राष्ट्र आज चौहत्तरवां गणतंत्र दिवस मनावत हे। ए अवसर म मुख्य समारोह नई दिल्ली के कर्तव्य-पथ म आयोजित करे गीस। राष्ट्रपति द्रौपदी मुर्मू ह गणतंत्र दिवस आयोजन म देस के नेतृत्व करीन। ए बछर के परेड म मुख्य अतिथि मिस्र के राष्ट्रपति अब्देल फतह अल सीसी रिहीन। परेड आज बिहनिया राष्ट्रीय समर स्मारक म प्रधानमंत्री नरेन्द्र मोदी के पुष्पांजलि के संग प्रारंभ होईस। अइसन पहिली बार होईस कि तीन झन महिला अउ छह झिन अग्निवीर मन घलो परेड म हिस्सा लीन। तटरक्षक, केन्द्रीय रिजर्व पुलिस बल, रेलवे सुरक्षा बल, दिल्ली पुलिस, एनसीसी अउ एनएसएस के घलो भागीदारी रिहीस। पहिली बार, सीमा सुरक्षा बल के महिला ऊंट सवार मन परेड म सहभागिता करीन।
प्रधानमंत्री ह गणतंत्र दिवस म देसवासी मन ल सुभकामना दीन हे। अपन ट्वीट संदेस म ओमन किहीन कि ए बखत के गणतंत्र दिवस ए अर्थ म बिसेस हे कि ए आयोजन आजादी के अमृत महोत्सव के दउरान होवत हे।
गणतंत्र दिवस-छत्तीसगढ़-मुख्य समारोह
छत्तीसगढ़ म घलो चौहत्तरवां गणतंत्र दिवस देसभक्ति अउ उल्लास के माहौल म मनाय जात हे। राज्यपाल अनुसुईया उइके ह आज राजधानी रईपुर के पुलिस परेड मैदान म आयोजित मुख्य समारोह म ध्वजारोहण करीन अउ परेड के सलामी लीन। ए मउका म राज्यपाल ल गार्ड ऑफ ऑनर दे गीस। समारोह म लयबद्ध अउ आकर्षक परेड के आयोजन करे गीस। अलग-अलग विभाग मन डहार ले छत्तीसगढ़ के विकास ल दर्सावत आकर्षक झांकी मनके घलो प्रदर्सन करे गीस। स्कूली लइका मन देसभक्ति अउ छत्तीसगढ़ी गीत म सामूहिक नृत्य प्रस्तुत करीन।
ए अवसर म राज्यपाल ह किहीन कि गणतंत्र के मजबूती ही जन-जन के सफलता आय। ए दिन देस म अपन संविधान लागू करे, ए संविधान के अनुसार देस के संचालन करे अउ आमजनता ल विधि सम्मत शक्ति अउ अधिकार संपन्न बनाय के दिन आय। ओमन किहीन कि प्रदेस म माओवादी गतिविधि नियंत्रित होय हे अउ माओवादी मन अपन गतिविधि ल छोड़के सामाजिक जीवन म लहुटत हे। राज्यपाल ह समारोह के अंत म राज्य वीरता पुरस्कार बर चयनित लइका, केन्द्रीय अउ राज्य बल मनके उत्कृष्ट परेड के टुकड़ी अउ सांस्कृतिक कारीकरम अउ श्रेष्ठ विभागीय झांकी मन ल सम्मानित करीन।
गणतंत्र दिवस-मुख्यमंत्री घोषणा
उहें, मुख्यमंत्री भूपेश बघेल ह जगदलपुर के लालबाग मैदान म आयोजित गणतंत्र दिवस समारोह म ध्वजारोहण करीन। ए अवसर म मुख्यमंत्री ह कई ठिन महत्वपूर्ण घोसना घलो करीन। ओमन किहीन कि आगू वित्तीय बछर ले बेरोजगार मन ल हर महीना बेरोजगारी भत्ता दे जाही। एखर अलावा आदिवासी पर्व सम्मान निधि के तहत आगामी वित्तीय बछर ले सरकार ह बस्तर संभाग, सरगुजा संभाग अउ प्रदेस के अनुसूचित क्षेत्र मन म आदिवासी समाज के पर्व मनके उत्तम आयोजन बर प्रत्येक ग्राम पंचायत ल दस हजार रूपिया हरेक बछर प्रदान करही। उहें, महिला समूह, महिला उद्यमी, महिला व्यवसायी अउ महिला स्टार्टअप मन ल व्यापार उद्योग स्थापित करे बर नवीन योजना सुरू करे जाही। राज्य म छत्तीसगढ़ नवाचार आयोग के गठन करे जाही। संगेसंग रायपुर एयरपोर्ट म यात्री सुविधा ल बढ़ावा दे बर एयरपोर्ट क्षेत्र के वाणिज्यिक विकास अउ रोजगार सृजन बर स्वामी विवेकानंद विमानतल करा एयरोसिटी विकसित करे जाही।
मुख्यमंत्री ह किहीन कि छत्तीसगढ़ म कुटीर उद्योग आधारित ग्रामीण अर्थव्यवस्था ल सुदृढ़ बनाय, रोजगार अउ लोगन मनके आय बढ़ाय बर ग्रामीण उद्योग नीति बनाय जाही। उहें, उद्योग विभाग डहार ले विकसित औद्योगिक क्षेत्र मन म स्थित इकाई मन ल संपत्ति कर के भार ले मुक्त करे जाही। मुख्यमंत्री ह खारून नदी उपर उत्कृष्ट रिवरफ्रंट विकसित करे के घलो घोसना करीन। एखर अलावा प्रदेस म विद्युत सिकायत के निराकरण बर आधुनिक ऑनलाइन निराकरण प्रणाली विकसित करे जाही। मुख्यमंत्री ह निर्माण श्रमिक मन बर मुख्यमंत्री निर्माण श्रमिक आवास सहायता योजना सुरू करे के घोसना करीन। एखर तहत छत्तीसगढ़ भवन अउ अन्य सन्निर्माण कर्मकार कल्याण मंडल म लगातार तीन साल पंजीकृत निर्माणी श्रमिक मन ल स्वयं के मकान बनाय बर पचास हजार रूपिया अनुदान दे जाही। मुख्यमंत्री के एक अन्य घोसना के अनुसार राज्य म हरेक बछर राष्ट्रीय रामायण-मानस महोत्सव के आयोजन होही। उहें, चंदखुरी म हरेक बछर मां कौशिल्या महोत्सव आयोजित करे जाही।
पद्म पुरस्कार
केन्द्र सरकार ह काली गणतंत्र दिवस के पूर्व संध्या म पद्मश्री, पद्म विभूषण अउ पद्म भूषण पुरस्कार मनके घोसना करीन। ए बखत छत्तीसगढ़ के तीन झिन विभूति मन ल पद्मश्री अलंकरण ले सम्मानित करे जाही। एमा दुरूग जिला के उषा बारले ल पंडवानी गायन के क्षेत्र म, बालोद जिला के ग्राम लाटाबोड़ निवासी डोमर सिंह कंवर ल नाचा कला के क्षेत्र म उल्लेखनीय योगदान बर अउ कांकेर जिला के अजय कुमार मंडावी ल कलाकृति के बेजोड़ नमूना तैयार करे बर पद्मश्री सम्मान ले नवाजे जाही।
राज्यपाल अनुसुईया उइके अउ मुख्यमंत्री भूपेश बघेल ह पद्मश्री पुरस्कार बर चयनित छत्तीसगढ़ के तीनों विभूति मन ल बधाई अउ सुभकामना दीन। ओमन देस के प्रतिष्ठित पुरस्कार बर इखर चयन उपर प्रसन्नता जाहिर करत हुए किहीन कि एखर ले छत्तीसगढ़ के कलाजगत सहित पूरा प्रदेस गौरवान्वित होय हे।
परीक्षा पे चर्चा
परीक्षा पे चर्चा के छठवां संस्करण काली सत्ताईस जनवरी के नई दिल्ली के तालकटोरा इंडोर स्टेडियम म आयोजित करे जाही। ए कारीकरम परीक्षा मन ले तनाव मुक्त बनाय अउ परीक्षाथी मनके सहायता करे के तरीका उपर चरचा करे बर आयोजित करे जात हे। ए कारीकरम ल लेके छत्तीसगढ़ म घलो लइका मन म काफी उत्साह देखे जात हे।
केन्द्रीय शिक्षा मंत्री धर्मेन्द्र प्रधान ह बतईन कि ए बछर परीक्षा पे चर्चा बर अड़तीस लाख ले जादा विद्यार्थी मन पंजीकरण कराय हे, जेन ह पाछु बछर के तुलना म पचास प्रतिसत जादा हे।
मुख्यमंत्री-लोकार्पण
मुख्यमंत्री भूपेश बघेल ह गणतंत्र दिवस के मउका म आज जगदलपुर म इंडिया गेट के तर्ज म बनाय गे अमर वाटिका के लोकार्पण करीन। ए मउका म मुख्यमंत्री ह अमर शहीद जवान मन ल पुष्पचक्र अर्पित करके श्रद्धांजलि दीन। संगेसंग सहीद मनके परिजन ल साल, श्रीफल देके सम्मानित घलो करीन।
गौरतलब हे कि बस्तर के सांति, सुरक्षा अउ विकास बर अपन प्राण के आहुति देवइया पुलिस अउ सुरक्षा बल के जवान अउ नागरिक मनके सुरता म अमर वाटिका बनाय गेहे। अमर वाटिका म करीबन साठ फीट ऊंचा सहीद स्मारक बनाय गेहे।
स्कूल-शुल्क निर्धारित
राज्य सरकार ह प्रदेस के सरकारी स्कूल मन म नौवीं ले बारहवीं तक के कक्षा के सलाना सुल्क निर्धारित कर देहे। स्कूल शिक्षा विभाग डहार ले जारी आदेस के अनुसार हाईस्कूल के विद्यार्थी मन ल चार सौ दस रूपिया अउ हायर सेकेंडरी के विद्यार्थी मन ल सुल्क के रूप म चार सौ पैंतालीस रूपिया सलाना दे बर लागही।
गौरतलब हे कि प्रदेस म पहली ले आठवीं कक्षा तक शिक्षा निःशुल्क हे।
बसंत पंचमीं
आज बसंत पंचमी आय। छत्तीसगढ़ सहित देसभर म बसंत पंचमी धार्मिक श्रद्धा, आस्था अउ पारंपरिक उल्लास के संग मनाय जात हे। माघ शुक्ल पंचमी के ए दिन ज्ञान, विवेक, संपूर्ण कला, काव्य अउ संगीत के देवी सरस्वती के उपासना के दिन आय। एला श्री पंचमी घलो केहे जाथे। ए अवसर म लइका मनके विद्या आरंभ कराय के परंपरा हे। शैक्षणिक संस्था के अलावा लोगन मन घर म घलो मां सरस्वती के पीला फूल से श्रृंगार कर उंखर बिसेस पूजा अर्चना करीन।