आज दिनभर के खबर ल अपन गुरतुर छत्तीसगढ़ी भाखा म पढ़व

प्रदेस म विधानसभा चुनाव बर पहिली चरण के तहत बीस विधानसभा क्षेत्र म काली मतदान होही। एखर बर चुनाव आयोग ह जम्मों तियारी पूरा कर लेहे। संगेसंग सुरक्षा के पुख्ता इंतजाम घलो करे गेहे। काली जउन बीस विधानसभा क्षेत्र म मतदान होही, ओमा ले दस विधानसभा क्षेत्र – अंतागढ़, भानुप्रतापपुर, कंाकेर, केशकाल, कोंडागांव, नारायणपुर, दंतेवाड़ा, बीजापुर, कोंटा अउ मोहला- मानपुर म बीहनिया सात बजे ले मंझनिया तीन बजे तक मतदान होही।

उंहे दस आने विधानसभा क्षेत्र पंडरिया, कवर्धा, खैरागढ़, डोंगरगढ़, राजनंादगंाव, डोंगरगांव, खुज्जी, बस्तर, जगदलपुर अउ चित्रकोट म बीहनिया आठ बजे ले संझा पांच बजे तक वोट डारे जाही। पहिली चरण म कुल दू सौ तेईस उम्मीदवार मन चुनाव मैदान म हे। एमा ले पच्चीस झिन महिला उम्मीदवार घलो सामिल हे।

पहिली चरण म चालीस लाख अठहत्तर हजार छै सौ इक्यासी मतदाता मन अपन वोट डारही। एमा उन्नीस लाख तिरानवे हजार नौ सौ सैंतीस पुरूष, बीस लाख चौरासी हजार छै सौ पचहत्तर महिला अउ उनहत्तर तृतीय लिंग के मतदाता मन सामिल हे। ये चरण म अठारा ले उन्नीस आयु वर्ग के अइसे मतदाता हे जउन पहिली बार वोट डारही। उंखर संख्या करीबन एक लाख चौसठ हजार हे। उंहे दू सौ छियानबे मतदाता अइसे हे जेखर उमर सौ बछर ले जादा हे।

पहिली चरण के चुनाव बर पांच हजार तीन सौ चार मतदान केंद्र बनाए गेहे। एमा ले दू सौ मतदान केंद्र संगवारी मतदान होही, जेखर संचालन महिला कर्मी मन डहार ले करे जाही। उंहे बीस मतदान केंद्र दिव्यांगजन अउ आने बीस मतदान केंद्र युवा मन डहार ले संचालित करे जाही। एखरे संग एक सौ दू मतदान केंद्र ल आदर्श मतदान केंद्र के रूप म बनाय गेहे।

भारत निर्वाचन आयोग के निर्देश म काली दू हाजर चार सौ इकतीस मतदान केंद्र मन म लाइव वेब कास्टिंग कराये जाही। जेखर माध्यम ले आयोग ह से मतदान मेंद्र म होवत मतदान म सीधा नजर राखही।

काली होवइया मतदान बर करीबन पच्चीस हजार मतदान कर्मी मनके ड्यूटी लगाये गेहे। ए चुनाव म अस्सी बछर ले जादा उमर के सियान लोगन अउ दिव्यांगजन मन ल घर बइठे डाक मतपत्र के माध्यम ले मतदान के सुविधा उपलब्ध कराय गे रीहिस हे । मुख्य निर्वाचन पदाधिकारी रीना बाबा साहेब कंगाले ह बताइन कि प्रथम चरण म एक हजार पांच सौ छिहत्तर लोगन मन ह ए सुविधा के लाभ उठावत घर ले मतदान करे रीहिस।

इही बीच, मतदान ल लेके जम्मों मतदान केंद्र म सुरक्षा के पुख्ता इंतजाम करे गेहे। अंदरूनी क्षेत्र म केंद्रीय अर्द्ध सैनिक बल, डीआरजी, एसटीएफ, कोबरा अउ बस्तर फाईटर्स जइसन विशेषज्ञ बल मन के तैनाती करे गेहे। ये विशेष बल पड़ोसी राज्य- तेलंगाना, आंध्रप्रदेश, महाराष्ट्र अउ ओडिशा के सीमा मन म तैनात करे गेहे। माओवाद प्रभावित अति संवेदनशील छै सौ ले जादा मतदान केंद्र म त्रि-स्तरीय सरुक्षा घेरा बनाय गेहे। उंहे माओवादी गतिविधि मनके ड्रोन अउ हेलीकॉप्टर ले निगरानी करे जाही।

सुरक्षा कारण के चलत बीजापुर, नारायणपुर, अंतागढ़, दंतेवाड़ा अउ कांेटा के एक सौ उनचास मतदान केंद्र ल नजदीकी थाना अउ सुरक्षा कैंप के तीर म स्थानांतरित करे गेहे। संगेसंग बस्तर संभाग के दुर्गम अउ माअेावाद प्रभावित क्षेत्र म एक सौ छब्बीस गांव अइसे हे, जिहंा पहिली बखत मतदान केंद्र बनाय गेहे। उंहे मतदान दल ल अंदरूनी क्षेत्र के एक सौ छप्पन ले जादा मतदान केंद्र म हेलीकॉप्टर के माध्यम ले पहुंचाय गेहे।

बस्तर रेंज के पुलिस महानिरीक्षक सुंदरराज पी. ह बताइन कि पूरा बस्तर संभाग म मतदान बर सुरक्षा के पुख्ता इंतजाम करे गेहे। ओमन आम नागरिक अउ मतदाता मन ल आश्वस्त करत कीहिन कि ओमन बिना कोनो डर के मतदान केंद्र तक पहुंचय अउ अपन संवैधानिक जिम्मेदारी ल निभात होय वोट डारय।

इही बीच राज्य शासन ह काली सात नवंबर के मतदान के दिन संबंधित क्षेत्र मन म सामान्य अवकाश घोषित करे हे।

प्रदेस म होवइया विधानसभा चुनाव के तहत चुनाव आयोग हा फोटोयुक्त मतदाता पहचान पत्र के संग बारा ठिन वैकल्पक दस्तावेज ल मान्य करे हे। एमा आधार कार्ड, मनरेगा जॉब कार्ड, ड्राईविंग लाइसेंस, पैन कार्ड, भारतीय पासपोर्ट, फोटोयुक्त पेंशन दस्तावेज, केंद्र, राज्य सरकार अउ निजी कंपनी डहार ले जारी करे गे फोटो पहचान पत्र, बैंक या डाकघर डहार ले जारी पासबुक, स्मार्ट कार्ड, स्वास्थ्य बीमा कार्ड, सांसद, विधायक अउ विधान परिषद सदस्य मन ल जारी करे गे सरकारी पहचान पत्र के अलावा केंद्रीय सामाजिक न्याय अउ अधिकारिता मंत्रालय डहार ले दिव्यांगजन ल जारी यूनिक डिसएबिलिटी आईडी कार्ड सामिल हे। मतदाता मन एमा ले कोनो भी दस्तावेज पेस करके वोट डार सकही।

इही बीच दूसर चरण के तहत सत्तर विधानसभा सीट मन म होवइया विधानसभा चुनाव बर प्रचार प्रसार तेज होगे हे। इही कड़ी म भारतीय जनता पार्टी के राष्ट्रीय अध्यक्ष जे.पी. नड्डा ह आज जशपुर जिला के पत्थलगांव म भाजपा प्रत्याशी मनके पक्ष म आमसभा ल संबोधित करीन। असम के मुख्यमंत्री हिमंत बिस्वा सरमा ह जांजगीर-चंापा जिला के अकलतरा अउ पामगढ़ म भाजपा प्रत्याशी के समर्थन म रोड-शो करके आमसभा ल संबोधित करीन।

उंहे कंेद्रीय मंत्री स्मृति ईरानी ह धमतरी जिला के नगर पंचायत आमदी म आमसभा ल संबोधित करीन।

दूसर कोति मुख्यमंत्री भूपेश बघेल ह बेमेतरा जिला के ग्राम भिंभौरी म कंाग्रेस प्रत्याशी के पक्ष म आमसभा ल संबोधित करीन। फेर उप मुख्यमंत्री टी.एस. सिंहदेव ह अकलतरा विधानसभा क्षेत्र के ग्राम नरियरा म चुनाव सभा लीन।केंद्र ऐप प्रतिबंध

केंद्र सरकार ह महादेव बुक समेत बाईस अवैध सट्टेबाजी ऐप उपर रोक लगा देहे। इलेक्ट्रानिक्स अउ सूचना प्रौद्योगिकी मंत्रालय ह महोदव बुक अउ रेड्डी अन्नाप्रिस्टोप्रो समेत बाईस अवैध ऐप अउ वेबसाइट म रोक लगाये संबंधी आदेश पाछू पांच नवंबर के जारी करीन। प्रवर्तन निदेशालय-ईडी ह छत्तीसगढ़ म महादेव बुक उपर छापा के कार्रवाई अउ जांच के बाद केंद्र ले एखर सिफारिश करे रीहिस। ईडी ह ए मामला म छत्तीसगढ़ पुलिस के कंास्टेबल भीम सिंह यादव अउ असीम दास ल धनशोधन के आरोप म गिरप्तार करे हे।

नारायणपुर जिला के अबूझमाड़ के मलखंभ खिलाड़ी मन ह मुंबई म होय रियलिटी शो इंडिया गॉट टैलेंट म जीत दर्ज करके इतिहास रचे हे। ए टीम म मनोज प्रसाद, पारस यादव, नरेंद्र गोटा, युवराज सोम, फूलसिंह सलाम, श्यामलाल पोटाई, सलाम, राकेश कुमार वरदा, मोनू नेताम, राजेश कोर्राम, शुभम पोटाई, अजमत फरीदी, समीर सोरी अउ सुरेश पोटाई शामिल रीहिस।

जीत के बाद ए खिलाड़ी मन ल पुरस्कार के रूप म बीस लाख रूपिया नगर अउ संगसेंग एक अर्टिगा कार घलो दे गेहे। ए जीत के बाद मुख्यमंत्री भूपेश बघेल अउ पूर्व मुख्यमंत्री डॅाक्टर रमनसिंह ह खिलाड़ी मन ल बधाई अउ शुभकामना दीन हे।

– प्रदेश म विधानसभा चुनाव ल देखत निर्वाचन आयोग डहार ले जागरूकता कार्यक्रम के तहत रायगढ़ के बरमकेला म लोक नृत्य के रंग मतदान संकल्प के संग थीम उपर अउ कोरिया जिला के बैकुठपुर अउ शिवपुर-चरचा म मतदाता रथ के माध्यम ले मतदाता जागरूकता के आयोजन करे गीस।

– बीजापुर जिला के मंाझीगुड़ा के एक गारमेंट फैक्ट्री म पाछू रतिहा आग लगे ले लाखो रूपिया के कपड़ा जलके खाक होगे।

– नारायणपुर जिला म आज गांव मुरहापदर के तीर माओवादी मन डहार ले लगाए गे आईईडी ल निष्क्रिय करे के दउरान विस्फोट ले आईटीबीपी के एक जवान घायल होगे, जेला जिला अस्पताल म भर्ती कराय गेहे।