केन्द्र सरकार ह जम्मों राज्य अउ केन्द्रसासित प्रदेस मन ल जीनोम अनुक्रम के प्रक्रिया तेज करे अउ निगरानी बढ़ाय के संगेसंग कोविड के स्थिति म पूरा नजर राखे के परामर्स देहे। सरकार ह आर्थिक अउ सामाजिक गतिविधि मन ल फेर सुरू करत समय पूरा तरीका ले सतर्क रेहे अउ ढिलाई नइ बरते बर केहे हे। ए संबंध म केन्द्रीय स्वास्थ्य सचिव राजेश भूषण ह जम्मों राज्य मनके मुख्य सचिव अउ केन्द्रसासित प्रदेस के प्रसासक मन ल पत्र लिखे हे। ओमन किहीन कि दक्षिण पूर्व एसिसा अउ यूरोप के कुछु देस मन म कोरोना संक्रमण फेर बाढ़त हवय। श्री भूषण ए बात म जोर दीन कि पांच स्तरीय रणनीति जांच, निगरानी, उपचार टीकाकरण अउ कोविड अनुकूल व्यवहार के पालन म निरंतर ध्यान देना चाही। स्वास्थ्य सचिव ह किहीन कि राज्य मन ल यहू सुनिश्चित करना चाही कि जम्मों पात्र लोगन मन ल कोविड ले बचाव के टीका लगवाय खातिर प्रेरित करे जाय।
खैरागढ़ उपचुनाव
खैरागढ़ उपचुनाव बर काली ले नामांकन पत्र भरे के प्रक्रिया सुरू होगे हवय। नामांकन पत्र 24 मार्च तक भरे जा सकही। उहें, 25 मार्च के नामांकन पत्र मनके जांच करे जाही। 28 मार्च तक अभ्यर्थी मन अपन नाव ल वापस ले सकथे। ए उपचुनाव खातिर 12 अप्रैल के मतदान होही अउ मतणगना 16 अप्रैल के होही।
जानबा के मुताबिक खैरागढ़ विधानसभा सीट जनता कांग्रेस छत्तीसगढ़ के विधायक देवव्रत सिंह के निधन के बाद ले खाली हवय।
उपचुनाव के तियारी ल लेके जिला निर्वाचन अधिकारी तारन प्रकाश सिन्हा ह काली खैरागढ़ म बी.एल.ओ. मनके बइठका लीन, जेमा ओमन किहीन कि मतदान केन्द्र म मतदाता मन खातिर जम्मों बेवस्था होना चाही। जम्मों बी.एल.ओ. मन मतदान केन्द्र के निरीक्षण कर जरूरी सुविधा उपलब्ध करावंय। ओमन किहीन कि मतदाता मनके सुविधा खातिर हेल्पडेस्क घलो बनाय जाय, जेखर ले मतदाता मन ल जरूरी सुविधा मिल सकय।
होली-01
रंग, प्रेम अउ खुसी के तिहार होरी आज प्रदेस के जम्मों जघा म पारंपरिक तरीका ले बड़ उछाह के संग मनाय जावत हे। पूरा प्रदेस उत्साह अउ उल्लास के रंग म सरोबार हवय। दिनभर लोगन मन ह रंग के मस्ती म डूबे रिहीन। जगह-जगह नगाड़ा के थाप अउ फाग गीत सुनाई देवत हे। सहर हो या गांव, जम्मों जगह बिहनिया ले होरी के टोली मन घूम-घूम के एक-दूसर ल रंग अउ गुलाल लगाके बधाई देवत हवय। पाछु दू बछर के तुलना म ए घांव कोरोना संक्रमण बहुत कम होय के सेती होरी परब ल लेके लोगन मन म जादा उत्साह देखे जावतत हे। आज बिहनिया लइका अउ युवा मन जम्मों चउक-चउराहा म पिचकारी लेके अवइया-जवइया मन उपर रंग ले बौछार कर होरी के आनंद लेवत रिहीन।
उहें, आने-आने सामाजिक संस्था मन ह पर्यावरण जागरूकता के चलत मनखे मन ल सूखा होरी खेले बर प्रेरित करीन। ए संस्था के कार्यकर्ता अउ पदाधिकारी मन गुलाल लगाके एक-दूसर ल होरी के बधाई दीन।
छत्तीसगढ़ म बस्तर ले सरगुजा तक होरी के आने-आने तरीका के रंग नजर आवत हे। बस्तर म ए दारी हमेसा के जइसन होली म जनजातीय संस्कृति अउ परंपरा मनके आने-आने झलक देखे ल मिलीस। बस्तर म होरी के सुरूवात दंतेवाड़ा के फागुन मेला ले होथे। ए परंपरा के अनुसार सुद्ध माटी अउ पलास के फूल ले बने रंग ल दंतेश्वरी देवी अउ मेला म प्रतीकात्मक रूप ले आय बड़ अकन देवी-देवता ल चढ़ाय जाथे। ए मउका म सांकेतिक होरी बारे जाथे। उहें, फागुन मेला के दूसर दिन बस्तर के पहला होरी माड़पाल म बारे जाथे। प्रदेस म पुलिस प्रसासन डहार ले चउक-चउराहा मन म कड़ा निगरानी राखे गे रिहीस।
होली-02
होरी के मउका म राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह देसवासी मन ल बधाई दीन। राष्ट्रपति ह किहीन कि रंग के ए तिहार लोगन मनके जिनगी म आनंद अउ उल्लास लेके आथे। उपराष्ट्रपति ह किहीन कि होरी, सांति, समृद्धि अउ खुसहाली, प्रेम अउ भाईचारा के प्रतीक के तिहार हरय। उहें, प्रधानमंत्री ह कामना करतन किहीन कि होरी के रंग हरेक मनखे मनके जिनगी म उमंग अउ उल्लास लावय।
छत्तीसगढ़ के राज्यपाल अनसुईया उइके अउ मुख्यमंत्री भूपेश बघेल ह घलो आम लोगन मन ल रंग के तिहार होरी के हार्दिक बधाई अउ सुभकामना दीन।
ग्रीष्मकालीन अवकाश-गुणवत्ता सुधार
स्कूल सिक्षा विभाग डहार ले प्रदेस के विकासखंड मन म ग्रीष्मकालीन अवकाश के अवधि म कटौती के आधार म गुणवत्ता सुधार खातिर विशेष कारीकरम चलाय जाही। एखर क्रियान्वयन खातिर समग्र सिक्षा के प्रबंध संचालक नरेन्द्र दुग्गा ह जिला सिक्षा अधिकारी मन ल निरदेस दीन हे। ओमन किहीन हे कि स्कूल मन म ग्रीष्मकालीन अवकाश म कटौती कर लइका मनके पढ़ाई म होवत क्षति म कमी लाय सेती जम्मों विकासखंड ल कारीकरम इकाई मानत विकासखंड सिक्षा अधिकारी ल नेतृत्व दे जाय।
जिला सिक्षा अधिकारी ले केहे गेहे कि ए कारीकरम ल जिला अउ विकासखंड स्तर म बिसेस कार्यदल के गठन करके तुरते प्रभाव लागू करय। कारीकरम के प्रभाविता के आंकलन अवइया सत्र के सुरूवात म बाहिरी एजेंसी मनके जरिया करे जाही।
किशोर स्वास्थ्य सप्ताह
अंतर्राष्ट्रीय किशोर स्वास्थ्य सप्ताह बीस ले छब्बीस मार्च तक मनाय जाही। ए दउरान स्वास्थ्यकर्मी, नीति निर्धारक, प्रसासक, समाचार माध्यम, किशोर अउ उंखर समुदाय मन ल स्वास्थ्य संबंधी जानकारी उपलब्ध कराय जाही। ताकि ओमन अपन किशोर अवस्था ल सफल बनाय सकय। ए सप्ताह के बिसय हवय- ‘‘परिवर्तन‘‘। एखर उद्देश्य किशोर मन ल खुद उंखर मनके स्वास्थ्य अउ विकास के बारे म जागरूक करना अउ ए बारे म खुद के निर्णय लेय म मदद करना हवय।
मनरेगा श्रमिक सम्मान
केंद्रीय ग्रामीण विकास मंत्रालय ह आजादी के अमृत महोत्सव के तहत मनरेगा मजदूर ले स्वरोजगार तक के सफर तय करइया प्रोजेक्ट-‘उन्नति‘ के पचहत्तर झन हितग्राही मन ल 24 मार्च के नई दिल्ली म जाही। एमा प्रदेस के 6 श्रमिक घलो सामिल हवय।
इहा ए बतादन कि ए श्रमिक मन ल प्रोजेक्ट ‘उन्नति‘ के जरिया कौशल विकास के प्रसिक्षण देके स्वरोजगार बर तैयार करे गेहे। प्रदेस म ए सम्मान पवइया मन म धमतरी जिला के नीतू साहू अउ फूलवंती कंवर, गरियाबंद जिला के गीतांजली धु्रव अउ ओमेश्वरी कंवर, कोरिया जिला के कृष्ण कुमार अउ महासमुंद जिला के बिमल साव सामिल हवय।
संक्षिप्त समाचार
अउ अब थोरकुन समाचार सार म-
– महासमुंद जिला के रामपुर गांव के जंगल म चीतल के सिकार करे के आरोप म सोलह झन मनखे मन उपर मामला दरज करे गेहे। एमा ले नौ झन मनखे मन ल गिरफ्तार करे गे हवय। उहें, सात झन आरोपी मनके तलाश करे जावत हे।
अउ
– बिलासपुर जिला के तारबाहर थाना क्षेत्र के अंतर्गत रेलवे के स्टोर म आगी लग गे। ए आगजनी म करोड़ों रूपिया के एल्युमीनियम वायर जल गे। बताय जात हे कि होरी दहन के दिन रतिहा स्टोर म अचानक आगी लग गे, जउन देखते-देखत बाढ़ गे अउ उहां रखे एल्युमीनियम वायर के ठन बंडल जल गे।