पीएम कोविड बैठक
चीन, जापान अउ अमेरिका समेत दूसर देश मन म कोरोना के बाढ़त मामल ल देखत केंद्र सरकार सतर्क होगे हे। ए संबंध म आज प्रधानमंत्री नरेंद्र मोदी ह एक महत्वपूर्ण बइठका लीन। ऑनलाइन होइस उच्च स्तरीय बइठका म देश म कोरोना के स्थ्तिि अउ संबंधित पहलू मन उपर चर्चा करे गीस।
ए बइठका चीन, जापान, दक्षिण कोरिया, फ्रांस अउ अमेरिका म कोरोना के बाढ़त मामला ल देखत बलाये गीस। इही बीच काली प्रदेश म एक हजार ले जादा सैंपल के जांच करे गीस, जेमा रायपुर जिला के दू झिन मनखे मन कोरोना संक्रमित पाये गीस।
आदिवासी समुदाय जाति
केंद्रीय जनजाती समाज कल्याण राज्य मंत्री अउ सरगुजा के सांसद रेणुका सिंह ह छत्तीसगढ़ के बारा जाति मन ल आदिवासी समुदाय म सामिल करे संबंधी विधेयक लोकसभा म पारित होय म आदिवासी समाज ल बधाई दीन हे। ओमन ए पहल बर प्रधानमंत्री नरेंद्र मोदी अउ केंद्रीय जनजाती समाज कल्याण मंत्री अर्जुन मुण्डा बर आभार व्यक्त करीन हे। ए बारा जनजाति मन म मूल जातिसूचक शब्द ले मिलत जुलत जाति मन ल उहीच समूह म सम्मिलित करे गेहे।
आदिवासी बहुल छत्त्ीसगढ़ म बारा जनजातीय समुदाय के लोगन मनके ए मांग रीहिस कि ओमन ल अनुसूचित जनजाती के सूची म सामिल करे जाय, जेखर ले ओमन ल आरक्षणसमेत सरकार के योजना के लाभ मिल सकय। केंद्र सरकार ह ए मंाग ल गंभीरता ले स्वीकार करत पाछू सितंबर महीना म होय मंत्रिमंडल के बइठका म एखर ले जुड़े विधेयक के प्रस्ताव ल पारित कर दे रीहिन।
केंद्रीय राज्यमंत्री रेणुका सिंह ह कीहिन कि लोकसीभा म ए विधेयक के पारित होय ले प्रदेश के बारा जनजाती समुदाय मन ल आने-आने योजना के उचित लाभ मिल सकही। प्रदेश भाजपा अध्यक्ष अउ बिलासपुर के संासद अरूण साव अउ रायपुर सांसद सुनील सोनी ह घलो ए विधेयक के लोकसभा म पारित होय म प्रधानमंत्री अउ केंद्रीय जनजातीय समाज कल्याण मंत्री बर आभार व्यक्त करीन हे।
भेंट मुलाकात
मुख्यमंत्री भूपेश बघेल ह कीहिन हे कि राजीव गांधी किसान न्याय योजना के चौथा किस्त इकतीस मार्च के पहिली किसान मनके खाता म जमा हो जाही। आज बलौदाबाजार भाटापारा जिला के ओडान गांव म भेंट मुलाकात कार्यक्रम के दउरान मुख्यमंत्री ह ये बात कीहिन।
अपन प्रवास के दउरान श्री बघेल ह लाहोद गांव म बावन करोड़ इकतालिस लाख रूपिया के लागत के छियांलिस विकास काम के लोकार्पण अउ भूमिपूजन करीन।
जी-20
भारत ल विश्व के प्रमुख देश मनके समूह जी-20 के अध्यक्षता मिले के बाद ये उपलब्धि ल यादगार बनाये बर ए दिन म देश भर म आने-आने आयोजन करे जात हे। इही कड़ी म दक्षिण पूर्व मध्य रेलवे ह आम लोगन मन ल देश के ए उपलब्धि ले परीचित कराय के उद्देश्य ले अपन प्रकाशन, वेबसाइट अउ सोशल मीडिया के मंच बर एक ठिन लोगो तियार करे हे। एमा पृथ्वी ल देखावत ओखर संग वसुधैव कुटुम्बकम के नारा लिखे गेहे।
आंगनबाड़ी केंद्र वाटर टैंक
लईका मन ल पीये के साफ पानी उपलब्ध कराय के सेती रायपुर, दुर्ग अउ बिलासपुर जिला के दू सौ दस आंगनबाड़ी मन म स्टील के बने पानी के टंकी लगाये जाही। एला बनाये म चिकित्सा मानक अनुसार उपयुक्त स्टील के इस्तेमाल करे जाही। पानी के टंकी ल ले जाने वाला गाड़ी ल महिला अउ बाल विकास मंत्री अनिला भंेडिया ह आज अपन रायपुर स्थित निवास कार्यालय ले झंडा दिखाके रवाना करीन।
गोबर पेंट-गडकरी सराहना
प्रदेश के जम्मों सरकारी कार्यालय अउ भवन मनके रंग रोगन म अब गोबर ले बने प्राकृतिक पेंट के इस्तेमाल करे जाही। राज्य सरकार ह गोधन न्याय योजना के तहत प्रदेश के गौठान मन म इकट्ठा होवइया गोबर के कृषि के अलावा दूसर उपयोग ल बढ़ावा देके उद्देश्य ले ये निर्णय लीन हे। केंद्रीय सड़क परिवहन मंत्री नीतिन गडकरी ह राज्य सरकार के ए निर्णय के सराहना करत मुख्यमंत्री भूपेश बघेल ल ट्वीट करीन हे। अपन ट्वीट म ओमन कीहिन कि छत्तीसगढ़ के विभागीय भवन मन म गोबर ले बने प्राकृतिक पेंट के इस्तेमाल के निर्णय सराहनीय अउ स्वागत योग्य हरय।
मुख्यमंत्री श्री बघेल ह केंद्रीय मंत्री के ये ट्वीट बर ओमन के प्रति आभार व्यक्त करीन हे। अपन ट्वीट म मुख्यमंत्री ह कीहिन हे कि गोधन अउ श्रम के सम्मान करके छत्तीसगढ़ महात्मा गांधी के रास्ता म आगू बाढ़त हे।
बतादन कि राज्य के गोधन न्याय योजना ल राष्ट्रीय स्तर म अनेक पुरस्कार मिल चुके हे। उंहे ये योजना के बारे म जाने खातिर देश के दूसर राज्य मन घलो उत्सुकता देखाय हे।
घनश्याम सिंह गुप्त जयंती
प्रदेश के स्वाधीनता सेनानी अउ संविधान निर्माण सभा के हिंदी प्रारूप कमिटी के अध्यक्ष घनश्याम सिंह गुप्त के आज जयंती हरय। संविधान निर्माण सभा म महत्वपूर्ण जिम्मेदार निभइया दुरूग निवासी घनश्याम सिंह गुप्त सीपी एंड बरार प्रांत के विधानसभा के पहिली अध्यक्ष घलो रीहिन। ओखर जयंती म आज प्रदेश म आने-आने कार्यक्रम राखे गीस।
इही कड़ी म मुख्यमंत्री भूपेश बघेल ह अपन निवास कार्यालय म आयोजित समारोह म घनश्याम सिंह गुप्त के व्यक्तित्व अउ कृतित्व म प्रकाशित पुस्तक विधान पुरूष के विमोचन करीन। श्री बघेल ह ए पुस्तक के लेखक संजीव तिवारी ल बधाई देवत कीहिन कि ओमन हमर पुरखा के स्मृति ल संजोय के सराहनीय प्रयास करीन हे। श्री बघेल ह कीहिन कि नवा रायपुर के एक चौक के नामकरण स्वाधीनता सेनानी घनश्याम सिंह गुप्त के नाव उपर करे जाही अउ उंहा ओखर प्रतिमा घलो लगाये जाही।
हॉकी वर्ल्डकप ट्रॉफी
विश्व कप हॉकी प्रतियोगिता के ट्रॅाफी चौबीस दिसंबर के रायपुर पहुंचही। अपन निवास कार्यालय म आयोजित होवइया एक समारोह म मुख्यमंत्री भूपेश बघेल ए ट्रॅाफी के अनावरण करही। प्रदेश के खेलमंत्री उमेश पटेल कार्यक्रम के अध्यक्षता करही। ए कार्यक्रम के बाद ट्रॅाफी ल रैली के रूप म शहर के नेताजी सुभाष स्टेडियम लाये जाही। एखर बाद ट्रॅाफी ल तेलीबंाधा तलाब के किनारे अउ शहर के एक बड़े मॉल म आम जनता बर प्रदर्शित करे जाही। रायपुर ले ये ट्रॉफी विश्वकप हॉकी प्रतियोगिता के आयोजन स्थल भुवनेश्वर बर रावाना करे जाही।
छत्तीसगढ़ हॉकी संघ के महासचिव मनीष श्रीवास्तव ह बताइन कि ए ओडिशा म अवइया तेरा ले उनतीस जनवरी तक होवइया विश्वकप हॉकी प्रतियेगिता के सेती हॉकी इंडिया डहार ले देश के सोला राज्य मन म विश्व कप ट्रॉफी ल ले जाये जात हे। ओमन बताइन कि ये पहिली मउका हे जब विश्व कप हॉकी प्रतियोगिता के ट्रॉफी रायपुर लाये जात हे। एखर पहिली काली बंगलुरू म आयोजित होने वाला समारोह म ये ट्रॉफी छत्तीसगढ़ हॉकी संघ के अध्यक्ष फिरोज अंसारी ल सौंपे जाही।
अउ अब थोरकुन समाचार सार म –
– मुख्यमंत्री भूपेश बघेल काली दुर्ग जिला के जमराव म राखे गे गुरू बाबा घासीदास जयंती समारोह म सामिल होइन। ए मउका म ओमन आने आने विकास काम बर बीस लाख रूपिया देके घोसना करीन।
– गरियाबंद जिला के छुरा इलाका म पुलिस ह दू आरोपी मन ल देसी कट्टा के संग गिरप्तार करे हे। पुलिस के अनुसार ये दूनो झिन देसी कट्टा बेचे बर ग्राहक खोजत रीहिन।
– जांजगीर चंापा के देवरी गांव म हंसदेव नदिया म पाछू मंगलवार के दू झिन छात्र डूब गे रीहिन। बलौदा थाना प्रभारी गोपाल सतपथी ह बताइन कि एमा ले दूसर छात्र के शव घलो आज बरामद कर ले गेहे।
– बिलासपुर जिला के कोहरौदा गांव म घर के आगू खेलत एक साल के लइका के घर के पाछू बने पानी के गड्ढा म गिरे ले मउत होगे।