कोविड राज्य समीक्षा
अंतर्राष्ट्रीय स्तर म कोविड के बाढ़त मामला ल देखत केंद्र ह राज्य मनले केहे हे कि ओमन पॉजीटिव नमूना के जादा संख्या म जीनोम सिक्वेसिंग करय। केंद्रीय स्वास्थ्य सचिव राजेश भूषण ह एखर बारे म राज्य के मुख्य सचिव अउ स्वास्थ्य सचिव मन ल पत्र लिखे हे। ओमन ये सुनिश्चित करे बर केहे हे कि नमूना मन ल दैनिक आधार म जीनोम सिक्वेसिंग बर निर्धारित प्रयोगशाला मन म भेजे जाना चाही।
केंद्रीय स्वास्थ्य सचिव ह केहे हे कि एक हप्ता म लगभग पैंतीस लाख मामला के रिपोर्ट आय ले कोविड के चुनौती विश्व भर म बने हे। भारत म ए दउरान लगभग बारा सौ मामला दर्ज करे गेहे। इही बीच चीन, जापान, अमेरिका, कोरिया अउ ब्राजील म कोविड के बाढ़त खतरा ल देखत केंद्रीय स्वास्थ्य मंत्री मनसुख मांडविया आज कोविड म उच्च स्तरीय समीक्षा बइठका करीन। ओमन एक ट्वीट म कीहिन कि कोविड अभी सिराय नइ हे, ओमन जम्मों झन ले सतर्क रहे अउ निगरानी तंत्र ले मजबूत करे के निर्देश दीन।
राज्यपाल-उपराष्ट्रपति मुलाकात
उपराष्ट्रपति जगदीप धनखड़ ले छत्तीसगढ़ के राज्यपाल अनुसूइया उइके ह काली नई दिल्ली म सौजन्य भेंट करीन। ए मउका म उपराष्ट्रपति ल राज्यपाल ह प्रदेश के आने-आने गतिविधि के बारे म जानकारी दीन। ओमन छत्तीसगढ़ म नवा शिक्षा नीति लागू करे के संबंध म होय प्रगति अउ एखर ले जुड़े कुछ अध्यादेश मनके अनुमोदन ले घलो अवगत कराइन। राज्यपाल ह श्री धनखड़ ल उप राष्ट्रपति बने के शुभकामना दीन अउ छत्तीसगढ़ आये के नेवता दीन।
भेंट-मुलाकात सरसीवां
सारंगढ़-बिलाईगढ़ जिला के ग्राम पंचायत सरसीवां ल तहसील संगेसंग सरसीवां अउ पवनी ल नगर पंचायत बनाय जाही। मुख्यमंत्री भूपेश बघेल ह भेंट-मुलाकात कार्यक्रम के तहत काली सरसीवां म भटगांव म उप पंजीयन कार्यालय खोले के घलो घोसना करीन। ए दउरान मुख्यमंत्री ह आने-आने योजना मनके जमीनी हकीकत के जानकारी घलो लीन।
उंहे अजमेर म मुख्यमंत्री ह भेंट-मुलाकात कार्यक्रम के दउरान बिलाईगढ़ विधानसभा बर चौहत्तर करोड़ रूपिया ले जादा के आने-आने विकास काम के लोकार्पण अउ भूमिपूजन करीन। बाद म ओमन बिलाइगढ़ म अधिकारी मनके समीक्षा बइठका लेके जरूरी निर्देश दीन।
इही बीच बिलाईगढ़ विधानसभा क्षेत्र म आदिमजाति विकास विभाग के एक अधिकारी के खिलाफ मिले शिकायत मन ल मुख्यमंत्री ह गंभीरता ले लीन हे। मुख्यमंत्री ह आज बिलाइगढ़ म समीक्षा बइठका म संबंधित अधिकारी के तबादला करे अउ सिकायत के जांच कराय के निर्देश दीन। ए आदेश के बाद विभाग के प्रभारी सहायक आयुक्त पीसी लहरे के सेवा मूल विभाग म लहुटावत अवइया आदेस तक ओमन ल नवा रायपुर म आदिम जाति अनुसंधान अउ प्रशिक्षण संस्थान म संचालक के पद म पदस्थ करे गेहे।
जी-20 बैठक
राजधानी रायपुर म अगला साल सितंबर म प्रस्तावित जी-20 देश मनके चौथा स्थायी वित्त कार्य समूह बइठका ल लेके प्रशासनिक तियारी शुरू होगे हे। ए संबंध म मुख्य सचिव अमिताभ जैन के अध्यक्षता म राज्य स्तरीय समन्वय समिति के बइठका होइस अउ राज्य स्तर म अधिकारी मन ल जिम्मेदारी सौंपे गीस।
तबादला
राज्य शासन ह राज्य प्रशासनिक सेवा के छै अधिकारी मनके तबादला कर देहे। ए संबंध म सामान्य प्रशासन विभाग ह आदेश जारी कर देहे। एखर अनुसार प्रफुल्ल कुमार रजक अब मोहला मानपुर चौकी जिला म डिप्टी कलेक्टर होही। उंहे तुलसीराम मरकाम ल अब जनपद पंचायत पत्थलगांव के मुख्य कार्यपालन अधिकारी बनाय गेहे। अइसने इंदिरा मिश्र ल बलरामपुर रामानुजगंज, फागेश सिन्हा ल सरगुजा, पूजा बंसल ल घलो सरगुजा अउ शिवनाथ बघेल ल दंतेवाड़ा जिला म डिप्टी कलेक्टर पद के जिम्मेदारी दे गेहे।
भाजपा प्रदर्शन
मुख्यमंत्री भूपेश बघेल के बयान अउ कुरूद विधायक अजय चंद्राकर के सभा म होय पथराव के विरोध म धमतरी म भारतीय जनता युवा मोर्चा ह प्रदर्शन करीन। ए दउरान कार्यकर्ता मन ल रोके बर पहुंचे पुलिस मन संग आंदोनलकारी मनके झूमा-झटकी घलो होइस। भाजयुमो के जिला अध्यक्ष विजय मोटवानी ह कीहिन कि विपक्षी दल के कार्यक्रम म पथराव होना शर्मनाक बात हे अउ ए ह लोकतांत्रिक अधिकार के हनन हरय।
उंहे मुंगेली जिला भाजपा अध्यक्ष शैलेष पाठक ह नगर पालिका अध्यक्ष हेमेंद्र गोस्वामी ल बर्खास्त नइ करे उपर अठाईस दिसंबर के धरना प्रदर्शन करे के चेतावनी देहे। बतादन कि जिला भाजपा ह आरोप लगाय हे कि मुंगेली नगर पालिका अध्यक्ष हेमेंद्र गोस्वामी ह फर्जी जाति प्रमाण पत्र के आधार म पार्षद अउ नगर पालिका अध्यक्ष के चुनाव लड़े रीहिस।
एखर बारे म भाजपा नेता ह मुंगेली कलेक्टर ल ज्ञापन सौंपके हेमेंद्र गोस्वामी ल पदले बर्खास्त करे के मांग करे रीहिन अउ कार्यवाही बर तीस दिन के समय दे रीहिस। भाजपा नेता मन ए संबंध म कार्रवाई नइ होय म आंदोलन के चेतावनी देहे।
पीआईबी कार्यशाला
पत्र सूचना कार्यालय रायपुर डहार ले आज जगदलपुर म ग्रामीण पत्रकार मन बर मीडिया कार्यशाला के आयोजन करे गीस। ए कार्यशाला दू सत्र म संपन्न होइस, जेमा जगदलपुर शहर समेत ग्रामीण अंचल के पत्रकार मन सामिल होइन। कार्यक्रम म पीआईबी रायपुर के निदेशक कृपाशंकर यादव ह पत्रकार मन ल पत्रकार कल्याण योजना के बारे म जानकारी दीन।
उंहें शहीद महेंद्र कर्मा विश्वविद्यालय जगदलपुर के कुलपति मनोज कुमार श्रीवास्तव ह भारत सरकार के नवा शिक्षा नीति अउ केंद्रीय शिक्षा अवर सचिव गजमोहन मीणा ह छात्रवृत्ति के विषय म जानकारी दीन। कार्यशाला म बस्तर रेंज के पुलिस महानिरीक्षक पी. सुंदरराज ह बस्तर म सुरक्षा बेवस्था अउ पत्रकार मनके बारे म बताइन।
उंहे सूचना अउ प्रसारण मंत्रालय भारत सरकार के केंद्रीय संचार ब्यूरो प्रादेशिक कार्यालय रायपुर डहार ले धमतरी म सेवा सुशासन अउ गरीब कल्याण के आठ साल बिसय उपर मल्टीमीडिया चित्र प्रदर्शनी लगाय गेहे। तीन दिन के ए प्रदर्शन के उद्घाटन विधायक रंजना दीपेंद्र साहू ह करीन।
रेल जागरूकता
रेल दुर्घटना मन बर लोगन मन ल सचेत करे अउ ओमन म जागरूकता लाये के सेती रायपुर जिला विधिक सेवा प्राधिकरण अब रेलवे जोन के मदद ले रायपुर रेल परिक्षेत्र म जागरूकता अभियान चलाही। जिला न्यायाधीश अउ जिला विधिक सेवा प्राधिकरण के अध्यक्ष संतोष शर्मा ह ए कार्यक्रम के जिम्मेदारी जिला विधिक सेवा प्राधिकरण के सचिव प्रवीण मिश्रा ल दीन हे।
बतादन कि रेलवे ट्रैक म खड़े होके लोगन मन कोति ले सेल्फी ले, वीडियो बनाये, ट्रेन के डिब्बा उपर चढ़के यात्रा करे के खबर आगू आत रथे। अइसने करे ले लोगन मन अपन जीवन म संकट म डाल देथे।
छत्तीसगढ़िया ओलंपिक
छत्तीसगढ़िया ओलंपिक के राज्य स्तरीय आयोजन सात जनवरी ले नौ जनवरी तक राजधानी रायपुर के आने-आने खेल मैदान अउ इंडोर स्टेडियम म करे जाही। उद्घाटन समारोह सात जनवरी के सरदार बलवीर सिंह जुनेजा इंडोर स्टेडियम म होही।
छत्तीसगढ़िया ओलंपिक के जम्मों चौदह खेल विधा के प्रतियोगिता सरदार बलबीर सिंह जुनेजा स्टेडियम, आउटडोर स्टेडियम बुढ़ापारा, पंडित रविशंकर शुक्ल विश्वविद्यालय खेल परिसर अउ स्वामी विवेकानंद स्टेडियम कोटा म होही। उद्घाटन समारोह अउ समापन समारोह म प्रतिभागी मन कोति ले आने-आने सांस्कृतिक कार्यक्रम पेस करे जाही। समापन समारोह के आयोजन स्वामी विवेकानंद स्टेडियम कोटा रायपुर म नौ जनवरी के संझा करे जाही। आयोजन ल लेके मुख्य सचिव अमिताभ जैन के अध्यक्षता म आज मंत्रालय म खेल अउ युवा कल्याण विभाग के बइठका होइस।
इही बीच रायपुर के पंडित रविशंकर शुक्ल शारीरिक शिक्षा अध्ययन शाला म राखे गे दू दिन के संभाग स्तरीय युवा महोत्सव आज संपन्न होइस।
अवैध खनन कलेक्टर
रायपुर जिला म अवैध रूप ले रेत, मुरूम, गिट्टी के खनन अउ परिवहन करे उपर संचालक मनके खिलाफ एफ.आई.आर. दर्ज करे जाही। कलेक्टर डॅाक्टर सर्वेश्वर भुरे ह काली अधिकारी मनके बइठका म ए निर्देश दीन।
कलेक्टर ह बंद हो चुके खदान या फेर बिना निविदा अउ लीज के चलने वाला खदान मनले उत्खनन करे उपर भी संचालक मनके खिलाफ एफ आई आर दर्ज कराय के निर्देश दीन। ओमन कीहिन कि, अइसे मामला आगू आय म परिवहन म लगे वाहन अउ मशीन मन ल जब्त करे के घलो कार्रवाई करे जाही।