संसद-शीतकालीन सत्र
संसद के दूनों सदन के कार्यवाही आज शीतकालीन सत्र के निर्धारित बेरा ले छह दिन पहिली अनिश्चितकाल बर स्थगित कर दे गेहे। लोकसभा अध्यक्ष ओम बिरला ह समापन भासन म किहीन कि ए सत्र के दउरान सदन के तेरह बइठका होईस। ए दउरान नौ विधेयक पेस करे गीस, जेमा ले सात विधेयक ल पारित करे गीस।
बतादन कि संसद के सीतकालीन सत्र सात दिसंबर ले सुरू होय रिहीस अउ एला उनतीस दिसंबर तक चलना रिहीस।
कोविड-नेजल वैक्सीन
केन्द्र सरकार ह कोविडरोधी बूस्टर डोज बर भारत बायोटेक कंपनी के नाक ले दे जाने वाला वैक्सीन ल मंजूरी दे देहे। केन्द्रीय स्वास्थ्य मंत्रालय के सूत्र ह बतईन कि ए वैक्सीन अट्ठारह साल ले जादा आयु के लोगन मन बर स्वीकृत करे गेहे। मंत्रालय के अनुसार बूस्टर डोज बर ए वैक्सीन सुरू म निजी अस्पताल मन म उपलब्ध होही अउ एला आज ले को-विन ऐप म सुरू करे जाही। नेजल वैक्सीन के मंजूरी ए समय म मिले हे, जब चीन अउ दूसर देस मन म कोविड के मामला सरलग बाढ़त हे।
राष्ट्रीय किसान दिवस
आज राष्ट्रीय किसान दिवस हरय। देश के पांचवंा प्रधानमंत्री चौधरी चरणसिंह के जयंती के मउका म ए दिवस मनाये जाथे। ए दिन किसान मनके भूमिका अउ अर्थव्यवस्था म ओमन के योगदान बर लोगन मन ल जागरूक बनाये खातिर देशभर म अभियान आयोजित करे जात हे।
उंहें छत्तीसगढ़ के जांजगीर-चंापा जिला के किसान स्कूल बहेराडीह म किसान महोत्सव के आयोजन करे गीस। एमा छत्तीसगढ़ गौ सेवा आयोग के अध्यक्ष महंत रामसुंदर दास शामिल होइन। ए मउका म जैजेपुर विधायक केशव चंद्रा घलो मौजूद रीहिन।
बतादन कि जांजगीर-चंापा जिला के बहेराडीह स्थित देश के पहिली किसान स्कूल के नामकरण वरिष्ठ पत्रकार स्वर्गीय कुंजबिहारी साहू के नाव उपर करे गेहे।
इलेक्ट्रिक वाहन-सब्सिडी
प्रदेस म इलेक्ट्रिक वाहन ल बढ़ावा देके खातिर एखर कीमत के दस प्रतिसत रासि सब्सिडी के रूप म दे जात हे। परिवहन मंत्री मोहम्मद अकबर ह काली इलेक्ट्रिक वाहन नीति के तहत प्रदेस के चार सौ चार हितग्राही मन ल अस्सी लाख सैंतीस हजार रूपिया ले जादा के रासि के सब्सिडी बांटीन। ए मउका म ओमन बतईन कि कोनों भी मनखे जउन इलेक्ट्रिक वाहन खरीदथे, ओ ह राज्य सासन ले सब्सिडी ले सकत हे। एखर रासि सीधा वाहन विक्रेता के खाता म विभाग डहार ले ट्रांसफर कर दे जाही।
बीजापुर जिला के फरसेगढ़ थाना क्षेत्र म आज सुरक्षा बल मन संग होय मुठभेड़ म एक महिला समेत दू माओवादी मारे गेहे। उहें, ए मुठभेड़ म घायल एक माओवादी ल गिरफ्तार करे गेहे।
हमर संवाददाता ह पुलिस के हवाला ले बतईन कि आज बिहनिया छत्तीसगढ़ अउ महाराष्ट्र के सीमा करा माओवादी मनके मौजूदगी के सूचना मिलीस। ओखर बाद बीजापुर के डीआरजी अउ महाराष्ट्र सी-सिक्सटी के संयुक्त टीम टेकमेटा, बड़े काकलेर अउ छोटेकाकलेर एरिया म सर्चिंग बर रवाना होईस।
ए दउरान फरसेगढ़ थाना क्षेत्र के टेकमेटा के जंगल म माओवादी मन सुरक्षा बल उपर फायरिंग सुरू कर दीस। जवान मन कोति ले करे गे जवाबी कार्रवाई म डीवीसी कमांडर महिला समेत दू झिन माओवादी मारे गीस। उहें, एक घायल माओवादी ल गिरफ्तार कर ले गीस। बाद म घटना स्थल के तलाशी के बेरा सुरक्षा बल ह दू ठिन एसएलआर अउ एक ठिन नग मस्केट बरामद करीन।
ओति सुकमा जिला म सीआरपीएफ के जवान मन चिंतलनार के कोत्तागुड़ा इलाका ले तिहत्तर स्पाईक होल बरामद करके माओवादी मनके बड़का साजिश ल नाकाम कर देहे।
दुर्घटना
कबीरधाम जिला म पाछु रतिहा होय एक सड़क दुर्घटना म तीन महिला समेत चार मनखे के मउत होगे। जिला के अतिरिक्त पुलिस अधीक्षक मनीषा ठाकुर ह बतईन कि एक कार ले आठ झिन मन इलाहाबाद म अस्थि विसर्जन के बाद लहुटत रिहीन। इही दउरान कुकदूर थाना क्षेत्र अंतर्गत आगरपानी घाटी करा ओमन के कार पाछु रतिहा करीबन एक बजे अनियंत्रित होके लगभग पचास फीट नीचे खाई म गिर गे। ए दुर्घटना म तीन मनखे के मउकाच म मउत होगे। उहें, एक झिन दूसर घायल महिला अस्पताल ले जाय के बेरा रास्ता म दम तोड़ दीस। ए हादसा म कार म सवार चार झिन दूसर लोगन मन ल मामूली चोट आय हे। घायल मनके इलाज बेमेतरा के अस्पताल म चलत हे।
मुख्यमंत्री भूपेश बघेल ह ए दुर्घटना म चार लोगन मनके मउत उपर गहरा दुख व्यक्त करीन हे। ओमन मृतक के परिवारजन के प्रति संवेदना प्रकट करत जिला प्रसासन ल ए दुर्घटना म घायल मन ल बने चिकित्सा सुविधा उपलब्ध कराय अउ पीड़ित परिवार ल हरसंभव सहायता उपलब्ध कराय के निरदेस दीन हे।
परिवहन मंत्री-बैठक
परिवहन मंत्री मोहम्मद अकबर ह प्रदेस म सड़क दुर्घटना मनके रोकथाम समेत सुरक्षित यातायात व्यवस्था बर संबंधित विभाग मन ल प्रभावी पहल करे के निरदेस दीन हे। संघरा ओमन लोगन मन ले यातायात नियम बर जागरूकता लाय अउ एखर कड़ाई ले पालन सुनिश्चित करे बर घलो किहीन हे। ए बात ओमन मंत्रालय म होय छत्तीसगढ़ राज्य सड़क सुरक्षा परिषद के बइठका के अध्यक्षता करत किहीन।
ए दउरान ओमन ब्लैक स्पॉट ल चिन्हा के ओमा सुधार करे बर किहीन। संघरा चउराहा मन उपर सुरक्षा संबंधी उपाय सुनिश्चित करे के निरदेस दीन। ओमन वाहन के जांच के संगेसंग गाड़ी के रफ्तार ल नियंत्रित्र करे बर स्पीड गवर्नर लगाय के दिसा म कार्रवाई करे बर किहीन। एखर अलावा नशा करइया अउ सड़क म स्टंट करके गाड़ी चलइया मनके खिलाफ तुरते कार्रवाई करे के घलो निरदेस दीन।
मल्टीमीडिया चित्र प्रदर्शनी
भारत सरकार के सूचना अउ प्रसारण मंत्रालय के तहत केंद्रीय संचार ब्यूरो प्रादेशिक कार्यालय रायपुर डहार ले धमतरी म आजादी के अमृत महोत्सव के तहत सेवा सुशासन अउ गरीब कल्याण के आठ साल विसय उपर लगाये गे मल्टीमीडिया चित्र प्रदर्शनी के आज समापन होइस। ए मउका म स्कूल अउ कॉलेज के विद्यार्थी मन आने आने सांस्कृतिक कार्यक्रम के प्रस्तुती दीन। संघरा प्रतियोगिता के विजेता मन ल पुरस्कृत करे गीस।
हॉकी वर्ल्डकप ट्रॉफी
विश्व कप हॉकी प्रतियोगिता के ट्रॅाफी काली चौबीस दिसंबर के रायपुर पहुंचही। अपन निवास कार्यालय म आयोजित होवइया एक समारोह म मुख्यमंत्री भूपेश बघेल ए ट्रॅाफी के अनावरण करही। प्रदेश के खेलमंत्री उमेश पटेल कार्यक्रम के अध्यक्षता करही। ए कार्यक्रम के बाद ट्रॅाफी ल रैली के रूप म शहर के नेताजी सुभाष स्टेडियम लाये जाही। एखर बाद ट्रॅाफी ल तेलीबंाधा तलाब के किनारे अउ शहर के एक बड़े मॉल म आम जनता बर प्रदर्शित करे जाही। रायपुर ले ये ट्रॉफी विश्वकप हॉकी प्रतियोगिता के आयोजन स्थल भुवनेश्वर बर रवाना करे जाही।
छत्तीसगढ़ हॉकी संघ के महासचिव मनीष श्रीवास्तव ह बताइन कि ए ओडिशा म अवइया तेरा ले उनतीस जनवरी तक होवइया विश्वकप हॉकी प्रतियेगिता के सेती हॉकी इंडिया डहार ले देश के सोला राज्य मन म विश्व कप ट्रॉफी ल ले जाये जात हे। ओमन बताइन कि ये पहिली मउका हे जब विश्व कप हॉकी प्रतियोगिता के ट्रॉफी रायपुर लाये जात हे।
एकलव्य राष्ट्रीय-खेल महोत्सव
आंध्रप्रदेश के गुंटुर म आयोजित तीसरा एकलव्य राष्ट्रीय खेल महोत्सव म छत्तीसगढ़ के खिलाड़ी मन अंठावन पदक हासिल करके पांचवां स्थान प्राप्त करीन हे। एमा छब्बीस स्वर्ण, बारह रजत अउ बीस कांस्य पदक सामिल हरय। ए खेल महोत्सव म बाईस राज्य मनके एकलव्य आदर्स आवासीय विद्यालय के लइका मन भाग लीन। एमा छत्तीसगढ़ के दू सौ अट्ठायासी लइका मन सामिल होईन।
ए उपलब्धि बर मुख्यमंत्री भूपेश बघेल ह बधाई अउ सुभाकमना दीन हे। ओमन किहीन कि एकलव्य आदर्श आवासीय विद्यालय म बेहतर सिक्षा के संघरा लइका मनके मानसिक अउ सारीरिक स्वास्थ्य के पूरा ध्यान रखे जाथे।
कांग्रेस प्रदेश प्रभारी-छत्तीसगढ़
अखिल भारतीय कांग्रेस कमेटी के महासचिव अउ छत्तीसगढ़ प्रभारी कुमारी शैलजा पच्चीस दिसंबर के रईपुर पहुंचही। पार्टी के संचार विभाग के अध्यक्ष सुशील आनंद शुक्ला ह बतईन कि अपन प्रवास के दउरान कुमारी शैलजा छब्बीस दिसंबर के बिहनिया राजीव भवन म राखे गे प्रदेस कांग्रेस कमेटी के बइठका म सामिल होही। एखर अगला दिन ओमन नई दिल्ली लहुट जही।