प्रदेश म आज झीरम श्रद्धांजलि दिवस मनाये जात हे। ए मउका म प्रदेश के जम्मों सरकारी अउ अर्धशासकीय ऑफिस मन म झीरम घाटी हमला म शहीद मनके सुरता म दू मिनट के मौन धारण करके ओमन ल श्रद्धांजलि दे गीस। मुख्यमंत्री ह आज जगदलपुर के लालबाग मैदान म झीरम घाटी म शहीद मेमोरियल के लोकार्पण करके शहीद मन ल श्रद्धांजलि दीन। ओमन शहीद मनके सुरता म करीबन सौ फीट उंचा तिरंगा झंडा फहराइन।
ए मउका म मुख्यमंत्री ह कीहिन कि झीरम घाटी म बत्तीस झिन शहीद मनके सुरता म मेमोरियल बनाय गेहे। जानबा के मुताबिक पच्चीस मई दू हजार तेरह के झीरम घाटी म माओवादी हिंसा म बड़का जनप्रतिनिधि नंदकुमार पटेल, विद्याचरण शुक्ल, महेंद्र कर्मा, उदय मुदलियार, योगेंद्र शर्मा के संगेसंग कतकोन बड़का नेता अउ सुरक्षा बल के जवान मन शहीद होय रीहिन।
एति विधानसभा सभागार म राखे गे एक ठिन कार्यक्रम म विधानसभा अध्यक्ष डॉक्टर चरणदास महंत ह झीरम घाटी के शहीद मन ल श्रद्धांजलि दीन। ए मउका म ओमन शहीद मनके सुरता म पुस्तक के विमोचन करीन।
त उंहे राजभवन सचिवालय अउ मंत्रालय म घलो अधिकारी अउ कर्मचारी मन ह श्रद्धांजलि दीन। मुख्य सचिव अमिताभ जैन ह आज मंत्रालय स्थ्ति अपन कक्ष म दू मिनट के मौन राखके झीरम घाटी के संगेसंग आने माओवादी घटना म शहीद जवान मन ल श्रद्धांजलि दीन।
उंहें प्रदेश कांग्रेस मुख्यालय राजीव भवन म घलो कांग्रेस जन मन ह श्रद्धांजलि दीन।
मुख्यमंत्री ह कीहिन हे कि जगदलपुर के नगरनार स्टील प्लांट ल प्रायवेट हाथ म नइ दे जाय। नानगुर म भेंट-मुलाकात कार्यक्रम के दउरान ओमन कीहिन कि राज्य सरकार ह नगरनार म उंहें के लोगन मन के हित के ध्यान राखही। ए दउरान मुख्यमंत्री ह नानगुर म सरकारी योजना के कामकाज के जानबा लीन अउ संगेसंग नानगुर ल तहसील बनाये, सहकारी बैंक के शाखा अउ कालेज खोल के संगेसंग पुलिस थाना अउ नानगुर म एम्बुलेंस सेवा शुरू करे के घोषणा करीन।
अइसने मुख्यमंत्री ह नगरनार म डिग्री कॉलेज खोले, नेतानार पनारापारा, भैरमगंज, बांडापारा, पोडागुड, धनपुंजी अउ तुरेनार म हाइस्कूल ल बढ़ाके, हायर सेकण्डरी स्कूल चलाये के संगेसंग जगदलपुर शहर म स्वामी आत्मानंद अंग्रेजी माध्यम स्कूल खोले के घोषणा करीन।
छत्तीसगढ़ विधानसभा के लोकलेखा समिति के पहिली बइठका आज विधानसभा परिसर म होइस। बइठका ल संबोधित करत विधानसभा अध्यक्ष ह कीहिन कि लोकलेखा समिति विधानसभा के जरूरी वित्तीय समिति हरय। ओमन कीहिन कि संसदीय समिति म वित्तीय समिति के बड़का भूमिका होथे। बइठका म विधानसभा अध्यक्ष ह समिति के जादा ले जादा बइठका करके रूके कामकाज ल निपटाय उपर जोर दीन।
ओमन बताइन कि विधानसभा के लोकलेखा समिति के पाछू साल छियालिस ठिन बइठका होय रीहिस अउ समिति ह इक्यासी ठिन प्रतिवेदन घलो पेश करे रीहिन। ए मउका म समिति के सभापति अजय चंद्राकर ह कीहिन कि लोक लेखा समिति ल जउन बात केहे गेहे, ओला ओ ह पूरा करत हे। बइठका म विधायक सत्यनारायण शर्मा, धनेन्द्रसाहू, शैलेष पांडेय के संगेसंग विधानसभा सचिव दिनेश शर्मा अउ महा लेखाकार दिनेश पाटिल घलो आय रीहिन।
राज्यपाल अनुसुइया उइके ले काली राजभवन म किसान मनके एक झिन प्रतिनिधि मंडल ह मिलिन अउ अपन आने-आने समस्या ल राज्यपाल के तीर राखीन। प्रतिनिधि मंडल ह राज्य म खराब वर्मी कम्पोस्ट बनाये अउ ओला बेचे के समस्या के संगेसंग किसान मन ल बोनस राशि बांटे के बारे म राज्यपाल ले गोठबात करीन अउ एखर ले जुड़े समस्या ल लेके ज्ञापन सौंपीन।
केंद्र सरकार ह स्वच्छ भारत मिशन शहरी के दूसर चरण म स्वच्छ सर्वेक्षण एस.एस. दू हजार तेईस के आठवां संस्करण के शुभारंभ करीन। केंद्रीय आवास अउ शहरी कार्य मंत्रालय म सचिव मनोज जोशी ह काली नई दिल्ली म एक ठन वचुअर्ल कार्यक्रम म एखर शुरूआत करीन। ए मिशन ल ’कचरे से संपदा’ थीम के संग तियार करे गेहे ।
राजधानी रायपुर के सड्डू स्थित क्षेत्रीय विज्ञान केंद्र ल लोगन मनके देखे बर उनतीस मई ले एक घांव फेर शुरू करे जात हे। ये विज्ञान केंद्र मंगलवार ले इतवार बीहनिया दस बजे ले संझा साढ़े पांच बजे तक खुला रीही। साप्ताहिक छुट्टी के सेती ए केंद्र ह सोमवार के बंद रीही। ये विज्ञान केंद्र म तारामंडल ल देखे बर प्रोजेक्टर के माध्यम ले डिजीटल वीडियो प्रक्षेपण प्रणाली के सुविधा रीही। गर्मी के छुट्टी ल देखत विज्ञान केंद्र म लईका मन बर समर कैंप के घलो आयोजन करे गेहे।
जानबा के मुताबिक करीबन दस एकड़ क्षेत्र म फैले ए केंद्र म तीन ठिन सुघ्घर अउ मनोरंजन वाले गैलरी हवय।
केंद्रीय औद्योगिक सुरक्षा बल सीआईएसएफ आरक्षक भर्ती परीक्षा म धोखाधड़ी करे के आरोप म दुर्ग पुलिस ह दू झिन लोगन मन ल आगरा ले गिरप्तार करे हे । ए मामला म गिरोह के मुख्य आरोपी के संगेसंग छै झिन लोगन मन ल पहिलीच ले गिरप्तार कर ले गेहे। ए मन ह आरक्षक भर्ती परीक्षा म अर्जी करइया मनके जगा म खुदे जाके घटना ल आगू बढ़ावत रीहिन।
जांजगीर चांपा जिला ले मजूरी करे बर झारखंड के इकतीस झिन श्रमिक मन ल कथित रूप ले लातेहार म ठेकेदार ह बंधक बना ले रीहिस। ए मामला के जानबा मिले के बाद जांजगीर कलेक्टर ह लातेहार जिला प्रशासन ले मिलके श्रमिक मन ल छोड़ाइन। ए बेरा मजूर मन ह अपन गांव जावत हे।
केंद्र सरकार ह हरएक साल बीस लाख मीटरिक टन कच्चा सोयाबीन अउ सूरजमुखी तेल के शुल्क मुक्त आयात के मंजूरी देहे। केंद्रीय वित्त मंत्रालय के अधिसूचना म बताय गेहे कि ए व्यवस्था ह दू साल बर लागू होही। आज ले प्रभावी होय ए छूट ले उपभोक्ता मन ल बड़का राहत मिलही।
– आज विश्व थायराईड दिवस हे। ए रोग ओखर लक्षण रोकथाम अउ इलाज के बारे म जागरूकता लाये के उद्देश्य ले हर साल पच्चीस मई के ए दिन ल मनाये जाथे।
– गरियाबंद जिला के पुलिस अधीक्षक ह ग्यारा ठिन थाना प्रभारी मनके प्रभार म फेरबदल करे हे।
– प्रदेश म सरकारी नौकरी मन म पिछड़ा वर्ग के लोगन मन म सत्ताईस प्रतिशत आरक्षण देके मांग ल लेके मुंगेली जिला म भाजपा पिछड़ा वर्ग मोर्चा के कार्यकर्ता मन ह धरना प्रदर्शन करीन।
– राजनांदगांव जिला के खैरागढ़ म पाछू रतिहा कार के टक्कर ले फटफटी म बइठे एक झिन गुरूजी के मउत होगे।
– रायगढ़ जिला के घरघोड़ा वन परिक्षेत्र म हाथी के हमला ले एक झिन मनखे के मउत होगे। ए क्षेत्र म ग्यारा ठिन हाथी के दल ह घूमत हवय।
– राजनांदगांव जिला म पुलिस ह बिजली कंपनी के एटीपी मशीन ल काटके दस लाख रूपिया चोरी करे के मामला म पूर्व ठेकेदार अउ ओखर संगवारी ल गिरप्तार करे हे। इंखर तीर ले आठ लाख पैंसठ हजार रूपिया बरामद करे गेहे।
– कोंडागांव जिला म पुलिस ह गांजा तस्करी के आरोप म एक झिन मनखे ल गिरप्तार करके उंखर तीर ले करीबन चौहत्तर किलोग्राम गांजा के जब्ती करे हे। गांजा के कीमत बाजार म चौदा लाख रूपिया बताये जात हे।
अउ
– रायपुर जिला म पुलिस ह ब्राउन शुगर तस्करी के मामला म तीन झिन आरोपी मन ल गिरप्तार करे हे। एखर तीर ले करीबन पचास हजार रूपिया कीमत के ब्राउन शुगर जब्त करे गेहे।