प्रधानमंत्री नरेन्द्र मोदी के बहत्तरवां जनम दिन म ‘‘रक्तदान अमृत महोत्सव‘‘ के बेरा म काली देस म एक दिन म सबले जादा रक्तदान करे के नवा विश्व रिकॉर्ड बनाय गीस। ए सबले बड़े रक्तदान अभियान रिहीस। 6 हजार ले जादा सिविर म 90 हजार ले जादा लोगन मन रक्तदान करीन। ए अभियान के उद्देश्य नियमित, निःशुल्क अउ ऐच्छिक रक्तदान के बारे म जागरूकता फैलाना रिहीस।
श्री मोदी ह अपन जनम दिन म सुभकामना देवइया जम्मों मनखे मन ल धन्यवाद दीन। ओमन किहीन कि ये सुभकामना ओमन ल जादा परिश्रम अउ काम करे म ताकत देथे।
ऐति, छत्तीसगढ़ म घलो प्रधानमंत्री के जनम दिन म भाजपा के आने-आने इकाई डहार ले कतकोन कारीकरम आयोजित करे जात हे। प्रदेस भाजपा डहार ले राजधानी रईपुर के एक मॉल म सेवा पखवाड़ा अउ एक प्रदर्सनी के सुभारंभ करे गीस। एमा प्रधानमंत्री के बालपन ले लेके प्रधानमंत्री बने तक के सफर के पुस्तक अउ फोटो मन ल प्रदर्शित करे गेहे। ए मउका म प्रदेस संगठन महामंत्री पवन साय, सांसद सुनील सोनी, पूर्व मंत्री बृजमोहन अग्रवाल समेत भाजपा के वरिष्ठ नेता सामिल होईन। संगेसंग राजधानी रायपुर के जयस्तंभ चौक म रक्तदान सिविर के आयोजन अउ सेवा पखवाड़ा के तहत कारीकरम के सिलसिला के सुरूवात होईस, जे ह दू अक्टूबर तक चलही।
ए मउका म भाजपा के राष्ट्रीय अध्यक्ष जे.पी. नड्डा ह नई दिल्ली ले ‘‘बस्ती संपर्क अभियान‘‘ के सुभारंभ करीन। ए कारीकरम म भाजपा जिला कार्यालय एकात्म परिसर ले सांसद सुनील सोनी, जिला अध्यक्ष श्रीचंद सुंदरानी अउ प्रदेस मंत्री किशोर महानंद समेत भाजपा के कतकोन वरिष्ठ नेता अउ कार्यकर्ता वर्चुअल रूप ले सामिल होईन।
उहें, मुंगेली म घलो सेवा पखवाड़ा के कारीकरम आयोजित करे गीस, जिहां वृक्षारोपण अउ रक्तदान सिविर राखे गे रिहीस। ए अवसर म विधायक पुन्नूलाल मोहले घलो सामिल होईन।
भेंट-मुलाकात
भेंट-मुलाकात कार्यक्रम के तहत मुख्यमंत्री भूपेश बघेल ह आज बालोद जिला के गुण्डरदेही विधानसभा क्षेत्र के बेलौदी गांव पहुंचीन। ए मउका म ओमन लोगन मन ले मुलाकात करके उंखर समस्या सुनीन।
श्री बघेल ह गुण्डरदेही म सब डिवीजनल अधिकारी के पदस्थापना करे अउ ग्राम हल्दी म नवा पुलिस चौकी सुरू करे के घोसना करीन। उहें, अर्जुंदा अउ गुण्डरदेही के सामुदायिक स्वास्थ्य केन्द्र बर भवन अउ अर्जुंदा म बस स्टैंड के निर्माण के मंजूरी घलो दीन। एखर अलावा मुख्यमंत्री ह भाटागांव, बेलौदी अउ कुरदी म जिला सहकारी बैंक के एटीएम खोले, भाठागांव-बी अउ पैरी म चलत दू निजी स्कूल के शासकीयकरण करे बात किहीन। ओमन किहीन कि ग्राम बेलौदी ले सतमरा अउ सतमरा ले अरमरीकला तक अउ ग्राम सतमरा ले डांडेसरा रद्दा तक के मरम्मत करे जाही। उहें, भाठागांव ले रनचिरई, रनचिरई ले जामगांव तक सड़क मरम्मत कराय के घोसना करीन। संगेसंग मुख्यमंत्री ह गुंडरदेही विकासखंड के आदिवासी बहुल्य गांव मन म देवगुड़ी निर्माण बर पचास लाख रूपिया देके घोसना घलो करीन।
कार्यशाला
पत्र सूचना कार्यालय, रईपुर डहार ले अंबिकापुर म काली उन्नीस सितंबर के ग्रामीण पत्रकारिता म आधारित एक कार्यशाला ‘‘वार्तालाप‘‘ के आयोजन करे जाही। कार्यसाला म वरिष्ठ पत्रकार अउ विषय विशेषज्ञ ‘‘जनकल्याणकारी योजना के प्रभावी प्रसार म ग्रामीण पत्रकारिता के भूमिका‘‘ बिसय म ग्रामीण क्षेत्र के पत्रकार अउ संवाददाता मन ले विचार-विमर्श करही। ए कार्यशाला ल केन्द्रीय जनजातीय कार्य राज्यमंत्री रेणुका सिंह घलो संबोधित करही।
बतादन कि ए आयोजन आज होवइया रिहीस हे, फेर कोनों कारण ले अब एला काली करे जाही।
दुर्घटना
धमतरी जिला म काली संझा यात्री बस अउ मोटरसाइकिल के बीच होय भिडंत म तीन झिन मनखे के मउत होगे। बतादन कि एक ठिन बस धमतरी ले रईपुर आवत रिहीस। इही दउरान दरबा गांव म राष्ट्रीय राजमार्ग के तीर मोटर साइकिल अउ बस के बीच टक्कर होगे। ए हादसा म मोटर साइकिल सवार तीनों मनखे गंभीर रूप ले घायल होगे। घायल मनखे मन ल कुरूद के सामुदायिक स्वास्थ्य केन्द्र म भर्ती कराय गीस, जिहां इलाज के दउरान तीनों के मउत होगे।
ऐति, कोंडागांव जिला के फरसगांव-छोटे मोड़ के तीर दू मोटर साइकिल के बीच होय टक्कर म चार झिन युवक घायल होगे, जेमन ल फरसगांव के अस्पताल म भर्ती कराय गेहे।
माओवादी-समर्पण
सुकमा जिला म दू लाख रूपिया के एक इनामी सहित पांच माओवादी आत्मसमर्पण करे हे। ए माओवादी मन पुलिस अधीक्षक सुनील शर्मा अउ सीआरपीएफ दू सौ उन्नीसवां बटालियन के अधिकारी मनके आगू म समर्पण करीन। पुलिस के मुताबिक इनामी माओवादी माड़वी जोगा पिड़मेल उपर बुरकापाल सहित कतकोन घटना म सामिल होय के आरोप हे।
उहें, इही जिला के पोलमपल्ली के अरलमपल्ली इलाका ले सुरक्षा बल ह आईईडी बरामद करे हे, जेला जवान मन मउका म ही निष्क्रिय कर दीन।
रेलवे-स्वच्छता पखवाड़ा
भारतीय रेलवे डहार ले ‘‘स्वच्छ रेल-स्वच्छ भारत‘‘ के तहत स्वच्छता अभियान चलाय जात हे। इही कड़ी म आज ‘‘स्वच्छ मूवमेंट‘‘ थीम म दक्षिण पूर्व मध्य रेलवे के बिलासपुर मंडल म साफ-सफाई अउ स्वच्छता अभियान चलाय गीस अउ स्वच्छता जागरूकता साइकिल रैली निकाले गीस। उहें, स्टेशन अउ रेलवे कॉलोनी म घुम-घुम के लोगन मन ल साफ-सफाई बर प्रेरित करे गीस।
रेलवे स्टेशन-आगजनी
रायपुर रेलवे स्टेशन के पार्सल गोदाम म आज बिहनिया आगी लगे ले पार्सल गोदाम म राखे गे लाखों रूपिया के सामान जलके राख होगे। उहें, स्टेशन के तीर बने स्टैंड म खड़े कुछेक गाड़ी म आगी लग गे। ए घटना रेलवे स्टेशन के प्लेटफॉर्म नंबर-एक के बाहिर बने पार्सल कार्यालय के हरय। आगी लगे के खबर मिले के बाद आरपीएफ अउ जीआरपी के अधिकारी मन मउका म पहुंचीन अउ पार्सल कार्यालय के कर्मचारी मन ले ए घटना के जानकारी लीन। दमकल गाड़ी के मदद ले आगी ल बुझा ले गेहे।
अउ अब पेस हे मौसम के हाल..
अवइया चौबीस घंटा के दउरान प्रदेस के एक-दू जघा म हल्का ले मध्यम बरसा होय या गरज-चमक के संग छींटा पड़े के संभावना हे।
मौसम विभाग के अनुसार एक मानसून द्रोणिका पूर्व मध्य बंगाल के खाड़ी ले मध्य समुद्र तक बने हवय। एखर असर ले काली प्रदेस म एक-दू जघा म भारी बरसा होय अउ गाज गिरे संभावना हे।
– राज्य सरकार ह लोक निर्माण विभाग के प्रभारी प्रमुख अभियंता वी.क.े भतपहरी ल तत्काल प्रभाव ले हटा के अस्थायी रूप ले ओएसडी के पद म पदस्थ करे हे। बताय जात हे कि खराब सड़क के मामला म राज्य सरकार ह अधिकारी के खिलाफ ए कार्रवाई करे हे।
– धमतरी पुलिस ह संविदा शिक्षक के हत्या के मामला म एक नाबालिग सहित तीन युवक ल गिरफ्तार करे हे।
– दुरूग जिला म शिवनाथ नदी म डुबे ले एक युवक के मउत होगे।
– राजनांदगांव जिला के रानीसागर तलाब के पास होय सड़क हादसा म एक झिन सियान के मउत होगे।
अउ
– जांजगीर-चांपा जिला के लटिया गांव म तरिया म डूबे ले एक झिन मनखे के मउत होगे।