भाजपा-जेल भरो आंदोलन
राज्य सरकार कोति ले धरना-प्रदर्शन के संबंध म नवा नियम बनाय जाय के विरोध म भारतीय जनता पार्टी के प्रदेस इकाई ह आज राजधानी रईपुर समेत प्रदेस के जम्मों जिला मुख्यालय म ‘‘जेल भरो आंदोलन‘‘ करीन। रईपुर म भाजपा ह आने-आने जगह म प्रदर्सन करीन। ए बेरा म कई ठन जिला मुख्यालय म पुलिस अउ कार्यकर्ता के बीच छुट-पुट झूमाझटकी होय के खबर मिले हे।
भाजपा नेता अउ कार्यकर्ता तेलीबांधा तरिया, आजाद चउक, फाफाडीह चउक अउ कालीबाड़ी चउक ले एक संघरा मुख्यमंत्री निवास के घेराव करे बर निकलीन। ए बेरा म पार्टी कार्यकर्ता मन ह सरकार के खिलाफ जम के नारेबाजी करीन। पुलिस ह प्रदर्सन करइया मन ल मुख्यमंत्री निवास पहुंचे के पहिली रस्ता म रोक लीन। आंदोलनकारी मन ल रोके बर पुलिस ह राजभवन अउ मुख्यमंत्री निवास के तीर-तखार के रद्दा के संगेसंग आने रद्दा म घलो जघा-जघा बैरिकेट्डस लगा राखे रिहीन।
राजधानी रईपुर म होय विरोध-प्रदर्सन म पार्टी के बड़का नेता बृजमोहन अग्रवाल, राजेश मूणत समेत आने पदाधिकारी सामिल होईन। उहें, राजनांदगांव म भाजपा के राष्ट्रीय उपाध्यक्ष डॉक्टर रमन सिंह के अगुवई म जेल भरो आंदोलन करे गीस। ए बेरा म ओमन किहीन कि प्रदेसभर म पार्टी कार्यकर्ता सरकार के फइसला के खिलाफ प्रदर्सन करत हे। अइसने, नेता प्रतिपक्ष धरमलाल कौशिक के अगुवई म बिलासपुर म धरना-प्रदर्शन करे गीस। नेहरू चउक ले प्रदर्सन करइया मन ह कलेक्ट्रेट के घेराव करे बर निकलीन, तभे पुलिस ह ओमन ल रोक लीन। कांकेर म सांसद मोहन मंडावी के मौजूदगी म जिला के आने-आने जघा ले पहुंचे भाजपा पदाधिकारी अउ कार्यकर्ता मन ह गिरफ्तारी दीन।
दुरूग अउ भिलई म भाजपा कार्यकर्ता मन ह मानस भवन तीर आंदोलन करीन। सांसद विजय बघेल के अगुवई म पार्टी के बड़का नेता अउ कार्यकर्ता मन ह गिरफ्तारी दीन। अइसने, कोंडागांव जिला म प्रदेस भाजपा उपाध्यक्ष लता उसेंडी के अगुवई म पार्टी कार्यकर्ता मन ह आंदोलन करीन।
रायगढ़ म भाजपा के जेल भरो आंदोलन म साढ़े तीन सौ ले जादा कार्यकर्ता मन ह गिरफ्तारी दीन। उहें, धमतरी म विधायक अजय चंद्राकर के संग कुरूद, मगरलोड, नगरी अउ भखारा ब्लॉक के कार्यकर्ता मन ह प्रदर्सन करत फटफटी रैली निकालीन।
बीजापुर जिला म पूर्व मंत्री महेश गागड़ा के अगुवई म प्रदर्सन होईस। इहां पुलिस अउ कार्यकर्ता के बीच झड़प होय के समाचार मिले हे। उहेंं जांजगीर-चांपा, मुंगेली अउ महासमुंद जिला म घलो आज भाजपा कोति ले जेल भरो आंदोलन म धरना-प्रदर्सन करे गीस।
गेहूं-खरीदी
केंद्र सरकार ह गहूं बिसाय के तारीख ल इकतीस मई तक बढ़ा देहे। राज्य अउ केन्द्रसासित प्रदेस ले मई महीना के आखिर तक गहूं बिसाय जाही। केन्द्रीय उपभोक्ता कार्य खाद्य अउ सार्वजनिक वितरण मंत्रालय ह भारतीय खाद्य निगम ल घलो केन्द्रीय पुल म गहूं बिसाय के काम जारी राखे के निरदेस दीन हे। केन्द्र सरकार ह ऋण सुभीता के सरत के संग पड़ोसी अउ खाद्यान्न के कमी वाले देस ल छोड़ के गहूं के निर्यात म प्रतिबंध लगाय के फइसला करे हे।
पाईप बम-बरामद
सुकमा जिला म पोलमपल्ली थाना क्षेत्र के अतुलपारा तीर सुरक्षा बल ह पाईप बम बरामद करे हे। जिला के पुलिस अधीक्षक सुनील शर्मा ह बतईन कि रोड ओपनिंग बर निकले सीआरपीएफ अउ डीआरजी के जवान मन ह एल्मागुड़ा मिनपा के बीच ए विस्फोटक ल बरामद करीन हे। माओवादी मन ह सुरक्षा बल ल निसाना बनाय बर ए विस्फोटक लगाय रिहीन। जवान मन ह विस्फोटक ल मउकाच म निष्क्रिय कर दीन।
विश्व डेंगू दिवस
आज विश्व डेंगू दिवस हरय। ए बेरा म छत्तीसगढ़ समेत देसभर म डेंगू ले बचाव बर कतकोन जन-जागरूकता अभियान चलाय जात हे। रोग नियंत्रण कार्यक्रम के राज्य नोडल अधिकारी डॉक्टर सुभाष मिश्रा ह बतईन कि डेंगू एडीज नामक मच्छर के काटे ले होथे अउ ए मच्छर जिहां पानी जमा होथे, उहां पनथे। ओमन लोगन ले अपील करीन कि डेंगू ले बचाव बर कूलर, टंकी अउ आने जगह के पानी ल हफ्ता के हफ्ता साफ करना चाही।
अमृत महोत्सव-प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी म आज के प्रश्न हे –
ओ क्रांतिकारी के नाव बतावव, जउन मन अंडमान निकोबार द्वीप के सैल्यूलर जेल म कारावास के बेरा ‘‘बंदी जीवन‘‘ किताब के रचना करे रिहीन।
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
भालू हमला-ग्रामीण मौत
मुंगेली जिला के अचानकमार टाईगर रिजर्व के कोटा बफर क्षेत्र म तेंदूपत्ता सकेले बर गे एक झिन गांव के मनखे उपर भालू हमला कर दीस, जेमा मनखे के मउत होगे। मउत होय मनखे बैगा जनजाति के बताय जात हे।
उहें, जशपुर जिला के बादलखोल अभ्यारण्य के नारायणपुर रेंज के कलिया गांव म भालू के हमला ले आज दू झिन मनखे घायल होगे, जिखर इलाज अस्पताल म होवत हे। बताय जात हे कि ए दूनों मनखे जंगल ले लहुटत रिहीन। इही बेरा भालू ह हमला कर दीस।
हादसा
बेमेतरा जिला के गुनरबोड़ गांव तीर दू ठन टरक के बीच भिंड़त होय ले दूनों टरक ड्राईवर के मउत होगे। उहें, परिचालक रूप गंभीर रूप ले घायल होगे हे।
उहें, रायगढ़ जिला म खरसिया क्षेत्र के महका गांव के तरिया म आज नहाय के बेरा एके परिवार के दू झिन लइका मनके बुढ़े ले मउत होगे। दूनों संग भाई रिहीन। खबर के मुताबिक दस अउ बारह बछर के दूनों लइका नहाय बर पंखतियापार तरिया गे रिहीन। नहात बेरा गहराई म जाय ले ए हादसा होगे।
किसान स्कूल
जैविक खेती अउ नवाचार ल बढ़ावा दे बर राज्य के पहिली किसान स्कूल जांजगीर-चांपा जिला के बहेराडीह गांव म खोले जात हे। विधानसभा अध्यक्ष डॉक्टर चरणदास महंत बाईस मई के ए स्कूल के सुभारंभ करही। जिला के जैविक गांव बेहराडीह के एक कृषक दीनदयाल यादव ह ए स्कूल के स्थापना करे हे। ओमन बतईन कि ए स्कूल म आने-आने राज्य के नवाचारी, प्रगतिसील किसान, नवा किसान मन ल किसानी के क्षेत्र ले जु़ड़े आने-आने बिसय के जानकारी दीहीं। सरकार के मदद ले किसान मन ल फसल उत्पादन ले जुड़े प्रायोगिक शिक्षा दे जाही।
बुद्ध पूर्णिमा
आज बुद्ध पूर्णिमा हरय। विश्वभर म ए दिन बौद्ध धर्म के मनइया मन बर बिसेस महत्ता के हवय। उप राष्ट्रपति एम. वेकैंया नायडू अउ प्रधानमंत्री नरेन्द्र मोदी ह ए मउका अपन सुभकामना संदेस म किहीन कि बुद्ध पूर्णिमा हमन ल भगवान बुद्ध के सिद्धांत ल सुरता करे अउ पूरा करे के मउका देथे। ओमन किहीन कि भगवान बुद्ध के संदेस ले धरती म सांति अउ भाईचारा के भावना बाढ़ही।
ऐति, छत्तीसगढ़ के मुख्यमंत्री भूपेश बघेल ह बुद्ध पूर्णिमा म बौद्ध धरम के मनइया अउ प्रदेसवासी मन ल सुभकामना दीन हे।
माशिमं-काउंसलिंग
छत्तीसगढ़ माध्यमिक शिक्षा मंडल कोति ले दसवीं अउ बारहवीं के परीक्षा पास करइया पढ़ईया लइका मनके कैरियर ले जुड़े जानकारी अउ आने समस्या ल सुलझाय बर काउंसलिंग करे जात हे। एखर बर मंडल कोति ले टोल फ्री नंबर- एक-आठ शून्य-शून्य दू तीन-तीन चार तीन छह तीन जारी करे गेहे, जेमा विद्यार्थी सिक्षक अउ अभिभावक तेईस मई तक बिहनिया साढ़े दस बजे ले संझा पांच बजे तक गोठबात करत सकत हे।
संक्षिप्त समाचार
– रईपुर जिला रोजगार अउ स्व-रोजगार मार्गदर्शन केन्द्र कोति ले स्थानीय सिक्षित बेरोजगार युवक मन ल निजी क्षेत्र म रोजगार के मउका देवाय बर काली सत्रह मई के प्लेसमेंट कैम्प लगाय जाही।