द्रौपदी मुर्मू-शपथ ग्रहण
नवनिर्वाचित राष्ट्रपति द्रौपदी मुर्मू ल काली बिहनिया सवा दस बजे संसद के केन्द्रीय कक्ष म भारत के पन्द्रहवां राष्ट्रपति पद के सपथ दिलाय जाही। राष्ट्रपति रामनाथ कोविंद अउ नवनिर्वाचित राष्ट्रपति द्रौपदी मुर्मू ह पारपंरिक ढंग ले समारोह बर केन्द्रीय कक्ष पहुंचही। प्रधान न्यायाधीश एन.वी. रमण ह श्रीमती मुर्मू ल सपथ दिलाही।
ए बेरा म उप राष्ट्रपति एम. वेंकैया नायडु, प्रधानमंत्री नरेन्द्र मोदी, लोकसभा अध्यक्ष ओम बिरला अउ आने-आने केन्द्रीय मंत्री मनके संगेसंग अलग-अलग राज्य के राज्यपाल, मुख्यमंत्री, संसद सदस्य, सैन्य अउ आने अधिकारी मौजूद रइही।
तिरंगा-संशोधन
केन्द्र सरकार ह भारतीय ध्वज संहिता म संसोधन करत खुला अउ निजी मकान के संग अन्य भवन म दिन-रात तिरंगा फहराय के अनुमति दे देहे। एखर पहिली, ध्वज ल खुला म सूरूज उगे ले, सूरूज के डूबे तक फहराय के ही अनुमति रिहीस। अब कोई भी भारतीय नागरिक, निजी अउ शैक्षणिक संस्था म जम्मों दिवस अउ अवसर म राष्ट्रीय ध्वज के गौरव अउ सम्मान के अनुरूप तिरंगा फहरा सकत हे।
प्रधानमंत्री नरेन्द्र मोदी ह लोगन मन ले तेरह ले पन्द्रह अगस्त तक अपन-अपन घर म तिरंगा फहराय के आह्वान करे हे। श्री मोदी ह किहीन कि भारत ह ए साल आजादी के अमृत महोत्सव मनावत हे, एखरे सेती ‘‘हर घर तिरंगा अभियान‘‘ ले राष्ट्रीय ध्वज के संग हमर जुड़ाव अउ गहरा होही।
कर्मचारी-हड़ताल
छत्तीसगढ़ कर्मचारी-अधिकारी फेडरेशन के बैनर तले काली ले पांच दिन तक सरकारी कर्मचारी हड़ताल म रइही। ए दउरान सरकारी कार्यालय म कोनों कामकाज नइ होवय। उहें, स्कूल घलो नइ खुलय। ए करमचारी मन केन्द्र सरकार के कर्मचारी के समान चौंतीस प्रतिशत महंगाई अउ गृह भाड़ा भत्ता के मांग करत हे। ए हड़ताल म अस्सी ले जादा कर्मचारी संगठन के सामिल होय के संभावना हे।
छत्तीसगढ़ कर्मचारी-अधिकारी फेडरेशन के संयोजक कमल वर्मा ह बतईन कि फेडरेशन के बैनर तले जम्मों कर्मचारी संगठन एकजुट हवय। जम्मों कर्मचारी मन अपन-अपन कार्यालय अउ विभाग प्रमुख ल अवकास के सूचना दे देहे। अपन मांग के समर्थन म जम्मों झन एकजुट होके प्रदर्सन करही। ओमन बतईन कि मंत्रालय म राजपत्रित अधिकारी ले लेके चतुर्थ श्रेणी के कर्मचारी घलो हड़ताल म सामिल होही। ओमन बतईन कि ए आंदोलन म शिक्षक संगठन घलो सामिल होही, जेखर कारण स्कूल म पढ़ई के संगेसंग खेलकूद अउ मध्यान्ह भोजन घलो प्रभावित होही। ए बेरा स्वामी विवेकानंद तकनीकी विश्वविद्यालय डहार ले आयोजित होवइया जम्मों परीक्षा ल स्थगित कर दे गेहे।
अमृत महोत्सव-रेलवे
आजादी के अमृत महोत्सव के तहत ‘‘आजादी की रेलगाड़ी और स्टेशनों‘‘ कार्यक्रम के आज समापन होईस। समापन समारोह म केन्द्रीय संसदीय कार्य मंत्री प्रहलाद जोशी, रेल, कोयला अउ खान राज्यमंत्री राव साहेब पाटिल दानवे, कपड़ा राज्यमंत्री दरसाना जरदोश अउ सामाजिक न्याय अधिकारिता राज्यमंत्री सामिल होईन। समारोह म रेलवे बोर्ड के अध्यक्ष अउ मुख्य कार्यकारी अधिकारी वी.के. त्रिपाठी घलो उपस्थित रिहीन।
ए समारोह म दक्षिण पूर्व मध्य रेलवे के महाप्रबंधक आलोक कुमार अउ अपर महाप्रबंधक सहित बिलासपुर, रायपुर अउ नागपुर मंडल के अधिकारी वीडियो कान्फ्रेंसिंग के माध्यम ले सामिल होईन। ए मउका म संसदीय कार्यमंत्री प्रहलाद जोशी ह किहीन कि भारतीय रेलवे ह पाछु सप्ताह आने-आने स्थान म स्वतंत्रता सेनानी मनके सम्मान करके उत्कृष्ट कार्य करे हे। एखर बर भारतीय रेलवे ह बधाई के पात्र हे। स्वतंत्रता सेनानी मनके अनुभव ले युवा पीढ़ी म देशभक्ति के भावना जागृह होही। कारीकरम म वीडियो कान्फ्रेंसिंग के माध्यम ले स्वतंत्रता सेनानी अउ उंखर परिवार के सदस्य मन घलो सामिल होईस।
ऐति, दक्षिण पूर्व मध्य रेलवे म घलो आने-आने कारीकरम के आयोजन करे जावत हे। इही कड़ी म आज बिलासपुर म वृक्षारोपण कारीकरम करे गीस। एखर सुभारंभ महाप्रबंधक आलोक कुमार अउ सेक्रो के अध्यक्ष डॉक्टर वनीता जैन ह करीन। ए बेरा कई फलदार अउ छायादार पौधा लगाय गीस।
बारिश
प्रदेस म पाछु चौबीस घंटा के दौरान रूक-रूक के होवत बारिस ले जन-जीवन अस्त-व्यस्त होगे हे। उहें, बस्तर संभाग म लगातार बारिस ले कई नदी-नरवा उफान म हे।
सुकमा जिला म गोदावरी नदी के जलस्तर फेर बाढ़े ल लाग गेहे। जगरगुंडा रद्दा म नरवा के उपर ले पानी बोहावत हे। कलेक्टर हरीश एस. ह जिला अधिकारी मन ल आवश्यक दिसा-निरदेस जारी करके बाढ़ जइसे हालात ल ध्यान देवत जरूरी सुविधा पहुंचाय के निरदेस देहे।
ऐति, बीजापुर जिला म घलो बाढ़ जइसन स्थिति बने हे। तोयनार-तेलमपारा म बिजली खंभा ल सहारा बना के नरवा पार करे के दौरान पांव फिसले ले एक झिन छह साल के लइका के मउत होगे।
इही बीच, मौसम विभाग ह काली प्रदेस म हल्का ले मध्यम बरसा होय या गरज-चमक के संग छींटा पड़े के संगेसंग एक-दू जघा म भारी बरसा होय के चेतावनी देहे।
डाक-सम्मान
डाकघर स्पीड पोस्ट सेवा म छत्तीसगढ़ परिमंडल ल देस म पहला स्थान मिले हे। ए उपलब्धि बर रायपुर संभाग के सहायक अधीक्षक सौरभ श्रीवास्तव ह जम्मों अधिकारी अउ कर्मचारी मन बधाई दीन हे। काली रायपुर म आयोजित एक ठिन कारीकरम म रायपुर संभाग म पाछु वित्तीय बछर म उत्कृष्ट सेवा देवइया एक सौ दस कर्मचारी अउ अभिकर्ता मन ल पुरस्कृत करे गीस। एखर अलावा सुकन्या समृद्धि खाता खोले म बिसेस सहयोग देवइया रायपुर के पार्षद सुशीला धीवर अउ महिला एवं बाल विकास विभाग के सुपरवाइजर बीना कोशी, शैल नाविक, प्रतिभा गजभिये, रीता चौधरी अउ पंखुरी मिश्रा ल सम्मानित करे गीस।
हाथी-हमला
रायगढ़ जिला के घरघोड़ा वन परिक्षेत्र के ग्राम बटुराकछार म आज हाथी के हमला म एक झिन माईलोगिन के मउत होगे। वन अमला ह एखर सूचना हाथी सहायता केन्द्र रायगढ़ ल दे देहे।
उहें, इही जिला के धरमजयगढ़ वनमंडल क्षेत्र के अंतर्गत लैलूंगा वन परिक्षेत्र के भकुर्रा के जंगल म छह हाथी के दल घूमत हे। वन विभाग ह ग्रामीण मन ल जंगल डहार जाय बर मना करे हे।
माओवादी समाचार
सुकमा जिला के गोगुंडा पहाड़ी म दू दिन पहिली सुरक्षा बल अउ माओवादी मनके बीच होय मुठभेड़ म मारे गे माओवादी के पहिचान कर ले गेहे। पुलिस अधीक्षक सुनील शर्मा ह बतईन कि मृत माओवादी मड़कम हांदा केरलापाल एरिया कमेटी के सदस्य रिहीस अउ ओ ह कतकोन बड़े घटना म सामिल रिहीस। एखर उपर दू लाख रूपिया के इनाम घलो घोसित रिहीस। ओमन बतईन कि मुठभेड़ म दू अउ माओवादी मनके घायल होय के खबर हे, जिंखर तलाश करे जावत हे।
कोरोना समाचार
प्रदेस म कोरोना संक्रमण के मामला लगातार बाढ़त हे। काली प्रदेस म कोरोना संक्रमण के पांच सौ ग्यारह नवा मामला आगू आय हे। रईपुर जिला म सबले जादा उनयासी अउ दुरूग जिला म तिहत्तर मरीज मिले हे। एखरे संगेसंग राज्य म कोरोना के सक्रिय मरीज मनके संख्या बढ़के तीन हजार आठ सौ तीस होगे हे।
इही बीच, प्रदेस म कोरोना टीकाकरण अभियान जोरदरहा ढंग ले चलत हे। अब तक प्रदेस म 4 करोड़ 39 लाख इक्यास हजार ले जादा कोविडरोधी टीका लगाय जा चुके हे।
अउ अब थोरकुन समाचार सार म-
– रईपुर नगर निगम ह डेंगू अउ मलेरिया जइसे जलजनित बीमारी ले निपटे बर तैयारी सुरू करे देहे। एखर बर निगम के स्वास्थ्य अधिकारी समेत ग्यारह अधिकारी के मोबाइल नंबर सार्वजनिक करे गेहे।
– प्रयास आवासीय विद्यालय के कक्षा दसवीं म प्रवेस बर अवइया सत्ताईस जुलाई तक आवेदन मंगाय गेहे। एखर बर इकतीस जुलाई के जगदलपुर म चयन परीक्षा आयोजित करे जाही।
अउ
– इंदिरा गांधी कृषि विश्वविद्यालय के अंतर्गत शासकीय अउ निजी महाविद्यालय म संचालित बी.टेक. कृषि अभियांत्रिकी, बी.टेक. खाद्य प्रौद्योगिकी अउ फूड टेक्नोलॉजी म प्रवेस बर ऑनलाइन काउंसिलिंग प्रक्रिया काली ले सुरू होही।