रबी फसल समर्थन मूल्य
केंद्रीय मंत्रिमंडल ह बछर दू हजार तेईस-चौबीस विपणन मौसम खातिर जम्मों रबी फसल के न्यूनतम समर्थन कीमत बढ़ाय के मंजूरी दे देहे। मसूर के न्यूनतम समर्थन मूल्य पांच सौ रूपिया कुंटल बढ़ाय गेहे, जउन अब तक के सबले जादा बढ़ोत्तरी हरय। गंहू के सरकारी खरीद मूल्य म एक सौ दस रूपिया कुंटल अउ जौ के न्यूनतम समर्थन कीमत म सौ रूपिया के बढ़वार करे गेहे।
मंत्रिमंडल के बइठका के बाद पत्रकार मनले गोठबात म केंद्रीय सूचना अउ प्रसारण मंत्री अनुराग सिंह ठाकुर ह ये जानकारी दीन।
्धान खरीदी
राज्योत्सव के संगेसंग प्रदेस म एक नवंबर ले धान बिसाय के काम सुरू होही। एसो पंजीयन होय किसान मनले ऐ सौ दस लाख मीट्रिक टन धान बिसाय के लक्ष्य राखे गेहे। एखर बर चोबीस लाख बांसठ हजार ले जादा किसान मनके पंजीयन होगे हे। एमा साठ हजार ले जादा नवा किसान सामिल हे। अपन धान बेचे बर किसान इकतीस अक्टूबर तक पंजीयन करा सकत हे।
उंहे प्रदेश के सबो सहकारी समिति म धान बिसाय बर जरूरी तियारी पूरा कर ले गेहे। खाद्य विभाग के सचिव टोपेश्वर वर्मा ह बताइन कि खरीदी काम के सरलग निगरानी करे जाही। ओमन यहू कीहिन कि धान खरीदी के अधिकतम सीमा पाछू बछर के मुताबिक पंद्रह कुंटल एकड़ पाछू लिकिंग समेत तय करे गेहे। संगेसंग बारदाना के बेवस्था घलो कर ले गेहे।
उंहें मील पंजीयन के काम घलो शुरू होगे हे। धान खरीदी केंद्र मन म अवैध रूप ले अवइया धान के आवक रोके अउ संवेदनशील उपार्जन केंद्र मनके चिन्हारी बर नोडल अधिकारी मनके नियुक्ति के संबंध म जिला कलेक्टर मन ल निर्देश जारी करे गे
नीति आयोग आकांक्षी जिला
नीति आयोग कोति ले आकांक्षी जिला ल लेके रिपार्ट जारी करे गेहे। जेमा चैंपियन ऑफ चेंज डेल्टा रैंकिंग म नारायणपुर जिला के प्रदर्शन बने रीहिस हे। देश म घोषित एक सौ बारा आकांक्षी जिला म प्रदर्शन श्रेणी म सबले बने पांच ठिन जिला म नारायणपुर जिला पांचवा स्थान म हवय। उंहें स्वास्थ्य अउ पोषण श्रेणी म नारायणपुर जिला के दूसर स्थान हे।
अइसने शिक्षा श्रेणी के आधार म जारी मासिक डेल्टा रैंकिंग म नारायणपुर जिला ल चौथइया स्थान मिले हे।
ईडी छापा
राज्य म प्रवर्तन निदेशालय – ईडी कोति ले छापा के कार्रवाई चलत हे। रायगढ़ जिला कलेक्टर रानू साहू के गरियाबंद के पांडुका म उंखर माता-पिता अउ आने परिजन मनके घर म काली ईडी के टीम ह जांच करीन।
ईडी के अधिकारी मन ह रानू साहू के माता-पिता अउ आने परिजन ले उंखर संपत्ति ल लेके पूछताछ करीन।
मुख्यमंत्री आदिवासी आरक्षण
मुख्यमंत्री भूपेश बघेल ह कीहिन हे कि राज्य सरकार आदिवासी मन ल बत्तीस प्रतिशत आरक्षण के फायदा देवाय बर प्रतिबद्ध हरय। ये बात ओमन काली रायपुर म आदिवासी समाज के जन प्रतिनिधि मनले भेंट के बेरा कीहिन। मुख्यमंत्री ह प्रतिनिधि मंडल संग आरक्षण के मुद्दा म गोठबात करत कीहिन कि राज्य म आदिवासी मन ल बत्तीस प्रतिशत के आरक्षण के फायदा देवाय बर जरूरी कदम उठाय जात हे। ओमन कीहिन कि राज्य सरकार ए विसय ल लेके सर्वोच्च न्यायालय जाही।
भेंट-मुलाकात कार्यक्रम
मुख्यमंत्री भूपेश बघेल ह कीहिन कि लोगन के आय म वृद्धि अउ सबके समृद्धि राज्य सरकार के उद्देश्य हे। ये बात मुख्यमंत्री ह आज भेंट-मुलाकात कार्यक्रम म सक्ती जिला म चंद्रपुर विधानसभा क्षेत्र के मुक्ता गांव म कीहिन । ये बेरा म मुख्यमंत्री ह मुक्ता, जमगहन, मालखरौदा, सिघरा, अउ सारसडोल म आने आने निर्माण काम के घोषणा करीन।
अंतर्राष्ट्रीय कृषि मड़ई
रायपुर स्थित इंदिरा गांधी कृषि विश्विद्यायल म राखे गे अंतर्राष्ट्रीय कृषि मड़ई एग्री कॉनिर्वाल आज सिरागे। आज समापन मउका म राज्यपाल अनुसुइया उइके मौजूद रीहिन। पांच दिन चलइया ये कार्निवॉल म दस ठिन अफ्रीकी देश के संगेसंग साउथ एशियन देश नेपाल, बांग्लादेश, श्रीलंका अउ भारत समेत करीबन पंद्रह देश के कृषि वैज्ञानिक सामिल होइन। एमा एक ठिन प्रदर्शनी घलो लगाय गे रीहिस हे। ये मड़ई म किसान मन ह नवा-नवा तकनीक बउरे के जानकारी लीन।
बिलासपुर लोक कला महोत्सव
बिलासपुर जिला के कोटा म आदिवासी लोक कला महोत्सव के आयोजन करे गीस। कार्यक्रम म माइपहुना के रूप म राज्यपाल अनुसूइया उइके संघरीन। कार्यक्रम म बोलत ओमन कीहिन कि आदिवासी समुदाय ह प्रकृति संग रहत आदिकाल ले सरलग अपन रहन सहन के देखभाल करत प्रकृति के बचाव बर काम करे हे। आदिवासी समाज के धर्मगुरू मन ह विश्व के रक्षा बर पर्यावरण के संतुलन के सिद्धांत ल जिनगी म अपनाय के संदेश दीन हे। ओमन कीहिन कि ये संदेश के प्रचार आधुनिक समाज ल नवा दिशा दे सकत हे। ये महोत्सव के आयोजन छत्तीसगढ़ सर्व आदिवासी समाज कोति ले करे गीस।
एनआरआई सेल बैठक
विदेश म रहत छत्तीसगढ़ के अप्रवासी भारतीय मन ल जोड़े अउ छत्तीसगढ़ के कला साहित्य ल संजोय राखे अउ प्रचार प्रसार करे बर गठित एनआरआई सेल के पहिली बइठका आज मंत्रालय म होइस।
गृह विभाग के प्रमुख सचिव मनोज पिंगवा के अगवई म होय ये बइठका म निवेश अउ तकनीकी बदलाव जइसन मुद्दा म सहयोग ल लेके गोठबात होइस। संगेसंग विदेश म रहत अप्रवासी भारतीय मन संग जीवंत संबंध बनाये राखे अउ राज्य के प्रगति बर जरूरी सुझाव लेके संबंध म गोठबात करे गीस।
जिला पंचायत सचिव मामला
कोंडागांव जिला कलेक्टर ह पंचायत अधिकारी मनले ऑनलाईन ठगी ले सतर्क रेहे के अपील करीन हे। खबर के मुताबिक पाछू दिन जिला के आने आने ग्राम पंचायत के पदाधिकारी मन ल एक झिन अज्ञात मनखे कोति ले फोन म निर्माण काम बर रकम आबंटित कराय के लालच दे जात रीहिस। जिला कलेक्टर ह ये मामला ल संज्ञान म लीन हे। ओमन पंचायत पदाधिकारी मनले कीहिन कि सिरिफ विभागीय अधिकारी मन ही बिकास काम के मंजूरी दे सकत हे। एखर सेती कोनो किसम के लालच म झन आवय।
इही बीच कोरबाजिला पंचायत के मुख्य कार्यपालन अधिकारी ह पाली ब्लॉक के दू झिन सचिव, करतला के एक सचिव अउ करारोपण अधिकारी मन ल निलंबित कर देहे। निलंबित कर्मचारी मन उपर सरकारी योजना चलाय म कोताही करे के आरोप हवय।
स्वावलंबी भारत अभियान
भिलाई म रोजगार सृजन केंद्र के स्थापना करे गेहे। ये प्रदेश के दूसर रोजगार सृजन केंद्र हे। एखर शुभारंभ छत्तीसगढ़ चेंबर ऑफ कॉमर्स एंड इंडस्ट्रीज के प्रदेश कार्यकारी अध्यक्ष संजय चौबे ह करीन।
स्वावलंबी भारत अभियान के प्रांत समन्वयक जगदीश पटेल ह बताइन कि देशभर के तेइस ठिन संगठन मिलके काम करत हे। ये अभियान के उद्देश्य बेरोजगार मन ल रोजगार के साधन देवाय बर आर्थिक, सामाजिक, शैक्षणिक क्षेत्र म काम करे संस्था ल जोड़े जात हे।
मौसम
अवइया एक दू दिन म प्रदेश के कुछ अउ भाग ले मानसून के विदाई हो सकत हे। मौसम विभाग के मुताबिक प्रदेश म बंगाल के खाड़ी ले नमी आवत हे। जेखर सेती काली कुछएक जगा म छुटपुट बरसा होय के संभावना हरय। ये बेरा म राज्य म एक दू जगा म गरज चमक संग गाज घलो गिर सकत हे।
अउ अब थोरकुन समाचार सार म –
– मुख्यमंत्री भूपेश बघेल ह जनसंपर्क विभाग के हिंदी-अंग्रेजी नवीन द्विभाषी वेबसाइट के लोकार्पण करीन हे। ये नवा वेबसाईट म समाचार के संगेसंग विभागीय अउ छत्तीसगढ़ ले जुड़े जम्मों जानकार हिंदी अउ अंग्रेजी म मिलही। ये वेबसाइट म जिला बर अलग सेगमेंट बनाय गेहे।
– नारायणपुर-ओरछा रद्दा म झोरी गांव तीर माओवादी मन ह एचडीडी मशीन अउ टरक म आगी लगा दीन। ये क्षेत्र म बीएसएनएल कोति ले फायबर केबल बिछाय के काम करे जात हे। ये काम म लगे गाड़ी म माओवादी मन हआगी लगा दीन।
– बिलासपुर म जमीन विवाद ल लेके दू पक्ष के बीच चाकूबाजी अउ मारपीट के घटना होय हे जेमा एक मनखे ह घायल होय हे। पुलिस ह आरोपी मनके बीच बलवा अउ हत्या के मामला दर्ज करे हे।
अउ
– जांजगीर अउ खोखरा गांव के तीर राष्ट्रीय राजमार्ग बनाय के बेरा धुर्रा उड़ाय ले हलाकान गांव के लोगन मन आज चक्का जाम करीन। पुलिस के समझाइश ले ओमन अपन चक्का जाम ल खतम करीन हे।