भाजपा जेल भरो आदोंलन
भारतीय जनता पार्टी के प्रदेश इकाई ह काली सोला मई ले जेल भरो आंदोलन के शुरूआत करे ल जात हे। भाजपा अध्यक्ष विष्णुदेव साय ह कीहिन कि राज्य सरकार जनता ले अभिव्यक्ति के आजादी ल झटकना चाहत हे। एखरे सेती प्रदेश म धरना-प्रदर्शन, अांदोलन खातिर नवा नियम बनाय गेहे। ओमन कीहिन कि भाजपा के कार्यकर्ता काली सोला मई के सबो जिला मन म नवा नियम के खिलाफ जेल भरो आंदोलन करही।
एति जेल भरो आंदोलन के चलत राजधानी रायपुर म भाजपा नेता अउ कार्यकर्ता मन तेलीबांधा तरिया, आजाद चौक, फाफाडी चौक अउ कालीबाड़ी चौक ले एक संग मुख्यमंत्री निवास के घेराव करे बर निकलही।
उंहें राजनांदगांव जिला म भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह आंदोलन के अगवई करही। बिलासपुर म नेता प्रतिपक्ष धरमलाल कौशिक अउ पूर्व मंत्री अमर अग्रवाल के अगवई म आंदोलन करे जाही। उंहें दुर्ग जिला म राज्यसभा सांसद सरोज पांडेय, सांसद विजय बघेल अउ पूर्व मंत्री प्रेमप्रकाश पांडेय जेल भरो आंदोलन के पगरैती करहीं।
हाईकोर्ट न्यायाधीश नियुक्ति
केंद्र सरकार ह वरिष्ठ अधिवक्ता सचिन सिंह राजपूत ल छत्तीसगढ़ उच्च न्यायालय के अतिरिक्त न्यायाधीश के रूप म नियुक्ति के अधिसूचना जारी करे हे। उंखर ए नियुक्ति ह पदभार झोंके के तारीख ले दू बछर तक के बेरा बर लागू रीही।
सर्वोच्च न्यायालय कालेजियम ह बीते एक सितंबर दू हजार एक्कइस के होय अपन बइठका म सीनियर वकील सचिन सिंह राजपूत ल छत्तीसगढ़ उच्च न्यायालय के अतिरिक्त न्यायाधीश के रूप म नियुक्त करे के अनुसंसा करे रीहिस। एखर बाद ग्यारा नवंबर दू हजार एक्कइस के होय बइठका म कालेजियम ह अपन आगू के अनुसंसा ल दोहराय रीहिस। नया नियुक्ति के संगे छत्तीसगढ़ हाइकोर्ट म अब तेरा झिन न्यायाधीश होगे हे।
राजीव कुमार पदभार
राजीव कुमार ह आज भारत के पच्चीसवां मुख्य निर्वाचन आयुक्त के पदभार झोंकीन। ए मउका म ओमन कीहिन कि निर्वाचन आयोग ह संविधान के मुताबिक कोनो भी बड़का सुधार विचार विमर्श अउ जनमत तियार करे के लोकतांत्रिक अउ समय के कसौटी म खरा उतरे के तरीका के पालन करय।
श्री कुमार ह यहू कीहिन कि सुघ्घर चुनाव प्रबंधन म पारदर्शिता अउ मतदान सेवा म सुगमता लाये बर प्रक्रिया ल सरल बनाये खातिर टेक्नॉलाजी ल मुखरूप ले इस्तेमाल करे जाही।
बुद्ध पूर्णिमा
काली बुद्ध पूर्णिमा हरय। ए मउका म राज्यपाल अनुसुईया उइके अउ मुख्यमंत्री भूपेश बघेल ह प्रदेशवासी मन ल शुभकामना दीन। राज्यपाल ह अपन संदेश म कीहिन हे कि भगवान बुद्ध ह प्रेम, करूणा अउ अहिंसा के भावना ल सर्वोत्तम मानत जम्मों विश्व ल नवा रद्दा दिखाय हे।
मुख्यमंत्री ह अपन शुभकामना संदेश म कीहिन कि भगवान बुद्ध ह लोगन मन ल अहिंसा, समानता अउ विश्व बंधुत्व के आरो दीन। उंखर शिक्षा ल विदेश म घलो लोगन मन अपनइन। संगे लाखों अनुयायी उंखर देखाय रद्दा म रेंगके देश दुनिया ल सांति के आरो देवत हे।
कोविड अनुदान सहायता
प्रदेश के कई ठन जिला मन म कोरोना संक्रमण ले होय मउत के मामला म उंखर परवार वाले ल पइसा-कौड़ी के सहायता देवाय बर राज्य आपदा मोचन निधि ले ग्यारा करोड़ तिरानबे लाख रूपिया के राशि के आवंटन करे गेहे। राजस्व अउ आपदा प्रबंधन विभाग ह सबो जिला कलेक्टर मन ल अनुदान सहायता राशि के भुगतान आश्रित मनके बैंक खाता म डीबीटी के माध्यम ले करे के निर्देश देहे।
इंहा ए बतादन कि केंद्र सरकार डहार ले जारी दिशा-निर्देश मुताबिक कोरोना संक्रमण ले मउत होय मनखे के आश्रित ल पचास हजार रूपिया के सहायता राशि दे जात हे।
थॉमस कप विजेता
भारत ह थॉमस कप जीतके इतिहास रच देहे। बैंकॉक म आज फाइनल म भारत ह चौदह बेर के चैंपियन इंडोनेशिया ल तीन-शून्य ले हरा दीस। थॉमस कप प्रतियोगिता म भारत के ये पहिली स्वर्ण पदक हरय। किदांबी श्रीकांत, लक्ष्य सेन अउ चिराग शेट्टी अउ सात्विकसाइराज रंकीरेड्डी के जोड़ी ह जोरदरहा प्रदर्शन करत अपन-अपन मैच जीतिन।
प्रधानमंत्री नरेंद्र मोदी ह भारतीय टीम ल ये सुघ्घर जीत बर बधाई दीन हे। अपन ट्वीट संदेश म श्री मोदी ह कीहिन हे कि भारत ह थॉमस कप जीतके पूरा देश ल खुशियाली देहे।
केंद्रीय खेल मंत्री अनुराग सिंह ठाकुर ह घलो थॉमस कप जीते के सेती भारतीय टीम ल बधाई देहे। अपन ट्वीट संदेश म श्री ठाकुर ह कीहिन कि मलेशिया, डेनमार्क अउ इंडोनेशिया म सरलग जीत के बाद ये असाधारण उपलब्धि ह राष्ट्र बर बड़का सम्मान के बात हे। खेलमंत्री ए उपलब्धि बर भारतीय बैडमिंटन टीम ल एक करोड़ रूपिया नकद पुरस्कार देके घोषणा घलो करीन।
रेलवे पुरस्कार
रायपुर रेल मंडल के दू झिन अधिकारी के चयन राष्ट्रीय रेलवे पुरस्कार बरहोय हे। अपर मंडल रेल प्रबंधक परिचालन लोकेश विश्नोई अउ मंडल संकेत अउ दूरसंचार के अभियंता के.सी. प्रियदर्शी ल सड़सठवां राष्ट्रीय रेलवे पुरस्कार अवइया अठाईस मई के भुवनेश्वर म राष्ट्रीय पुरस्कार समारोह म दे जाही। मंडल रेल प्रबंधक श्यामसुंदर गुप्ता ह ए उपलब्धि बर दूनो अधिकारी मन ल बधाई दीन हे।
खो-खो चैंपियनशिप
दक्षिण पूर्व मध्य रेलवे स्पोर्ट्स एसोसिएशन बिलासपुर डहार ले राखे गे सोलहवां अखिल भारतीय अंतर रेलवे खो-खो चैंपियनशिप के काली समापन होइस। नॉर्थ ईस्ट इंस्टीट्यूट परिसर म होय ए चैंपियनशिप म मध्य रेलवे के टीम ह पहलइया स्थान पाय हे। उंहें पश्चिम रेलवे के टीम ह दूसर अउ दक्षिण पूर्व मध्य रेलवे के टीम ह तीसर स्थान म रीहिस। विजेता टीम मन ल दक्षिण पूर्व मध्य रेलवे के महाप्रबंधक आलोक कुमार ह सम्मानित करीन।
आगजनी
बलौदाबजार-भाटापारा जिला के कसडोल म आज बीहनिया वेल्डिंग के दुकान म आगी लगे ले एक झिन पुलिस कांस्टेबल समेत समेत तीन झिन मनखे झुलस गीन। गंभीर रूप ले झुलसे कांस्टेबल ल उपचार बर रायपुर रेफर करे गेहे।
मिले जानकारी मुताबिक आगी लगे के सूचना मिलतेच कसडोल पुलिस अउ दमकल विभाग ह मउका म पहुंचे रीहिस। तभे विस्फोट होय ले कांस्टेबल अउ दमकल कर्मी झुलस गीन। पुलिस ह आगी लगे के कारण के जांच करत हे।
माओवादी डंप
राजनांदगांव पुलिस ह दू किलो वजनी क्लेमोर माइंस के संग विस्फोटक जीनिस बरामद करे हे। मिले खबर के मुताबिक पुलिस ल नकसान पहुंचाय बर माओवादी मन ह बागनदी अउ बोरतलाब क्षेत्र के मुंजाल डोंगरी के जंगल म क्लेमोर माइंस अउ आने विस्फोटक लुकाके रखे रीहिस, जेला पुलिस दल ह तलाशी के बेरा बरामद करे हे।
चिटफंड कंपनी गिरप्तार
राजनांदगांव पुलिस ह ठगी के मामला म दू झिन संचालक मन ल राजस्थान ले गिरप्तार करीन। पुलिस ले मिले जानकारी के मुताबिक मुकेश मोदी अउ राहुल मोदी उपर जिला म करीबन तीन सौ पैंसठ झिन मनखे मनले पांच करोड़ रूपिया ले जादा के पइसा-कौड़ी के ठगी करे के आरोप हे। ए दूनो आरोपी गुजरात सीमा तीर सिरोह जिला म लुकाय रीहिन। एखर मनके खिलाफ राजस्थान के आने आने थाना मन म एक सौ पचास ले जादा मामला दरज हे।
मौसम
प्रदेश म अवइया चौबीस घंटा के दउरान एक दू जगा म हल्का बारिस या फेर गरज-चमक के संग आंधी चले के चेतावनी घलो देहे ।
इही बीच जगदलपुर के बकावंड क्षेत्र के टलनार गांव म तेज आंधी केसेती कई ठिन घर दुआर ल नकसान होय के खबर हे ।
ओति मुंगेली जिला म काली आय तूफान ले घुंडुकापा गांव के करीबन पच्चीस ठिन घर ल नकसान पहुंचे हे।