गोधन न्याय योजना
राज्य सरकार के महत्वाकांक्षी गोधन न्याय योजना आज ले प्रदेसभर म सुरू होगे हे। मुख्यमंत्री भूपेश बघेल ह हरेली परब के बेरा म रईपुर स्थित अपन निवास म आयोजित समारोह म सांकेतिक रूप ले गोबर ल खरीद के ए योजना सुरूवात करीन। ए बेरा म मुख्यमंत्री ह प्रदेसवासी मन ल हरेली परब के बधाई देवत किहीन कि ए योजना संकट के बेरा म किसनहा अउ पशुपालक मन बर वरदान साबित होही। ए ग्रामीण अर्थव्यवस्था के संजीवनी बनही। ओमन किहीन कि ए ह एक ठिन बहुआयामी योजना हवय, जेखर बहुत अकन लक्षय एक संघरा हासिल करे जा सकही।
मुख्यमंत्री ह यहू किहीन कि गोधन न्याय योजना ले पशुपालक मन के आय म बढ़ोतरी होही अउ जैविक खाद के उपयोग ल बढ़ावा मिले ले रसायनिक खाद के उपयोग म कमी आही। गोधन न्याय योजना के तहत राज्य सरकार ह पशुपालक मन ले दू रूपिया किलो के दर ले गोबर खरीदही अउ फेर ओखर ले जैविक खाद तैयार करे जाही। वर्मी कम्पोस्ट खाद ल आठ रूपिया प्रति किलो के दर ले बेचे जाही। उहें, ए योजना ले बड़का पैमाना म रोजगार के अवसर घलो उपलब्ध होही।
प्रदेस म सुराजी गांव योजना के तहत पहिली ले ही पांच हजार ले जादा गौठान के स्वीकृति दे जा चुके हे। एमा ले दू हजार सात सौ पच्यासी गौठान बन गेहे। इही गौठान के माध्यम ले गोधन न्याय योजना संचालित होही। राज्य सरकार ह प्रदेस के सबो ग्राम पंचायत अउ गांव म गौठान बनाय के लक्षय राखे हे।
लाॅकडाउन निर्देश
प्रदेस म कोरोना संक्रमण के बाढ़ता मामला ल देखत आने-आने जिला म लाॅकडाउन लागू करे के आदेस जारी करे गेहे।
रईपुर अउ सरगुजा जिला म बाईस ले अट्ठाईस जुलाई तक लाॅकडाउन रइही। रईपुर कलेक्टर डाॅक्टर एस. भारतीदासन ह जिला म कोरोना वायरस के रोकथाम बर नगर पालिक निगम रईपुर अउ बीरगांव के संपूर्ण क्षेत्र ल कंटेनमेंट जोन घोषित करीन हे। इहां बाईस ले अट्ठाईस जुलाई तक आने-आने गतिविधि उपर रोक लगाय गेहे। ए बेरा म सासकीय, अर्द्ध शासकीय, अउ निजी कार्यालय बंद रइही। नगरीय क्षेत्र म सार्वजनिक परिवहन सेवा, निजी बस, टैक्सी आॅटो रिक्शा, ई-रिक्शा अउ रिक्शा के परिचालन घलो बंद रइही। सिरिफ जरूरी जिनीस अउ सेवा के आवागमन ल छोड़े के रईपुर अउ बीरगांव नगर निगम के सबो सीमा ल सील कर दे गेहे। सिरिफ वाणिज्यक कार्गों परिवहन के ही अनुमत होही। फल, सब्जी, राशन दुकान, मेडिकल अउ जनरल स्टोर्स निर्धारित अवधि तक खुले रइही।
उहें, सरगुजा जिला के नगरीय इलाका म घलो बाईस ले अट्ठाईस जुलाई तक जरूरी सेवा ल छोड़ के पूर्ण लाॅकडाउन रइही। ए बेरा म नगर निगम अंबिकापुर के सीमा सील करे जाही। उहें, रासन दुकान अउ फल-सब्जी के दुकान बिहनिया छह बजे ले दस बजे तक खुले रइही।
ऐति, बिलासपुर जिला के बिल्हा अउ बोदरी म तेईस ले इकतीस जुलाई तक पूर्ण लाॅकडाउन के आदेस हवय। ए बेरा म सासकीय कार्यालय अउ पुलिस थाना चैकी म बिना पूर्व अनुमति के प्रवेस प्रतिबंधित रइही। रासन दुकान अउ फल-सब्जी के दुकान बिहनिया छह ले मंझनिया बारह बजे तक तक खुले रइही।
सरकारी कार्यालय-निर्देश
सामान्य प्रशासन विभाग ह कोरोना संक्रमण के नियंत्रण बर प्रतिबंधात्मक आदेस ले परभावित क्षेत्र मन म सासकीय कार्यालय के संचालन बर संसोधित निरदेस जारी करीन हे। राज्य सासन ह परभावित क्षेत्र म स्थित सासकीय कार्यालय के संचालन प्रतिबंधात्मक आदेस के प्रभावी रेहे के अवधि तक नइ करे के निरदेस दीन हे। लेकिन इही क्षेत्र म पुलिस, स्वास्थ्य, अस्पताल, फायर बिग्रेड, साफ-सफई, ठोस अपशिष्ट प्रबंधन, बिजली, पेयजल आपूर्ति अउ आने-आने जरूरी अउ आपातकालीन सेवा पहिली के जइसे संचालित होही। पंजीयन कार्यालय के संचालन के अनुमति रइही।
कोरोना वारियर्स-सम्मान
श्रम मंत्री डाॅक्टर शिवकुमार डहरिया ह आज रईपुर के लालपुर स्थित कुष्ठ अस्पताल म बनाय गे कोविड अस्पताल के कोरोना योद्धा मन ल सम्मानित करीन। ए बेरा म डाॅक्टर डहरिया ह किहीन हे कि कोरोना संकट काल म कोरोना योद्धा अपन जीवन के परवाह करे बिना ही सरलग सेवा देवत हे। स्वास्थ्य, पुलिस, नगरीय निकाय अउ आने-आने जरूरी सेवा प्रदान करे वाले विभाग के संगेसंग समाजसेवी संस्था मन घलो मानव जीवन के रक्षा म लगे हे। ओमन ह लोगन मन ले मास्क लगाय, सैनिटाइजर के उपयोग करे अउ सोसल डिस्टेसिंग राखे के अपील करीन।
हरेली
हरियाली के परब हरेली आज प्रदेसभर म हंसी-खुसी मनाय जात हे। ए दरी घलो छत्तीसगढ़ म ए तिहार ल लेके अलग उत्साह देखे बर मिलीस। राज्य सासन डहार ले प्रदेसभर म ए तिहार के जगह-जगह आयोजन करे गीस, जेमा लइका अउ युवा मन गेड़ी के मजा लीन।
रईपुर स्थित मुख्यमंत्री निवास म घलो पारंपरिक रीति-रिवाज के संग हरेली तिहार मनाय गीस। ए बेरा म मुख्यमंत्री ह कृषि उपकरण के पूजा करीस अउ गाय ल लोंदी खवाईस। संगेसंग सांस्कृतिक कारीकरम के घलो आयोजन करे गे रिहीस, जेमा लोक कलाकार, नर्तक अउ लोक गायक मन ह पांरपरिक वेशभूषा म वाद्य यंत्र अउ साज-सज्जा के संग प्रस्तुति दीन।
ऐति, किसनहा मन अपन खेती-किसानी के औजार मन संग अपन देवता के पूजापाठ करीन। हरेली के तिहार पर्यावरण अउ प्रकृति के संग हमर जुड़ाव अउ हमर लोक संस्कृति ल घलो प्रदर्सित करथे।
मुंगेली, धमतरी, जांजगीर-चांपा, राजनांदगांव सहित प्रदेस के आने-आने जिला ले घलो हरेली परब पारंपरिक उल्लास के संग मनाय जाय के समाचार मिले हे।
राज्यपाल अनुसुईया उइके अउ मुख्यमंत्री भूपेश बघेल ह हरेली परब के प्रदेसवासी मन ल बधाई अउ सुभकामना दीन हे।
बस्तर-दशहरा
विश्व प्रसिद्ध बस्तर दशहरा के परब आज ले सुरू होगे हे। पचहत्तर दिन तक चलइया ए परब के बेरा आज पाटजात्रा के रस्म अदा करे गीस। ए बेरा म ग्रामीण मन दंतेश्वरी मंदिर पहुंचीन, जिहां गांव के पुजारी ह रथ निर्माण म प्रयोग करे जाय वाले पहिली लकड़ी के पंरपरा अनुसार पूजा-पाठ करीन। ए विधान के संगेसंग बस्तर दशहरा म विशालकाय रथ के निर्माण म जंगल ले लकड़ी लाय के काम सुरू हो जथे। ए बेरा म मौजूद बस्तर सांसद अउ दशहरा समिति के अध्यक्ष दीपक बैज ह बतईन कि कोरोना संक्रमण ल देखत दशहरा परब ल लेके जम्मों लोगन मन ले गोठबात करके एखर बारे म फइसला ले जाही।
खबर के मुताबिक ए बछर हिन्दू पंचाग के अनुसार एक अधिमास पड़े के सेती पचहत्तर दिन तक चलइया बस्तर दशहरा एक सौ चार दिन के होही।
गणेश मूर्ति-अनुमति
प्रदेस म भगवान गणेश के चार फीट तक के मूर्ति बेचे के अनुमति दे गेहे। मुख्यमंत्री भूपेश बघेल ह आज रईपुर स्थित अपन निवास म आयोजित कारीकरम म आय एक झिन मूर्तिकार के अनुरोध म ए जानकारी दीन। मूर्तिकार ह मुख्यमंत्री ल बतईन हे कि उंखर परिवार भगवान गणेश के मूर्ति बनाके बेचथे। ओमन गणेश उत्सव बर मूर्ति बनाय हे अउ कोरोना संक्रमण के सेती मूर्ति बेचे ल लेके असमंजस हवय।
रेस्टारेंट/बार बंद
प्रदेस म कोरोना संक्रमण ल देखत आबकारी विभाग ह क्लब, रेस्टोरेंट अउ होटल स्थित बार रूम, स्टाॅक रूम अउ मदिरा संग्रहण स्थल ल अवइया दू अगस्त तक बंद राखे के आदेस जारी करीन हे। आबकारी विभाग ह सबो कलेक्टर मन ल आदेस के कड़ाई ले पालन सुनिश्चित कराय के निरदेस दीन हे।
निर्माण कार्य-गुणवत्ता
प्रदेस के आने-आने सासकीय निर्माण काम बर उपयोग म लाय जात जिनीस के गुणवत्ता के माॅनिटरिंग अब आम मनखे मन घलो असानी ले कर सकही। मुख्यमंत्री के पहल म सासकीय निर्माण काम के माॅनिटरिंग बर सामान्य प्रसासन विभाग के अंतर्गत मुख्य तकनीकी परीक्षक सतर्कता के मार्गदर्शन म हिन्दी भासा म सौ बिन्दु के चेकलिस्ट पुस्तिका प्रकासित करे गीस हे, जेमा रद्दा, भवन, नाली सहित आने-आने निर्माण काम के विवरण अउ जिनीस के गुणवत्ता जांच के जानकारी दे गीस हे।
जीएसटी-पंजीकृत व्यवसाय
छत्तीसगढ़ म काम करइया बाहरी एजेंसी अउ प्रदायक मन ल प्रदेस म जीएसटी पंजीकृत व्यवसायी मन ले ही जिनीस के खरीदी करना होही। मुख्यमंत्री भूपेश बघेल ह मुख्य सचिव ल एखर बारे म जारी करे गे निरदेस के पालन सुनिश्चित करे बर किहीन हे। राज्य सासन के जम्मों विभाग डहार ले खरीदी करे के जिनीस के दर सी.एस.आई.डी.सी. (ब्ैप्क्ब्) के माध्यम ले तय करे अउ प्रदेस म जीएसटी पंजीकृत प्रदायक मन ले खरीदी करना पहिली ले ही जरूरी करे जा चुके हे।
महिला आत्महत्या-जांच निर्देश
गृहमंत्री ताम्रध्वज साहू ह दुरूग जिला के भिलाई तीन थाना क्षेत्र म एक झिन माईलोगिन डहार ले पाछु दिन आत्महत्या करे जाय के मामला म निष्पक्ष जांच कराय के निरदेस दीन हे। ओमन ह ए मामला म दुरूग आईजी विवेकानंद सिन्हा ल निर्देसित करत किहीन कि जांच निष्पक्ष होना चाही अउ दोसी ल सजा मिलना चाही।
खबर के मुताबिक ए मामला म एक झिन महिला डीएसपी अनामिका जैन अउ ओखर सहेली के खिलाफ अपराध दर्ज करे गेहे।
संक्षिप्त समाचार
अउ अब थोरकुन समाचार सार म-
– मुख्यमंत्री भूपेश बघेल ह आज पाटन म नवीन आदर्श थाना भवन के लोकार्पण करीन। ए मउका म ओमन ह महिला रक्षा टीम बर सौ ठिन पेट्रोलिंग स्कूटी महिला पुलिस बल ल समर्पित करीन।
– महासमुंद जिला के प्रभारी मंत्री कवासी लखमा ह मनरेगा के अंतर्गत सिरपुर स्थित राम वनगमन पथ के तीर पीपल के पौधा लगाईन।
– धमतरी जिला म हरेली परब म आज गोधन न्याय योजना के सुरूवात करे के संगे पशु चिकित्सा विभाग डहार ले एक दर्जन जघा म निःशुल्क पशु चिकित्सा सिविर अउ कृषक संगोष्ठी के आयोजन करे गीस।
अउ
– बीजापुर जिला के पमुलवाया अउ चिलानर के जंगल ले पुलिस ह एक झिन माओवादी ल गिरफ्तार करे हे। ए माओवादी उपर दू ग्रामीण के हत्या करे के आरोप हे।