आज दिनभर के खबर ल अपन गुरतुर छत्तीसगढ़ी भाखा म पढ़व

हाईकोर्ट जज-नियुक्ति

छत्तीसगढ़ उच्च न्यायालय म दू झिन नवा जज मनके नियुक्ति के आदेस जारी कर दे गेहे। मिले जानकारी के अनुसार वरिष्ठ वकील राकेश मोहन पांडेय अउ न्यायिक अधिकारी राधाकिशन अग्रवाल के नाम म सर्वोच्च न्यायालय के कॉलेजियम ह अपन सहमति जताय हे। बीते चौदह जुलाई के सर्वोच्च न्यायालय के कॉलेजियम के बइठका होय रिहीस, जेमा दूनों नाम के अनुसंसा केन्द्र सरकार ल भेजे गे रिहीस। सरकार के मंजूरी मिले के बाद विधि विभाग ह आदेश जारी कर दे हे। छत्तीसगढ़ उच्च न्यायालय म ए दूनों जज मनके नियुक्ति के बाद जज मनके संख्या बढ़के चौदह होगे हे।
गौरतलब हे कि अधिवक्ता राकेश मोहन पांडेय छत्तीसगढ़ उच्च न्यायालय अधिवक्ता संघ के सचिव रेहे हे। उहें, राधाकिशन अग्रवाल ह वर्तमान म बिलासपुर के जिला अउ सत्र न्यायाधीश हे।

प्रधानमंत्री-विद्युत मंत्रालय
प्रधानमंत्री नरेन्द्र मोदी ह विद्युत मंत्रालय के प्रमुख कार्यक्रम पुनर्विकसित वितरण क्षेत्र योजना के आज सुभारंभ करीन। एखर उद्देश्य वितरण कंपनी-डिस्कॉम अउ बिजली विभाग मनके परिचालन क्षमता अउ वित्तीय स्थिरता म सुधार लाना आय। प्रधानमंत्री ह किहीन कि ए योजना के उद्देश्य बिजली वितरण के बुनियादी ढांचा के आधुनिकीकरण अउ सुदृढ़ीकरण बर डिस्कॉम कंपनी मन ल वित्तीय सहायता प्रदान करना आय, ताकि उपभोक्ता मन बर आपूर्ति के विश्वसनीयता अउ गुणवत्ता म सुधार हो सकय।
श्री मोदी ह कार्यक्रम के दौरान वीडियो कान्फ्रेंसिंग के माध्यम ले ‘‘उज्जवल भारत-उज्जवल भविष्य- पावर एट द रेट दू हजार सैंतालीस‘‘ योजना के उद्घाटन घलो करीन। छह दिवसीय ये कार्यक्रम आजादी के अमृत महोत्सव के तहत आयोजित करे गीस, जेखर आज समापन होगे। एमा विद्युत क्षेत्र के पाछु आठ बछर के उपलब्धि मन ल दर्शाय गीस।
प्रधानमंत्री ह किहीन कि पाछु आठ बछर के दौरान बिजली क्षेत्र म पारदर्शिता आय हे। ओमन किहीन कि देश म भरपूर मात्रा म बिजली के उत्पादन होवत हे अउ निर्यात घलो करे जात हे।
ऐति, छत्तीसगढ़ के मुख्यमंत्री भूपेश बघेल ह ‘‘उज्जवल भारत-उज्जवल भविष्य- पावर एट द रेट-दू हजार सैंतालीस‘‘ के समापन कार्यक्रम म वर्चुअल रूप ले सामिल होईन। इही बीच, मुंगेली अउ बलौदाबाजार-भाटापारा सहित राज्य के दूसर जिला मन म आज बिजली महोत्सव के आयोजन करे गीस। ये दौरान आने वाला साल म बिजली के क्षेत्र म नवा कीर्तिमान स्थापित करे बात केहे गीस।

दीक्षांत समारोह

हिदायतुल्लाह राष्ट्रीय विधि विश्वविद्यालय के पांचवां दीक्षांत समारोह काली रायपुर म आयोजित करे जाही। ए समारोह के मुख्य अतिथि उच्च न्यायालय के मुख्य न्यायाधीश न्यायमूर्ति एन.वी. रमना होही। समारोह के                  अध्यक्षता मुख्यमंत्री भूपेश बघेल करही। एखर अलावा आंध्रप्रदेश उच्च न्यायालय के मुख्य न्यायाधीश प्रशांत मिश्रा के संगेसंग दूसर राज्य मनके उच्च न्यायालय मनके मुख्य न्यायाधीश मन समारोह म सामिल होही।
भारत के मुख्य न्यायाधीश काली बिहनिया दिल्ली ले रवाना होके रायपुर विमानतल पहुंचही। दीक्षांत समारोह म सामिल होय के बाद ओमन विमान ले मंझनिया विशाखापट्टनम बर रवाना होही।
गौरतलब हे कि दीक्षांत समारोह म बी.ए. एल.एल.बी. के तीन सौ सात, एल.एल.एम. के एक सौ दस अउ पीएचडी के चार विद्यार्थी मन ल डिग्री दे जाही। उहें, तेईस झिन विद्यार्थी मन ल आने-आने संस्था अउ मनखे मनके नाम ले गोल्ड मेडल दे जाही।

मन की बात

प्रधानमंत्री नरेन्द्र मोदी आकाशवाणी ले मन की बात कार्यक्रम म काली बिहनिया ग्यारह बजे देश-विदेश के लोगन मन संग अपन विचार साझा करही। ये कार्यक्रम ल आकाशवाणी अउ दूरदर्शन के सब्बो नेटवर्क, आकाशवाणी समाचार वेबसाइट अउ न्यूज ऑन एआईआर मोबाइल ऐप म घलो प्रसारित करे जाही। आकाशवाणी समाचार, डी.डी. न्यूज, प्रधानमंत्री कार्यालय, सूचना अउ प्रसारण मंत्रालय के यू-ट्यूब चैनल म एखर सीधा प्रसारण होही। आकाशवाणी ह हिन्दी प्रसारण के तुरंत बाद क्षेत्रीय भासा मन म ये कार्यक्रम के प्रसारण करही।

महासमुंद-मेडिकल कॉलेज

महासमुंद चिकित्सा महाविद्यालय ल शैक्षणिक सत्र दू हजार बाईस-तेईस बर सौ सीट के मान्यता मिल गेहे। ये संबंध म राष्ट्रीय चिकित्सा आयोग ह मान्यता प्रमाण पत्र जारी कर देहे। गौरतलब हे कि प्रदेश म शासकीय चिकित्सा महाविद्यालय मनके संख्या बाढ़े ले मेडिकल के शिक्षा के संगेसंग मरीज मन ल चिकित्सा सुविधा के लाभ घलो मिलही।

जिले की चिट्ठी

आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम ह आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संघरा रिले करही। ए हफ्ता के अंक म ‘‘महासमुंद‘‘ जिला के          गतिविधि मनके बारे म जानकारी दे जाही।

पदस्थापना

राज्य सरकार के भारतीय पुलिस सेवा के चार अधिकारी मनके नवा पद स्थापना करे हे। जारी आदेश के अनुसार बद्रीनारायण मीणा ल दुर्ग के संगेसंग रायपुर रेंज के पुलिस महानिरीक्षक के जिम्मेदारी दे गेहे। उहें, ओ.पी. पाल ल नक्सल ऑपरेशन अउ एस.आई.बी. के पुलिस महानिरीक्षक के पद म पदस्थ करे गेहे। रामगोपाल गर्ग ल राजनांदगांव रेंज के उप पुलिस महानिरीक्षक अउ के.एल. धु्रव ल उप पुलिस महानिरीक्षक के पद म धमतरी, महासमुंद अउ गरियाबंद जिला के माओवाद विरोधी अभियान के पर्यवेक्षण के काम सौंपे गेहे।

बीएसपी-मतदान

भिलाई इस्पात संयंत्र म यूनियन के मान्यता बर आज मतदान संपन्न होगे। तेरह हजार ले ज्यादा मतदाता मन आज पांच ठन यूनियन बर अपन मताधिकार के प्रयोग करीन। बिहनिया ले ही मतदान बर कर्मचारी मन म उत्साह देखे गीस। ये दौरान सबो पोलिंग बूथ मन म मतदाता मनके भीड़ नजर अईस। वोट के गिनती रात आठ बजे ले संयंत्र के एच.आर.डी.सी. भवन म करे जाही।

बातों-बातों-में

प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत कोविड ले बचाव बर निःशुल्क प्रिकॉशन डोज ले संबंधित पचहत्तर दिन के विशेष अभियान म राज्य टीकाकरण अधिकारी डॉक्टर वी.आर. भगत से लेगे भेंटवार्ता के प्रसारण करे जाही।
एखर प्रसारण आकाशवाणी के रायपुर केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र रिले करही।

बच्चे-मौत

कोंडागांव जिला म दडिया गांव के स्टापडेम म नहाय के दौरान चार झिन लइका मन डूब गे, जेमा ले दू झिन लइका के सव बरामद कर ले गेहे। उहें, दू झिन लइका के तलास जारी हे। मिले जानकारी के अनुसार नौ झिन दोस्त परीक्षा के बाद स्टापडेम म पिकनिक मनाय बर गे रिहीन।
ऐति, जांजगीर-चांपा जिला के नवागढ़ क्षेत्र म कटौद गांव के कंजी नाला म बोहाय ले एक झिन लइका के सव बीस घंटा बाद बरामद कर ले गेहे।

अउ अब थोरकुन समाचार सार म-

– बीजापुर जिला म सुरक्षा बल ह विस्फोटक बरामद करे हे, जेला बम        निरोधक दस्ता के टीम ह मउका म ही निष्क्रिय कर देहे।

– राजनांदगांव जिला म आकाशीय बिजली गिरे ले एक झिन महिला सहित दू लोगन मनके मउत होगे। उहें, एक झिन झुलस गे।

– गरियाबंद जिला के सुपेबेड़ा म किडनी के बीमारी ले पीड़ित एक झिन महिला के इलाज के दौरान मउत होगे।

– बीजापुर जिला के भैरमगढ़ विकासखंड म तमोड़ी बालक आश्रम के एक झिन छात्र के इलाज के दौरान मउत होगे। बताय जात हे कि ये छात्र ह मलेरिया ले पीड़ित रिहीस। उहें, तीन झिन दूसर छात्र मन ल घलो मलेरिया ले पीड़ित बताय जात हे।
अउ

– महासमुंद जिला के साइबर अउ कोमाखान पुलिस ह संयुक्त रूप ले कार्रवाई करत नसीला टेबलेट के तस्करी करइया अंतर्राज्यीय गिरोह के एक झिन आरोपी ल गिरफ्तार करे हे। एखर करा ले इकचालीस हजार दू सौ सत्तर नग टेबलेट अउ आठ सौ नग सिरप जब्त करे गेहे।