिला के माओवाद प्रभावित कारिगुण्डम क्षेत्र म तेईस बछर बाद लोगन मन मतदान करीन। कुछएक जगा म ईवीएम के खराबी के सेती मतदान म अबेर होइस। खबर के मुताबिक आज जउन बीस विधानसभा क्षेत्र म वोट डारे गेहे। ओमा उन्नीस म कांग्रेस के कब्जा रीहिस। सिरिफ राजनांदगांव सीट भाजपा तीर हवय।
प्रधानमंत्री सूरजपुर
भारतीय जनता पार्टी के बड़का नेता अउ प्रधानमंत्री नरेंद्र मोदी ह आज सूरजपुर म आमसभा म बोलत कीहिन कि केंद्र म भाजपा सरकार ह आदिवासी समाज के कल्याण बर बजट ल पांच गुना बढ़ा देहे। ओमन कीहिन कि आदिवासी कल्याण भाजपा के सबले पहिली प्राथमिकता हरय। ओमन यहू कीहिन कि आदिवासी लईका मनल बने शिक्षा मिलय एखर पांच सौ नवा एकलव्य मॉडल स्कूल बनाय जात हे। संगेसंग मेडिकल अउ इंजीनियरिंग के पढ़ई घलो मातृभाषा म देवाय जात हे। श्री मोदी ह कहिन कि केंद्र सरकार ह अस्सी हजार ले जादा नवा सामुदायिक पट्टा देहे। संगेसंग केंद्र के भाजपा सरकार गरीबी हटाय बर साफगोई ले काम करत हे।
उंहे कांग्रेस बर गरीबी हटाओ, सिरिफ एक नारा हवय। प्रधानमंत्री ह कहिन कि छत्तीसगढ़ म सरकार बने म भाजपा के प्रयास रीही कि छोटे किसान के कमई जादा ले जादा बढ़य। ओमन कहिन कि पांच बछर तक मुफत राशन देवइया योजना ल बढ़ाय ले निश्चित रूप ले देश के गरीब मन ल नवा ताकत मिलही। ओमन कहिन कि राम मंदिर होवय या गरीब मन बर पक्का घर बनाय के काम भाजपा जउन कहिथे करके देखाथे।
माओवादी घटना
बस्तर संभाग के सुकमा, कांकेर, अउ नारायणपुर जिला म माओवादी मन ह छुटपुट घटना ल अंजाम दीन हे। सुकमा जिला के मिनपा गांव म माओवादी मन संग होय मुठभेड़ म चार झिन जवान घायल होगे हे। उंहे इही जिला के एल्मागुंडा गावं म माओवादी मन कोति ले लगाय गे बम के चपेट म आय ले सीआरपीएफ के एक जवान घायल होगे। सुकमा जिला के ही ताड़मेटला अउ दुल्लेड़ के जंगल म सुरक्षा बल अउ माओवादी मनके बीच मुठभेड़ होइस। पाछू माओवादी जंगल कोति भाग गीन।
उंहे कांकेर जिला के बांदे थाना क्षेत्र म एरिया डोमिनेशन बर निकले बीएसएफ अउ डीआरजी के टीम के पानावर तीर माओवादी मन संग मुठभेड़ होइस। सुरक्षा बल ह मउका ले एके सैंतालिस रायफल बरामद करे हे। मुठभेड़ म सुरक्षा बल ह कुछएक माओवादी मनके घायल या मउत होय के दावा करे हे।
बीजापुर जिला के पदेड़ा म घलो सुरक्षा बल मन संग होय मुठभेड़ म तीन झिन माओवादी के मारे जाय के खबर हे। ओखर शव माओवादी अपन संग ले गेहे।
इही बीच नारायणपुर जिला के ओरछा थाना क्षेत्र के तादुर के जंगल म सुरक्षा बल अउ माओवादी मनके बीच मुठभेड़ होय के खबर हवय। ये घटना के बाद सुरक्षा बल ह ये क्षेत्र म गश्त तेज कर देहे।
दंतेवाड़ा जिला के अरनपुर थाना क्षेत्र के सोमापारा म गश्त के बेरा सीआरपीएफ के जवान मन ह दू ठिन प्रेशर बम बरामद करीन हे। बम ल माओवादी मन ह मतदान दल अउ सुरक्षा बल ल नकसान पहुंचाय बर लगाये रीहिन।
विस चुनाव दूसरा चरण
प्रदेश म विधानसभा चुनाव के दूसर पारी के बहत्तर सीट बर चुनाव प्रचार तेज होगे हे। अखिल भारतीय कांग्रेस कमेटी के महासचिव प्रियंका गांधी ह संजारी बालोद विधानसभा क्षेत्र के जुगेरा अउ धमतरी जिला के कुरूद म आमसभा लीन। बालोद जिला म आमसभा म बोलत कीहिन कि छत्तीसगढ़ म कांग्रेस के सरकार बनतेच सबले पहिली किसान मनके कर्जा माफ करे गे रीहिस। राज्य म समर्थन कीमत म धान बिसाय जात हे। कांग्रेस ह राज्य म फेर ले सरकार बने म दू सौ यूनिट बिजली मुफत, रसोई गैस सिलेण्डर म पांच सौ रूपिया के सब्सिडी अउ धान के समर्थन कीमत बत्तीस सौ रूपिया बोरा पाछू देके ऐलान करे हे।
इही बीच जनता कांग्रेस छत्तीसगढ़ के प्रदेश अध्यक्ष अमित जोगी ह आज जैजेपुर अउ रसोटा म आमसभा लेके पार्टी प्रत्याशी के पक्ष म प्रचार करीन। उंहे बहुजन समाज पार्टी के राष्ट्रीय अध्यक्ष मायावती चुनाव प्रचार बर नौ नवंबर के छत्तीसगढ़ आवत हे। ओमन सक्ति जिला के हसौद अउ बिलासपुर म चुनावी सभा लीहीं। ये विधानसभा चुनाव म बसपा अउ गोंडवाना गणतंत्र पार्टी के गठबंधन हे। गोंडवाना गणतंत्र पार्टी ह जिहां तीस सीट म अपन उम्मीदवार खड़े करे हे, उंहे बसपा ह संतावन सीट म अपन प्रत्याशी ल उतारे हे।
मांडविया रायपुर
केंद्रीय स्वास्थ्य मंत्री अउ छत्तीसगढ़ विधानसभा चुनाव सह प्रभारी डॅाक्टर मनसुख मांडविया ह आज रायपुर म छत्तीसगढ़ चेंबर ऑफ कॉमर्स एंड इंडस्ट्रीज के पदाधिकारी मन संग भेंट करीन। ये दउरान चेंबर ऑफ कॉमर्स के अध्यक्ष अमर पारवानी अउ आने पदाधिकारी मन ह डॅाक्टर मांडविया ले गोठबात करत अपन बात राखीन। ए बेरा म डॅाक्टर मांडविया ह कहिन कि जउन समस्या हवय उंखर समाधान करे के प्रयास करे जाही।