आज अंतर्राष्ट्रीय योग दिवस मनाय जात हे। एसो के बिसय हे – ‘‘वसुधैव कुटुम्बकम् के लिए योग। प्रधानमंत्री नरेन्द्र मोदी ह आज संयुक्त राष्ट्र मुख्यालय म नौवां अंतर्राष्ट्रीय योग दिवस के अगुवई करत हे।
अंतर्राष्ट्रीय योग दिवस के मउका म आज छत्तीसगढ़ के कतकोन जघा म कार्यक्रम करे जात हे। राज्यपाल विश्वभूषण हरिचंदन ह राजभवन म अधिकारी अउ कर्मचारी मनके संग मिलके योगासन अउ प्राणायाम करीन। ए मउका म ओमन किहीन कि योग ह भारत के एक ठिन प्राचीन कला हरय, जउन ह हजार बछर ले चलत हे। ओमन किहीन कि योग ल आसन अउ प्राणायाम तक सीमित करके झन राखे जाय। भलूक योग के ध्यानावस्था म जाय के विधि ल समझे बर मेडिटेशन के सिक्षा घलो जरूरी हे।
ऐति, ‘‘हर घर आंगन योग‘‘ के संदेस के संग रईपुर स्थित जोरा मैदान म राज्य स्तरीय योग कार्यक्रम राखे गीस। ए मउका म इक्कीस हजार ले जादा लोगन मन एके संघरा योग करीन। कार्यक्रम म छत्तीसगढ़ योग आयोग के अध्यक्ष ज्ञानेश शर्मा ह स्वस्थ जिनगी बर योग अपनाय अउ जन-जन तक योग के महत्ता ले प्रचारित करे के बिनती करीन।
कार्यक्रम म संसदीय सचिव विकास उपाध्याय, विधायक सत्यनारायण शर्मा, मोहन मरकाम, महापौर एजाज ढेबर के संगेसंग कतकोन बड़का जनप्रतिनिधि मन सामिल होइन।
उहें, छत्तीसगढ़ विधानसभा परिसर म घलो आज योगाभ्यास के कारीकरम होइस। ए मउका म विधानसभा सचिव दिनेश शर्मा के संगेसंग अधिकारी अउ कर्मचारी मन घलो योग करीन।
अंतर्राष्ट्रीय योग दिवस-02
अंतर्राष्ट्रीय योग दिवस के मउका म केन्द्रीय ग्रामीण विकास अउ पंचायती राज्यमंत्री गिरिराज सिंह ह मनेन्द्रगढ़ जिला के झगराखंड स्थित केन्द्रीय विद्यालय म राखे गे सामूहिक योग कारीकरम म सामिल होइन। कारीकरम ल संबोधित करत ओमन किहीन कि योग करे ले चिंता अउ तनाव ह दुरिहा भागथे।
ऐति, दुरूग के मिनी स्टेडियम म राखे गे जिला स्तरीय योगाभ्यास कारीकरम म गृहमंत्री ताम्रध्वज साहू ह सामिल होके लोगन मनके संग योगाभ्यास करीन।
त उहें, दक्षिण पूर्व मध्य रेलवे के रईपुर, बिलासपुर अउ नागपुर रेलमंडल मन म घलो योग अभ्यास के कारीकरम होइस। ए मउका म स्टेसन अउ गाड़ी मन म योग ले जुड़े पॉम्पलेट-पोस्टर बांटे गीस। बिलासपुर स्थित रेलवे प्राथमिक विद्यालय म राखे गे योगाभ्यास कारीकरम म अपर महाप्रबंधक विजय कुमार साहू के संगेसंग जम्मों विभागाध्यक्ष, मंडल रेल प्रबंधक के संगेसंग स्कूली लइका मन घलो भाग लीन।
उहें, सुकमा जिला के दोरनापाल म सीआरपीएफ के जवान मन ह योग अभ्यास करीन।
ओति, नारायणपुर जिला के रामकृष्ण मिशन विवेकानंद विद्यापीठ म घलो अंतर्राष्ट्रीय योग दिवस मनाय गीस। ए कारीकरम म आश्रम म पढ़ईया करीबन ग्यारह झिन लइका अउ विद्यापीठ के सिक्षक मन घलो भाग लीन।
ऐति, महासमुंद जिला के जम्मों आंगनबाड़ी केन्द्र मन म घलो योग दिवस मनाय के संगेसंग खान-पान अउ पाचन संबंधी जानकारी दे गीस।
अमित शाह-दुर्ग
केन्द्रीय गृह मंत्री अमित शाह ह काली एक दिन के दउरा म छत्तीसगढ़ आवत हे। ए दउरान ओमन दुरूग जिला म एक ठिन सभा ल संबोधित करही। जानबा के मुताबिक केन्द्रीय गृहमंत्री ह काली मंझनिया करीबन साढ़े बारह बजे बिसेस विमान ले रईपुर पहुंचही, जेखर बाद मंझनिया करीबन दू बजे श्री शाह ह दुर्ग के रविशंकर स्टेडियम म एक ठिन सभा ल संबोधित करही। ए सभा म राज्य के बीस विधानसभा क्षेत्र के भाजपा कार्यकर्ता मन ह सामिल होही। सभा के पहिली श्री शाह ह पंडवानी गायिका पद्मश्री उषा बारले के भिलाई-एक स्थित घर म जाके उंखर ले मिलही।
मांडविया-बैठक
केन्द्रीय स्वास्थ्य मंत्री डॉक्टर मनसुख मांडविया ह गर्मी म लू जइसन स्थिति अउ आने बीमारी ले प्रभावित राज्य मन ल स्थिति ले निपटे म केन्द्र कोति ले जम्मों मदद के आश्वासन देहे। स्वास्थ्य मंत्री ह आज छत्तीसगढ़ के संगेसंग छै ठिन राज्य मनके बइठका लेके ए जम्मों स्थिति ले निपटे के समीक्षा करीन।
बइठका म यहू फइसला ले गीस कि स्वास्थ्य मंत्रालय, मौसम विभाग अउ राष्ट्रीय आपदा प्रबंधन प्राधिकरण के पांच सदस्यीय टीम ह लू ले प्रभावित राज्य मनके दउरा करही।
माओवादी समाचार
बीजापुर जिला म सुरक्षा बल अउ माओवादी मनके बीच मुठभेड़ होइस। सुरक्षा बल मन ह ए मुठभेड़ म दू ले तीन माओवादी मनके मारे जाय के दावा करे हे। जिला के पुलिस अधीक्षक आंजनेय वार्ष्णेय ह बतईन कि माओवादी मनके होय के सूचना मिले के बाद कोबरा बटालियन, एसटीएफ अउ डीआरजी के संयुक्त टीम ह गंगालूर थाना क्षेत्र के पीड़िया कोति निकले रिहीन। इही दउरान माओवादी मन ह गोलीबारी सुरू कर दीन। जवान मन घलो जवाबी कार्रवाई करत माओवादी मनके ठिकाना मन ल ध्वस्त कर दीन। पुलिस के मुताबिक ए मुठभेड़ म दू ले तीन माओवादी गंभीर रूप ले घायल होय हे।
पुलिस ले मिले जानबा के मुताबिक ए अभियान ले वापिस लहुटत खानी गंगालूर अउ पुसनार के बीच माओवादी मन डहार ले लगाय गे विस्फोट के चपेट म आय ले डीआरजी के एक झिन जवान अजय मंडावी ह घायल होगे, जेखर इलाज रईपुर के अस्पताल म चलत हे।
त ओति, बीजापुर जिला के इलमिडी थाना क्षेत्र म माओवादी मन ह एक झिन गांव के लोगन के हत्या कर दीन। ए मनखे ल माओवादी मन ह एक दिन पहिली अगुवा कर ले रिहीन।
राजभवन-स्थापना दिवस
छत्तीसगढ़ राजभवन म काली पश्चिम बंगाल, तेलंगाना अउ गोवा राज्य मनके स्थापना दिवस मनाय गीस। ए कारीकरम म छत्तीसगढ़ म रहइया ए राज्य के लोगन मन ह उछाह के संग स्थापना दिवस ल मनईन। ए मउका म राज्यपाल विश्वभूषण हरिचंदन ह पश्चिम बंगाल, तेलंगाना अउ गोवा राज्य के भरे-पूरे इतिहास, कला अउ संस्कृति के बारे म विचार राखीन। ओमन किहीन कि देस के आने-आने राज्य के लोगन मन ह प्रदेस म सामाजिक एकता अउ अपन संस्कृति ल बढ़ावा देवत हे। प्रदेस के अर्थव्यवस्था म उंखर मनके योगदान ह अवइया बेरा म अउ जादा महत्ता राखही। स्थापना दिवस के मउका म राज्यपाल ह बढ़िया काम करइया बंगाली, तेलगू अउ गोवा समाज के मनखे मन ल सम्मानित करीन।
जानबा के मुताबिक प्रधानमंत्री के पहल उपर सुरू करे गे केन्द्र सरकार के ‘‘एक भारत-श्रेष्ठ भारत‘‘ कार्यक्रम के तहत एकता के भावना ल बढ़ावा दे बर जम्मों राज्य मन ह एक-दूसर राज्य के स्थापना दिवस ल मनावत हे।
ट्रेन परिचालन
दक्षिण पूर्व मध्य रेलवे के रायपुर रेलमंडल के भिलाई नगर अउ भिलाई के बीच तेईस जून के गर्डर लांचिग अउ रोड अंडरब्रिज के बॉक्स पुशिंग के काम करे जाही, जेखर सेती तेईस जून के रायपुर-दुर्ग मेमू पैसेंजर रद्द रइही। उहें, बाईस जून के टाटा-इतवारी एक्सप्रेस टाटानगर, कोरबा अउ बिलासपुर ले रद्द रइही। एखर अलावा निजामुद्दीन विशाखापट्टनम एक्सप्रेस निजामुद्दीन ले तीन घंटा देरी ले चलही। त उहें, गोंदिया-बरौनी एक्सप्रेस ह बाईस जून के गोंदिया ले छूटके दूसर रद्दा नैनपुर-जबलपुर-कटनी रद्दा ले होवत जाही।
ऐति, ईस्ट कोस्ट रेलवे के विशाखापट्टनम रेलमंडल के रायगड़ा-विजयनगरम सेक्सन म घलो ट्रैफिक अउ पावर ब्लॉक ल लेके काम करे जात हे, जेखर सेती आज अउ काली कोनों-कोनों गाड़ी के अवई-जवई प्रभावित रइही। आज विशाखापट्टनम-दुर्ग-विशाखापट्
अउ अब पेस हे मौसम के हाल…
प्रदेश म काली ले अधिकतम तापमान म गिरावट होय के संभावना हे। संगेसंग लू चले जइसन स्थिति घलो नइ राहय।
मौसम विभाग ले मिले जानबा के मुताबिक एक ठिन द्रोणिका दक्षिण पंजाब ले पश्चिम बिहार तक हवय। उहें, एक ठिन उपरी हवा के चक्रीय चक्रवाती घेरा बंगाल के खाड़ी, आंध्रप्रदेश अउ ओड़िसा तट के उपर बने हे, जेखर सेती प्रदेस म अवइया चौबीस घंटा के दउरान हवा-गरेर के संग कोनो-कोनो जघा म हल्का बरसा हो सकथे।
ऐति, आज राजधानी रईपुर अउ दुरूग के संगेसंग कोनो-कोनो जिला म पानी गिरे के समाचार मिले हे।