छत्तीसगढ़ विधानसभा म मानसून सत्र के दूसर दिन आज मुख्य विपक्षी दल भाजपा के सदस्य मन ह प्रधानमंत्री आवास योजना के मुद्दा म सरकार के जुआब ले असंतुष्ट होके सदन ले बहिर्गमन कर दीन।
आज सदन म प्रदेश के पूर्व मुख्यमंत्री अउ भाजपा सदस्य डॅाक्टर रमनसिंह ह प्रधानमंत्री आवास योजना के मुद्दा उठाइन । डॅाक्टर सिंह ह कीहिन कि ए विसय म सरकार के ही एक मंत्री ह अपन विभाग छोड़ देहे। एमा सरकार ल स्पष्टीकरण देना चाही। विभागीय मंत्री के गैर अनुपस्थित रेहे म वनमंत्री मोहम्मद अकबर ह सदन ल बताइन कि बछर 2019-20 म योजनाके मंजूर आवास योजना बर राज्यमंत्री परिषद ह प्रदेश के हिस्सा बर सात सौ बांसठ करोड़ रूपिया के ऋण ल मंजूरी दे रीहिस। ये कर्जा बैंक ह जारी घलो करे रीहिस, फेर भारतीय रिजर्व बैंक ह एला रोक दीस।
मंत्री के ये जुआब ले अंसतुष्ट होके भाजपा सदस्य मन ह सदन ले बहिर्गमन कर दीन। उंहें आज प्रश्नकाल म भाजपासदस्य अजय चंद्राकर के सवाल के जुआब म आबकारी मंत्री कवासी लखमा ह बताइन कि राज्य सरकार ह देशी अउ विदेशी मदिरा दुकान ले कोविड शुल्क अउ गौठान विकास शुल्क ले तेरा सौ करोड़ रूपिया ले जादा के रकम वसूल करे हे।
उंहें भाजपा सदस्य नारायण चंदेल ह प्रदेश म कथित रूप ले बिन परमीट अउ जादा कीमत म शराब बेचे जाय के शिकइत म विभागीय मंत्री ले जुआब मांगीन। एमा आबकारी मंत्री कवासी लखमा ह भाजपा सदस्य के सिकइत ल आधारहीन बतात कीहिन कि जिहां अइसन किसम के सिकइत आवत हे उंहा तुरते कारवाई करे जात हे।
ओमन कीहिन कि जांजगीर चांपा जिला म शराब म पानी मिलाय के सिकइत मिले म जिम्मेवार अधिकारी ल निलंबित कर देहे। अइसने रायगढ़ जिला म घलो शराब म पानी मिलाय जाय के पांच ठिन मामला आगू आय हे। ए जम्मों मामला म संबंधित अधिकारी ल निलंबित कर दे गेहे। ए संबंध म भाजपा के शिवरतन शर्मा अउ सौरभ सिंह ह अपन-अपन क्षेत्र म शराब बेचे म कथित गड़बड़ी के मुद्दा उठाइन। एमा आबकारी मंत्री ह कीहिन कि सिकइत मिले म कार्रवाई करे जाही।
आज सदन म नेता प्रतिपक्ष धरमलाल कौशिक ह जेम पोर्टल ले जीनिस बिसाय के मामला उठाइन । एमा सत्तापक्ष कोति ले बताय गीस कि ए संबंध म जानकारी इकट्ठा करे जात हे। एमा विधानसभा अध्यक्ष ह आपत्ति दरज करत सरकार ल बेरा म जुआब सुनिश्चित करे के निर्देश दीन। आज सदन म विपक्ष ह विधानसभा अध्यक्ष ले राज्य सरकार के खिलाफ अविश्वास प्रस्ताव ल मंजूर करत एक चर्चा के मांग करीन।
राज्य सरकार के कृषि मंत्री रविंद्र चौबे अब पंचायत अउ ग्रामीण विकास विभाग के जिम्मेवारी घलो सम्हालही। उंहें टी.एस.िसंहदेव स्वास्थ्य अउ परिवार कल्याण के संगेसंग चिकित्सा शिक्षा, बीस सूत्रीय क्रियान्वयन अउ वाणिज्यिक कर विभाग के मंत्री बने रीही। ए संबंध म छत्तीसगढ़ राजपत्र म अधिसूचना प्रकाशित कर दे गेहे।
भाजपा के बड़का नेता अजय जामवाल ल छत्तीसगढ़ अउ मध्यप्रदेश के क्षेत्रीय संगठन महामंत्री बनाय गेहे। पार्टी के राष्ट्रीय कार्यालय ले मिले जानकारी के मुताबिक अजय जामवाल के केंद्र रायपुर होही।
छत्तीसगढ़ ल लघु वनोपज के प्रसंस्करण क्षेत्र म अंतर्राष्ट्रीय स्तर म एक बड़े उपलब्धि पाय हे। छत्तीसगढ़ ल सतत विकास गरीबी उन्मूलन अउ महिला सशक्तिकरण बर सिंगापुर म अंतर्राष्ट्रीय पुरस्कार दे जाही। एखर बर जगदलपुर अउ कोरबा जिला के दू झिन महिला स्व सहायता समूह ल चुने गेहे। ये इनाम सिंगापुर म बाईस अउ तेइस जुलाई के होवइया ईएसजी ग्रिट समारोह म दे जाही।
मुख्यमंत्री भूपेश बघेल अउ वनमंत्री मोहम्मद अकबर ह एखर बर जगदलपुर अउ कोरबा जिला के महिला स्व सहायता समूह के सदस्य मन ल अपन बधाई अउ शुभकामना दीन हे।
देशभर म कोविड टीकाकरण अभियान म अब तक दू सौ करोड़ इंक्यानबे लाख ले जादा झन ल कोविड रोधी टीका लगाय गेहे। केंद्रीय स्वास्थ्य मंत्रालय ह बताय हे कि काली उनतीस लाख बारा हजार टीका लगाये गीस।
एति छत्तीसगढ़ म घलो कोविड टीकाकरण अभियान चलत हे। राज्य म चार करोड़ तीस लाख उन्नीस हजार ले जादा कोविड रोधी टीका लगाय गेहे। प्रदेश के आने आने जिला म जादा ले जादा पात्र लोगन ल सुरक्षित टीका के दूसर खुराक के संगेसंग प्रिकाशन डोज देबर विशेष अभियान चलाये जात हे।
एमा मुंगेली जिला के मुख्य चिकित्सा अधिकारी डॅाक्टर मधुलिका सिंह ठाकुर ह बताइन कि पाछू पंद्रह जुलाई ले मुफत म प्रिकाशन डोज बर जगा जगा शिविर लगाय गेहे।
उंहें राजनांदगांव जिला म एक विशेष अभियान म आने आने विभाग के अधिकारी अउ कर्मचारी मन ह कोरोना ले बचाव बर प्रिकाशन डोज लगवाइन। इही बीच कोरोना संक्रमण ले काली दुर्ग जिला के रिसाली नगर-निगम क्षेत्र के पुरेना बस्ती के रहवइया एक सियान मनखे के मउत होगे।
खबर के मुताबिक ए बेरा प्रदेश म कोरोना के सबले जादा पांच सौ अड़सठ मरीज दुर्ग जिला म हे।
प्रदेश म कोरोना मरीज के इलाज ल अउ जादा सुविधापूर्ण बनाय बर अमरीका म काम करइया भारतीय मूल के डॅाक्टर के संगठन ह छत्तीसगढ़ ल पचहत्तर लाख रूपिया के वेंटिलेटर अउ सहायक चिकित्सा उपकरण देहे। ये वेंटिलेटर राजनांदगांव अउ गरियाबंद के जिला अस्पताल म अउ रायपुर के गुढ़ियारी शहरी सामुदायिक स्वास्थ्य केंद्र म रखे जाही।
मुख्यमंत्री ह ये मदद बर अमरीका म काम करत भारतीय मूल के डॅाक्टर मन बर आभार जताइन हे।
प्रधानमंत्री किसान सम्मान निधि योजना के सबो लाभार्थी मन ल अवइया इकतीस जुलाई तक अपन केवायसी ऑनलाईन सत्यापित कराना जरूरी हे। रायपुर म पदस्थ कृषि विभाग के उपसंचालक ह बताइन कि इकतीस जुलाई तक केवायसी के काम पूरा नइ होय म किसान मन ल आगू के किश्त के भुगतान नइ करे जा सकही।
राजनांदगांव जिला के सीमावर्ती क्षेत्र म बरसा के बेरा घलो माओवादी मनके खिलाफ अभियान जारी रीही। जिला के पुलिस अधीक्षक प्रफुल्ल ठाकुर ह आज पुलिस अधिकारी अउ सुरक्षा बलके प्रभारी अधिकारी मनके बइठका म ए संबंध म जरूरी निर्देश दीन। बताय गेहे कि माओवादी मन ह अवइया अठाईस जुलाई ले तीन अगस्त तक शहीदी सप्ताह मनाये के एलान करीन हे। एला देखत पुलिस अउ सुरक्षा बल ल बिसेस रूप ले सचेत रेहे बर केहे गेहे।
भारतीय स्टेट बैंक ह अपन ग्राहक मनके बैंकिंग सुविधा ल अउ सरल बनाय बर वाअ्सअप बैंकिंग सेवा शुरू करे हे। ये सेवा बर लोगन ल 9 0 2 2 6 – 9 0 2 2 6 म संदेस लिखके भेजना हे। भारतीय स्टेट बैंक अपन क्रेडिट कार्ड धारक मन ल वाट्सअप सेवा दीही। एखर बर एसबीआई वाट्सअप कनेक्ट नाव के सुविधा बउरे जाही।
मुख्यमंत्री भूपेश बघेल काली कुम्हारी म नगर पालिका के नवा भवन अउ नवा बने क्रिकेट स्टेडियम के लोकार्पण करीन। ओमन स्टेडियम के नाव स्वर्गीय मिनीमाता के नाव म राखे के घोषणा करीन। अपन दौरा के बेरा मुख्यमंत्री ह बंयालिस करोड़ रूपिया के आने आने विकास काम के लोकार्पण अउ भूमिपूजन करीन।
रेलमंत्री अश्विनी वैष्णव ह कीहिन हे कि सरकार के रोज चलइया यात्री रेलगाड़ी ल चलाय बर प्रायवेट आपरेटर मन ल सौंपे जइसन कोनो योजना नइ हे। लोकसभा म एक लिखित जवाब म ओमन बताइन कि आईआरसीटीसी कोति ले दिल्ली-लखनउ, अहमदाबाद-मुंबई रेल रद्दा म अभी दू ठिन तेजस कारपोरेट रेलगाड़ी चलाय जात हे। लखनउ-दिल्ली रेल रद्दा म रेलगाड़ी ह बछर दू हजार उन्नीस बीस म दू करोड़ तीस लाख रूपिया के फायदा दरज करे रीहिस। फेर ओखर बाद दू वित्तीय बछर म ओला नकसान होइस।
रेलमंत्री ह बताइन कि छूट के लागत रेलवे ल भारी पड़ीस। वरिष्ठ नागरिक समेत जम्मों श्रेणी के यात्री मन बर छूट जारी रखना संभव नइ हे । तभो ले रेलवे ह चार श्रेणी के यात्री किराया म छूट देना जारी रखे हे।