ईडी-छापा
प्रवर्तन निदेशालय-ईडी के टीम डहार ले आज रायपुर के संगेसंग रायगढ़, बिलासपुर, कोरबा, अउ महासमुंद जिला म छापामार कार्रवाई करे गीस। खबर के मुताबिक ए शहर मन म काली देर रतिहा प्रवर्तन निदेशालय के अधिकारी मन ह पहुंच गे रीहिन अउ बीहनिया पांच बजे ले कई ठिन ठिकाना मन म छापा मारे गीस। महासमुंद म कांग्रेस के एक ठन नेता अउ चार्टर्ड एकाउंटेंट के ठिकाना म घलो छापामार कार्रवाई करे गीस।
उंहे रायगढ़ म एक झन प्रशासनिक अधिकारी अउ उंखर चार्टर्ड एकाउंटेंट के निवास म ये अधिकारी मन ह छापा मारीन। भिलाई म मुख्यमंत्री के उप सचिव के निवास म घलो ईडी के टीम डहार ले छापामार कार्रवाई करे गीस। कार्रवाई के दउरान उंखर घर ले मिले दस्तावेज के परीक्षण करे जात हे। छापा मारे के दौरान सुरक्षा खातिर ईडी के अधिकारी मन ह केंद्रीय रिजर्व पुलिस बल के टीम ल घलो साथ म राखे रीहिन। खबर के मुताबिक ए अधिकारी अउ कारोबारी के संबंध म ईडी के टीम ल करोड़ो रूपिया के अवैध लेनदेन के सूचना मिले रीहिस। जेला आधार मानके छापामार कार्रवाई करे गीस।
एति प्रदेश के पूर्व मुख्यमंत्री डॅाक्टर रमनसिंह ह आज एक ठन पत्रकार वार्ता म कीहिन कि प्रदेश के करीबन चालीस अधिकारी अउ कारोबारी के ठिकाना म छापामार कार्रवाई ले प्रदेश के छबि ह खराब होवत हे।
उंहे राज्य के मुख्यमंत्री भूपेश बघेल ईडी डहार ले करे जात छापामार कार्रवाई के निंदा करीन हे। ओमन आरोप लगावत कीहिन कि भाजपा, ह कांग्रेस के खिलाफ सोझे लड़ाई नइ लड़ सकत हे, जेखर सेती केंद्रीय जांच एजेंसी के मदद ले जात हे।
पीएम-आदि आदर्श ग्राम योजना
प्रधानमंत्री आदि आदर्श ग्राम योजना के तहत छत्तीसगढ़ डहार ले करीबन सत्ताईस सौ तिरालिस करोड़ रूपिया के प्रस्ताव ल केंद्रीय जनजातीय कार्य मंत्रालय ल भेजे जाही। मुख्य सचिव के अगवई म बनाये गे राज्य स्तरीय समिति डहार ले ये योजना के अंतर्गत राज्य के सात ठन जिला मन म डेढ़ हजार ले जादा गांव मन ल चुने गेहे।
केंद्र सलाह
केंद्र सरकार डहार ले भारतीय नागरिक मन ल यूक्रेन नइ जाय के सलाह दे गेहे। यूक्रेन म चलत लड़ई के सेती भारतीय दूतावास ह ये परामर्श जारी करे हे। परामर्श म केहे गेहे कि भारतीय नागरिक मन ल यूक्रेन सरकार अउ स्थानीय अधिकारी मनके सुरक्षा अउ दिशा-निर्देश मनके कड़ाई ले पालन करना चाही। दूतावास भारतीय नागरिक मनले अनुरोध करीन हे कि यूक्रेन म अपन स्थिति के बारे म दूतावास मन ल जानकारी देवत रहय, जेखर ले जरूरत पड़े म दूतावास डहार ले उंखर मदद करे जा सकय।
दीक्षांत समारोह
राज्यपाल अनुसूईया उइके ह कीहिन कि विश्वविद्यालय मनके जिम्मेवारी बनथे कि ओमन देश के विकास अउ नवा तकनीक बनाये के काम करय। रायगढ़ के ओ.पी. जिंदल विश्वविद्यालय म काली राखे गे एक ठन दीक्षांत समारोह के कार्यक्रम म संबोधित करत राज्यपाल ह कीहिन कि उच्च शिक्षा संस्थान मन ल अनुसंधान अउ विकास खातिर अपन विद्यार्थी मन ल नवाचार के संग उद्यमिता के सोच ल बढ़ावा देना चाही। ए कार्यक्रम म राज्यपाल ह कई ठन पाठ्यक्रम मन म पहिली स्थान पवइया विद्यार्थी मन ल स्वर्ण, रजत अउ कांस्य पदक भेंट करीन।
स्वास्थ्य विभाग समीक्षा
प्रदेश के जउन क्षेत्र मन म कोरोना संक्रमण के बचाव खातिर टीकाकरण कमती होय हे, उंहा जल्दी ले जल्दी ए अभियान ल तेज करे जाही। ए संबंध म स्वास्थ्य विभाग के संचालक भीमसिंह विभागीय अधिकारी मनके समीक्षा बइठका रखीन अउ जरूरी दिशा-निर्देश दीन।
ओमन कीहिन कि राज्य के कई ठन गांव मन म स्वास्थ्य सुविधा पहुंचाय खातिर अंतर्राष्ट्रीय, राष्ट्रीय, गैर सरकारी संगठन मनके मदद घलो ले जाही। ओमन कोरोना काल म एनजीओ मन डहार ले करे गे बढ़िया काम के बड़ई घलो करीन।
मुख्य सचिव-बैकिंग सुविधा
प्रदेश के बस्तर संभाग के सोला ठिन जगा मन म अउ सरगुजा संभाग के आठ ठन जगा मन म बैकिंग सुविधा के विस्तार ल जल्दीच करे जाही। ए संबंध म मुख्य सचिव अमिताभ जैन ह सहकारिता विभाग के समीक्षा बइठका म जरूरी दिशा-निर्देश दीन। बइठका म बताय गेहे कि बस्तर जिला के नानगुर, बड़ेकिलेपाल, बकावंड अउ नदीसागर म जिला सहकारी बैंक के सुविधा शुरू करे जाही।
उंहें बीजापुर जिला के कुटरू अउ मद्देड़ के संगेसंग नारायणपुर जिला म बेनूर अउ मर्दापाल म सहकारी बैंक बनाये जाही। अइसने कांडागांव जिला के दहीकोंगा, अमरावती, बड़ेडोंगर, धनोरा अउ बड़ेराजपुर म सहकारी बैंक के शाखा खोले जाही । एखर अलावा कांकेर जिला के कोयलीबेड़ा, जेपरा अउ अमोड़ा म सहकारी बैंक शुरू करे जाही।
ओति सरगुजा जिला के राजपुर, लुण्ड्रा अउ सूरजपुर जिला के गोविंदपुर अउ देवनगर म घलो जिला सहकारी बैंक के शाखा खोले जाही।
दंतेवाड़ा-बेटी मान
बस्तर क्षेत्र म ए बेरा पुलिस के टीम डहार ले हमर बेटी हमर मान अभियान चलाये जात हे। खबर के मुताबिक माइलोगिन अउ लइका मनके संग होवइया अपराध मनके प्रति लोगन मन ल जागरूक करे खातिर ए अभियान ल चलाये जात हे। दंतेवाड़ा के पुलिस अधीक्षक सिद्धार्थ तिवारी ह बताइन हे कि ए अभियान के तहत लइका मन ल निडर बनाये अउ सोशल मीडिया के सही उपयोग के बारे म जानकारी दे जात हे।
लखमा-कांग्रेस
प्रदेश के उद्योग मंत्री कवासी लखमा ह कीहिन हे कि राज्य म नवा उद्योग नीति के सेती अब तक करीबन पैंतालिस हजार ले जादा जवान लइका मन ल रोजगार देवाय गेहे। एखर संगेसंग माओवाद प्रभावित क्षेत्र मन म घलो वन उपज ले आधारित उद्योग मनके घलो विस्तार करे गेहे।
काली भिलाई म राखे गे एक ठिन कार्यक्रम म श्री लखमा ह पत्रकार मनले गोठबात करत कीहिन कि राज्य म विकास, बिश्वास अउ सुरक्षा के संकलप के सेती माओवादी मन ह अब कोनो कोनो क्षेत्र तक रही गेहे। ओमन कीहिन कि प्रदेश के वनक्षेत्र मन म वन उपज आधारित उद्योग लगाये के सेती आदिवासी बहुल क्षेत्र मन म जादा विकास होवत हे।
बीएसपी हादसा
भिलाई स्टील प्लांट-बीएसपी के यूनिवर्सल रेल मिल म आज बीहनिया तकनीकी दुर्घटना के सेती कुछ समय तक उत्पादन के काम ह प्रभावित होइस हे। खबर के मुताबिक ये दुर्घटना म कोनो प्रकार के नुकसान नइ होय हे । घटना के सूचना मिलतेच कारखाना के अधिकारी मन ह मउका म पहुंच गे अउ जल्दी ले जल्दी रेल मिल म उत्पादन के काम ल सुधारीन अउ कुछ देर बाद ए मिल म दुबारा फेर काम ल शुरू करे गीस।
राष्ट्रीय खेल
गुजरात के गांधीनगर म चलत छत्तीसवां राष्ट्रीय खेल म छत्तीसगढ़ के खिलाड़ी मन ह बढ़िया प्रदर्शन करत हे। काली सॉफ्टबॉल प्रतियोगिता के सेमी फायनल मुकाबला म राज्य के पुरूष टीम ह महाराष्ट्र के टीम ल नौ-शून्य ले हराके फायनल म जगा बनाइन। खबर के मुताबिक राष्ट्रीय खेल म छत्तीसगढ़ के टीम ह अब तक दू स्वर्ण के संगेसंग ग्यारा ठिन पदक जीत डारे हे।
अउ अब थोरकुन समाचार सार म –
– उच्च शिक्षा विभाग डहार ल सहायक प्राध्यापक मनके संशोधित तबादला सूची ल जारी कर देहे।
– भारतीय रेलवे यातायात सेवा के बड़का अधिकारी प्रवीण पांडेय ह बिलासपुर रेल मंडल के नवा प्रबंधक के पदभार ग्रहण करीन।
अउ
– जशपुर जिला के पत्थलगांव म ट्रक के चपेट म आय ले स्कूटी चलइया एक झिन माइलोगिन के मउत होगे, उंहें एक झिन माइलोगिन ह गंभीर रूप ले घायल होगे।