नाबालिग ले दुष्कर्म के मामला म भानुप्रतापपुर उपचुनाव म भाजपा प्रत्यासी ब्रम्हानंद नेताम के संग तीन आरोपी ल गिरफ्तार करे बर झारखंड पुलिस आज कांकेर पहुंचीस। झारखंड पुलिस ह संबंधित थाना प्रभारी मन ल आरोपी ल गिरफ्तार करे बर आवेदन दीस। पहिली दिन कोनों भी आरोपी के गिरफ्तारी नइ हो पईस हे।
हमर संवाददाता ल बतईन कि झारखंड राज्य के जमशेदपुर जिला ले पुलिस आज सुबह कांकेर पहुंचीस। एखर बाद पुलिस ह भाजपा प्रत्यासी ब्रम्हानंद नेताम के संग आने तीन आरोपी मन ल गिरफ्तार करे बर उंखर घर छापा मारीन। फेर कोनों भी आरोपी अपन घर म नइ मिलीस।
इही बीच, जिला निर्वाचन अधिकारी डॉक्टर प्रियंका शुक्ला ह झारखंड ले आय अधिकारी मन ल कार्यालय बुलाके पूरा मामला के जानकारी लीन।
इही बीच, भाजपा प्रत्याशी ब्रम्हानंद नेताम उपर कांग्रेस डहार ले लगाय गे गंभीर आरोप ल लेके चुनाव प्रभारी बृजमोहन अग्रवाल ह कहिन कि ए प्रकरण म छत्तीसगढ़ अउ झारखंड सरकार के मिलीभगत हे। अइसे करके राज्य सरकार ह आदिवासी समाज ल अपमानित करत हे। भाजपा एखर से डरने वाला नइ हे।
दूसर तरफ, मुख्यमंत्री भूपेश बघेल ह कहिन कि झारखंड पुलिस कानून के हिसाब ले काम करत हे। ए तीन साल पहिली के मामला हे, जेखर उपर अब कार्रवाई होवत हे।
भानुप्रतापपुर उपचुनाव
भानुप्रतापपुर विधानसभा उपचुनाव बर प्रचार तेज होगे हे। कांग्रेस अउ भाजपा के स्टार प्रचारक मनके अलावा दूसर निर्दलीय प्रत्यासी घलो लगातार प्रचार करत हे। मुख्यमंत्री भूपेश बघेल तीस नवंबर ले रोड शो के अलावा आठ चुनावी सभा ल संबोधित करही। तीस नवंबर के ओमन कोडेकुर्सी, भानुप्रतापपुर, पुरी अउ टंहकापार म चुनावी सभा करही। एखर बाद एक दिसंबर के श्री बघेल दुर्गुकोंदल म जनसभा अउ चारामा म सभा के बाद रोड शो म सामिल होही। उहें, प्रचार के आखिरी दिन तीन दिसंबर के मुख्यमंत्री ह कोरर अउ लखनपुरी म सभा ल संबोधित करही।
उहें, भाजपा के चुनाव प्रभारी बृजमोहन अग्रवाल के अलावा शिवरतन शर्मा, प्रेमप्रकाश पांडेय के संग आने वरिष्ठ नेता भानुप्रतापपुर म पार्टी प्रत्यासी के पक्ष म प्रचार करत हे।
संगीत नाटक अकादमी पुरस्कार
लोक संगीत के क्षेत्र म उल्लेखनीय योगदान बर छत्तीसगढ़ के तीन हस्ती मन ल संगीत नाटक अकादमी पुरस्कार बर चुने गेहे। एमा प्रसिद्ध पंडवानी गायिका पद्म विभूषण डॉक्टर तीजन बाई के संग खैरागढ़ के इंदिरा कला संगीत विश्वविद्यालय के कुलपति पद्मश्री डॉक्टर मोक्षदा (ममता) चंद्राकर अउ इही विश्वविद्यालय के सहायक प्राध्यापक डॉक्टर दिवाकर कश्यप सामिल हे। ए पहिली बार हे जब ए सम्मान बर छत्तीसगढ़ के तीन हस्ती ल चुने गेहे।
इही बीच, लोक संगीत के विद्यार्थी मन ल अपन प्रतिभा के प्रदर्शन बर नियमित मंच देके उद्देश्य ले इंदिरा कला संगीत विश्वविद्यालय के लोक संगीत विभाग डहार ले साप्ताहिक कारीकरम ‘कला चौपाल‘ के सुरूवात करे गेहे। कारीकरम ल संबोधित करत कुलपति ह अपन उपलब्धि के श्रेय माता-पिता, परिवार के संग छत्तीसगढ़ के जम्मों दर्शक अउ श्रोता मन ल दीन।
मुक्तिबोध प्रसंग
देश के जाने-माने साहित्यकार गजानन माधव मुक्तिबोध अउ मराठी के प्रसिद्ध साहित्यकार शरतचंद्र माधव मुक्तिबोध के जीवन म आधारित मुक्तिबोध प्रसंग के आयोजन काली उनतीस नवंबर ले राजधानी रईपुर म करे जाही। पंडित रविशंकर शुक्ल विश्वविद्यालय के कला भवन म आयोजित ए दू दिवसीय आयोजन म देस के कतकोन जाने-माने साहित्यकार सामिल होही। आने-आने सत्र अउ कतकोन बिसय म केन्द्रित ए कारीकरम के उद्घाटन प्रसिद्ध कवि लाल्टू अउ वरिष्ठ आलोचक जयप्रकाश अउ अध्यक्षता विश्वविद्यालय के कुलपति प्रोफेसर केशरीलाल वर्मा करही।
कारीकरम के दउरान कवि गोष्ठी आयोजित करे जाही। मुक्तिबोध प्रसंग म काली संझा संस्कृति भवन सभागार म नागपुर के मेराकी परफार्मिंग आर्ट के नाटक ब्रह्ाराक्षस के मंचन घलो होही।
छत्तीसगढ़ी राजभाषा दिवस
आज छत्तीसगढ़ी राजभाषा दिवस हे। ए मउका म राजधानी रईपुर के संग प्रदेस के आने-आने जिला मन म कतकोन कार्यक्रम आयोजित करे जात हे। मुख्यमंत्री निवास कार्यालय म संस्कृति अउ पुरातत्व विभाग डहार ले छत्तीसगढ़ी राजभाषा दिवस के आयोजन करे गीस। ए मउका म मुख्यमंत्री भूपेश बघेल ह छत्तीसगढ़ी भासा के तेरह साहित्यकार ल सम्मानित करे के संग दस साहित्यकार के रचना के विमोचन घलो करीन।
ए बेरा म मुख्यमंत्री ह राज्य सरकार डहार ले छत्तीसगढ़ी भासा के प्रचार-प्रसार बर करे जात काम के उल्लेख करत हुए कहिन कि अब सरकारी स्कूल मन म छत्तीसगढ़ी भासा म पढ़ाई-लिखाई सुरू होगे हे। मुख्यमंत्री ह कहिन कि हर छत्तीसगढ़िया के जिम्मेदारी हवय कि ओमन छत्तीसगढ़ी ल आगे बढ़ाय के काम करय।
भाजपा-पीएससी भर्ती
प्रदेस भाजपा महामंत्री ओपी चौधरी ह आरोप लगईन कि बिना आरक्षण रोस्टर के छत्तीसगढ़ लोक सेवा आयोग डहार ले विज्ञापन जारी करना युवा मनके संग षड़यंत्र हे। ओमन ह किहीन कि बिना आरक्षण रोस्टर के पीएससी कोन आधार म भर्ती करही। ओमन आरोप लगईन कि अइसे करके राज्य के कांग्रेस सरकार ह एक घांव फेर पिछड़ा वर्ग अउ आदिवासी युवा मनके संग धोखेबाजी करे हे।
वजन त्यौहार
प्रदेस म पाछु एक बछर म कुपोषण के दर म दू दशमलव एक प्रतिसत के कमी आय हे। महिला अउ बाल विकास विभाग डहार ले वजन त्यौहार के जारी आंकड़ा के अनुसार प्रदेस म कुपोषण मुक्ति बर चलाय जात अभियान के सकारात्मक परिणाम आगू आवत हे। एखर अनुसार पाछु तीन बछर म कुपोषण के दर म पांच दशमलव छह-एक प्रतिशत के कमी आय हे। जानबा के मुताबिक दू अक्टूबर दू हजार उन्नीस ले प्रदेस म कुपोषण मुक्ति बर मुख्यमंत्री सुपोषण अभियान सुरू करे गेहे। एखर ले प्रदेस के दू लाख ले जादा लइका कुपोषण ले मुक्त होय हे।
कांग्रेस/भाजपा-आरोप
मुख्यमंत्री भूपेश बघेल ह आरोप लगईन हे कि जइसे राज्य म केन्द्रीय जांच एजेंसी मनके अधिकारी मन डहार ले पूछताछ के दौरान गैर कानूनी काम करे के मामला आगू आवत हे, ओ ह बिल्कुल भी स्वीकार करे के योग्य नइ हे। ओमन ह कहिन कि अइसन घटना मन ले प्रदेस के जनता गुस्सा म हे। ओमन ह आरोप लगईन कि राजीनतिक षड़यंत्र ले झूठा प्रकरण बनाय जात हे। श्री बघेल ह मांग करीन कि अइसन अवैधानिक काम म रोक लगाय जाय। मुख्यमंत्री ह कहिन कि यदि अइसन सिकायत आगू मिलही, त राज्य के पुलिस कानूनी कार्रवाई बर विवस होही। ओमन ह अधिकारी मन ल कहिन कि जेन तरह ले केन्द्रीय जांच एजेंसी मन ह काम करत हे, उंखर सूचना केन्द्र सरकार ल दे जाय। संगेसंग ओमन ह कहिन कि जइसे भी पूछताछ करे जाही, ओखर वीडियोग्राफी हो। ओमन ह कहिन कि यदि कानूनी ढंग ले जांच करे जाही, त एमा सरकार पूरा सहयोग करही।
दूसर तरफ, भारतीय जनता पार्टी के रायपुर संभाग प्रभारी अउ विधायक सौरभ सिंह ह आरोप लगईन कि मुख्यमंत्री भूपेश बघेल कानून ल अपन काम करे बर रोकत हे। भ्रष्टाचार करइया अधिकारी अउ चुनिंदा कारोबारी मनके इहां छापा म बे-हिसाब संपत्ति अउ भ्रष्टाचार के परिणाम मिलत हे। अइसन म केन्द्रीय जांच एजेंसी के कार्रवाई ले मुख्यमंत्री ल दिक्कत काबर होवत हे। ओमन ह आरोप लगईन कि जइसे मुख्यमंत्री भ्रष्टाचार अउ भ्रष्टाचारी मनके संरक्षक के आचरण दिखावत हे, ओ ह कई संदेह ल जन्म देवत हे।
अउ अब थोरकुन समाचार सार म –
– मुख्यमंत्री भूपेश बघेल ह आज रायपुर स्थित अपन निवास कार्यालय म समाज सुधारक, विचारक, लेखक अउ दार्शनिक महात्मा ज्योतिबा फुले के पुण्यतिथि म उंखर छायाचित्र म पुष्प अर्पित करीन।
– गौरेला-पेंड्रा-मरवाही जिला के करगी गांव म ट्रेलर अउ बस के टक्कर म एक युवक के मउत होगे। उहें, पांच यात्री घायल होगे हे।
अउ
– राजनांदगांव जिला के डोंगरगढ़ अउ चिचोला पुलिस ह गांजा के तस्करी करे के आरोप म पांच झिन लोगन ल गिरफ्तार करे हे। इंखर पास ले करीब आठ किलो गांजा बरामद करे गेहे।