निर्वाचन आयोग ह आज देश के सोलहवां राष्ट्रपति के चुनाव कार्यक्रम के घोषणा कर देहे। मुख्य निर्वाचन आयुक्त राजीव कुमार ह नई दिल्ली म चुनाव कार्यक्रम के घोषणा करत कीहिन कि मतदान अठारा जुलाई अउ मतगणना इक्कीस जुलाई के होही। चुनाव के अधिसूचना पंद्रह जून के जारी करे जाही।
मुख्य निर्वाचन आयुक्त ह बताइन कि उनतीस जून तक नामांकन पत्र भरे जा सकही अउ एखर जांच तीस जून के होही।
खबर के मुताबिक राष्ट्रपति रामनाथ कोविंद के कार्यकाल इक्कीस जुलाई के सिरात हे । मुख्य निर्वाचन आयुक्त ह कीहिन कि सात सौ छिहत्तर संसद सदस्य अउ विधानसभा के चार हजार तैंतीस सदस्य संग चार हजार आठ सौ नौ निर्वाचक राष्ट्रपति के चुनाव करही। श्री कुमार ह कीहिन कि मतदान अउ मतगणना के दिन कोरोना के बचाव संबंधी दिशा-निर्देश के कड़ाई ले पालन करे जाही।
प्रदेश के अठाईस जिला मन म त्रिस्तरीय पंचायत के उपचुनाव बर नामांकन जमा करे के आज आखरी दिन रीहिस । काली नामांकन पत्र के जांच करे जाही। आठ जून तक मिले आकड़ा के अनुसार साढ़े चार सौ नामांकन पत्र दाखिल करे जा चुके हे। एमा जनपद सदस्य बर आठ, सरपंच बर एक सौ तैंतीस अउ पंच बर तीन सौ नौ उम्मीदवार के नामांकन शामिल हे।
तेरा जून तक उम्मीदवार मन अपन नाम वापिस ले सकही । उही दिन उम्मीदवार के सूची जारी करके ओमन ल चुनाव चिन्ह बांटे जाही । जरूरत पड़े म अठाईस जून के बीहनिया सात बजे ले मतदान अउ उनतीस जून के मतगणना कराय जाही। उंहे परिणाम के घोषणा तीस जून के करे जाही। त्रिस्तरीय पंचायत के निर्वाचन गैरदलीय आधार म होही। मतदान, मतपत्र ले कराये जाही।
इंडिया फर्स्ट टेक स्टार्टअप सम्मेलन म छत्तीसगढ़ के चार स्टार्टअप ल पुरस्कार मिले हे। मुख्यमंत्री भूपेश बघेल अउ उद्योग मंत्री कवासी लखमा ह पुरस्कार पाने वाला प्रदेश के चारो कंपनी के संग उद्योग विभाग के अधिकारी मन ल बधाई अउ शुभकामना देहे।
खबर के मुताबिक स्टार्टअप कंपनी मन ल प्रोत्साहित करे खातिर बेंगलुरू म काली अउ आज राष्ट्रीय स्तर के सम्मेलन करे गे रीहिस। ए सम्मेलन म प्रदेश के बारह कंपनी ल अपन स्टार्टअप के संबंध म जानकारी दीन। सम्मेलन के दउरान उद्योग विभाग के अधिकारी मन ह उद्यमी मन ल राज्य म स्टार्टअप उद्योग म निवेश बर आमंत्रित घलो करीन हे।
आर्थिक सामाजिक सर्वेक्षण
आर्थिक सामाजिक सर्वेक्षण के तहत प्राथमिक कर्मचारी मनके प्रशिक्षण बर तीन दिन के कार्यशाला आज ले रायपुर म शुरू होगे हे। योजना आयोग के सदस्य डॅाक्टर ए.के. सुब्रमण्यम ह ए कार्यशाला के शुभारंभ करीन। ओमन कीहिन कि सर्वेक्षण के आंकड़ा सही होय म ही विकास के सबो प्रयास पूरा हो सकही ।ओमन कीहिन कि सतत विकास के लक्ष्य ल पूरा करे खातिर सामाजिक आर्थिक आंकड़ा के विश्वसनीय होना जरूरी हे। एखरे आधार म विश्व समुदाय म भारत ल विकासशील देश के रूप म पहचाने जाथे।
कार्यक्रम म पत्र सूचना कार्यालय के सहायक निदेशक सुनील तिवारी ह कर्मचारी मनले कीहिन कि सामाजिक आर्थिक सर्वेक्षण कार्य ल जिम्मेदारी के संग पूरा करय। केंद्रीय सांख्यिकी क्रियान्वयन मंत्रालय के क्षेत्रीय उपनिदेशक रोशनलाल साहू ह कीहिन कि छत्तीसगढ़ म सामाजिक आर्थिक सर्वेक्षण म सबो वर्ग ल समान रूप से शामिल करे जाय। एखर ले अच्छा आकड़ा तैयार हो सकही। ये सर्वेक्षण एक जुलाई ले अवइया बछर तीन जून तक देश के ग्रामीण अउ शहरी क्षेत्र म अखिल भारतीय स्तर म आयोजित करे जाही।
नारायणपुर जिला म आज तीन माओवादी मन ह पुलिस के आगू आत्मसमर्पण कर देहे। ए माओवादी मन ह जिला के पुलिस अधीक्षक सदानंद कुमार संग सुरक्षा बलके वरिष्ठ अधिकारी के आगू आत्मसमर्पण करीन। ए तीन माओवादी मन उपर आने-आने हिंसक घटना म शामिल रेहे के आरोप हे। खबर के मुताबिक पुलिस अउ सुरक्षा बलके नेतृत्व म बस्तर क्षेत्र म ए दिन माओवादी के खिलाफ अभियान चलाये जाथे।
उंहें बीजापुर जिला म पुलिस ह माओवादी मन ल विस्फोटक अउ आने सामान देवइया एक झन सदस्य ल गिरप्तार करे हे। जिला के तोयानार थानाक्षेत्र म पुलिस अउ सुरक्षा बलके संयुक्त टीम ह तलाशी अभियान के दउरान ए माओवादी मन ल गिरप्तार करे हे। पूछताछ के दउरान ए माओवादी मन ह बताइन कि ओमन ह आने स्थानीय सहयोगी के संग मिलके विस्फोटक अउ आने सामान माओवादी मन ल उपलब्ध करावत रीहिन। पकड़े गे माओवादी के तीर ले प्रतिबंधित संगठन के वर्दी के करीबन डेढ़ सौ मीटर कपड़ा, दस जिलेटिन रॉड, कार्डेक्स वायर अउ टिफिन बम बरामद करे गेहे।
आदिवासी मनके उत्थान बर आजीवन संघर्ष करइया महान क्रांतिकारी जननायक बिरसा मुण्डा के आज पुण्यतिथि हरय । मुख्यमंत्री भूपेश बघेल ह अपन निवास कार्यालय म जननायक बिरसा मुण्डा के पुण्यतिथि के अवसर म ओखर चित्र उपर फूलमाला चढ़ाके श्रद्धांजलि दीन। ओमन कीहिन कि बिरसा मुण्डा ह आदिवासी मन ल संगठित करके जल, जंगल अउ जमीन म अधिकारी बर आंदोलन करे रीहिन।
उंहें मुख्यमंत्री ह छत्तीसगढ़ी लोकसंगीत के पुरोधा खुमानसाव के पुण्यतिथि उपर ओमन ल नमन करे हे। श्री बघेल ह ओमन ल सुरता करत कीहिन कि श्री साव ह चंदैनी गोंदा के माध्यम ले छत्तीसगढ़ी लोककला ल संवारे म अपन पूरा जीवन लगा दीन।
अनिवार्य बाल शिक्षा के अधिकार अधिनियम-आरटीई के अंतर्गत हितग्राही समूह के विद्यार्थी मन ल प्रदेशभर के निजी स्कूल मन म प्रवेश बर ऑनलाईन आवेदन मंगाय गेहे। लोकशिक्षण संचालक ह बताइन कि एखर तहत आने-आने स्कूल मन म प्रवेश बर ऑनलाईन लॉटरी के पारदर्शी प्रक्रिया अपनाय जाथे। जउन ह पोर्टल के माध्यम ले संचालित होथे। ओमन बताइन कि पहिली चरण म सोला हजार छै सौ छियांसी विद्यार्थी मनके चयन करे जाही।
भिलाई इस्पात संयंत्र के कन्वटर शॉप म काम के बेरा मुड़ी उपर लोहा के चेन गिरे ले घायल एक झिन ठेका मजदूर के मउत होगे । ए घटना के सूचना मिलतेच संयंत्र के अधिकारी मन ह तुरते घायल मजदूर ल सेक्टर नौ अस्पताल म पहुंचाइन। उंहा परीक्षण के दउरान डॅाक्टर मन ह मजदूर ल मृत घोषित कर दीन।
विश्व अभिलेखागार दिवस के उपलक्ष्य म संस्कृति अउ पुरातत्व विभाग डहार ले आज महंत घासीदास स्मारक संग्रहालय परिसर म छायाचित्र प्रदर्शनी के शुभारंभ करे गीस। प्रदर्शनी के उद्घाटन विभाग के संचालक विवेक आचार्य ह करीन । ए प्रदर्शनी म कलाप्रेमी मनके उछाह ले देखत एखर समय सीमा काली दस जून तक बढ़ा दे गेहे। ए प्रदर्शनी म आजादी के पहिली अउ आजादी के बाद के एतिहासिक महत्व के अभिलेख मन ल छायाचित्र के माध्यम ले प्रदर्शित करे गेहे।
मुख्यमंत्री भूपेश बघेल काली संझा राजधानी रायपुर म अखिल भारतीय जगार हस्तशिल्प अउ हथकरघा वस्त्र के प्रदर्शनी के शुभारंभ करही। ग्रामोद्योग अउ लोक स्वास्थ्य मंत्री गुरू रूद्रकुमार ए प्रदर्शनी के उद्घाटन समारोह के अध्यक्षता करही।
उद्घाटन समारोह म राज्य सरकार के आने मंत्री के संग रायपुर लोकसभा क्षेत्र के सांसद सुनील सोनी घलो उपस्थित रीही। ए प्रदर्शनी पंढरी स्थ्ति छत्तीसगढ़ हाट परिसर म हस्तशिल्प विकास बोर्ड डहार ले लगाये जात हे। एमा छत्तीसगढ़ संग ग्यारह राज्य के शिल्पकार अपन शिल्पकला के प्रदर्शन करही। ए प्रदर्शनी उन्नीस जून तक चलही।
मौसम
अवइया चौबीस घंटा के दउरान प्रदेश के एक-दू जगा म हल्का बरसा होय या गरज चमक के संग छींटा पड़े के संभावना हे।
मौसम विभाग के मुताबिक दक्षिण महाराष्ट्र, गोवा, कर्नाटक, तमिलनाडु, आंध्रप्रदेश अउ पश्चिम बंगाल के खाड़ी के कुछएक जगा म अवइया अड़तालीस घंटा के दउरान मानसून के गतिविधि बाढ़े के संभावना हे। एखरे संग ए बेरा उत्तरप्रदेश ले मणिपुर तक एक ठिन द्रोणिका बने हुए हे। उंहें पश्चिम बंगाल ले ओडिशा तक एक ठिन आने द्रोणिका घलो सक्रिय हे। एखर प्रभाव ले प्रदेश म एक दू जगा म गरज चमक के संग आकाशीय बिजली गिरे अउ हवा गरेर चले के चेतावनी घलो दे गेहे।