आज दिनभर के खबर ल अपन गुरतुर छत्तीसगढ़ी भाखा म पढ़व

सूरजपुर-भूकंप

सरगुजा संभाग के सूरजपुर जिला म आज मंझनिया करीब बारह बजे भूंकप के झटका महसूस करे गीस। रिक्टर पैमाना म एखर तीव्रता चार दशमलव सात मापे गेहे। ए झटका सूरजपुर जिला ले पन्द्रह किलोमीटर दूरिहा महसूस करे गीस।  भूंकप ले कोनों नुकसान नइ होय हे, फेर, कोनों-कोनों दीवार मन म दरार पड़े के बात सुने म आवत हे। ए ह सामान्य श्रेणी के भूंकप हरय, जउन बड़े नुकसान पहुंचाय के क्षमता नइ राखय। सूरजपुर म भूंकप के झटका आय के बाद जिला प्रशासन ह स्कूल मन म छुट्टी घोसित कर दीस।
एखर पहिली, पाछु ग्यारह अउ उनतीस जुलाई के घलो सरगुजा संभाग के कोरिया अउ अंबिकापुर म भूंकप के झटका महसूस करे जा चुके हे।

हर घर तिरंगा अभियान

हर घर तिरंगा अभियान ल लेके प्रदेस म जोरदरहा तैयारी चलत हे। ए अभियान ल यादगार बनाय बर कबीरधाम के युवा पर्वतारोही अंकिता गुप्ता प्रदेस के जनता कोति ले पन्द्रह अगस्त के माउंट एल्बु्रस के चोटी म राष्ट्रीय ध्वज फहराही। ए संबंध म पर्वतारोही अंकिता गुप्ता ह काली रईपुर म मुख्यमंत्री भूपेश बघेल ले भेंट करीन अउ माउंट एल्ब्रुस के चोटी म तिरंगा फहराय के इच्छा जतईन। मुख्यमंत्री ह अंकिता ल तिरंगा देके ओमन ल अपन बधाई अउ सुभकामना दीन। अंकिता गुप्ता ह मुख्यमंत्री ल बतईन कि ओमन आठ अगस्त के माउंट एल्ब्रुस चोटी बर रवाना होही। ए चोटी के ऊंचाई अट्ठारह हजार पांच सौ दस फीट हवय।
ऐति, राजनांदगांव जिला म भारतीय जनता पार्टी के वरिष्ठ नेता लीलाराम भोजवानी ह कार्यकर्ता मनके बइठका लेके ग्यारह ले सत्रह अगस्त के बीच मनइया हर घर तिरंगा अभियान ल सफल बनाय के अपील करीन।
उहें, मुंगेली के जिला कलेक्ट्रेट म गांव तेली मोहतरा के गायत्री स्व-सहायता समूह के माईलोगिन मन ह बेचे बर तिरंगा झंडा के स्टॉल लगाय हे। समूह के माईलोगिन मन ह बतईन कि उंखर समूह ल दस हजार तिरंगा झंडा बनाय के ऑर्डर मिले हे।

स्वाइन फ्लू-चिकित्सा व्यवस्था

स्वास्थ्य मंत्री टी.एस. सिंहदेव के निरदेस के बाद प्रदेस के जम्मों अस्पताल म स्वाइन फ्लू के दवई अउ जरूरी उपकरण के व्यवस्था करे गेहे। ए बारे म स्वास्थ्य संचालक नीरज बंसोड़ ह जम्मों सरकारी मेडिकल कालेज के डीन, अस्पताल अधीक्षक, जिला के मुख्य चिकित्सा अउ स्वास्थ्य अधिकारी के संगेसंग सिविल सर्जन मन ल स्वाइन फ्लू ले बचाव, रोकथाम अउ इलाज बर दिसा-निरदेस जारी करे हे। संगेसंग अस्पताल प्रमुख मन ले केहे गेहे कि पीपीई किट अउ एन-95 मास्क रखयं। स्वाइन फ्लू के सैंपल के जांच बर प्रयोगसाला म व्यवस्था घलो करे गेहे।

वजन त्यौहार-जागरूकता रथ

लइका मन म कुपोषण के स्तर जांचे अउ सुपोषण के प्रति लोगन मन ल जागरूक करे बर प्रदेस के जम्मों आंगनबाड़ी केन्द्र मन म ए दिन वजन तिहार मनाय जावत हे। इही कड़ी म महिला अउ बाल विकास मंत्री अनिला भेंड़िया ह आज रईपुर स्थित अपन निवास कार्यालय ले अट्ठाईस रथ ल हरियर झंडा दिखाके रवाना करीस। ए जागरूकता रथ जम्मों जिला म ‘‘जम्मो लईका होही खुसहाल चलव मनाबो वजन तिहार‘ सूत्र वाक्य के संग छह बछर तक लइका मन ल आंगनबाड़ी लाके तउलाय बर कहि अउ पोसन के महत्व ल समझाही। श्रीमती भेंडिया ह लोगन मन ले अपील करे हे कि ओमन अपन छह बछर तक लइका मन ल आंगनबाड़ी लाके उंखर कुपोषण के स्तर के जांच करावय। ए अभियान तेरह अगस्त तक चलही।

गोधन न्याय योजना

मुख्यमंत्री भूपेश बघेल ह आज रईपुर म गोधन न्याय योजना के हितग्राही मन ल करीबन पांच करोड़ साठ लाख रूपिया के रासि के ऑनलाइन भुगतान करीन। ए रासि सोलह ले इकतीस जुलाई तक खरीदे गे गोबर के बदला, पशुपालक किसान, महिला स्व-सहायता समूह अउ गौठान समिति मन ल जारी करे गेहे। गोधन न्याय योजना म अब तक हितग्राही मन ल तीन सौ एक करोड़ बयालीस लाख रूपिया ले जादा रासि के भुगतान करे जा चुके हे।

राज्यपाल-मुख्य सचिव

राज्यपाल अनुसुईया उइके ह काली राजभवन म मुख्य सचिव अमिताभ जैन ले भेंट करीन। ए दउरान राज्यपाल ह श्री जैन ले राजभवन सचिवालय डहार ले राज्य सरकार ल भेजे प्रस्ताव मन म जल्दीच कार्यवाही करे बर किहीन। राज्यपाल ह श्री जैन ले महात्मा गांधी उद्यानिकी अउ वानिकी विश्वविद्यालय अउ इंदिरा      गांधी कृषि विश्वविद्यालय के बीच संपत्ति अउ करमचारी मनके अंतरण के          संबंध म घलो जानकारी लीन। राज्यपाल ह किहीन कि अनुसूचित क्षेत्र म गठित कुछेक नगर पंचायत मन ल फेर ले ग्राम पंचायत म बदले के प्रक्रिया लंबित हवय, एमा जल्दीच कार्यवाही करे जाय। संगेसंग राज्यपाल ह अग्निवीर योजना के तहत सेना म भर्ती बर राज्य म रैली के आयोजन के संबंध म घलो जानकारी लीन अउ किहीन कि इहां के युवा मन ल ए योजना के फायदा मिलना चाही।

महासमुंद नपा-अध्यक्ष

कांग्रेस समर्थित राशि त्रिभुवन महिलांग महासमुंद नगर पालिका के अध्यक्ष निर्वाचित होय हे। पाछु महिना चार जुलाई के लाय गे अश्विस प्रस्ताव के दउरान भारतीय जनता पार्टी समर्थित पूर्व अध्यक्ष प्रकाश चंद्राकर ल अध्यक्ष पद ले हटा दे गे रिहीस। आज होय चुनाव म राशि त्रिभुवन महिलांग ल तीस म ले उन्नीस मत मिले हे। उहें, प्रकाश चंद्राकर ल ग्यारह वोट मिलीस।

भाजपा-बैठक

भारतीय जनता पार्टी के नवनियुक्त क्षेत्रीय संगठन महामंत्री अजय जामवाल ह रईपुर स्थित कुशाभाऊ ठाकरे परिसर म पार्टी के सबो मोर्चा प्रभारी, अध्यक्ष अउ महामंत्री के बइठका लीन। बइठका म ओमन कार्यकर्ता मन ले पार्टी के संगठनात्मक गतिविधि उपर विचार-विमर्स करीन। ए मउका म भाजपा प्रदेस अध्यक्ष विष्णुदेव साय, प्रदेस संगठन महामंत्री पवन साय समेत पार्टी के पदाधिकारी अउ कार्यकर्ता मौजूद रिहीन।

हाथी-आतंक

राजनांदगांव जिला के तांडो-अड़ताल गांव म ए दिन हाथी मनके दल घूमत हे। हाथी मनके ए दल पाछु रतिहा गांव तांडो पहुंचीन अउ एक झिन गांव वाले के घर ल तोड़ दीस। हाथी मनके मौजूदगी ले गांव वाले मन डर्राय हे। वन विभाग ह प्रभावित गांव मन म मुनादी करा के गांव वाले मन ले हाथी ले सतर्क रेहे बर केहे हे। उहें, तांडो के गांव वाले मन ल अड़ताल के सामुदायिक भवन म रूकाय गेहे। वन अधिकारी मन ह गांव वाले मन ले केहे हे कि ओमन खेत म अकेल्ला झन काम करय।

जम्प रोप-प्रतियोगिता

कर्नाटक म उनतीस ले इकतीस जुलाई तक उन्नीसवां सब जूनियर अउ सीनियर फेडरेशन कप प्रतियोगिता के आयोजन करे गीस। ए प्रतियोगिता म छत्तीसगढ़ के छह सदस्यीय पुरूष टीम ह जम्प रोप म ग्यारह स्वर्ण अउ एक रजत जीते हे। ए पदक टीम इवेंट बर मिले हे। ओमन ल ए उपलब्धि म डबल डच वर्ल्ड रिकॉर्ड अउ लिम्का बुक ऑफ रिकॉर्ड के प्रमाण पत्र घलो मिले हे।
ए खिलाड़ी मन काली रईपुर म राज्य महिला आयोग के अध्यक्ष डॉक्टर किरणमयी नायक ले भेंट करीन अउ अपन उपलब्धि के बारे म बतईन। डॉक्टर नायक ह ए खिलाड़ी मन ल अपन सुभकामना दीन।

मुख्यमंत्री-वंशिका पांडे

छत्तीसगढ़ के राजनांदगांव के वंशिका पांडे के चुनई भारतीय थल सेना म लेफ्टिनेंट पद बर होय हे। वंशिका पांडे ह मुख्यमंत्री भूपेश बघेल ले रईपुर स्थित उंखर निवास कार्यालय म भेंट करीन। ए दउरान उंखर संग माता-पिता घलो मौजूद रिहीन। मुख्यमंत्री ह वंशिका ल उंखर ए उपलब्धि बर बधाई अउ सुभकामना दीन हे। ए मउका म मुख्यमंत्री ह लेफ्टिनेंट वंशिका पांडे ल राष्ट्रीय झंडा भेंट करीन। प्रदेस के महिला अउ बाल विकास मंत्री अनिला भेंडिया ह घलो वंशिका ल उंखर सफलता म अपन सुभकामना दीन हे।
खबर के मुताबिक ऑफिसर्स एकेडमी चेन्नई म ग्यारह महीना के प्रसिक्षण के बाद वंशिका पांडे ल लेफ्टिनेंट रैंक कमीशन मिले हे।

अउ अब पेस हे मौसम के हाल….

मौसम विभाग ह दक्षिण छत्तीसगढ़ म काली एक-दू जघा म गरज-चमक के संग जोरदरहा बरसा होय अउ गाज गिरे के चेतावनी देहे। मौसम विभाग के मुताबिक एक ठिन उपरी हवा के चक्रीय चक्रवाती घेरा पश्चिम मध्य बंगाल के खाड़ी अउ ओखर ले लगे तटीय आंध्रप्रदेश के उपर स्थित हवय। एखर असर ले काली प्रदेस म अधिकांश जघा म हल्का ले मध्यम बरसा होय या फेर गरज-चमक के संग सिटिर-साटर पानी गिरे के संभावना हे।

अउ अब थोरकुन समाचार सार म-
– राज्य सरकार ह सरगुजा संभाग के कमिश्नर गोविंद राम चुरेन्द्र ल हटाके उंखर जघा म बिलासपुर संभाग के कमिश्नर संजय अलंग ल सरगुजा कमिश्नर के उपरहा प्रभार दे गेहे।

– छत्तीसगढ़ लोक सेवा आयोग डहार ले भृत्य के इंक्यानवे पद म सीधी भर्ती बर विज्ञापन जारी करे गेहे। ए पद के पहिली चरण के लिखित परीक्षा पच्चीस सितंबर के आयोजित करे जाही।

– छत्तीसगढ़ लोक सेवा आयोग डहार ले आयोजित होम्योपैथिक चिकित्सा अधिकारी अउ दंत शल्य चिकित्सक परीक्षा के परिणाम घोसित कर दे गेहे।

अउ

– महासमुंद जिला के सिंघोड़ा पुलिस ह रईपुर के दू झिन लोगन ल दू सौ बावन किलोग्राम चांदी के संग गिरफ्तार करे हे। जब्त चांदी के कीमत करीबन डेढ़ करोड़ रूपिया बताय गेहे।