विश्व शतरंज ओलंपियाड टॉर्च रिले भुवनेश्वर ओडिशा ले होवत आज राजधानी रायपुर पहुंचीस। रायपुर के स्वामी विवेकानंद हवाई अड्डा म खेल अउ युवा कल्याण मंत्री उमेश पटेल ह शतरंज ओलंपियाड के टॉर्च ल लेके पहुंचे ग्रैण्ड मास्टर प्रवीण थिप्से के स्वागत करीन। आजादी के अमृत महोत्सव के मउका म ए टॉर्च रिले देश के पचहत्तर ठिन शहर ले होवत चेन्नई पहुंचही। जिहां ग्रैण्ड मास्टर विश्वनाथन आनंद ह एला लीही।
आज राजधानी रायपुर पहुंचे के बाद टॉर्च रिले ल माना विमानतल ले शहर म घुमावत पंडित दीनदयाल उपाध्याय ऑडिटोरियम लाये गीस। जिहां स्कूली लईका मन ह आने-आने देश के झंडा ल देखाके टॉर्च रिले के जोरदरहा ढंग ले स्वागत करीन। ऑडिटोरियम म राखे गे कार्यक्रम म ग्रैण्ड मास्टर प्रवीण थिप्से ह मुख्यमंत्री ल टॉर्च रिले सौंपीन।
जानबा के मुताबिक शतरंज ओलंपियाड के पंचानबे साल के इतिहास म भारत ल पहिली घांव ओलंपियाड के मेजबानी मिले हे। जेमा एक सौ अठ्यासी देश शामिल होही। आजादी के अमृत महोत्सव के तहत पचहत्तर ठिन शहर मन म शतरंज ओलंपियाड रैली निकाले जात हे।
छत्तीसगढ़ म खरीफ सीजन दू हजार बाईस बर केंद्र सरकार डहार ले चलाये जात प्रधानमंत्री फसल बीमा योजना के नामांकन तारीख ल इकतीस जुलाई तक बढ़ा दे गेहे। केंद्रीय कृषि मंत्रालय ह छत्तीसगढ़ के कृषि उत्पादन आयुक्त ल चिट्ठी भेजके ए बारे म जानबा देहे।
फसल बीमा योजना के नामांकन के तिथि ल बढ़ाय ले अब प्रदेश के किसान मन इकतीस जुलाई तक अपन खरीफ फसल के बीमा करा सकही। प्रदेश म चालू खरीफ मौसम म धान सिंचित-असिंचित, मक्का, सोयाबीन, मूंगफली, मूंग, उरिद अउ तुअर फसल के बीमा किसान मन करा सकथे।
केंद्रीय ग्रामीण विकास अउ पंचायत राज्यमंत्री गिरीराज सिंह ह अपन कोरबा जिला के प्रवास के दउरान कटघोरा म राखे गे विधानसभा कार्यकर्ता परिचर्चा सम्मेलन म शामिल होइन। ए मउका म केंद्रीय मंत्री ह आरोप लगाइन कि छत्तीसगढ़ के कांग्रेस सरकार ह भ्रष्टाचार म लिप्त हवय। ओमन कीहिन कि प्रदेश म केंद्र सरकार के कतकोन योजना के पइसा के दुरूपयोग करे जात हे। त उंहें प्रधानमंत्री आवास योजना अउ मनरेगा के कामकाज ह घलो बने ढंग ले नइ हो पात हे।
प्रदेश म बनाये गे गौठान के ग्रामीण औद्योगिक पार्क म तियार होवइया उत्पाद मन ल बढ़िया बाजार देवाय बर बने कीमत अउ मार्केटिंग उपर विशेष रूप ले धियान दे जाही। जेखर ले बने ढंग ले फायदा स्व सहायता समूह मन ल मिले। मुख्यमंत्री भूपेश बघेल ह रायपुर म राखे गे बइठका म गौठान मन ल औद्योगिक पार्क के रूप म विकसित करे बर करे जात कामकाज के समीक्षा के बाद जरूरी निर्देश दीन।
मुख्यमंत्री ह गौठान म तियार उत्पाद मनके बा्रण्डिग अउ बिक्री बर सोशल प्लेटफार्म के प्रयोग करे के घलो निर्देश दीन। जानबा के मुताबिक गोधन न्याय योजना के तहत गौठान मन म बारा हजार ले जादा स्व सहायता समूह मन काम करत हे।
केंद्रीय शिक्षक पात्रता परीक्षा सीटीईटी एसो दिसंबर म होही। परीक्षा के तारीख बाद म घोषित करे जाही। केंद्रीय माध्यमिक शिक्षा बोर्ड ह कीहिन हे कि ए परीक्षा ह कम्पयूटर आधारित होही अउ पूरा देश म बीस भाषा म ले जाही।
सीबीएसई ह बताइन कि परीक्षा के बारे म जानबा पाठ्यक्रम, भाषा, परीक्षा फीस, अउ आने जानबा सीटीईटी के आधिकारिक वेबसाईट म हावय।
रेलवे प्रशासन डहार ले दक्षिण पूर्व मध्य रेलवे ले चलइया पांच ठिन मेमू पेसेंजर स्पेशल रेलगाड़ी ल एक घांव फेर शुरू करे जात हे। एमा बिलासपुर-कोरबा, कोरबा-बिलासपुर, अउ रायपुर-इतवारी रेलगाड़ी शामिल हे। बिलासपुर-कोरबा पैंसेजर स्पेशल, बिलासपुर-कोरबा मेमू पैसेंजर स्पेशल अउ कोरबा-बिलासपुर मेमू पैसेंजर स्पेशल ल अठारा जुलाई ले रोजे चलाये जाही।
त उंहें रायपुर-इतवारी पैसेंजर स्पेशल ल बीस जुलाई अउ इतवारी-रायपुर पैसेंजर स्पेशल रेलगाड़ी ल इक्कीस जुलाई ले रोजे चलाये जाही। एति गेवरारोड-इतवारी एक्सप्रेस ल अवइया आदेश तक रद्द कर दे गेहे।
बस्तर संभाग के संगेसंग प्रदेश के कतकोन जिला मन म पाछू हप्ता भर ले सरलग होवत बरसा के सेती नदिया-नरवा मन म पूरा आगे हे। त उंहे नीचे के बस्ती अउ खेत मन म पानी भर गेहे। नीचे वाले जगा म बाढ़ जइसन स्थिति होय के सेती सामान्य जनजीवन ह घलो प्रभावित होय हे। बस्तर संभाग के सुकमा अउ बीजापुर जिला म सरलग होवत बरसा ले गांव मनके जिला मुख्यालय ले संपर्क टूट गेहे। शबरी नदी अउ इंद्रावती नदिया के पानी ह सरलग बाढ़त हे।
एति मुख्यमंत्री ह उद्योग मंत्री कवासी लखमा ल सुकमा अउ बीजापुर जिला म बरसा ले बाढ़ के स्थिति के बारे म जायजा लेके निर्देश दे हवयं अउ संगेसंग जरूरी व्यवस्था करे के बात केहे हे। मुख्यमंत्री के निर्देश म उद्योगमंत्री ह आज नारायणपुर के सुकमा अउ बीजापुर जिला के बाढ़ प्रभावित जगा के दउरा करीन।
एति रायगढ़ जिला म घलो सरलग होवत बरसा के सेती नदिया-नरवा के पानी बाढ़ गेहे। किलो जलाशय म कैचमेंट एरिया के पानी के आवक बाढ़े के सेती बांधा के कोनो-कोनो गेट ल खोल दे गेहे। जेखर ले खर्रा घाट चक्रपथ अउ एसईसीएल के तीर के रद्दा ह पानी म डूब गेहे।
ओति जांजगीर-चांपा जिला म मुलमुला क्षेत्र के मानाडेरा कोसागांव के तीर लीलागर नदिया म बने एनीकट ल पार करत बेरा फटफटी म बइठे पति-पत्नि अउ ओखर चार साल के बेटा बोहागे। पति-पत्नि ल निकल ले गेहे, फेर लइका के खोज खबर चलत हे ।
उंहे मौसम विभाग ह अवइया चौबीस घंटा के दउरान प्रदेश के कतकोन जगा म हल्का ले मध्यम बरसा के संगेसंग छींटा पढ़े के संभावना बताय हे। त उंहें कोनो-कोनो जगा म गरज-चमक के संग भारी ले अतिभारी बरसा होय के चेतावनी घलो दे गेहे।
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बार भारत म राष्ट्रपति चुनई के प्रक्रिया उपर छत्तीसगढ़ के पूर्व राज्य निर्वाचन आयुक्त डॅाक्टर सुशील त्रिवेदी ले लेगे भेंटवार्ता प्रसारित करे जाही।
एखर प्रसारण आकाशवाणी के रायपुर केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र रिले करही।
आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम ह आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संगरा रिले करही। ए हफ्ता के अंक म ‘‘दुर्ग‘‘ जिला के गतिविधि मनके बारे म जानबा दे जाही।
– कांकेर जिला म गोधन न्याय योजना के तहत गौठान मन म वर्मी कम्पोस्ट बनाये के संगेसंग आने कामकाज म लापरवाही के मामला म जनपद पंचायत के चौदा झिन अधिकारी मन ल कारण बताओ नोटिस जारी करे गेहे।
– जांजगीर-चांपा जिला के करूमहू गांव के तीर गांजा ले भरे एक ठिन गाड़ी ह दुर्घटनाग्रस्त होगे। ए गाड़ी ले मुलमुला पुलिस ह करीबन दस लाख रूपिया के गांजा बरामद करे हे।
– महासमुंद जिला म सांकरा के तीर एक ठिन गाड़ी ले करीबन पचास किलो गांजा के संग एक झिन आरोपी ल पुलिस ह गिरप्तार करे हे। जब्ती करे गे गांजा के भाव दस लाख रूपिया बताये जात हे।
अउ
– राजनांदगांव जिला के मनगटा वन चेतना केंद्र म घूमे बर गे एक झिन छात्र के खदान के पानी म बूड़े ले मउत होगे।