केन्द्र सरकार ह उपभोक्ता मन ल किफायती दर म दार उपलब्ध कराय बर ‘‘भारत दाल ब्रांड नाम‘‘ के तहत साठ रूपिया प्रतिकिलो म सब्सिडी वाले चना दार के बिक्री सुरू करे हे। केन्द्रीय उपभोक्ता मामला, खाद्य अउ सार्वजनिक वितरण मंत्री पीयूष गोयल ह भारत दाल के ब्रैंड नाम ले रियायती दर म चना दार के बिक्री अभियान के सुभारंभ करीन। एखर अंतर्गत एक किलोग्राम के पैकेट के दाम साठ रूपिया प्रति किलोग्राम अउ तीस किलोग्राम के पैकेट के दाम पचपन रूपिया प्रति किलोग्राम राखे गेहे। उपभोक्ता मन ल सस्ता दर म दार उपलब्ध कराय के दिसा म भारत दाल अभियान, केन्द्र सरकार के एक ठन बड़े कदम आय।
सहारा रिफंड पोर्टल-शुभारंभ
केन्द्रीय गृहमंत्री अमित शाह ह आज नई दिल्ली म सी.आर.सी.एस.-सहारा रिफंड पोर्टल के सुभारंभ करीन। ए पोर्टल सहारा समूह के दस करोड़ ले जादा जमाकर्ता मन बर अपन पइसा वापस ले म मददगार होही। ए अवसर म श्री शाह ह किहीन कि सहारा समूह के चार सहकारी समिति मन म फंसे जमाकर्ता मनके पइसा वापस लेके प्रक्रिया सहारा रिफंड पोर्टल के उद्घाटन के बाद सुरू होगे हे। सुरूवाती चरण म जमाकर्ता मन ल रिफंड पोर्टल ह पांच हजार करोड़ रूपिया लहुटाही। श्री शाह ह किहीन कि ए पहल के सफल होय के बाद सहारा समूह के सहकारी समिति म जेन जमकर्ता मनके जादा पइसा फंसे हे, उनला पइसा लहुटाय के निर्णय ले जाही।
विधानसभा सत्र
छत्तीसगढ़ विधानसभा के मानसून सत्र आज ले सुरू होगे हे। सत्र के पहलइया दिन भिलाई के वैशाली नगर विधानसभा ले विधायक रेहे स्वर्गीय विद्यारतन भसीन अउ अविभाजित मध्यप्रदेश के पूर्व कैबिनेट मंत्री स्वर्गीय भानूप्रताप सिंह ल मुख्यमंत्री भूपेश बघेल, विधानसभा अध्यक्ष डॉक्टर चरणदास महंत सहित सदन के सदस्य मन श्रद्धांजलि अर्पित करीन। ए अवसर म मुख्यमंत्री ह किहीन कि स्वर्गीय विद्यारतन भसीन सरल अउ सहज व्यक्तित्व के धनी रिहीन। ओमन दलगत भावना ले उपर उठ के हमेसा आम जन के कल्याण बर काम करीन। उहें, डॉक्टर महंत ह किहीन कि स्वर्गीय भसीन बेहद मिलनसार प्रवृत्ति के रिहीन। उंखर जाना हम सब बर अपूरणीय क्षति आय।
विधानसभा म मुख्यमंत्री ह दिवंगत भानूप्रताप सिंह ल श्रद्धांजलि अर्पित करत हुए किहीन कि ओमन प्रदेस म कला अउ संस्कृति ल आगू बढ़ईन। जनहित के काम अउ सामाजिक क्षेत्र म उंखर योगदान सराहनीय रेहे हे।
विधानसभा के मानसून सत्र इक्कीस जुलाई तक चलही। ए दउरान कुल चार बइठका होही। सत्र के दौरान राज्य सरकार ह तीन हजार करोड़ रूपिया के अनुपूरक बजट पेस करही। उहें, विपक्ष डहार ले अविश्वास प्रस्ताव लाय जाही।
मंत्रिमंडलीय उप समिति-बैठक
राज्य म पंजीकृत किसान मन ले आगामी खरीफ विपणन बछर म बीस क्विंटल प्रति एकड़ के मान से धान के खरीदी करे जाही। खाद्य मंत्री अमरजीत भगत के अध्यक्षता म आज विधानसभा स्थित सभाकक्ष म धान खरीदी अउ कस्टम मिलिंग के नीति के समीक्षा कर सुझाव दे बर गठित मंत्रिमंडलीय उप समिति के बइठका म ए निर्णय ले गीस। बइठका म अधिकारी मन ल धान खरीदी बर बारदाना सहित सबो जरूरी व्यवस्था सुनिश्चित करे के निरदेस दे गीस। संगेसंग समर्थन मूल्य म धान अउ मक्का खरीदी, कृषक पंजीयन, बारदाना अउ वित्तीय व्यवस्था संबंधी नीति के निर्धारण के संबंध म चर्चा घलो करे गीस।
छत्तीसगढ़-भूमि सम्मान
भूमि प्रबंधन अउ प्रशासन बर छत्तीसगढ़ ल भूमि सम्मान ले नवाजे गेहे। उहें, प्रदेस के दू ठन जिला सरगुजा अउ बेमेतरा ल घलो भूमि सम्मान प्लेटिनम सर्टिफिकेट सम्मान ले सम्मानित करे गेहे। राष्ट्रपति द्रौपदी मुर्मू ह आज नई दिल्ली के विज्ञान भवन म आयोजित कार्यक्रम म छत्तीसगढ़ ल ए पुरस्कार प्रदान करीन।
ए उपलब्धि बर मुख्यमंत्री भूपेश बघेल ह प्रदेस के राजस्व विभाग, सरगुजा अउ बेमेतरा जिला प्रशासन ल बधाई अउ सुभकामना दीन हे।
युवा-विधानसभा प्रदर्शन
प्रदेस म अनुसूचित जाति अउ अनुसूचित जनजाति समुदाय के युवा मन ह आज विधानसभा के मानसून सत्र के पहलइया दिन विधानसभा मार्ग म नग्न होके विरोध प्रदर्शन करीन। युवा मनके ए समूह ह फर्जी जाति प्रमाण पत्र के प्रयोग करके, अयोग्य लोगन मन डहार ले, अनुसूचित जाति अउ अनुसूचित जनजाति समुदाय बर आरक्षित नौकरी प्राप्त करे के विरोध करत रिहीन। ए युवा मन सड़क म प्रदर्सन करत हुए राज्य सरकार के खिलाफ नारेबाजी घलो करीन। बाद म ए युवा मन ल पुलिस ह गिरफ्तार कर लीस।
ए संबंध म अनुसूचित जाति अउ अनुसूचित जनजाति वर्ग के फर्जी जाति प्रमाण-पत्र मामला के संघर्ष समिति के प्रवक्ता विनय कौशल ह किहीन कि फर्जी प्रमाण पत्र रखइया मनके खिलाफ तत्काल कार्रवाई करे के मांग ल लेके ए प्रदर्सन करे गीस।
सुप्रीम कोर्ट-ईडी कार्रवाई रोक
प्रदेस म करीबन दू हजार करोड़ रूपिया के कथित सराब घोटाला मामला म सुप्रीम कोर्ट ह प्रवर्तन निदेशालय-ईडी के कार्रवाई म रोक लगा देहे। कोर्ट ह ए फइसला तीन याचिका के सुनवाई के बाद करे हे। न्यायमूर्ति संजय किशन कौल अउ न्यायमूर्ति सुधांशु धुलिया के बेंच ह आज ए मामला के सुनवाई करीन। कोर्ट ह किहीन कि फिलहाल ए मामला म ईडी के तीर कार्रवाई करे बर प्रेडिकेट अफेंस नइ हे, जेखर सेती ईडी ल ए मामला म कोनों भी तरह के कार्रवाई ले रोके जावत हे।
बतादन कि सराब घोटाला मामला म यश टुटेजा, अनवर ढेबर अउ सिद्धार्थ सिंघानिया ह सुप्रीम कोर्ट म याचिका दायर करे रिहीन। ईडी ह सराब घोटाला मामला म कार्रवाई करत अनवर ढेबर समेत पांच झिन लोगन ल गिरफ्तार करे हे।
राजभवन-प्लास्टिक मुक्त क्षेत्र
छत्तीसगढ़ राजभवन परिसर ल प्रतिबंधित सिंगल यूज प्लास्टिक मुक्त क्षेत्र घोसित करे गेहे। ए संबंध म राजभवन सचिवालय डहार ले आदेस जारी कर दे गेहे। आदेस के अनुसार केन्द्रीय पर्यावरण, वन अउ जलवायु परिवर्तन मंत्रालय अउ राज्य सरकार डहार ले पाछू बछर एक जुलाई अउ नौ दिसंबर के अलग-अलग जारी अधिसूचना के अनुसार सिंगल यूज प्लास्टिक के आइटम के वि-निर्माण, आयात, भंडारण, वितरण, बिक्री अउ उपयोग ल प्रतिबंधित कर दे गे रिहीस। ए अधिसूचना मनके परिपालन म राजभवन परिसर म प्रतिबंधित सिंगल यूज प्लास्टिक उत्पाद मनके उपयोग नइ करे जात हे।
आईटी-छापा
आयकर विभाग के टीम ह आज बिलासपुर म एक ठिन बड़े उद्योग समूह सत्या पावर के ठिकाना म छापामार कार्रवाई करीन। मिले जानकारी के अनुसार विभाग के अधिकारी मन ह सत्या पावर के डायरेक्टर राम अवतार अग्रवाल अउ पवन अग्रवाल के निवास समेत अलग-अलग ठिकाना म छापा मारीन। एमा रतनपुर स्थित फैक्ट्री अउ अलग-अलग जघा म स्थित कार्यालय घलो सामिल हे। विभाग के अनुसार सत्या पावर के मालिक डहार ले टैक्स चोरी के मामला म ए कार्रवाई करे जात हे। गौरतलब हे कि सत्या पावर उद्योग समूह बिजली उत्पादन के संगेसंग स्टील कारोबार ले जुड़े हुए हे।
जगदीश-कांस्य पदक
नई दिल्ली म आयोजित कॉमनवेल्थ गेम्स म छत्तीसगढ़ के जगदीश विश्वकर्मा ह वेटलिफ्टिंग म कांस्य पदक जीते हे। राजनांदगांव के रहइया जगदीश ह वेटलिफ्टिंग म भारत के प्रतिनिधित्व करत हुए छियानवे किलोग्राम वर्ग समूह म कुल तीन सौ इकचालीस किलोग्राम वजन उठा के कांस्य पदक अपन नाम करीन।
अउ अब पेस हे मौसम के हाल..
मौसम विभाग ह अवइया बारह घंटा के दौरान प्रदेस के दंतेवाड़ा, सुकमा, बीजापुर अउ नारायणपुर जिला म एक-दू जघा म भारी ले अति भारी बारिस होय के चेतावनी देहे। उहें, बालोद, राजनांदगांव, बस्तर, कोंडागांव अउ कांकेर जिला म एक-दू जघा म भारी बरसा होय के संभावना हे।