आज दिनभर के खबर ल अपन गुरतुर छत्तीसगढ़ी भाखा म पढ़व

स्वास्थ्य मंत्री-अपील

स्वास्थ्य मंत्री टी.एस. सिंहदेव ह लोगन मन ले मंकीपॉक्स, कोरोना संक्रमण अउ स्वाइन फ्लू के संगेसंग बरसा के मौसम म होवइया मौसमी बीमारी ले सतर्क रेहे के अपील करे हे। स्वास्थ्य विभाग डहार ले ए बारे म जम्मों मेडिकल कॉलेज अस्पताल, मुख्य चिकित्सा अउ स्वास्थ्य अधिकारी के संगेसंग सिविल सर्जन मन ल जरूरी दिसा-निरदेस जारी कर देहे।
स्वास्थ्य मंत्री ह बतईन कि प्रदेस म स्वाइन फ्लू के ग्यारह प्रकरण के पहिचान होय हे। स्वास्थ्य मंत्री ह प्रदेस के लोगन मन ले अपील करे हवय कि ओमन भीड़-भाड़ वाले जघा म मास्क के परयोग करय अउ संगेसंग कोरोना ले जुड़े नियम के पालन करय। ओमन किहीन कि स्वाइन फ्लू घलो कोरोना जइसने फेफड़ा ल प्रभावित करथे।
उहें, स्वास्थ्य मंत्री ह बतईन कि सुकमा जिला म किडनी रोग ले परभावित गांव के पानी के सुरूवाती जांच म आयरन अउ फ्लोराइड के अधिकता पाय गेहे। इहां के पानी ल जांच बर भेजे गेहे।

हर घर तिरंगा अभियान

आजादी के अमृत महोत्सव के तहत देस म तेरह ले पन्द्रह अगस्त तक हर घर तिरंगा अभियान चलाय जाही। मुख्यमंत्री ह प्रदेस के लोगन मन ले ग्यारह ले सत्रह अगस्त के बीच घर, दुकान या आने संस्थान मन म राष्ट्रीय झंडा फहरा के ‘‘हमर तिरंगा अभियान‘‘ ल सफल बनाय के अपील करे हे। संगेसंग ओमन स्वतंत्रता सप्ताह के दउरान बिसेस डीपी फ्रेम के परयोग अपन डीपी म लगाय के बिनती करे हे।
मुख्यमंत्री के हमर तिरंगा अभियान के बारे म करे गे अपील के थोरिक दे बादेच करीबन सात हजार ले जादा लोगन मन ह अपन-अपन सोशल मीडिया प्रोफाइल उपर तिरंगा के संग अपन फोटू ल अपलोड कर लेहे।
उहें, रईपुर कलेक्टर ह आज कलेक्ट्रेट परिसर म तिरंगा स्टॉल के सुभारंभ करीन। ए स्टॉल ले महिला समूह मन डहार ले बनाय गे तिरंगा ल बेचे बर रखे गेहे। अवइया दिन म सी-मार्ट के संगेसंग गांव के रासन दुकान मन म घलो तिरंगा बांटे जाही।
ऐति, प्रदेस म स्व-सहायता समूह के माईलोगिन मन ह राष्ट्रीय ध्वज बनाय के काम करत हे। एखर ले ओखर मनके इंनकम घलो बाढ़ गेहे।
उहें, कोरिया जिले के झुमका बोर्ड क्लब, झुमका आइलैंड अउ कोरियागढ़ पहाड़ उपर तीस मीटर ऊंचा तिरंगा फहराय जाही।

राजस्व मंत्री-अल्पवर्षा

प्रदेस के कोनों-कोनों तहसील मन म कमती बरसा होय के स्थिति म ए तहसील मन म राहत मैनुअल के मुताबिक कार्रवाई करे जाही। ए बारे म राजस्व मंत्री जयसिंह अग्रवाल ह जिला कलेक्टर मन ल चिट्ठी लिखके ओ तहसील के बारे म जानबा जुटाय बर केहे हे। जउन तहसील मन म सूखा जइसन स्थिति हे ओ जघा म फसल मनके नजरी आंकलन के रिपोर्ट तैयार करे जाही।

मतदाता सूची-पुनरीक्षण

छत्तीसगढ़ के मुख्य निर्वाचन पदाधिकारी पी. दयानंद ह निर्वाचन काम ले जुड़े अधिकारी मन ले केहे हे कि ओमन भारत निर्वाचन आयोग के निरदेस के मुताबिक निर्वाचन के काम ल पेपर लेस बनाय के दिसा म काम करय। ए बारे म छत्तीसगढ़ निर्वाचन पदाधिकारी कार्यालय डहार ले निर्वाचन ले जुड़े अधिकारी मन ल दू दिन के प्रसिक्षण दे गीस। प्रसिक्षण के दउरान निर्वाचक नामावली तैयार करय, आधार संकलन करे, नवा मतदाता मनके ईपिक कार्ड बनवाय, नाम कटवाय के संगेसंग आने जानकारी अधिकारी-करमचारी मन ल दे गीस।

आयकर छापा

आयकर विभाग के अलग-अलग टीम ह आज प्रदेस म स्टील अउ स्पंज आयरन के कारोबार ले जुड़े कारोबारी मनके घर अउ दफ्तर मन म छापा मार के कागजात के जांच करीन। जानबा के मुताबिक आयकर अधिकारी मन ह ए बेपारी मनके रईपुर, कोरबा अउ रायगढ़ जिला मन म स्थित आफिस अउ प्लांट म जाके दस्तावेज के जांच करीन। टीम डहार ले ए कारोबारी मन ले पूछताछ करे जात हे।

भाजपा-बैठक

भारतीय जनता पार्टी के नवा क्षेत्रीय संगठन महामंत्री अजय जामवाल ह काली रईपुर स्थित कुशाभाऊ ठाकरे परिसर म भाजपा कोरगु्रप के बइठका लीन। बइठका के दउरान ओमन अवइया विधानसभा चुनई ल लेके बड़का नेता मन ले गोठबात करीन। बइठका म प्रदेस अध्यक्ष विष्णुदेव साय, नेता प्रतिपक्ष धरमलाल कौशिक, विधायक बृजमोहन अग्रवाल के संगेसंग कोरगु्रप के आने सदस्य मन सामिल होईन।

रोलिंग मिल-ऊर्जा प्रभार

राज्य सासन ह प्रदेस के रोलिंग मिल मनके ऊर्जा प्रभार म नौ माह तक बर चौबीस प्रतिसत के बिसेस छूट देके फइसला लेहे। जारी आदेस के मुताबिक रोंलिंग मिल मन ल ए छूट एसो जुलाई ले अवइया साल के इकतीस मार्च तक के खपत करे गे बिजली के मात्रा उपर दे जाही। एखर ले छत्तीसगढ़ राज्य विद्युत वितरण कंपनी ल होवइया घाटा ल राज्य सरकार ह वहन करही।
जानबा के मुताबिक प्रदेस म एक सौ पचहत्तर रोंलिंग मिल हवय। त उहें, रईपुर म एक सौ पच्चीस ठिन मिल चलत हे।

कोरोना टीका

राष्ट्रव्यापी टीकाकरण अभियान के तहत अब तक देश म दू सौ चार करोड़ चौरासी लाख ले जादा कोविड टीका लगाय जा चुके हे। काली तेईस लाख उनचास हजार ले जादा टीका लगाय गीस।
ऐति, प्रदेस म काली कोरोना संक्रमण के पांच सौ पंचानवे नवा मामला आगू आय हे, जेला मिलाके प्रदेस म सक्रिय मरीज के संख्या तीन हजार तीन सौ सात होगे हे। रईपुर म काली सबले जादा एक सौ पैंतालीस मरीज मिलीस। ए बेरा प्रदेस के औसत पॉजीटिविटी दर पांच दशमलव एक-तीन प्रतिसत हे।

पार्किंग नियम-संशोधन

सहर के आबादी बढ़े के संगेसंग गाड़ी मनके संख्या बाढ़े अउ यातायात समस्या ल देखत राज्य सासन ह सहरी क्षेत्र मन म पार्किंग व्यवस्था ल ठीक-ठाक करे बर छत्तीसगढ़ अनाधिकृत विकास के नियमितिकरण अधिनियम म संशोधन करे हे। एखर मुताबिक अब पार्किंग बर चुने गे जघा म दूसर कामकाज नइ करे जा सकय। एखर अधिसूचना के प्रकाशन छत्तीसगढ़ राजपत्र म घलो करे गेहे।

छात्रावास-डायरिया

दुरूग जिला के भिलाई के स्मृति नगर स्थित कौशल विकास संस्थान के छात्रावास म उल्टी-दस्त ले एक झिन छात्रा के मउत होय के बाद जिला प्रसासन ह कॉलेज प्रबंधन ल दोसी मानत उंखर खिलाफ प्राथमिकी दर्ज करे हे। ए कॉलेज के पचपन झिन छात्र-छात्रा मन ह उल्टी-दस्त ले पीड़ित पाय गेहे, जिंखर इलाज प्राईवेट अस्पताल म चलत हे।
जानबा के मुताबिक कॉलेज प्रबंधन के शिकायत एहां के छात्र-छात्रा मन ह पहिली घलो करे रिहीन। फेर, कालेज प्रसासन ह इंखर मनके सिकायत उपर ध्यान नइ दीस।

अउ अब थोरकुन समाचार सार म-
– छत्तीसगढ़ राज्य हज कमेटी के चेयरमैन ह बतईन कि छत्तीसगढ़ ले मक्का-मदीना के हज यात्रा म गे तीन सौ उनयासी हाजी के दल ह आज छत्तीसगढ़ वापिस आ गे।

– राष्ट्रकवि मैथिलीशरण गुप्त के आज जयंती हरय। ए मउका म रईपुर नगर निगम कोति ले जल विहार कॉलोनी स्थित उंखर मूर्ति म फूलमाला चढ़ाके ओमन ल श्रद्धांजलि दे गीस।

– रईपुर संभाग के नवा संभाग आयुक्त यशवंत कुमार ह आज अपन पदभार संभालीन।

– संघ लोक सेवा आयोग डहार ले राखे गे केन्द्रीय सशस्त्र पुलिस बल म सहायक कमांडेंट पद बर सात अगस्त के भर्ती परीक्षा होही।

– कबीरधाम जिला के पंडरिया के दू ठिन नर्सिंग होम अउ एक ठिन लैब ल स्वास्थ्य विभाग ह नर्सिंग होम एक्ट के उल्लंघन करे के मामला म सील कर देहे।

– जांजगीर-चांपा जिला के बारगांव म गाज गिरे ले दू झिन माईलोगिन के मउत होगे।

– बिलासपुर जिला के गांव नेवरा के तीर कार के टक्कर ले फटफटी बइठे एक झिन माईलोगिन के संग दू झिन लोगन के मउत होगे।
अउ
– महासमुंद जिला के पुलिस ह बसना के तीर गांजा तस्करी के आरोप म चार झिन लोगन मन ल गिरफ्तार करे हे। उंखर मन तीर ले करीबन दस किलो गांजा जब्त करे गेहे। उहें, राजनांदगांव के खड़गांव पुलिस ह सोलह किलो गांजा के संग एक झिन मनखे ल गिरफ्तार करे हे।