प्रधानमंत्री-मीडिया भूमिका
प्रधानमंत्री नरेन्द्र मोदी ह किहीन हे कि मीडिया ह लोगन मनके जिनगी बदले म बड़का भूमिका निभा सकत हे। ओमन स्वच्छ भारत मिशन उपर गोठबात करत बतईन कि जनसंचार माध्यम मन ले ए जरूरी मिशन ल बड़ गंभीरता ले गीस हवय। ओमन किहीन कि योग, फिटनेस अउ बेटी बचाओ-बेटी पढ़ाओ जइसन जन कल्याणकारी योजना मन ल लोकप्रिय बनाय म मीडिया के एक बड़का भूमिका हवय। प्रधानमंत्री ह काली मलयालम दैनिक ‘मातृभूमि‘ के सताब्दी बछर समारोह के वीडियो कान्फ्रेंंसिंग के जरिया एखर उद्घाटन करीन। श्री मोदी ह नवा भारत के निर्माण अभियान म मीडिया के सकारात्मक प्रभाव के बारे म बड़ विस्तार ले जानकारी दीन।
प्रधानमंत्री ग्राम सड़क योजना
प्रधानमंत्री ग्राम सड़क योजना के निर्माणाधीन कार्य मनके गुणवत्ता परीक्षण खातिर राष्ट्रीय गुणवत्ता समीक्षक मन 21 ले 26 मार्च तक छत्तीसगढ़ के दौरा करही। ए दउरान ओमन 8 जिला मन म जाके प्रधानमंत्री ग्राम सड़क योजना के तहत बनत सड़क मनके परीक्षण करही।
पोषण पखवाड़ा
केन्द्र सरकार के निरदेस म देसभर म 21 मार्च ले 04 अप्रैल तक पोषण पखवाड़ा के आयोजन करे जाही। पोषण पखवाड़ा के तहत सुपोषण चौपाल, पोषण पंचायत बैठक, साइकिल रैली, प्रभातफेरी, वेबीनार, स्कूल अउ समुदाय उपर आने-आने गतिविधि करवाय जाही। उहें, स्व-सहायता समूह, युवा समूह अउ कृषक समूह मनके बइठका घलो होही। एखर अलावा हाट-बाजार, व्यंजन प्रदर्शनी, गृहभेंट के जरिया ले सलाह-परामर्श, ग्रामीण-शहरी स्वास्थ्य स्वच्छता अउ पोषण दिवस जइसन कारीकरम घलो आयोजित करे जाही। पोषण पखवाड़ा के दउरान आंगनबाड़ी केन्द्र स्तर म लक्षित हितग्राही मन ल मिलत सेवा, लइका मनके वजन अउ लंबाई-ऊंचाई के जानकारी, पोषण ट्रेकर ऐप म प्रविष्टि करे के निरदेस दे गे हवय।
खैरागढ़ उपचुनाव
खैरागढ़ उपचुनाव खातिर ए बेरा नामांकन पत्र भरे के प्रक्रिया चलत हवय। नामांकन पत्र 24 मार्च तक भरे जा सकही। उहें, 25 मार्च के नामांकन पत्र मनके जांच करे जाही। 28 मार्च तक अभ्यर्थी मन अपन नाव ल वापस ले सकथे।
उपचुनाव के तियारी ल लेके राजनांदगांव कलेक्टर, जिला निर्वाचन अधिकारी तारन प्रकाश सिन्हा अउ पुलिस अधीक्षक संतोष सिंह ह आज स्थैतिक निगरानी दल, चेक पोस्ट अउ निर्वाचन खातिर बनाय गे मतदान केन्द्र मनके निरीक्षण करीन। ए दउरान ओमन निर्वाचन क्षेत्र बढ़ईटोला, पेण्ड्रीकला अउ भरदाकला मतदान केन्द्र म पहुंच के उहां जम्मों जरूरी बेवस्था कराय के निरदेस दीन। ओमन चेक पोस्ट म अवई-जवई करइया वाहन मनके जांच अउ उंखर वीडियोग्राफी करे के निरदेस घलो दे हवय।
जानबा के मुताबिक खैरागढ़ उपचुनाव म 12 अप्रैल के मतदान अउ मतणगना 16 अप्रैल के होही। खैरागढ़ विधानसभा सीट जनता कांग्रेस छत्तीसगढ़ के विधायक देवव्रत सिंह के निधन के बाद ले खाली हवय।
खेल-समाचार
ग्यारहवीं सीनियर एशियन कुरास चैंपियनशिप म भाग ले बर छत्तीसगढ़ के दू झन खिलाड़ी समेत एक झन कोच के चयन होय हे। कुरास एसोसिएशन ऑफ छत्तीसगढ़ के अध्यक्ष रवि वर्मा ह बतईन कि ए चैंपियनशिप खातिर एसोसिएशन के परिचय मिश्रा ल भारतीय टीम के कोच नियुक्त करे गे हवय। संगेसंग भिलाई के खिलाड़ी राहुल कुमार अउ दिव्या कुमारी ल भारतीय टीम म सामिल करे गे हवय। राहुल कुमार के चयन 73 किलोग्राम म अउ दिव्या कुमारी के चयन 57 किलोग्राम वर्ग म होय हवय। ए स्पर्धा तजिकिस्तान म 17 ले 21 मार्च तक आयोजित करे जावत हे।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा 6 बजके 30 मिनट ले 6 बजके 35 मिनट तक जिला के चिट्ठी कारीकरम के प्रसारण करे जाही। ए कारीकरम आकाशवाणी के रायपुर केंद्र डहार ले प्रसारित होही, जेला जम्मों केंद्र मन ह एके संघरा रिले करही। ए बखत के अंक म सुकमा जिला के गतिविधि के बारे म जानकारी दे जाही।
हादसा
छत्तीसगढ़ अउ मध्यप्रदेश के सीमा म मधुटिकरा के तीर होय सड़क हादसा म बड़का पत्रकार उपेन्द्र दुबे के परिवार के तीन झन सदस्य मनके मउत होगीस। उहें, पत्रकार दुबे गंभीर रूप ले घायल होगे हवय।
मिले जानबा के मुताबिक ए जम्मों मन ह कार म अपन परिवार के कारीकरम म सामिल होय बर सूरजपुर ले वाराणसी जावत रिहीन। इही दउरान आज बिहनिया उंखर कार छत्तीसगढ़ अउ मध्यप्रदेश के सीमा म मधुटिकरा के पास अनियंत्रित होके पेड़ ले टकरा गीस। ए हादसा म पत्रकार उपेन्द्र दुबे के मां, उंखर पत्नी अउ बेटा के मउकाच म मउत होगीस। गंभीर रूप ले घायल पत्रकार दुबे ल अंबिकापुर के निजी अस्पताल म भर्ती कराय गे हवय।
मुख्यमंत्री भूपेश बघेल ह ए हादसा म सूरजपुर के बड़का पत्रकार उपेन्द्र दुबे के परिवार के तीन झन सदस्य मनके होईस अकाल मृत्यु म गहरा दुख प्रकट करीन हे। ओमन हादसा म घायल उपेन्द्र दुबे के इलाज खातिर सरगुजा जिला प्रसासन ल बढ़िया सुविधा देवाय के निरदेस दीन हे।
ऐति, महासमुंद जिला म कोतवाली थाना क्षेत्र के बरौंडाबाजार तालाब म नहाय बर गिन तीन झन युवक मन ह डूब गे रिहीस। एमा ले एक झन युवक के सव ल बरामद कर ले गे हवय। उहें, दू झन आने युवक मन ल गांव के रहइया मनके मदद ले बचा ले गीस, जउन मन ल अस्पताल म भर्ती कराय गे हवय।
कोरोना टीका/समाचार
राष्ट्रीय कोविड टीकाकरण अभियान म अब तक देस म 181 करोड़ ले जादा टीका लगाय जा चुके हे। केन्द्रीय स्वास्थ्य मंत्रालय ह किहीन हे कि काली 5 लाख 84 हजार ले जादा टीका लगाय गीस।
ऐति, छत्तीसगढ़ म कोविड टीकाकरण अभियान घलो जोरदरहा चलत हवय। अब तक प्रदेस म 3 करोड़ 88 लाख 15 हजार ले जादा कोविड के टीका लगाय जा चुके हे।
इही बीच, प्रदेस म कोरोना संक्रमण के मामला म सरलग गिरावट आवत हे अउ औसत पॉजिटीविटी दर घटके शून्य दशमलव छै-छै प्रतिसत म आ गे हवय। काली प्रदेस म 1 हजार 827 सैंपल मनके जांच करे गीस, जेमा 12 मनखे मन कोरोना संक्रमित पाय गीन। उहें, प्रदेश के 21 ठिन जिला मन म काली कोरोना संक्रमण के एको ठिन नवा मामला सामने नइ आय हे। अभी के बेरा म 175 मरीज मनके इलाज प्रदेस के आने-आने अस्पताल अउ होम आइसोलेशन म चलत हवय।
अस्पताल-प्रमाण पत्र
सुघ्घर स्वास्थ्य सेवा अउ मरीज मन ल इलाज देवाय खातिर छत्तीसगढ़ के 6 ठिन सरकारी अस्पताल ल केन्द्रीय स्वास्थ्य मंत्रालय डहार ले राष्ट्रीय गुणवत्ता आश्वासन मानक प्रमाण पत्र दे गे हवय। एमा जशपुर जिला के प्राथमिक स्वास्थ्य केन्द्र भेलवा अउ फरसाबहार, रईपुर जिला के तीन सहरी प्राथमिक स्वास्थ्य केन्द्र- चंगोराभाटा, उरला अउ भनपुरी, कोरबा जिला के ढोढीपारा अउ दुरूग जिला के चरौदा सहरी प्राथमिक केन्द्र सामिल हे।
बातों-बातों-में
सुनइया मन ल बतादन कि ए बेरा आजादी के अमृत महोत्सव मनाय जावत हे। एमा आजादी के आंदोलन अउ उंखर जाने-माने नेता के संगेसंग गुमनाम नायक मनके बारे म लोगन मन ल जानकारी दे जावत हे। इही कड़ी म छत्तीसगढ़ म घलो संस्कृति विभाग डहार ले आने-आने कारीकरम अउ प्रतियोगिता आयोजित करे जावत हे। ए बारे म अउ जादा जाने बर आकाशवाणी समाचार ह संस्कृति विभाग के संचालक विवेक आचार्य ले गोठबात करीन।
ए बाताचीत के प्रसारण समसामयिक विषय म आधारित हमर साप्ताहिक कारीकरम ‘‘बातों-बातों-में‘‘ म काली बीस मार्च, रविवार के बिहनिया साढ़े नौ बजे आकाशवाणी केन्द्र रईपुर ले प्रसारित होही। जेला छत्तीसगढ़ के जम्मां आकाशवाणी केन्द्र मन ह एके संघरा रिले करही।