भानुप्रतापपुर उपचुनाव
भानुप्रतापपुर विधानसभा उपचुनाव बर कांग्रेस अउ भाजपा के उम्मीदवार मन आज अपन नामांकन दाखिल करीन। कांग्रेस उम्मीदवार सावित्री मंडावी ह मुख्यमंत्री भूपेश बघेल अउ प्रदेस कांग्रेस अध्यक्ष मोहन मरकाम समेत पार्टी के आने-आने नेता मनके मौजूदगी म अपन नामांकन जमा करीन। ओमन जम्मों नेता मनके संग जुलूस लेके जिला निर्वाचन कार्यालय पहुंचीन। ए दउरान जुलूस म सामिल पार्टी कार्यकर्ता मन उंखर समर्थन म नाराबाजी घलो करीन।
उहें, मुख्य विपक्षी दल भाजपा के उम्मीदवार ब्रम्हानंद नेताम ह घलो पार्टी के बड़का नेता मनके मौजूदगी म नामांकन दाखिल करीन। ए मउका म प्रदेस भाजपा अध्यक्ष अरूण साव, राष्ट्रीय उपाध्यक्ष डाक्टर रमन सिंह, सांसद मोहन मंडावी, नेता प्रतिपक्ष नारायण चंदेल, विधायक बृजमोहन अग्रवाल अउ महिला मोर्चा प्रदेस अध्यक्ष शालिनी राजपूत समेत पार्टी के आने-आने नेता मौजूद रहीन। नामांकन के दउरान जिला निर्वाचन दफ्तर म सुरक्षा के कड़ा इंतजाम करे गे रिहीस हे। भाजपा प्रत्याशी के नामांकन के बाद पार्टी के नेता मन ह चारामा म एक ठिन जनसभा ल संबोधित करीन।
जिला निर्वाचन अधिकारी डाक्टर प्रियंका शुक्ला ह बतईन कि काली नामांकन पत्र के जांच होही। उहें, इक्कीस नवंबर तक नाम वापिस ले जा सकही। ए उपचुनाव बर पांच दिसंबर के ओट डारे जाही। मतगणना अउ चुनाव परिणाम के घोषणा आठ दिसंबर को होही।
ऋचा जोगी-एफ.आई.आर.
छत्तीसगढ़ जनता कांग्रेस के अध्यक्ष अमित जोगी के पत्नी ऋचा जोगी के खिलाफ फर्जी जाति प्रमाण पत्र के मामला म बिलासपुर म रिपोर्ट दरज करे गेहे। खबर के मुताबिक मरवाही उपचुुनाव के दउरान ऋचा जोगी के अनुसुचित जनजाति वर्ग के जाति प्रमाण पत्र रद्द कर दे गे रिहीस। उही मामला म राज्य स्तरीय छानबीन समिति के निरदेस म आज बिलासपुर के सिटी कोतवाली थाना म प्रकरण दरज करे गेहे। मुंगेली म आदिवासी विकास विभाग के सहायक आयुक्त एल.आर.कुर्रे के खबर ले ये प्रकरण दर्ज होय हे। ऋचा जोगी ल मुंगेली जिला के पेंड्रीडीह म ऋचा रूपाली साधू के नाम ले अनुसुचित जनजाति के प्रमाण पत्र जारी करे गे रिहीस। आज दर्ज होय प्रकरण के आधार म ऋचा जोगी ल अनुसुचित जनजाति प्रमाण पत्र जारी करइया अधिकारी के भूमिका घलो जांच के दायरा म आ गेहे।
मुख्यमंत्री बैठक-प्रेस
मुख्यमंत्री भूपेश बघेल ह भेंट मुलाकात कारीकरम के दउरान आज अंबागढ़ चौकी अउ खुज्जी विधानसभा क्षेत्र म प्रस्तावित करीबन तिंरालीस करोड़ रूपिया के आने-आने विकास काम के लोकार्पण अउ भूमिपूजन करीन।
एखर, पहिली अंबागढ़ चौकी म अधिकारी मन मनके संग समीक्षा बइठका म मुख्यमंत्री ह किहीन कि जउन सड़क के निर्माण के बेरा इंखर गुणवत्ता ल लेके गारंटी दे गे रिहीस। ओखर मरम्मत के काम तुरते करवाना चाही। ओमन यहू किहीन कि मरम्मत के काम म देरी लगही त संबंधित ठेकेदार ल तुरते हटा देना चाही। ओमन ह मुख्य सड़क के संगेसंग पहुंच मार्ग के मरम्मत उपर घलो बिसेस धियान दे बर किहीन।
बइठक के बाद मुख्यमंत्री ह पत्रकार मन ले गोठबात करत कहीन हे कि प्रदेस म नरवा योजना के माध्यम ले प्रमुख नदियां मन ल पुनर्जीवित के संग ओमा बारो महिना प्रवाह बनाय राखे बर कोसिस करे जावत हे। आरक्षण के संबंध म पूछे गे एक ठिन सवाल के जवाब म मुख्यमंत्री ह कहीन हे कि संविधान म आरक्षण के संबंध म जउन प्रावधान हे ओखर फायदा संबंधित वर्ग ल निश्चित रूप ले मिलही।
अग्निवीर भर्ती रैली
दुरूग म अवईया एक ले तेरा दिसंबर तक होवईया अग्निवीर भर्ती रैली बर पंजीकृत आवेदक मनके प्रवेस-पत्र रायपुर स्थित सेना भर्ती कार्यालय ले जारी कर दे गेहे। अभ्यर्थी अपन प्रवेस-पत्र “ज्वाइन इंडियन आर्मी” वेबसाइट ले ले सकत हे। ए संबंध म जिला रोजगार अधिकारी ह बताईन हे कि अभ्यर्थी मन ल उंखर क्षेत्र ले जुड़े जिला रोजगार कार्यालय ले घलो प्रवेस पत्र डाउनलोड करे के सुविधा दे गेहे। जउन आवेदक प्रवेस पत्र लेना चाहत हे ओ अपन मेल आईडी पासवर्ड अउ आधार ले जुड़े मोबाईल नंबर के संग जाके एला ले सकथे।
धान खरीदी-पंजीयन
प्रदेस म धान खरीदी बर किसान मन ल पंजीयन कराए के एक अउ मउका दे गेहे। पाछु पंजीयन के दउरान छूटे किसान मन अब इक्कीस नवंबर तक अपन क्षेत्र के तहसील कार्यालय अउ सहकारी साख समिति के दफ्तर म जाके पंजीयन करा सकत हे। पंजीयन के तारीख बढ़ाए जाए के बाद प्रदेस के जम्मों जिला म छूटे किसान मन ल जल्दीच पंजीयन कराए के अपील करे गेहे। ए संबंध म राज्य सरकार ह जम्मों जिला कलेक्टर मन ल जरूरी कदम उठाए के निरदेस देहे।
आईजी फरसगांव-जवानों से मुलाकात
बस्तर रेंज के पुलिस महानिरीक्षक सुंदरराज पी. ह आज कोंडागांव जिला के फरसगांव स्थित पुलिस प्रशिक्षण विद्यालय-पीटीएस म बस्तर फाइटर फोर्स के प्रशिक्षण लेवइया जवान मन ले भेंट करीन। ए मउका म जिला क पुलिस अधीक्षक ेदिव्यांग पटेल घलो उंखर संग म रिहीन। पुलिस महानिरीक्षक ह ए जवान मन ल बस्तर फाइटर फोर्स के गठन के उद्देश्य अउ महत्व के बारे म विस्तार ले बताईन। ए मउका म पीटीएस के डिप्टी कमांडेंट संतराम नेताम समेत आने-आने अधिकारी अउ प्रशिक्षक घलो मौजूद रिहीन।
खबर के मुताबिक फरसगांव म ए बेरा बस्तर फाइटर के दू सौ तीन जवान प्रशिक्षण लेवत हे। पूरा बस्तर संभाग म करीबन चौवन हजार अभ्यर्थि मन बस्तर फाइटर म भर्ती बर अर्जी करे रिहीस। एमा, ले बस्तर के सात जिला मन बर कुल इक्कीस सौ जवान मन ल चुने गेहे। जवान मन ले भेंट के बाद पुलिस महानिरीक्षक अउ पुलिस अधीक्षक ह प्रशिक्षक मनकेे संग अलग ले बइठक करके ओमन ल ए फोर्स के गठन के उद्देश्य अउ बस्तर के भौगोलिक परिस्थिति के बारे म बिसेस जानकारी दीन।
राष्ट्रीय छात्रवृत्ति योजना
राष्ट्रीय छात्रवृत्ति योजना बर बछर दू हजार बाईस-तेईस बर आवेदन जमा करे के आखिरी तारीख ल तीस नवंबर तक बढ़ा दे गेहे। केंद्रीय शिक्षा मंत्रालय ह किहीन हे कि ए योजना के तहत आर्थिक रूप ले कमजोर वरग के होसियार लइका मन ल आठवीं के बाद घलो अपन पढ़ई जारी रखे बर प्रोत्साहित करे के उद्देश्य से छात्रवृत्ति दे जाथे।
दुर्घटना
दुरूग-धमधा रद्दा म एक ठिन यात्री बस ह ननकट्ठी गांव के तीर फटफटी सवार ल टक्कर मार दीस। ए हादसा म ओमा बइठे तीन झिन मनखे के मउकाच म मउत होगे। घटना के बाद बस ड्रायवर भगागेे, घटना ले गुस्साय गांव वाले मन ह प्रदर्सन के दउरान टोरफोर करीन। एखर खबर मिलतेच नंदनी पुलिस थाना ले अधिकारी तुरते मउका म पहुंचीन। ओमन ह गुस्साय लोगन मन ल समझा के बस ल अपन कब्जा म ले लीन।
ओति, अंबिकापुर ले प्रयागराज जावत यात्री बस के ट्रक ले टक्कर होय के सेती बस म बइठे दू झिन यात्री के मउकाच म मउत होगे। उंहे, तीस झिन आने यात्री घायल होगेे। जेमा, ले गंभीर रूप ले घायल आठ झिन यात्री ल रींवा मेडिकल कालेज अस्पताल म भर्ती कराय गेहे।
प्रदेस म जाड़ा के असर धीरे-धीरे देखे बर मिलत हे। मौसम विभाग के मुताबिक ए बेरा उत्तर ले अवइया सुष्क अउ ठंडी हवा प्रदेस म चलत हे। एखर प्रभाव न्यून्तम तापमान म गिरावट होना सुरू हो गेहे। मौसम वैज्ञानिक मनके मुताबिक पाछु रतिहा बस्तर, दुरूग अउ बिलासपुर संभाग म न्यूनतम तापमान सामान्य ले कमती दरज करे गे रिहीस।
उंहे, रइपुर अउ सरगुजा संभाग म न्यून्तम तापमान अभी सामान्य बने हे।
अउ अब थोरकुन समाचार सार म –
– आकासवाणी के समाचार सेवा प्रभाग के महानिदेसक डाक्टर वसुधा गुप्ता ल आकासवाणी महानिदेसक के अतिरिक्त प्रभार सौंपे गेहे। उन्नीस सौ नवासी बैच के भारतीय सूचना सेवा के अधिकारी डाक्टर गुप्ता ह बत्तीस बछर ले जादा के कार्यकाल म सूचना अउ प्रसारण मंत्रालय के कई ठिन विभाग म काम करे हे।
– कांकेर जिला के आमाबेड़ा थाना क्षेत्र म माओवादी मन ह एक झिन गांव वाला के हत्या कर देहे। पुलिस अधीक्षक शलभ सिन्हा ह बतईन कि मृतक आमाबेड़ा थाना क्षेत्र के अंतर्गत अवईया हुर्रापिंजोड़ी गांव के सरपंच के भाई रिहीन।