बारिश
सरलग होवत बरसात के सेती बस्तर संभाग के कुछु हिस्सा म बाढ़ के हालात बन गेहे। बस्तर के संगेसंग सीमा ले लगे राज्य महाराष्ट्र अउ तेलंगाना म घलो बीते करीब एक हफ्ता ले मूसलाधार बरसात होवत हे। एखर ले नदिया-नरवा म खतरा के निसान ले उपर पानी बोहात हे। गोदावरी नदी के बैक वॉटर म सुकमा स्थित सबरी नदी उफान म हे, जेखर सेती कोंटा अउ चट्टी के बीच विरापुराम पुलिया के तीर राष्ट्रीय राजमार्ग क्रमांक-30 म करीब 5 फीट उपर ले पानी बोहात हे। छत्तीसगढ़ के आखरी छोर म बसे ए गांव आंध्रप्रदेश अउ तेलंगाना राज्य के सीमा म हे। पानी भरे ले छत्तीसगढ़ अउ आंध्रप्रदेश के सड़क संपर्क टूट गेहे।
बीजापुर अउ नारायणपुर जिला बर मौसम विभाग ह रेड अलर्ट जारी करे हे। सरलग होत बरसात के सेती बीजापुर जिला म बाढ़ के खतरा बाड़े हे। जिला के कोडेनार गांव म तीन दिन पहिली मिंगाचल नदी म बोहाय एक झिन ग्रामीण के अब तक पता नइ चल पाय हे। उहें, तोयनार, चेरपाल अउ पमगल समेत 24 ले जादा गांव मनके संपर्क जिला मुख्यालय ले टूट गेहे। इंद्रावती नदिया सहित बड़े-छोटे नरवा मन उफान म हे।
कोंडागांव जिला म घलो नदिया-नरवा मनके संग खेत मन म पानी भर गेहे, जेखर ले किसान अपन फसल के नुकसान ल लेके हलाकान हे। जिला म बीते सनिच्चर ले सरलग बरसात होवत हे।
इही बीच, मौसम विभाग ह अवइया 24 घंटा म दुर्ग, रायपुर, बिलासपुर अउ बस्तर संभाग के कतको जिला मन म भारी ले अतिभारी बरसात होय के संभावना जताय हे। उहें, बस्तर संभाग म एक-दू जघा मन म भारी बरसा होय के चेतावनी घलो दे गेहे। मौसम विभाग के अनुसार दक्षिण-तटीय ओड़िसा अउ ओखर तीर म स्थित निम्नदाब के क्षेत्र मजबूत होगे हे। उहें, उपरी हवा म एक चक्रवाती घेरा हवय, जेखर चलत काली राज्य म ज्यादातर जगह मन म हल्का ले मध्यम बरसात होय के या गरज-चमक के संग छींटा पड़े के संभावना हे।
केन्द्रीय राज्यमंत्री-समीक्षा
केन्द्रीय जलशक्ति अउ जनजातीय राज्यमंत्री विश्वेश्वर टुडू ह अधिकारी मन ल केन्द्रीय योजना मनके क्रियान्वयन अउ प्रगति के निरीक्षण करे बर किहीन। केन्द्रीय राज्यमंत्री ह जगदलपुर प्रवास के बेरा जिला कलेक्टर सहित आने अधिकारी मनके संग समीक्षा बैठक करीन। बैठक म ओमन जल जीवन मिशन, स्वास्थ्य मिशन, एकलव्य विद्यालय, विशेष केन्द्रीय सहायता मद, वन-धन केन्द्र अउ राष्ट्रीय ग्रामीण आजीविका मिशन सहित आने योजना मनके बारे म जानकारी लीन। ओमन ह जल जीवन मिशन के समीक्षा करत अधिकारी मन ल निरदेस दीन कि अवइया बछर के दिसंबर महीना तक काम पूरा कर ले जाय अउ गुणवत्ता के घलो ध्यान राखे जाय। श्री टुडू ह स्वास्थ्य विभाग के अधिकारी मन ल वनवासी क्षेत्र म चिकित्सक अउ स्वास्थ्य कर्मी मनके उपलब्धता सुनिश्चित करे बर किहीन।
भाजपा-कार्यसमिति
राज्य के कांग्रेस सरकार डहार ले युवा मन ल बेरोजगारी भत्ता नइ दे के विरोध म भारतीय जनता पार्टी 24 अगस्त के राजधानी रायपुर म विरोध-प्रदर्शन करही। ए जानकारी केन्द्रीय जनजातीय विकास राज्यमंत्री रेणुका सिंह ह दीन हे। भाजपा के प्रदेश कार्यसमिति के बैठक म सामिल होय के बाद भिलाई म पत्रकार मन ले चर्चा करत ओमन बतइन कि प्रधानमंत्री आदर्श विकास योजना के माध्यम ले छत्तीसगढ़ के 4 हजार गांव मन ल विकसित करे जाही। संगेसंग आजादी के अमृत महोत्सव के अंतर्गत देसभर म स्वतंत्रता संग्राम सेनानी मनके 51 संग्रहालय बनाय जाही। केन्द्रीय राज्यमंत्री ह बतइन कि भिलाई म होय प्रदेश कार्यसमिति के बैठक म छत्तीसगढ़ के राजनीतिक हालात मन उपर चर्चा होईस। श्रीमती सिंह ह बतईन कि एनडीए के राष्ट्रपति पद के उम्मीदवार द्रौपदी मुर्मू 15 जुलाई के छत्तीसगढ़ प्रवास म आही अउ इहां के सांसद अउ विधायक मन ले समर्थन मांगही।
केन्द्रीय मंत्री-कोरबा
केन्द्रीय ग्रामीण विकास अउ पंचायती राज मंत्री गिरिराज सिंह ह काली ले 4 दिन के कोरबा प्रवास म रिही। अपन प्रवास के बेरा केन्द्रीय मंत्री 14 के कोरबा स्थित जिला पंचायत कार्यालय ले वीडियो कान्फ्रेंसिंग के माध्यम ले दिल्ली म आयोजित नेशनल वॉटर शेड कान्फ्रेंस म सामिल होही। एखर बाद ओमन जिला पंचायत के अधिकारी मन संग आने-आने सासकीय योजना मन ल लेके समीक्षा बैठक करही। ए बेरा श्री सिंह भारत सरकार योजना मनके लाभार्थी मन संग चर्चा घलो करही। प्रवास के बेरा केन्द्रीय मंत्री 15 जुलाई के कोरबा जिला म संचालित आने-आने विकास कार्य के निरीक्षण करही। संगेसंग ओमन रजकम्मा अउ कोरकोमा गांव घलो जाही। प्रवास के आखरी दिन 16 जुलाई के केन्द्रीय मंत्री ह रायपुर ले होत दिल्ली रवाना हो जही।
शहीद जवान-श्रद्धांजलि सभा
राजनांदगांव के पुलिस लाइन म कोरकोट्टी माओवादी हमला म शहीद जवान मनके 13वां बरसी म आज ओमन ल श्रद्धांजलि दे गीस। रक्षित केन्द्र म होय ए कार्यक्रम म शहीद जवान मनके परिजन मन ल घलो सम्मानित करे गीस। एमा सांसद संतोष पांडेय अउ आने जनप्रतिनिधि मन संग वरिष्ठ पुलिस अधिकारी मन घलो मौजूद रिहीन।
जानकारी बर बतादन कि बछर 2009 म 12 जुलाई के राजनांदगांव जिला के तत्कालीन पुलिस अधीक्षक विनोद कुमार चौबे सहित 29 पुलिस जवान माओवादी हमला म शहीद होगे रिहीन।
प्रयास/एकलव्य-जेईई परीक्षा
जेईई संयुक्त प्रवेश परीक्षा-एक के परिणाम म राज्य म संचालित प्रयास अउ एकलव्य विद्यालय के लइका मन ह शानदार प्रदर्शन करीन। परीक्षा म प्रयास विद्यालय के 137 अउ एकलव्य के 48 लइका मनके चयन होना तय हे। लइका मनके ए सफलता म अनुसूचित जाति अउ जनजाति मंत्री डॉक्टर प्रेमसाय सिंह टेकाम ह खुसी जतईन। जेईई संयुक्त प्रवेश परीक्षा-एक म रायपुर स्थित प्रयास बालक आदिवासी विद्यालय के छात्र हिमांशु साहू ह राज्य म सबले जादा अंक पाय हे।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– रॉयलसीमा के ओ स्वतंत्रता सेनानी के नाव का हे, जउन ब्रिटिश सेना म अतना डर पैदा कर दे रिहीस कि ब्रिटिश सेना ह ओखर मउत के बाद घलो ओला सार्वजनिक रूप ले फांसी दीस अउ ओखर शव ल लोगन मन ल देखाय बर 30 बछर तक पिंजरा म राखीस।
श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
शतरंज ओलंपियाड
शतरंज ओलंपियाड चार्ट रिले अवइया 16 जुलाई के रायपुर पहुंचही। इहां ले ए ओलंपियाड मसाल रायपुर सहर के भ्रमण करत पंडित दीनदयाल उपाध्याय ऑटिडोरियम पहुंचही। ए बेरा टॉर्च रिले के तेलीबांधा चौक अउ नगर घड़ी चौक म स्वागत करे जाही। पंडित दीनदयाल उपाध्याय ऑडिटोरियम म कार्यक्रम के आयोजन घलो करे जाही।
जानकारी बर बतादन कि शतरंज ओलंपियाड के 95 साल के इतिहास म भारत ल पहिली घांव ओलंपियाड के मेजबानी के मउका मिले हे। जेमा 188 देस सामिल होही। आजादी के अमृत महोत्सव के अंतर्गत 75 शहर मन म ए शतरंज ओलंपियाड रैली निकाले जात हे। ये भारत म आयोजित होवइया अब तक के सबले बड़े खेल आयोजन होही। एखर बर टॉर्च रिले के आयोजन 19 जून ले सुरू होगे हे, जउन 28 जुलाई तक चलही।