छत्तीसगढ़ विधानसभा के शीतकालीन सत्र दू दिन पहिली आजेच सिरा गीस। छै जनवरी तक चलइया ए सत्र ल विधानसभा अध्यक्ष डॅाक्टर चरणदास महंत ह आज अनिश्चिकाल बर स्थगित कर दीस। सदन म प्रश्नकाल के बेरा भाजपा के पूर्व नेता प्रतिपक्ष धरमलाल कौशिक ह प्रधानमंत्री गरीब कल्याण योजना म चांवल वितरण मामला म पांच हजार करोड़ रूपिया के चांवल घोटाला के मामला ल उठात हंगामा करीन।
सदन म होवत शोर शराबा ल देखत विधानसभा अध्यक्ष ह पहिली दस मिनट बर सदन के कार्यवाही स्थगित करे गीस, फेर विपक्ष डहार ले लगातार हंगामा करे के सेती बाद म एक घंटा बर सदन के कार्यवाही ल रोक दे गीस। एखर बाद सदन के कार्यवाही दुबारा शुरू करे के बाद घलो हंगामा जारी रीहिस अउ विपक्ष डहार ले पर्चा फाड़के आसंदी के तरफ फेंके जाय के घटना के बाद सदन के कार्यवाही अनिश्चितकाल बर स्थगित कर दे गीस।
विधानसभा उपाध्यक्ष
कांग्रेस विधायक संतराम नेताम छत्तीसगढ़ विधानसभा के नवा उपाध्यक्ष बनाय गेहे। आज विधानसभा म बिना विरोध के ओमन ल चुन ले गीस। भाजपा सदस्य मन ह घलो संतराम नेताम ल अपन समर्थन दीन। कांग्रेस विधायक दल के काली होय बइठका म प्रदेश प्रभारी कुमारी शैलजा के उपस्थिति म श्री नेताम के नाम म सहमति बने रीहिस। एखर बाद बुधवार के नामांकन भरे के बाद गुरूवार के चुनाव होना रीहिस। श्री नेताम ह आज विधानसभा सचिव के आगू अपन नामांकन पत्र दाखिल करीन। ए बेरा म मुख्यमंत्री भूपेश बघेल, संसदीय कार्यमंत्री, रविंद्र चौबे के संग आने मंत्री उपस्थित रीहिन।
नामांकन भरे के सूची म श्री नेताम के एकमात्र नाम होय के कारण ओमन ल छत्तीसगढ़ विधानसभा के उपाध्यक्ष चुन ले गेहे। संतराम नेताम केशकाल के विधायक हे।
जानबा के मुताबिक भानुप्रतापपुर के पूर्व विधायक मनोज मंडावी के निधन के बाद विधानसभा उपाध्यक्ष के पद खाली रीहिस।
भाजपा आरक्षण धरना
भारतीय जनता पार्टी ह आरक्षण ल जल्दी लागू करे के मांग ल लेके राजधानी रायपुर म आज धरना प्रदर्शन करीन। भाजपा के वरिष्ठ नेता अउ कार्यकर्ता मन ह शहर के मुख्य सड़क ले होत मुख्यमंत्री निवास के घेराव के कोसिस करीन। ए प्रदर्शन म भाजपा प्रदेश अध्यक्ष अरूण साव, पूर्व मुख्यमंत्री डॅाक्टर रमनिंसंह, नेता प्रतिपक्ष नारायण चंदेल, धरमलाल कौशिक, बृजमोहन अग्रवाल, अजय चंद्राकर, अउ प्रेमप्रकाश पांडे घलो शामिल होइन।
केंद्रीय मंत्रिमंडल-बीआईएनडी मंजूरी
केंद्र सरकार ह केंद्रीय सूचना तंत्र ल अच्छा बनाये बर आज ब्रॉडकास्टिंग इंफ्रास्ट्रक्चर एंड नेटवर्क डेवलपमेंट स्कीम – बीआईएनडी ल मंजूरी दे देहे। ए बछर दू हजार पच्चीस-छब्बीस तक दू हजार पांच सौ उनतालीस करोड़ रूपिया खर्च करे जाही।
केंद्रीय सूचना अउ प्रसारण मंत्री अनुराग सिंह ठाकुर ह नई दिल्ली म पत्रकार मनल बताइन कि ए योजना ले प्रसार भारती ल प्रसारण के बुनियादी ढांचा अउ समाचार के विषय वस्तु ल अच्छा बनाये बर वित्तीय मदद दे जाही। श्री ठाकुर ह कहिन कि नवा योजना के तहत दूरदर्शन अउ आकाशवाणी के स्टूडियो अउ ब्रॉडकास्ट उपकरण के आधुनिकीकरण अउ डिजिटलीकरण करे जाही।
ओमन कीहिन कि आकाशवाणी के एफ.एम. सेवा के विस्तार करे जाही अउ देश के अस्सी प्रतिशत आबादी तक एखर पहुंच बनाये जाही। संगेसंग देश के दूरिहा जगा, जनजातीय, वामपंथी उग्रवाद प्रभावित अउ सीमावर्ती क्षेत्र के संग आकांक्षी जिला म दूरदर्शन के आठ लाख डीटीएच सेट-टॉप बॉक्स घलो बांटे जाही।
परीक्षा पे चर्चा
प्रधानमंत्री नरेंद्र मोदी सत्ताईस जनवरी के परीक्षा पे चर्चा संवाद म विद्यार्थी, शिक्षक अउ अभिभावक मन संग गोठबात करही। ए कार्यक्रम नई दिल्ली के तालकटोरा इंडोर स्टेडियम म होही।
शिक्षा मंत्रालय ह कहिन कि पाछू बछर के तुलना म ए बछर परीक्षा पे चर्चा बर पंजीकरण दोगुना ले जादा होय हे। राज्य बोर्ड, सीबीएसई, केंद्रीय विद्यालय संगठन, नवोदय विद्यालय समिति अउ आने बोर्ड ले बड़ संख्या म विद्यार्थी, शिक्षक अउ अभिभावक खुश होके ए कार्यक्रम म शामिल होवत हे।
मंत्रालय ह कहिन कि इकतीस लाख ले जादा विद्यार्थी पांच लाख ले जादा शिक्षक अउ लगभग दू लाख अभिभावक ह परीक्षा पे चर्चा बर पंजीकरण करवाय हे। डेढ़ सौ ले जादा देश के विद्यार्थी इंक्यावन देश के शिक्षक अउ पचास देश के अभिभावक ह घलो कार्यक्रम बर पंजीकरण करवाय हे।
जानबा के मुताबिक प्रतिभागी मनके चयन बर पच्चीस नवंबर ले तीस दिसंबर दू हजार बाईस के बीच आने-आने विषय म ऑनलाइन रचनात्मक लेखन प्रतियोगिता आयोजित करे गे रीहिस।
माओवादी समाचार
बीजापुर जिला ले अगवा करे गे दू आने लोगन ल घलो आज माओवादी मन छोड़ देहे। जानबा के मुताबिक पाछू चौबीस दिसंबर के माओवादी मन ह कोंडागांव के दू मनखे अउ लोहण्डीगुड़ा के दू मनखे संग चार लोगन ल अगवा कर ले रीहिन । माओवादी मन ह एमा ले दू लोगन ल काली रिहा कर दे रीहिस।
इही बीच सुकमा जिला ले आज तीन इनामी माओवादी मन ह आत्मसमर्पण करीन। जानबा के मुताबिक ए माओवादी मन ह पुलिस अधीक्षक सुनील शर्मा, अतिरिक्त पुलिस अधीक्षक किरण चौहान अउ ओम चंदेल के संग कोबरा दू सौ आठ बटालियन के अधिकारी मनके आगू आत्मसमर्पण करीन। एखर मन उपर पांच लाख रूपिया अउ तीन लाख रूपिया के इनाम घोषित रीहिस।
आधार पता
भारतीय विशिष्ट पहिचान प्राधिकरण ह आधार कार्ड म पता बदलवाना आसान करीस हे। प्राधिकरण ह लोगन ल परिवार के मुखिया के सहमति ले आधार म अपन पता ऑनलाइन अपडेट करे के एक विशेष सुविधा के शुरूआत करे हे। ए सुविधा ले ओ लोगन मन ल मदद मिलही जेखर पास आधार म अपन नवा पता अपडेट करे बर खुद के नाम के कोई वैध दस्तावेज नइ हे।
नवा व्यवस्था के तहत राशन कार्ड, मार्कशीट, विवाह प्रमाण पत्र, पासपोर्ट जइसन ओ दस्तावेज मन ल प्रस्तुत करे जा सकत हे, जेमा आवेदक अउ परिवार के मुखिया दूनो के नाम अउ रिश्ता के जानकारी होवय। फेर रिश्ता ल प्रमाणित करइया दस्तावेज घलो उपलब्ध नइ हे त प्राधिकरण डहार ले निर्धारित प्रारूप म परिवार के मुखिया स्व-घोषणा प्रस्तुत करके पता बदले बर आवेदन कर सकत हे।
ए सुविधा ले अइसन लाखों लोगन मन ल सहूलियत होही, जेन आने कारण ले एक जगा ले दूसर जगा म रेहे बर जात हे। ये विकल्प यूआईडीएआई डहार ले पहिली निर्धारित अपडेट प्रक्रिया के अतिरिक्त होही। अठारा बछर ले जादा उम्र के कोनो भी निवासी ए उद्देश्य बर परिवार के मुखिया के रूप म अपन रिश्तेदार के संग अपन पता साझा कर सकत हे।
मौसम
मौसम म अचानक होय बदलाव ले प्रदेश के तापमान म गिरावट आय हे। आज बीहनिया ले रायपुर के संग प्रदेश के आने जिला मन म घना कोहरा छाये हुए हे। उंहे कुछ जगा म हल्का बारिश होय के खबर घलो मिले हे। रायपुर के संग राजनांदगांव, पेण्ड्रा, बिलासपुर, अंबिकापुर के संग आने जिला म पूरा दिन बादल छाये के संग थोरकुन पानी घलो गिरीस।
मौसम बदले के कारण प्रदेश के कतकोन इलाका म कड़ाका के ठंड पड़त हे। मौसम विभाग के अनुसार बंगाल के खाड़ी ले अवइया पूर्वी हवा के चलत प्रदेश के मौसम म ये बदलाव देखे जात हे। मौसम विभाग ह बताइन कि अवइया चौबीस घंटा के दउरान बादल छाये रीही अउ ठंड म घलो बढ़ोत्तरी हो सकत हे। उंहे कुछ जिला म शीतलहर के घलो संभावना हे।
एति सरगुजा, बलरामपुर-रामानुजगंज, गौरेला-पेण्ड्रा-मरवाही अउ सुकमा जिला म शीतलहर के सेती स्कूल म काली पांच जनवरी ले सात जनवरी तक छुट्टी के आदेश जारी कर दे गेहे। जिला म कलेक्टर ह आदेश देहे कि मौसम सामान्य होय तक स्कूल बंद रीही अउ अर्धवार्षिक परीक्षा के तारीख घलो आगू बढ़ाय जाही।