तबादला आदेश
राज्य के शिक्षा विभाग ह सत्ताईस झिन जिला शिक्षा अधिकारी अउ प्राचार्य के तबादला आदेश जारी कर देहे। ए आदेश ह तुरते लागू होही । एखर संगेसंग विकासखंड शिक्षा अधिकारी, व्याख्याता अउ प्रधान पाठक के एक आने तबादला सूची घलो जारी होय हे। एमा अठारा झिन अधिकारी मनके नाम हे।
भेंट-मुलाकात कार्यक्रम
मुख्यमंत्री भूपेश बघेल ह आज भेंट-मुलाकात कार्यक्रम के तहत सक्ती जिला के काशीगढ़ गांव म आने आने विकास काम ले जुड़े कतकोन घोषणा करीन। ए मउका म ओमन गांव वाले मन ल संबोधित करत कीहिन कि राज्य सरकार उंखर कल्याण बर कई ठिन योजना चलावत हे। ए बेरा म श्री बघेल ह गांव म लगे साप्ताहिक बाजार के दिन हाट बाजार क्लिनिक लगाये के घोषणा घलो करीन।
संगेसग ओमन ह काशीगढ़ बर स्कूल, दतौद अउ मलनी गांव म उप स्वास्थ्य केंद्र अउ जैजेपुर के सामुदायिक स्वास्थ्य केंद्र म ट्रामा सेंटर बनाये के घोषणा करीन। जैजेपुर म कृषि गोदाम भवन, पशु चिकित्सालय भवन, बेलकर्री म आंगनबाड़ी अउ अकलसरा ले केकराघाट तक पक्का सड़क बनाये बर घलो मंजूरी दीन। एखर अलावा मुख्यमंत्री ह पेण्ड्री अउ कचंदा म नवा पशु चिकित्सालय बनाये के संगेसंग भोथिया म सामुदायिक भवन बनाये ल घलो मंजूरी दीन।
जीएसटी बैठक
केंद्रीय वस्तु अउ सेवा कर विभाग सीजीएसटी के भोपाल स्थित मध्यक्षेत्र कार्यालय डहार ले आज रायपुर म व्यापार संगठन बर एक ठिन महत्वपूर्ण बइठका होइस। एमा मध्यक्षेत्र के मुख्य आयुक्त नवनीत गोयल ह व्यापारी मनले कीहिन कि जीएसटी के रिटर्न निर्धारित बेरा म दाखिल करे जाना चाही।
बइठक के अध्यक्षता करत प्रधान आयुक्त अतुल गुप्ता ह व्यापारी मनले कीहिन कि अगर कोनो करदाता ल कोनो समस्या होही त विभाग कोति ले ओखर तुरते समाधान करे जाही।
स्वास्थ्य मंत्री निर्देश
राजधानी रायपुर के डीकेएस पोस्ट ग्रेजुएट इंस्टीट्यूट एंड रिसर्च सेंटर ल एक स्वतंत्र संस्थान के रूप म अब चलाये जाही। ए फैसला स्वास्थ्य अउ चिकित्सा शिक्षा मंत्री टी.एस. सिंहदेव के अध्यक्षता म संस्थान के प्रबंध कारिणी अउ सामान्य सभा के बइठक म ले गीस।
ए बैठक म स्वास्थ्य मंत्री ह डीकेएस संस्थान के न्यूरोलॉजी समेत आने विभाग ले संबंधित इलाज के प्रक्रिया ल केंद्र के आयुष्मान योजना ले जोड़े के निर्देश दीन। श्री सिंहदेव ह ए अस्पताल के प्लास्टिक सर्जरी म स्कीन लैब बनाये ल घलो मंजूरी देहे।
कोरबा उपचुनाव
कोरबा जिला म पंचायत संस्था मनके उपचुनाव के काम चालू कर दे गेहे। जिला निर्वाचन अधिकारी अउ कलेक्टर संजीव झा ह बताइन कि जिला के तालापारा, चोटिया अउ परला ग्राम पंचायत म सरपंच के तीन पद बर उपचुनाव होना हे। उंहें जिला के आने आने ग्राम पंचायत म बारा झिन पंच बर उपचुनई के घोषणा करे गेहे। ओमन ह बताइन कि ए उपचुनई ल देखत चौदा अक्टूबर के मतदाता सूची के प्रारंभिक प्रकाशन करे जाही। एमा दावा आपत्ति के निराकरण के बाद दस नवंबर के मतदाता सूची के अंतिम प्रकाशन होही।
कलेक्टर अउ जिला निर्वाचन अधिकारी संजीव झा ह उपचुनई बर रजिस्ट्रिकरण अउ सहायक रजिस्ट्रिकरण अधिकारी मनके नियुक्ति कर देहे। उंहे अपर कलेक्टर ल अपीलीय अधिकारी बनाय गेहे।
बेमेतरा अविश्वास प्रस्ताव
बेमेतरा नगर पालिका परिषद के अध्यक्ष के खिलाफ लाये गे अविश्वास प्रस्ताव निरस्त होगे हे। नगर पालिका अध्यक्ष शकुंतला साहू के खिलाफ भाजपा ले निकाले गे पार्षद मन ह अविश्वास प्रस्ताव लाये रीहिन, जेखर उपर आज मतदान होइस अउ अविश्वास प्रस्ताव के पक्ष म नौ त उंहे विपक्ष म ग्यारा ठिन वोट पड़ीस ।
जानबा के अनुसार बेमेतरा नगर पालिका परिषद के चुनई म कांग्रेस के आठ अउ भाजपा के बारा झिन पार्षद मन जीतके आय रीहिन। फेर क्रॉस वोटिंग के सेती कांग्रेस पार्षद शकुंतला साहू ह अध्यक्ष निर्वाचित होगे रीहिन।
लंपी वायरस
बेमेतरा जिला म कठिया गांव के चार झिन जानवर मन म लंपी वायरस के लक्षण दिखे के बाद जिला प्रशासन ह पशु पालन विभाग ल जरूरी कदम उठाय के निर्देश दीन हे। ए जानवर मनके शुरूआती जांच म लंपी वायरस के लक्षण पाय के सूचना मिलतेच जिला प्रशासन ह सचेत होगे हे।
मामला के गंभीरता ल देखत जिला कलेक्टर ह पशुपालन विभाग के अधिकारी मन ल जानवर मनके टीकाकरण करे के निर्देश दीन हे। अधिकारी मन ल जानवर मनके सैंपल लेके तुरते जांच बर रायपुर भेजे बर केहे हे।
सट्टा कार्रवाई
छत्तीसगढ़ पुलिस ह राज्य म ऑनलाईन सट्टा बाज मनके दुबई ले संपर्क होय के संबंध म सुराग मिले के दावा करीन हे। पुलिस ह ए मामला म महाराष्ट्र ले दू झिन आरोपी ल गिरप्तार करे हे, जेखर ले पूछताछ म ऑनलाईन सट्टा बाज के कॉर्पोरेट बैंक खाता के जानकारी घलो मिले हे । ए आरोपी मन करा ले पुलिस ह लैपटॉप, चार मोबाइल अउ नकदी घलो जब्त करे हे।
पुलिस ह मोबाइल एप्लीकेशन ले सट्टा करइया पांच ठिन शाखा म दबिश देके उंहा काम करत सॉफ्टवेयर इंजीनियर अउ ओखर साथी मन ल गिरप्तार कर चुके हे। आरोपी मनले पूछताछ के बेरा ए जानकारी मिले हे कि सटोरिया मन किराया म खाता लेके रूपिया के लेनदेन करत रीहिन। ए केस म पुलिस ह खाता म किराया देवइया एक मैट्रीमोनियल कंपनी के संचालक अउ ओखर साथी ल घलो गिरप्तार करे हे।
छत्तीसगढ़ पदक
गुजरात म होवत छत्तीसवां राष्ट्रीय खेल के चलत छत्तीसगढ़ ह सॉफ्ट बॉल स्पर्धा म दू ठिन पदक पाय हे। छत्तीसगढ़ के पुरूष टीम ल रजत पदक मिले हे। त उंहे महिला वर्ग के टीम ह कांस्य पदक पाय हे।
मुख्यमंत्री भूपेश बघेल अउ खेलमंत्री उमेश पटेल ह दूनो टीम के खिलाड़ी मन ल ए सफलता बर बधाई अउ शुभकामना दीन हे। जानबा के अनुसार राष्ट्रीय खेल म छत्तीसगढ़ ल अब तक दू ठिन स्वर्ण, पांच रजत अउ छै ठिन कांस्य पदक मिल चुके हे।
अउ अब थोरकुन समाचार सार म –
– डाक सेवा बर लोगन मन ल जागरूक करे खातिर अभी राष्ट्रीय डाक सप्ताह मनाये जात हे। एखर चलत बिलासपुर म डाक विभाग डहार ले ग्राहक सम्मेलन होइस।
– रायगढ़ जिला के भालूमार गांव म चलत छत्तीसगढ़िया ओलंपिक खेल के बेरा कबड्डी प्रतियोगिता म पटकनी देत एक झिन जवान लइका ह घायल होगे रीहिस। जेखर बाद इलाज बर रायगढ़ ले जात बेरा रद्दा म ए खिलाड़ी के मउत होगे। घटना के बाद गुस्साये लोगन मन ह चक्का जाम कर दीन। पुलिस अधिकारी मन मउका म पहुंचके मामला ल शांत कराइन।
अउ
– एंटी करप्शन ब्यूरो के अधिकारी मन ह महासमुंद जिला म पशु विभाग के दू झिन लिपिक ल उनचालिस हजार के रिश्वत लेत गिरप्तार करीन हे।