छत्तीसगढ़ विधानसभा के बजट सत्र काली ले शुरू होवत हे। चौबीस मार्च तक चलइया ए सत्र के दउरान चौदह बइठका होही। सत्र के शुरूआत काली एक मार्च के राज्यपाल के अभिभाषण के संग शुरू होही।
विधानसभा अध्यक्ष डॅाक्टर चरणदास महंत ह आज पत्रकार मनले गोठबात करत बताइन कि राज्यपाल के अभिभाषण ल दूरदर्शन अउ आकाशवाणी ले सोझे प्रसारित करे जाही। तीन मार्च के राज्यपाल के अभिभाषण उपर सदन म गोठबात कराय जाही।
मुख्यमंत्री भूपेश बघेल ह अवइया वित्तीय बछर बर बजट छै मार्च के पेश करही। ए बजट भाषण के प्रसारण घलो दूरदर्शन अउ आकाशवाणी ले करे जाही।
विधानसभा अध्यक्ष ह बताइन कि विधानसभा ले जुड़े सूचना अउ आंकड़ा ल तुरते देवाय के उद्देश्य ले एक ठिन मोबाइल एप घलो विकसित करे गेहे। ए मोबाइल एप ल काली लांच करे जाही। जेमा बजट के पूरा जानबा के संगेसंग राज्यपाल के अभिभाषण अउ सभा के कार्यवाही ले जुड़े प्रश्नोत्तरी घलो शामिल रीही।
छत्तीसगढ़ माध्यमिक शिक्षा मंडल डहार ले बारहवीं के परीक्षा काली एक मार्च ले अउ दसवीं के परीक्षा दू मार्च ले शुरू होवत हे। बारहवीं के परीक्षा इकतीस मार्च तक अउ दसवीं के परीक्षा चौबीस मार्च तक चलही। परीक्षा बीहनिया नौ बजे ले शुरू होही। उंहे शारीरिक प्रशिक्षण पत्रोपाधि परीक्षा घलो काली ले शुरू होवत हे। प्रवेश पत्र मंडल के वेबसाईट म जारी कर दे गेहे।
एति मंडल डहार ले परीक्षा के पहिली छात्र, पालक अउ शिक्षक मनके समस्या के निपटारा बर हेल्पलाइन नंबर जारी करे गेहे। ये टोल फ्री नंबर हे- एक आठ शून्य शून्य दू तीन तीन चार तीन छै तीन म बीहनिया साढ़े दस बजे ले संझा साढ़े पांच बजे तक अपन समस्या के तुरते निपटारा कर सकथे।
छत्तीसगढ़ के मुख्य निर्वाचन पदाधिकारी कार्यालय अउ राज्य शासन डहार ले निर्वाचन प्रक्रिया म दिव्यांग अउ थर्ड जेंडर समूह के लोगन मनके भागीदारी बढ़ाय बर रायपुर म संवाद सेतु कार्यशाला राखे गीस। एमा दिव्यांग अउ थर्ड जेंडर के कल्याण बर काम करइया एनजीओ, समाज कल्याण विभाग के अधिकारी अउ थर्ड जेंडर समुदाय के प्रतिनिधि मन ह भाग लीन।
मुख्य निर्वाचन पदाधिकारी रीना बाबा साहेब कंगाले ह दिव्यांग अउ थर्ड जेंडर बर भारत निर्वाचन आयोग डहार ले दे जात सुविधा के बारे म जानबा दीन। त उंहे उप मुख्य निर्वाचन पदाधिकारी विनय अग्रवाल ह आयोग डहार ले तैयार करे गे सक्षम ऐप के बारे म बताइन । ओमन बताइन कि निर्वाचन आयोग के नवा निर्देश के मुताबिक अब अस्सी साल ले जादा उमर के मतदाता अउ चालीस प्रतिशत ले जादा दिव्यांग मतदाता मन ल डाक मतपत्र के सुविधा दे जाही। प्रदेश म ए बेरा करीबन डेढ़ लाख पंजीकृत दिव्यांग मतदाता अउ तृतीय लिंग के रूप म चिन्हांरी करे गे आठ सौ ग्यारा मतदाता हवय।
शिशु संरक्षण माह
लईका मनके स्वास्थ्य अउ पोषण के बने देखरेख बर प्रदेश म आज ले शिशु संरक्षण माह शुरू होगे हे। इकतीस मार्च तक चलइया ए महीना के दउरान नौ माह ले पांच साल तक के लइका मन ल विटामिन ए के डोज पिलाये जाही। संगेसंग छै माह ले पांच साल तक के लइका मन ल आयरन अउ फॉलिक एसिड सिरप घलो दे जाही।
शिशु अउ बाल स्वास्थ्य कार्यक्रम के उप संचालक डॅाक्टर वी.आर. भगत ह बताइन कि शिशु संरक्षण माह के दउरान प्रदेश के पच्चीस लाख साठ हजार लइका मन ल विटामिन ए अउ छब्बीस लाख नब्बे हजार लइका मन ल आयरन के संगेसंग फॉलिक एसिड देके लक्ष्य राखे गेहे। डॅाक्टर भगत ह बताइन कि शिशु संरक्षण माह के दउरान छै माह ले पांच साल तक के लइका मन ल मितानिन मन ह घरोघर जाके हप्ता म दू बार आईएफए सिरप पिलाही। उंहे नौ माह ले पांच साल तक के लइका मन ल विटामिन ए के खुराक घलो दे जाही।
भाजपा रैली-घेराव
भारतीय जनता पार्टी के प्रदेस अध्यक्ष अरूण साव ह किसान मोर्चा डहार ले सरगुजा जिला के भटगांव म राखे गे किसान आक्रोस रैली ल संबोधित करत राज्य के कांग्रेस सरकार उपर किसान बिरोधी होय के आरोप लगाए हे। ओमन किहीन कि राज्य सरकार ह केन्द्र सरकार के पईसा ले धान बिसा के वाहवाही लूटत हे। एक लाख ले जादा किसान मन ह सिंचई पम्प म बिजली कनेक्सन बर अरजी लगाए हे, फेर सरकार ह किसान मन ल बिजली तक नई दे पात हे।
उहें, भाजपा के कार्यकर्ता मन ह मोर आवास-मोर अधिकार अभियान के तहत आज भिलई-तीन म मुख्यमंत्री निवास अउ पीएचई मंत्री के आवास के घेराव करे के कोसिस करीन। प्रदर्सन के दउरान पुलिस ह भाजपा कार्यकर्ता मन ल भिलई-तीन कालेज के तीर रोक दीन। ए मउका म भाजपा कार्यकर्ता मन ह राज्य सरकार के खिलाफ नाराबाजी घलो करीन।
स्वास्थ्य मंत्रालय-गर्मी मौसम
केंद्रीय स्वास्थ्य मंत्रालय ह गर्मी ले जुड़े बीमारी उपर राज्य अउ केंद्रशासित प्रदेश मन ल एक ठिन राष्ट्रीय कार्ययोजना जारी करे हे। स्वास्थ्य मंत्रालय ह कार्य योजना म गर्मी के मौसम म गर्मी के प्रभाव ल दूर करे बर प्रभावी कदम उठाय बर केहे हे। मंत्रालय ह राज्य के स्वास्थ्य अधिकारी मनले जम्मों जिला मन म दिशा निर्देश जारी करके प्रचार प्रसार करे बर केहे हे।
केंद्रीय स्वास्थ्य सचिव राजेश भूषण ह राज्य के जम्मों मुख्य सचिव मन ल लिखे चिट्ठी म केहे हे कि एक मार्च ले जम्मों राज्य अउ जिला मन म जलवायु परिवर्तन अउ मानव स्वास्थ्य उपर राष्ट्रीय कार्यक्रम के तहत गर्मी ले जुड़े बीमारी उपर सरलग निगरानी करे के बात केहे हे।
प्रदेश म कोदो-कुटकी अउ रागी के फसल मन ल बढ़ावा देबर समर्थन मूल्य म एखर खरीदी करे जात हे। प्रदेश म अब तक करीबन बारह करोड़ रूपिया के अड़तीस हजार कुंटल ले जादा कोदो कुटकी अउ रागी के खरीदी करे जा चुके हे। वन विभाग के प्रमुख सचिव मनोज कुमार पिंगुआ ह बताइन कि किसान मनके हित म एखर दायरा ल बढ़ाके अब पूरा प्रदेश म राज्य लघु वनोपज संघ के जम्मों प्राथमिक वनोपज सहकारी समिति मनके माध्यम ले ए फसल मनके समर्थन मूल्य म खरीदी करे जात हे।
आरडीए-सरचार्ज राशि
रायपुर विकास प्राधिकरण ह अब प्रधानमंत्री आवास योजना के तहत कमल विहार, इंद्रप्रस्थ, रायपुरा अउ बोरियाखुर्द के फ्लैट्स योजना के संगेसंग स्वतंत्र मकान के बांचे पइसा के पूरा राशि के भुगतान उपर सरचार्ज राशि म पचास प्रतिशत के छूट देहे। ए छूट इकतीस मार्च तक लागू रीही। जउन मन पहिली भुगतान कर देहे उंखर मन उपर ये छूट लागू नइ होवय।
बालोद जिला कलेक्टोरेट के पोताई गोबर ले बने प्राकृतिक पेंट ले करे जात हे। ये ह राज्य के पहिली कलेक्टोरेट भवन हे जेखर पोताई प्राकृतिक पेंट ले होवत हे। जिला कलेक्टर कुलदीप शर्मा ह कलेक्टोरेट भवन के रंग-रोगन के काम करे के शुरूआत करीन।
जानबा के मुताबिक राज्य म सरकारी भवन मनके पोताई गौठान मन म महिला समूह मन डहार ले गोबर ले बनाये गे प्राकृतिक पेंट ले करे के निर्देश शासन डहार ले जारी करे जा चुके हे। एखर तहत बालोद जिला के जम्मों सरकारी ऑफिस, भवन, स्कूल अउ आंगनबाड़ी केंद्र मनके पोताई प्राकृतिक पेंट ले करे जात हे।
– अंतर्राष्ट्रीय महिला दिवस के मउका म रायपुर के बीटीआई मैदान म काली ले छै दिन के महिला मड़ई शुरू होगे हे। एमा प्रदेश के जम्मों जिला मनके महिला स्व सहायता समूह मन ह स्टॉल लगावत हे।
– दुर्ग जिला के पाटन के गांव पतोरा के सरपंच अंजिता साहू के चयन स्वच्छ सुजल शक्ति सम्मान बर होय हे। चार मार्च के दिल्ली म एक ठिन कार्यक्रम म राष्ट्रपति डहार ले ओमन ल सम्मानित करे जाही।
– सूरजपुर जिला के कमलपुर रेलवे स्टेशन म लाइफ लाइन एक्सप्रेस रेलगाड़ी म निशुल्क स्वास्थ्य उपचार अउ सर्जरी शिविर के दउरान नेत्र विशेषज्ञ मन डहार ले मोतियाबिंद ले पीड़ित सत्तर झिन मरीज मनके सफल ऑपरेशन करे गीस।
अउ
– बेमेतरा जिला के चंदनू पुलिस चौकी के ग्राम खम्हरिया म जहरीला खाना खाय ले नौ झिन लोगन मन बीमार होगे। इंखर मनके इलाज जिला अस्पताल म चलत हे।