द्रौपदी मुर्मू देस के पन्द्रहवां राष्ट्रपति होही। राष्ट्रपति चुनाव के निर्वाचन अधिकारी अउ राज्यसभा महासचिव पी.सी. मोदी ह काली संझा मतगणना पूरा होय के बाद श्रीमती मुर्मू के नाव के घोसना करीन। राष्ट्रपति चुनाव म द्रौपदी मुर्मू ल चौसठ प्रतिसत अउ विपक्ष के उम्मीदवार यशवंत सिन्हा ल छत्तीस प्रतिशत वोट मिलीस। प्रधान न्यायाधीश न्यायमूर्ति एन.वी. रमना पच्चीस जुलाई के संसद के केन्द्रीय कक्ष म ओमन ल राष्ट्रपति पद के सपथ दिलाही। द्रौपदी मुर्मू राष्ट्रपति पद म आसीन होवइया पहिली जनजातीय महिला हरय।
उहें, छत्तीसगढ़ के मुख्यमंत्री भूपेश बघेल ह द्रौपदी मूर्मू ल राष्ट्रपति निर्वाचित होय म छत्तीसगढ़ के जनता डहार ले बधाई अउ सुभकामना दीन हे। मुख्यमंत्री ह ट्वीट के माध्यम ले श्रीमती मुर्मू ल बधाई देवत किहीन कि भारतीय गणराज्य के संवैधानिक संरक्षक के रूप म देस के नागरिक मनके लोकतांत्रिक मूल्य के रक्षा के गौरवसाली इतिहास आप मनके हाथ म सुरक्षित रइही।
द्रौपदी मुर्मू के राष्ट्रपति चुने जाय म छत्तीसगढ़ म जश्न के माहौल हे। रायपुर, जशपुर, नारायणपुर, बस्तर अउ बिलासपुर समेत प्रदेश के कई जगा मन म लोगन मन ढोल-नगाड़ा के संग रैली निकालिन।
द्रौपदी मुर्मू राष्ट्रपति 02
ओति भाजपा के प्रदेश अध्यक्ष विष्णुदेव साय ह घलो श्रीमती मुर्मू ल राष्ट्रपति चुने जाय म बधाई अउ शुभकामना दीन हे। संगरा ओमन राष्ट्रपति चुनाव के जम्मों मतदाता मनके प्रति आभार जताइन हे । ओमन कीहिन कि देश म पहिली घांव आदिवासी समाज के महिला ल संवैधानिक प्रमुख चुने गेहे।
उंहें भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह ह कीहिन कि भारत ह विश्व के पूरा आदिवासी बिरादरी ल संदेस देहे कि भारत के राजनीतिक नेतृत्व सबके साथ सबके विकास अउ सबके विश्वास के उद्देश्य म चलथे।
प्रधानमंत्री-हर-घर तिरंगा अभियान
प्रधानमंत्री नरेन्द्र मोदी ह हर घर तिरंगा अभियान सशक्त करे के आह्वान करीन हे। ए साल देश आजादी के अमृत महोत्सव मनावत हे। ट्वीट म श्री मोदी ह लोगन मनले तेरा ले पंद्रह अगस्त तक अपन घर म राष्ट्रीय तिरंगा फहराय के अपील करीन हे। प्रधानमंत्री ह कीहिन कि आजे के दिन यानि बाईस जुलाई के हमर इतिहास म विशेष स्थान हरय। बछर 1947 के आजे के दिन राष्ट्रीय ध्वज तिरंगा अपनाय गे रीहिस।
उंहें सूचना अउ प्रसारण मंत्री अनुराग ठाकुर ह घलो जम्मों देशवासी मनले हर घर तिरंगा अभियान म शामिल होय के आग्रह करीन हे। एक ट्वीट म श्री ठाकुर ह कीहिन कि साहस, शांति अउ सच्चाई के प्रति तिरंगा हर भारतीय के गौरव हे।
विधानसभा समाचार
छत्तीसगढ़ विधानसभा के मानसून सत्र के तीसरा दिन आज सदन म भिलाई ईस्पात संयंत्र म लगातार होवत दुर्घटना के मुद्दा गूंजीस। प्रश्नकाल म कांग्रेस विधायक देवेन्द्र यादव ह बीएसपी संयंत्र म होय घटना के मामला उठाइन। एखर जवाब म मंत्री डहरिया ह कीहिन कि ए संयंत्र म दुर्घटना के सेती पाछू तीन साल म पंद्रह मनखे मनके मउत होय हे, जबकि नौ झिन घायल होइन हे।
मंत्री ह मानीन कि बीएसपी डहार ले दुर्घटना वाला क्षेत्र म सुरक्षा जांच के बिना काम करवाय गीस, जबकि सुरक्षा के दायित्व संयंत्र के हरय। ओमन बताइन कि श्रम अधिनियम म श्रमिक के मउत उपर ओमन के परिजन ल अनुकंपा नियुक्ति के प्रावधान नइ हे, फेर श्रम विभाग मानवीय आधार म अनुकंपा नियुक्ति दिलाये के प्रयास करथे। ए दउरान मृत चार श्रमिक के परिजन मन ल नियुक्ति दे गेहे। मंत्री के जवाब ले विधायक देवेंद्र यादव ह असंतुष्टि जताइन ।
सदन म आज नेता प्रतिपक्ष धरमलाल कौशिक ह ध्यानाकर्षण सूचना के जरिया बिलासपुर मंडल म कैम्पा के माध्यम ले करे गे काम म भ्रष्टाचार के आरोप लगाइन। अपन जवाब म वनमंत्री मोहम्मद अकबर ह कीहिन कि कोटा उप वन मंडलाधिकारी के जांच प्रतिवेदन म अनियमितता दिखाइ देवत हे। एखर उच्च अधिकारी मन डहार ले परीक्षण करे जात हे। अंतिम जांच प्रतिवेदन मिले के बाद दोषी मनके खिलाफ कार्रवाई करे जाही।
विधानसभा म आज विधायक मनके वेतन वृद्धि बर पेश करे गे विधेयक पारित कर दे गेहे। विधायक मन ल अब हर महीना एक लाख साठ हजार रूपिया वेतन मिलही। एखरे संग विधायक मनके चिकित्सा अउ टेलिफोन भत्ता म पांच-पांच हजार रूपिया बढ़ाय गेहे। निर्वाचन भत्ता म घलो पच्चीस-पच्चीस हजार रूपिया बढ़ाय गेहे।
गंगरेल बांध पानी
मुख्यमंत्री भूपेश बघेल ह कृषि अउ जल संसाधन मंत्री रविंद्र चौबे के अनुशंसा सहित अभनपुर अउ धरसींवा के विधायक समेत किसान संगठन के मांग ल देखत गंगरेल बांध ले सिंचाई बर तुरते पानी छोड़े के निर्देश दीन हे।
प्रमुख अभियंता इंद्रजीत उइके ह बताइन कि गंगरेल बांध म पर्याप्त पानी हे। गंगरेल बांध के नहर ले रायपुर, आरंग, धरसींवा, बलौदाबाजार, भाटापारा, लवन पलारी अउ धमतरी क्षेत्र के किसान मन ल खरीफ फसल के सिंचाई बर पानी मिलही।
सीबीसएसई परिणाम
केंद्रीय माध्यमिक शिक्षा बोर्ड – सीबीएसई ह आज दसवीं अउ बारहवीं कक्षा के परिणाम घोषित कर देहे। बारहवीं कक्षा म पास होवइया विद्यार्थी मनके प्रतिशत बयानबे दशमलव सात-एक हे। उंहें दसवीं कक्षा म चौरानबे दशमलव चार प्रतिशत विद्यार्थी मन पास होय हे।
किसान शिकायत निवारण पोर्टल
केंद्र सरकार डहार ले प्रधानमंत्री फसल बीमा योजना अउ मौसम आधारित फसल बीमा के संबंध म किसान मनके शिकायत के ऑनलाईन सुनवाई अउ निदान बर किसान शिकायत निवारण पोर्टल एफजीआर तियार करे गेहे। ए पोर्टल ल पायलट प्रोजेक्ट के रूप म काली छत्तीसगढ़ म लांच करे गीस।
शिकायत मनके निदान म ए पोर्टल के उपयोगिता अउ मूल्यांकन के बाद देश के जम्मों राज्य मन म एला लागू करे जाही। ए पोर्टल के शुरू होय ले किसान मनल अब फसल बीमा संबंधी शिकायत के निराकरण बर कोनो कार्यालय के चक्कर लगाय के जरूरत नइ होही। न ही लिखित म आवेदन देना होही। किसान टोल फ्री नंबर एक चार चार चार सात म कॉल करके अपन शिकायत दर्ज करा सकत हे।
राज्यपाल मुख्यमंत्री पत्र
जांजगीर चांपा जिला म पाछू दिन एक महिला के संग होय दुष्कर्म अउ ओखर हत्या के मामला के तुरते अउ निष्पक्ष जांच करके पीड़िता ल न्याय दिलाये बर राज्यपाल अनुसुइया उइके हे मुख्यमंत्री भूपेश बघेल ल पत्र लिखिन हे। राज्यपाल ह घटना के संवेदनशीलता ल देखत मामला के तुरते सुनवाई बर फास्ट ट्रैक कोर्ट के बेवस्था करे बर कीहिन हे। राज्यपाल ह ए घटना म चिंता जतावत राज्य म कानून व्यवस्था ल मजबूत करे बर कीहिन हे, जेखर ले हर क्षेत्र म महिला सुरक्षित हो अउ अइसने घटना दुबारा न हो सकय।
क्षेत्रीय परिवहन सुविधा केंद्र
राज्य म एक हजार क्षेत्रीय परिवहन सुविधा केंद्र खोले जाही। एखर तहत रायपुर म चालीस केंद्र खोले जाय के योजना हरय। जेमा ले दस ले जादा जगा मन म एखर शुरूआत हो चुके हे। परिवहन विभाग के अंतर्गत शुरू होवत क्षेत्रीय परिवहन सुविधा केंद्र ले प्रदेश के लोगन मन ल ड्राइविंग लाइसेंस बनवाय या दूसर परिवहन संबंधी काम बर अब आरटीओ कार्यालय के चक्कर लगाय के जरूरत नइ होही। ए केंद्र के खुले ले लोगन मन ल घरे के नजदीक परिवहन ले जुड़े सुविधा मिलही।
माओवादी ग्रामीण हत्या
सुकमा जिला के पोलमपल्ली म माओवादी मन एक ग्रामीण के हत्या कर देहे। जिला के पुलिस अधीक्षक सुनील शर्मा ह घटना के पुष्टि करत बताइन कि किराना दुकान चलइया मड़कम जोगा के घर पाछू रतिहा माओवादी मन घुसगे अउ लाठी अउ धारदार हथियार ले ओखर हत्या कर दीन। हत्या के बाद माओवादी मन मृतक के वाहन म आगी लगा दीन। माओवादी मनके कोंटा एरिया कमेटी ह ए घटना के जिम्मेदारी लेवत ओमन के घर पर्चा घलो फेंकीन।
रेलवे वृक्षारोपण अभियान
आजादी के अमृत महोत्सव के तहत रेलवे डहार ले आने आने कार्यक्रम राखे जात हे। इही कड़ी म दक्षिण पूर्व मध्य रेलवे के बिलासपुर, रायपुर अउ नागपुर मंडल डहार ले क्षेत्र के चयनित पचहत्तर रेलवे स्टेशन म मोटर सायकिल रैली राखे गीस। एखरे संग ए स्टेशन मनके अंतर्गत अवइया स्टेशन परिसर रेलवे कॉलोनी पार्क अउ तालाब के किनारे पौधा लगाये जात हे। ए अभियान पंद्रह अगस्त तक चलही।