प्रधानमंत्री 5जी सेवा
प्रधानमंत्री नरेंद्र मोदी ह आज नई दिल्ली म राखे गे एक कार्यक्रम म फाइव-जी सेवा के शुरूआत करीन। फाइव-जी तकनीक ले इंटरनेट के गति तेज होय के संग कवरेज के दायरा घलो बाढ़ही ।
ए मउका म श्री मोदी ह कीहिन हे कि फाइव-जी सेवा के शुरूआत दूरसंचार उद्योग डहार ले एक सौ तीस करोड़ भारतीय मन बर उपहार हे। ये एक नवा युग म प्रवेश हरय। ओमन कीहिन कि टू-जी, थ्री-जी, अउ फोर-जी सेवा के दउर म भारत तकनीक बर दूसर देश उपर निर्भर रीहिस, फेर फाइव-जी सेवा के शुरू होय ले देश ह एक नवा इतिहास रच देहे।
स्वच्छ सर्वेक्षण
राष्ट्रपति द्रौपदी मुर्मू ह आज नई दिल्ली म आयोजित समारोह म स्वच्छ सर्वेक्षण के पुरस्कार दीन । एमा छत्तीसगढ़ के दुर्ग जिला के पाटन ल देशभर म दूसर स्थान मिले हे। एक लाख ले कमती आबादी वाले शहर म ईस्ट जोन म पाटन ह पहिली नंबर म हे ।
उंहे एक लाख ले जादा अउ तीन लाख ले कमती आबादी वाले शहर मन म अंबिकापुर राज्य म पहिली स्थान अउ कोरबा दूसर स्थान म हवय। स्वच्छ सर्वेक्षण के तहत दस लाख ले जादा आबादी वाले शहर मन म रायपुर ल दूसर स्थान मिले हे। एखरे संग स्वच्छता सर्वेक्षण के इंडियन स्वच्छता लीग म छत्तीसगढ़ के आठ शहर मन ह बाजी मारे हे। मुख्यमंत्री भूपेश बघेल ह छत्तीसगढ़ ल ए उपलब्धि बर प्रदेशवासी मन ल बधाई अउ शुभकामना देहे।
स्वच्छता विशेष अभियान
केंद्र सरकार ह स्वच्छता ले जुड़े अउ सरकार के तीर लंबित मामला ल कमती करे बर काली दू अक्टूबर ले इकतीस अक्टूबर तक विशेष अभियान के दूसर चरण के घोषणा करे हे। एखर माध्यम ले मामला के बेरा म निपटान अउ स्वच्छ कार्यस्थल के महत्व ल रेखांकित करे गेहे। महीना भर चलइया ए अभियान के दउरान मंत्रालय या विभाग अउ ओखर ले जुड़े कार्यालय के संगेसंग डेढ़ लाख ले जादा डाकघर, विदेशी मिशन, रेलवे स्टेशन अउ आने सार्वजनिक कार्यालय मन ल अभियान म सामिल करे के योजना हरय।
पीएससी परिणाम रोक
छत्तीसगढ़ लोक सेवा आयोग डहार ले आयोजित राज्य सेवा मुख्य परीक्षा दू हजार इक्कीस के परिणाम घोषित करे उपर अभी रोक लगा दे गेहे। आरक्षण के संबंध म छत्तीसगढ़ उच्च न्यायालय के आदेश के बाद ये रोक लगाये गेहे । अब तक आयोग डहार ले इंटरव्यू के बाद आखरी दिन परीक्षा परिणाम घोषित करे जाय । राज्य सेवा के एक सौ इकहत्तर पद के भर्ती बर पांच सौ नौ अभ्यर्थी मनके चुनई साक्षात्कार बर होय रीहिस अउ पाछू दिन तीस सितंबर साक्षात्कार के आखरी दिन रीहिस।
स्वैच्छिक रक्तदान दिवस
आज राष्ट्रीय स्वैच्छिक रक्तदान दिवस हरय। ए बछर ये ‘डोनेटिंग ब्लड इज एन एक्ट ऑफ सॉलिडरिटी ज्वॉइन द इफर्ट एंड सेव लाइव्स‘ के थीम उपर मनाये जावत हे। ए बछर एखर आयोजन स्वैच्छिक रक्तदान के प्रति जन जागरूकता लाये बर करे जाथे। ए मउका म प्रदेश म आज सरकार अउ गैर सरकारी संगठन डहार ले आने-आने जगा मन म स्वैच्छिक रक्तदान शिविर के आयोजन करे जात हे।
स्वास्थ्य विभाग के सचिव प्रसन्ना आर. अउ राष्ट्रीय स्वास्थ्य मिशन के संचालक भोस्कर विलास संदीपान ह आज राजधानी रायपुर स्थित डॅाक्टर भीमराव अंबेडकर स्मृति चिकित्सालय के मॉडल ब्लड बैंक म रक्तदान करीन। ए मउका म ओमन ह लोगन मनले ए अभियान ले जुड़के रक्तदान करे के अपील करीन।
जिले की चिट्ठी
आकाशवाणी समाचार डहार ले काली संझा छह बजके तीस मिनट ले छह बजके पैंतीस मिनट तक ‘‘जिले की चिट्ठी‘‘ कार्यक्रम के प्रसारण करे जाही। समाचार एकांश के ए कार्यक्रम ल छत्तीसगढ़ स्थित आकाशवाणी के जम्मों केंद्र मन ह एके संग रिले करही। ए बखत के अंक म ‘‘बिलासपुर‘‘ जिला के गतिविधि मनके बारे म जानकारी दे जाही।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ ए बखत छत्तीसगढ़ म पर्यटन के संभावना अउ पर्यटन ल बढ़ावा देबर करे जात प्रयास उपर छत्तीसगढ़ पर्यटन मंडल के प्रबंध संचालक अनिल कुमार साहू ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली दू अक्टूबर के बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
धान खरीदी
प्रदेश म अवइया एक नवंबर ले समर्थन मूल्य म धान खरीदी करे जाही। मुख्य सचिव अमिताभ जैन ह मंत्रालय ले वीडियो कॉन्फ्रेसिंग के माध्यम ले बइठका लेके जम्मों संभाग आयुक्त अउ जिला कलेक्टर मन ल धान खरीदी के तैयारी के संबंध म जरूरी दिशा-निर्देश दीन। मुख्य सचिव ह फसल के गिरदावरी के शुद्धि उपर विशेष जोर दीन अउ गिरदावरी के सत्यापन ग्राम सभा म करवाय के निर्देश कलेक्टर मन ल दीन। मुख्य सचिव ह धान खरीदी केंद्र मन म मानव संसाधन, बिजली, पानी, कैप कवर, चबूतरा, टोकन, तौल मशीन, बारदाना आदि के व्यवस्था करे बर कीहिन।
कबाड़ से जुगाड़
स्कूली लईका मन ल पाठ्यक्रम के कठिनाई ल समझाय बर शिक्षक मन तीर तखार म पड़े कबाड़ ले जुगाड़ के शिक्षण सामग्री तैयार करही। राष्ट्रीय अविष्कार अभियान के अंतर्गत शिक्षण सामग्री तैयार करे बर स्कूल ल लेके जिला स्तर तक मेला के आयोजन करे जाही।
ए प्रतियोगिता के थीम ‘मूलभूत साक्षरता अउ संख्यात्मक ज्ञान‘ उपर आधारित होही। हरएक विकासखंड अउ जिला म प्रतियोगिता के आयोजन बर तीस-तीस हजार रूपिया के प्रावधान करे गेहे। प्रदेश के जम्मों प्राथमिक स्कूल मन म पहिली चरण म संकुल स्तर म प्रतियोगिता राखे जाही। दूसर चरण म विकासखंड स्तर म प्रतियोगिता होही।
ग्रामसभा
काली दू अक्टूबर के राष्ट्रपिता महात्मा गांधी के जयंती हरय। ए मउका म प्रदेश के गांव मन म ग्रामसभा के आयोजन करे जाही । ग्रामसभा म गोठबात बर पंद्रह ठिन बिंदु तय करे गेहे। एमा ले ग्यारा बिंदु मन उपर जम्मों ग्रामसभा म अउ अनुसूचित क्षेत्र के ग्राम सभा मन म उपराहा चार बिंदु उपर विशेष गोठबात करे जाही।
ग्रामसभा म निर्धारित बिंदु मनके संग कलेक्टर, जिला पंचायत, जनपद पंचायत अउ ग्राम पंचायत मन डहार ले स्थानीय आवश्यकता ल धियान म राखत आने-आने विषय-वस्तु ल घलो ग्रामसभा के एजेंडा म शामिल करे जा सकत हे। ग्रामसभा म गौठान के प्रबंधन अउ संचालन के संबंध म चर्चा के संगेसंग सुराजी ग्राम योजना के तहत नरवा, गरवा, घुरवा अउ बाड़ी ले जुड़े काम के प्रगति उपर चर्चा करे जाही।
भेंट-मुलाकात
भेंट-मुलाकात कार्यक्रम के तहत मुख्यमंत्री भूपेश बघेल ह आज कबीरधाम जिला के पंडरिया विधानसभा क्षेत्र म करीबन उनहत्तर करोड़ रूपिया के आने- आने विकास काम के लोकार्पण अउ भूमिपूजन करीन।
मुख्यमंत्री ह पंडरिया जिला स्तरीय अधिकारी मनके समीक्षा बइठका लेके प्रशासनिक कामकाज ल अउ जादा सुघ्घर बनाये के निर्देश दीन। ओमन अधिकारी मन ल निर्देश दीन कि ओमन शिक्षा, स्वास्थ्य, पानी, सड़क अउ बिजली जइसन बुनियादी सुविधा हरएक नागरिक ल देवाय बर योजनाबद्ध तरीका ले काम करय। ओमन अधिकारी मन ल शासन के योजना के फायदा आखरी मनखे तक पहुंचाय बर कीहिन।
हाइकोर्ट भर्ती प्रक्रिया
छत्तीसगढ़ उच्च न्यायालय ह बस्तर अउ सरगुजा संभाग के संग बिलासपुर संभाग के गौरेला-पेण्ड्रा-मरवाही अउ कोरबा जिला म तीसरा अउ चौथा श्रेणी के पद मन उपर स्थानीय निवासी मनके भर्ती संबंधी राज्य सरकार के अधिसूचना ल निरस्त कर देहे। सामान्य प्रशासन विभाग ह ए संबंध म विभाग, कलेक्टर अउ जिला पंचायत के मुख्य कार्यपालन अधिकारी मन ल चिट्ठी लिखके आदेश के पालन करे के निर्देश दीन।
सीएम मिलेट्सछत्तीसगढ़ के आश्रम, छात्रावास अउ स्कूल मन म मध्यान्ह भोजन म मिलेट्स ल सामिल करे के संग मिलेट्स आधारित उद्योग ल बढ़ावा दे जाही। ए संबंध म मुख्यमंत्री भूपेश बघेल ह मुख्य सचिव ल कार्ययोजना बनाय के निर्देश दीन हे। कुपोषित, एनीमिक लईका अउ माइलोगिन मन ल ए कार्ययोजना म सामिल करे जाही।
खबर के मुताबिक प्रदेश के कोदो, कुटकी अउ रागी के न्यूनतम समर्थन मूल्य म तय करके खरीदी के व्यवस्था अउ मिलेट्स उत्पादक किसान मन ल नौ हजार रूपिया प्रति एकड़ इनपुट सब्सिडी दे जावत हे।
वृद्धजन दिवस
अंतर्राष्ट्रीय वृद्धजन दिवस के मउका म आज समाज कल्याण बिभाग डहार ले राजधानी रईपुर के इंडोर स्टेडियम म राज्य स्तरीय सम्मान समारोह के आयोजन करे गीस। ए मउका म विसिष्ट अतिथि डहार ले सूफी गायक पद्मश्री मदन चौहान अउ समाज सेविका पद्मश्री शमशाद बेगम सहित सोला वरिष्ठजन मन ल समाज म उंखर उल्लेखनीय योगदान बर सम्मानित करे गीस।
राष्ट्रीय खेलगुजरात म आयोजित छत्तीसवां राष्ट्रीय खेल म छत्तीसगढ़ ल पहिली सफलता मिले हे। दस हजार मीटर स्पीट स्केटिंग म छत्तीसगढ़ के अमितेश मिश्रा ह दूसरा स्थान पाके रजत पदक जीते हे।
खेल मंत्री उमेश पटेल ह अमितेश मिश्रा ल उंखर ए उपलब्धि बर बधाई अउ शुभकामना देहे।
