संसद के शीतकालीन सत्र काली ले सुरू होही। ए सत्र उनतीस दिसंबर तक चलही अउ ए दउरान तेईस दिन म कुल सत्रह बइठका होही।
एखर पहिली, आज नई दिल्ली म सर्वदलीय बइठका होईस। रक्षा मंत्री राजनाथ सिंह, संसदीय कार्यमंत्री प्रहलाद जोशी, संसदीय कार्य राज्यमंत्री अर्जुन राम मेघवाल अउ आने-आने राजनीतिक दल के नेता मन ह बइठका म भाग लीन।
बइठका के बाद संसदीय कार्यमंत्री श्री जोशी ह किहीन कि लोकसभा अध्यक्ष अउ राज्यसभा के सभापति के अनुमति ले सरकार ह सदन म कोनों भी मुद्दा उपर चरचा बर तैयार हे। कांग्रेस नेता अधीर रंजन चौधरी ह सरकार ले आग्रह करीन कि सीतकालीन सत्र के दउरान आने-आने मुद्दा उपर चरचा कराय जाय।
वंदे भारत एक्सप्रेस
देस के छठवां सेमी-हाईस्पीड ट्रेन ‘‘वंदे भारत एक्सप्रेस‘‘ बिलासपुर ले नागपुर के बीच चलाय जाही। प्रधानमंत्री नरेन्द्र मोदी ह ग्यारह दिसंबर के नागपुर म ए ट्रेन ल हरा झंडा दिखाके रवाना करही। रेलवे के अनुसार ए ट्रेन के स्टापेज रईपुर, दुरूग अउ गोंदिया म दे गे हवय। सनिवार ल छोड़के ए ट्रेन ह हफ्ता म छह दिन चलही अउ यात्रा के एक चरण करीबन साढ़े पांच घंटा म पूरा करही। ए ट्रेन बिलासपुर के बिहनिया करीबन पौने सात बजे रवाना होही अउ मंझनिया कुन सवा बारह बजे नागपुर पहुंचही। वापसी म ए ट्रेन मंझनिया दू बजे नागपुर ले रवाना होके संझा सात बजके पैंतीस मिनट म बिलासपुर पहुंचही।
ए सेमी हाईस्पीड ट्रेन म स्वचलित दरवाजा अउ जीपीएस आधारित ऑडियो-विजुअल सूचना प्रणाली संग सबो आधुनिक सुविधा मौजूद रइही।
भेंट-मुलाकात कार्यक्रम
भेंट-मुलाकात कार्यक्रम के दउरान मुख्यमंत्री भूपेश बघेल ह आज गरियाबंद जिला के वनांचल क्षेत्र देवभोग म ग्रामीण अर्थव्यवस्था ल बेहतर बनाय बर वनोपज म आधारित इन्क्यूबेसन सेंटर अउ रूरल इंडस्ट्रीयल पार्क के भूमिपूजन करीन। ए मउका म ओमन ह किहीन कि वनोपज आधारित ए पार्क ह वनांचल क्षेत्र के हजारों वनोपज संग्राहक परिवार के आर्थिक अउ सामाजिक उत्थान के दिसा म मील के पत्थर साबित होही। ए केन्द्र के माध्यम ले सोलह हजार ले जादा संग्राहक परिवार मन ल उपरहा कमई के जरिया मिल सकही। भेंट-मुलाकात के दउरान मुख्यमंत्री ह देवभोग ल नगर पंचायत, झाखरपारा ल उप-तहसील बनाय के अउ सिनापाली म जिला सहकारी ग्रामीण बैंक के साखा खोले के संग कतकोन दूसर घोसना घलो करीन।
उहें, मुख्यमंत्री ह आज राजिम विधानसभा क्षेत्र बर करीबन अड़सठ करोड़ साठ लाख रूपिया के आने-आने विकास काम के लोकार्पण अउ भूमिपूजन घलो करीन। ए मउका म पत्रकार मन संग गोठबात करत मुख्यमंत्री ह किहीन कि राजिम मेला ल व्यवस्थित रूप दे जाय के परयास करे जावत हे। एखर बर पचपन एकड़ जमीन चिन्हित करे गेहे।
ईडी-रिमांड
मनी लॉड्रिंग अउ कोयला घोटाला म गिरफ्तार निलंबित आईएएस समीर बिश्नोई संघरा तीनो कारोबारी सूर्यकांत तिवारी, लक्ष्मीकांत तिवारी अउ सुनील अग्रवाल ल के न्यायिक रिमांड के अवधि ल स्पेशल कोर्ट ह तीन दिन बर अउ बढ़ा देहे। ए सबो झन ल आज विशेष न्यायाधीश अजय सिंह राजपूत के अदालत म पेस करे गीस। इंखर मनके अगला पेसी दस दिसंबर के होही अउ इही दिन प्रवर्तन निदेशालय-ईडी ह चालान पेस करही।
उहें, कड़ा सुरक्षा के बीच ईडी ह मुख्यमंत्री के उपसचिव सौम्या चौरसिया ल घलो आज कोर्ट म पेस करीस। आखिरी समाचार लिखे जाय तक सौम्या चौरसिया के रिमांड बर स्पेशल कोर्ट म सुनवाई चलत रिहीस।
भीमराव अंबेडकर-महापरिनिर्वाण दिवस
राष्ट्र आज भारतरत्न डॉक्टर भीमराव अंबेडकर के सड़सठवां महापरिनिर्वाण दिवस म ओमन ल श्रद्धांजलि देवत हे। राष्ट्र निर्माण म डॉक्टर अंबेडकर के योगदान ल प्रदर्सित करे बर छत्तीसगढ़ संघरा देसभर म कतकोन कारीकरम कराय जावत हे।
राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेन्द्र मोदी ह आज बिहनिया नई दिल्ली के संसद भवन परिसर म बाबा साहेब ल श्रद्धांजलि दीन।
मेडिकल कॉलेज-मामला
स्वास्थ्य मंत्री टी.एस. सिंहदेव ह अंबिकापुर मेडिकल कॉलेज अस्पताल म चार झन नवजात शिशु के मउत के मामला के जांच ल अड़तालीस घंटा के भीतर पूरा करके रिपोर्ट सौंपे के निरदेस दीन हे। ओमन स्पष्ट रूप म केहे हे कि जांच म जउन कोनों भी के लापरवाही आगू आही, ओखर खिलाफ निलंबन के कार्रवाई करे जाही।
इही बीच, अंबिकापुर मेडिकल कॉलेज के डीन डॉक्टर रमणेश मूर्ति ह बतईन कि चारों नवजात शिशु मन ल गंभीर लक्षण के संग एस.एन.सी.यू. म भर्ती करके इलाज करे जावत रिहीस। ओमन बतईन कि शिशु मनके परिवार वाला मन ल उंखर गंभीर अवस्था के बारे म बताय गे रिहीस। ओमन बतईन कि परन दिन रतिहा करीबन एक बजे अस्पताल म बिजली व्यवस्था बाधित होय रिहीस। फेर एक घंटा के भीतर ही पैनल म आय खराबी ल दूर कर ले गीस। ए दउरान वेंटीलेटर चलत रिहीस।
कांग्रेस-प्रदेश प्रभारी
पूर्व केन्द्रीय मंत्री अउ अखिल भारतीय कांग्रेस कमेटी के महासचिव कुमारी शैलजा ल छत्तीसगढ़ कांग्रेस के नवा प्रभारी बनाय गे हवय। अभी तक ए जिम्मेदारी ह पी.एल. पुनिया तीर रिहीस। ए संबंध म अखिल भारतीय कांग्रेस कमेटी के महासचिव के.सी. वेणुगोपाल ह सूची जारी करीन हे। सुश्री शैलजा हिमाचल प्रदेस ले हवय। उहें, श्री पुनिया बछर दू हजार सत्रह ले छत्तीसगढ़ के प्रभारी रिहीन। छत्तीसगढ़ के अलावा हरियाणा अउ राजस्थान के प्रभारी घलो बदले गेहे। पार्टी अध्यक्ष मल्लिकार्जुन खड़गे ह ए नियुक्ति मन ल अंतिम रूप दे हवय।
प्रदेस कांग्रेस कमेटी के प्रवक्ता सुरेन्द्र वर्मा ह छत्तीसगढ़ प्रभारी बनाय जाय म कुमारी शैलजा ल सुभकामना दीन हे।
भानुप्रतापपुर उपचुनाव
भानुप्रतापपुर विधानसभा उपचुनाव बर काली मतदान सांतिपूर्ण ढंग ले होगीस। मतदान के दउरान कोनां भी तरीका के अप्रिय घटना के सूचना नइ मिले हे। आंकड़ा के अनुसार ए उपचुनाव म करीबन बहत्तर प्रतिसत वोट डारे गीस। छत्तीसगढ़ के मुख्य निर्वाचन पदाधिकारी रीना बाबा साहेब कंगाले ह बतईन कि काली मतदान सुरू होय के पहिली मॉक-पोल के दउरान तकनीकी खराबी के सेती एक ठिन बैलेट यूनिट, एक ठिन कंट्रोल यूनिट अउ सात ठन वीवीपैट मसीन ल बदले गीस। उहें, वास्तविक मतदान के दउरान तीन ठन वीवीपैट मसीन ल तकनीकी खराबी के सेती बदले गीस।
धान खरीदी
राज्य म किसान मन ले समर्थन मूल्य म धान खरीदी के काम जारी हे। अभी तक तीस लाख छत्तीस हजार मीटरिक टन ले जादा धान के खरीदी करे जा चुके हे। एखर बदला आठ लाख तीस हजार ले जादा किसान मन ल छह हजार तीन सौ पैंसठ करोड़ रूपिया ले जादा के रासि के भुगतान बैंक लिंकिंग व्यवस्था म करे गे हवय।
अउ अब थोरकुन समाचार सार म –
– केन्द्रीय शिक्षा मंत्री धर्मेन्द्र प्रधान ह विद्यार्थी मन ले प्रधानमंत्री नरेन्द्र मोदी संग ‘‘परीक्षा पे चर्चा‘‘ कार्यक्रम म सामिल होय के अपील करीन हे। कार्यक्रम म भाग ले बर तीस दिसंबर तक प्रविष्टि भेजे जा सकत हे।
– दक्षिण पूर्व मध्य रेलवे के रईपुर मंडल ले चलइया रईपुर-विशाखापट्टनम अउ रईपुर-जूनागढ़ पैसेंजर स्पेशल ट्रेन के अवई-जवई एक घांव फेर सुरू होवत हे। यात्री मनके मांग ल देखत दूनों ट्रेन ल काली ले चलाय जाही।
– रतनपुर के महामाया मंदिर परिसर म राज्य स्तरीय गीता जयंती समारोह कराय गीस। समारोह म छत्तीसगढ़ संस्कृत विद्यामंडलम् के अध्यक्ष डॉक्टर सुरेश शर्मा ह किहीन कि गीता म मानव जाति के सबो धर्म अउ कर्म के उल्लेख हवय।
अउ
– नवा रईपुर के सेक्टर-सत्ताईस के बॉटीनिकल गार्डन म निःशुल्क योगाभ्यास केन्द्र सुरू करे गेहे।