प्रधानमंत्री नरेन्द्र मोदी के जन्मदिन म आज राष्ट्रपति द्रौपदी मुर्मू, उप राष्ट्रपति जगदीप धनखड़, केन्द्रीय गृहमंत्री अमित शाह, रक्षामंत्री राजनाथ सिंह, लोकसभा अध्यक्ष ओम बिड़ला अउ सूचना अउ प्रसारण मंत्री अनुराग सिंह ठाकुर ह सुभकामना दीन।
उहें, छत्तीसगढ़ के मुख्यमंत्री भूपेश बघेल ह घलो प्रधानमंत्री नरेन्द्र मोदी ल जन्मदिन के सुभकामना देवत हुए उंखर अच्छा स्वास्थ्य के कामना करीन।
भाजपा-सेवा पखवाड़ा
भारतीय जनता पार्टी देशभर म आज ले दू अक्टूबर तक सेवा पखवाड़ा के आयोजन कर प्रधानमंत्री नरेन्द्र मोदी के जन्मदिन मनावत हे। नई दिल्ली म संवाददाता सम्मेलन म भाजपा सांसद अरूण सिंह ह किहीन कि ए दउरान पार्टी कार्यकर्ता मन रक्तदान जइसे अलग-अलग गतिविधि मन म सेवा प्रदान करही। ओमन किहीन कि भारत ल बछर दू हजार पच्चीस तक तपेदिक मुक्त बनाय के प्रधानमंत्री के आह्वान म पार्टी कार्यकर्ता मन तपेदिक मरीज मन ल गोद घलो लीन हे।
ऐति, छत्तीसगढ़ के विभिन्न जिला मन म घलो प्रधानमंत्री नरेन्द्र मोदी के जन्म दिवस म भाजपा के विभिन्न इकाई डहार ले अनेक कार्यक्रम आयोजित करे जात हे। कवर्धा म शहर मंडल अउ महिला मोर्चा के कार्यकर्ता मन ह पौधरोपण कर प्रधानमंत्री के जन्मदिन मनईन। उहें, युवा मोर्चा के कार्यकर्ता मन तीस यूनिट रक्तदान घलो करीन।
अइसने, अंबिकापुर म आदिवासी समाज ह घलो छत्तीसगढ़ के बारह जाति मन ल अनुसूचित जनजाति म सामिल करे जाय के खुसी म नृत्य प्रस्तुत कर प्रधानमंत्री के जनमदिन मनईन।
मुख्यमंत्री-स्वाईन फ्लू निर्देश
मुख्यमंत्री भूपेश बघेल ह प्रदेस म स्वाईन फ्लू के मामला म बढ़ोतरी ल देखत हुए अस्पताल मन म आवश्यक तैयारी रखे के निरदेस देहे। संगेसंग दूसर बीमारी मन से बचाव अउ रोकथाम बर आवश्यक उपाय सुनिश्चित करे बर केहे हे। मुख्यमंत्री ह स्वास्थ्य सचिव ल घलो ए संबंध म बइठका लेके समीक्षा करे के निरदेस देहे।
गौतलब हे कि प्रदेस के अलग-अलग जिला मन म पाछु कुछ दिन ले स्वाईन फ्लू के मामला म बढ़ोतरी देखे जात हे। एखर बाद स्वास्थ्य विभाग ल अलर्ट कर दे गेहे।
त्यौहार-एनजीटी निर्देश
राष्ट्रीय हरित प्राधिकरण-एनजीटी डहार ले छत्तीसगढ़ सहित देसभर म नवरात्र, दशहरा अउ दीवाली तिहार बर नवा दिशा-निरदेस जारी कर दे गेहे। दिसा-निरदेस के अनुसार ए तिहार मनके दउरान सड़क मन म पंडाल अउ स्वागत द्वार नइ लगाय जा सकही। दिसा-निरदेस मनके कड़ाई ले पालन सुनिश्चित कराय जाय के संबंध म राज्य सासन के आवास अउ पर्यावरण विभाग ह सबो जिला कलेक्टर अउ पुलिस अधीक्षक मन ल निरदेस देहे।
एमा केहे गेहे कि एनजीटी भोपाल बेंच के आदेस के कारण अब सड़क मन म पंडाल या स्वागत द्वार नइ लगाय जा सकय। प्रसासन के अनुमति के बिना अगर कोई पंडाल या स्वागत द्वार सड़क म लगाय जाही। त ओला तत्काल हटा दे जाही। आदेस म यहू केहे गेहे कि धार्मिक अउ सामाजिक जुलूस म ध्वनि अउ वायु प्रदूषण झन होवय। एखर बर बिसेस ध्यान रखना होही। तेज आवाज म डीजे बजाके जुलूस निकाले ले कड़ा कार्रवाई करे जाही।
समावेशी शिक्षा
प्रदेस के स्कूल मन म अध्ययनरत् दृष्टिबाधित लइका मन बर अब समावेशी शिक्षा के तहत अध्ययन सामग्री स्मार्ट फोन के जरिया उपलब्ध कराय जाही। ए कारीकरम के संचालन बर शिक्षक मनके कार्यशाला चौदह ले तेईस सितंबर तक राजधानी रायपुर के ठाकुर प्यारे लाल पंचायत अउ ग्रामीण विकास प्रशिक्षण संस्थान निमोरा म आयोजित करे जात हे। ये कार्यशाला म कक्षा नौंवी म अध्ययनरत् दृष्टिबाधित लइका मन संग चयनित बी.आर.पी. समावेशी शिक्षा ल स्मार्ट फोन म पाठ्यक्रम के उपयोग बर प्रशिक्षित करे जात हे।
अंतर्राष्ट्रीय ओजोन परत दिवस
अंतर्राष्ट्रीय ओजोन परत संरक्षण दिवस उपर काली छत्तीसगढ़ पर्यावरण संरक्षण मंडल डहार ले रायपुर म पोस्टर अउ पर्यावरणीय प्रश्नोत्तरी प्रतियोगिता के आयोजन करे गीस। प्रतियोगिता म साढ़े पांच सौ ले जादा प्रतिभागी मन म हिस्सा लीन अउ विजयी प्रतिभागी मन ल पुरस्कार वितरण करे गीस।
ये अवसर म मंडल के सदस्य सचिव आर.पी. तिवारी ह छात्र-छात्रा मन ले आह्वान करीन कि ओमन ओजोन परत के सुरक्षा बर जनचेतना जागृत करय।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत शिक्षक दिवस म राष्ट्रपति के हाथ ले राष्ट्रीय सिक्षक सम्मान ले सम्मानित छत्तीसगढ़ के सिक्षिका ममता अहार से लेगे भेंटवार्ता प्रसारित करे जाही।
एखर प्रसारण आकाशवाणी के रायपुर केन्द्र डहार ले काली बिहनिया 9 बजके 30 मिनट म करे जाही। एला छत्तीसगढ़ के जम्मों आकाशवाणी केन्द्र एके संघरा रिले करही।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा छह बजके पैंतीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘सुकमा‘‘ जिला के गतिविधि मनके बारे म जानकारी दे जाही।
चेस टूर्नामेंट
छत्तीसगढ़ के राजधानी रईपुर म काली अट्ठारह सितंबर ले छत्तीसगढ़ चीफ मिनिस्टर ट्रॉफी इंटरनेशनल ग्रैंडमास्टर्स चेस टूर्नामेंट के आयोजन करे जाही। अट्ठाईस सितंबर तक चलने वाला ये टूर्नामेंट म विश्व के पन्द्रह देस के पांच सौ ले जादा शतरंज खिलाड़ी मन हिस्सा लीहीं। खेल अउ युवा कल्याण विभाग, अखिल भारतीय शतरंज महासंघ अउ छत्तीसगढ़ ओलंपिक एसोसिएशन डहार ले आयोजित ए टूर्नामेंट म भाग ले बर रशिया, यूक्रेन, जॉर्जिया, यूएसए, कजाकिस्तान, मंगोलिया, पोलैंड, वियतनाम, कोलंबिया, ईरान, श्रीलंका, बांग्लादेश, जिम्बाब्वे अउ नेपाल समेत पन्द्रह देस के खिलाड़ी मन पंजीयन करा चुके हे। ए टूर्नामेंट ले देस अउ प्रदेस के रेटेड खिलाड़ी मन ल अपन रेटिंग सुधारे के मउका मिलही।
अउ अब थोरकुन समाचार सार म –
– राज्यपाल अनुसुईया उइके ह अमर शहीद गोंड राजा शंकर शाह अउ उंखर पुत्र कुंवर रघुनाथ के पुण्यतिथि म ओमन ल नमन करीन।
– मुख्यमंत्री भूपेश बघेल ह आज विश्वकर्मा जयंती के अवसर म अपन निवास कार्यालय म भगवान विश्वकर्मा अउ यंत्र उपकरण मनके पूजा-अर्चना करके प्रदेस के सुख-समृद्धि के कामना करीन।
– मुख्यमंत्री भूपेश बघेल ह आज रायपुर म स्वतंत्रता संग्राम सेनानी वामन बलीराम लाखे के जयंती म उंखर छात्राचित्र उपर पुष्प अर्पित कर उनला नमन करीन।
– भारतीय पुलिस सेवा के अधिकारी अशोक जुनेजा अब राज्य के पूर्णकालिक पुलिस महानिदेशक बन गेहे। संघ लोक सेवा आयोग के मंजूरी के बाद राज्य शासन ह ए संबंध म आदेश जारी कर देहे।
– छत्तीसगढ़ व्यावसायिक परीक्षा मंडल डहार ले काली अट्ठारह सितंबर के शिक्षक पात्रता परीक्षा-टीईटी दू हजार बाईस के आयोजन करे जाही। ए परीक्षा दू पाली म होही।
– जांजगीर-चांपा जिला के पामगढ़ म बहुजन समाज पार्टी डहार ले पदाधिकारी अउ कार्यकर्ता मनके सम्मेलन आयोजित करे गीस। सम्मेलन म राज्यसभा सांसद रामजी गौतम अउ प्रदेस प्रभारी दाऊराम रत्नाकर सहित अन्य पदाधिकारी मौजूद रिहीन।
अउ
– दुर्ग जिला के सुपेला पुलिस ह करोड़ों रूपिया के ठगी के मामला म चिटफंड कंपनी के एक झिन डायरेक्टर ल मध्यप्रदेस ले गिरफ्तार करे हे।