आठवां अंतर्राष्ट्रीय योग दिवस आज मनाय जात हे। प्रधानमंत्री नरेन्द्र मोदी ह कर्नाटक के मैसूरू म योगाभ्यास कारीकरम के अगुवई करीन। ए मउका म ओमन किहीन कि योग पूरा मानवता बर हरय अउ योग ह विश्व म स्वास्थ्य ल नवा दिसा अउ निरोगी जीवन के भरोसा दिलाय हे। अंतर्राष्ट्रीय योग दिवस ले जुड़े आने-आने कारीकरम म भारत अउ विदेश म करोड़ों मनखे मन हिस्सा लीन। प्रधानमंत्री ह देस अउ दुनिया ल अंतर्राष्ट्रीय योग दिवस के बधाई दीन। ओमन किहीन कि योग के ए निरंतर यात्रा अनंत भविष्य के दिसा म अइसने चलत रिही। प्रधानमंत्री ह ए मउका म बड़का संख्या म युवा मन ल सामिल होय बर ओमन ल धन्यवाद दीन।
अंतर्राष्ट्रीय योग दिवस-02
सूचना अउ प्रसारण मंत्रालय के केन्द्रीय संचार ब्यूरो डहार ले भोरमदेव मंदिर परिसर म राखे गे योगाभ्यास कारीकरम म केन्द्रीय जनजातीय राज्यमंत्री रेणुका सिंह अउ सांसद संतोष पांडेय समेत अनेक जनप्रतिनिधि, अधिकारी अउ आम लोगन मन सामिल होईन। ए कारीकरम म एक संग तीन हजार ले जादा लोगन मन योगाभ्यास करीन अउ योग ल जीवन म अपनाय के संकल्प लीन। ए मउका म केन्द्रीय राज्यमंत्री ह किहीन कि योग पूरा मानवता बर कल्याणकारी हरय। ओमन योग के प्रचार-प्रसार बर राखे गे प्रतियोगिता के विजेता मन ल इनाम बांटीन।
अंतर्राष्ट्रीय योग दिवस म राज्यपाल अनुसुईया उइके ह राजभवन म आने-आने आसन अउ प्राणायाम करीन। ओमन प्रदेसवासी मन ल योग दिवस के बधाई देवत किहीन कि जम्मों झन ल नियमित योग करना चाही।
उहें, मुख्यमंत्री भूपेश बघेल ह नई दिल्ली स्थित छत्तीसगढ़ सदन म योग के आने-आने मुद्रा के अभ्यास करीन। ए मउका म ओमन प्रदेसवासी मन ल योग दिवस के बधाई देवत योग ल अपन दिनचर्या म सामिल करे के अपील करीन।
अंतर्राष्ट्रीय योग दिवस म रईपुर जिला के चंदखुरी स्थित माता कौशल्या के धाम ले आज लोगन मन योग अउ संयम के पाठ सीखीन। कौशल्या मंदिर परिसर म राखे गे योगा अभ्यास कारीकरम म छत्तीसगढ़ योग आयोग के अध्यक्ष ज्ञानेश शर्मा अउ रईपुर के महापौर एजाज टेबर घलो सामिल होईन। ए मउका म सात ले जादा योग प्रशिक्षक अउ योगाचार्य के मार्गदर्शन म बारह सौ ले जादा प्रतिभागी मन योगाभ्यास, प्राणायाम अउ ध्यान के प्रदर्शन करीन।
अंतर्राष्ट्रीय योग दिवस-03
उहें, प्रदेस के दूसर जिला मन म घलो राज्य सरकार के मंत्री, संसदीय सचिव, विधायक, आयोग अउ प्राधिकरण के अध्यक्ष मनके उपस्थिति म योग अभ्यास के आयोजन करे गीस। विधानसभा अध्यक्ष डॉक्टर चरणदास महंत ह कोरबा म राखे गे मुख्य कारीकरम म हिस्सा लीन। उहें, गृह मंत्री ताम्रध्वज साहू ह दुरूग अउ स्वास्थ्य मंत्री टी.एस. सिंहदेव ह अंबिकापुर म राखे गे योगाभ्यास कारीकरम म सामिल होईन।
उहें, बिलासपुर स्थित छत्तीसगढ़ उच्च न्यायालय परिसर म आज मुख्य न्यायाधीश समेत दूसर न्यायाधीश मन योगाभ्यास करीन।
भारतीय सेना मुख्यालय छत्तीसगढ़ अउ ओड़िसा उप क्षेत्र के रईपुर के ‘‘सौभाग्यम‘‘ ध्यान केन्द्र म एक कारीकरम राखे गीस, जेमा ढाई सौ ले जादा अधिकारी, जवान अउ नागरिक सुरक्षा कर्मचारी मन अपन परिवार के संग योग करीन।
उहें, प्रदेस के दस जिला मन म स्थापित राज्य सैनिक बोर्ड के जम्मों कार्यालय मन म योगाभ्यास कारीकरम आयोजित करे गीस। रईपुर म होय कारीकरम म छत्तीसगढ़ राज्य सैनिक बोर्ड के पूर्व निदेशक ब्रिगेडियर विवेक शर्मा सामिल होईन। ए दउरान कई ठिन प्रतियोगिता घलो राखे गीस।
ृ अंतर्राष्ट्रीय योग दिवस के मउका म बिलासपुर जिला के बिल्हा म राखे गे योग सिविर म नेता प्रतिपक्ष धरमलाल कौशिक सामिल होईन। एखर अलावा भाजपा के प्रदेस अध्यक्ष विष्णुदेव साय, प्रदेस संगठन महामंत्री पवन साय, विधायक बृजमोहन अग्रवाल, सांसद सुनील सोनी समेत पतंजलि योगपीठ के सदस्य मन रईपुर के गॉस मेमोरियल मैदान म योग करीन।
अग्निपथ योजना-अधिसूचना
सेना ह अग्निपथ योजना के अंतर्गत अग्निवीर मनके भर्ती बर अधिसूचना जारी कर देहे। आने-आने ट्रेड्स बर सेना भर्ती कार्यालय मन डहार ले जुलाई ले पंजीयन सुरू करे जाही। उम्मीदवार सेना के वेबसाइट ‘‘जॉइन इंडियन आर्मी डॉट एनआईसी डॉट आईएन‘‘ के जरिया पंजीकरण कर सकत हे।
इही बीच, राष्ट्रीय सुरक्षा सलाहकार अजीत डोभाल ह किहीन कि अग्निपथ पूरी-पूरा प्रशिक्षित अउ कुशल सेना बर एक क्रांतिकारी योजना हरय। श्री डोभाल ह न्यूज चैनल ल दे गे एक विशेष साक्षात्कार म अग्निपथ योजना के मिथक मन ल दूर करीन। ओमन किहीन कि ए योजना ले देस के सशस्त्र बल अउ मजबूत होही।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे।
भारतीय मनके खिलाफ ब्रिटिश राज के शोषण ल बताने वाला आंध्रप्रदेश म दर्ज पहिली आपराधिक मामला, काकीनाडा दंगा कोन बछर म होय रिहीस ?
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
डायरिया नियंत्रण पखवाड़ा
लइका मन म डायरिया के रोकथाम बर प्रदेस म आज ले डायरिया नियंत्रण पखवाड़ा चालू होईस। पांच जुलाई तक चलइया ए पखवाड़ा के दउरान जम्मों स्वास्थ्य केन्द्र मन म ओआरएस-जिंक कॉर्नर लगाय के संगेसंग जन-जागरूकता आधारित कई ठिन कारीकरम राखे जात हे।
स्वास्थ्य विभाग म बाल स्वास्थ्य कार्यक्रम के उप संचालक डॉक्टर वी.आर. भगत ह बतईन कि ए अभियान ले ए.एन.एम. अउ मितानिन मन ल घलो जोड़े गेहे। गहन डायरिया नियंत्रण पखवाड़ा के बेरा घर, कुंआ अउ जल-स्त्रोत के साफ-सफई अउ पानी ल साफ रखे बर क्लोरीन टैबलेट बांटे जात हे।
स्कूल-निर्देश
प्रदेस के स्कूल शिक्षा विभाग के प्रमुख सचिव ह जम्मों स्कूल मन म प्रयोगसाला ल अनिवार्य रूप ले चालू करे के निरदेस दीन हे। संघरा राज्य स्तरीय अधिकारी मन ल जिला आवंटित करके साला मनके सघन निरीक्षण करे के जिम्मा सौंपे हे। उहें, संयुक्त संचालक सिक्षा विभाग, जिला सिक्षा अधिकारी अउ हाई स्कूल अउ हायर सेकेंडरी स्कूल के प्राचार्य मन ल घलो निरीक्षण के लक्ष्य दे गेहे।
खरीफ फसल-बोआई
राज्य म मानसून के आय ले खरीफ फसल मनके बोआई सुरू होगे हे। कृषि विभाग के अनुसार किसनहा मन धान के अलावा दलहन-तिलहन अउ साग-भाजी के बोआई सुरू कर देहे। अब तक छब्बीस हजार ले जादा हेक्टेयर क्षेत्र म खरीफ फसल के बोआई हो चुके हे। राज्य म ए खरीफ सीजन म अड़तालीस लाख बीस हजार हेक्टेयर रकबा म आने-आने फसल के बोआई करे के लक्ष्य राखे गेहे।
मौसम
प्रदेस म मानसून सक्रिय होगे हे। आजों कई ठिन जिला मन म बरसा होय के समाचार मिले हे। जशपुर म आज करीबन दू घंटा तक गरज-चमक के संग सरलग बारिस होईस, जेखर ले खेत-खलियान म पानी भर गे।
मौसम विभाग के अनुसार ए बेरा एक उपरी हवा के चक्रीय चक्रवाती घेरा पूर्वी उत्तरप्रदेश के उपर सक्रिय हरय। उहें, एक द्रोणिका हरियाणा ले उत्तर पूर्व बंगाल के खाड़ी तक स्थित हे। एखर असर ले प्रदेस के आने-आने जघा मन म अवइया चौबीस घंटा के दउरान हल्का से मध्यम बरसा होय या गरज-चमक के संग छींटा पड़े के संभावना हे। उहें, एक-दू जघा मन म गरज-चमक के संगेसंग गाज गिरे के अउ भारी बरसा होय घलो आसार हवय।